1 Corinthians 7 - Yak'usda Ooghuni

Lhghu dilhtsꞌine huwun

¹ ꞋEt ꞌawet ndai la stsꞌo kꞌehguz-i, ꞌi ghun ꞌunohdutasnelh, dune tsꞌeke bulh ninta lheꞌustꞌi ꞌet hoonzoo.

² ꞋEt hoontsꞌi dune kꞌus tsꞌeke bulh lubeshi ꞌuhulhꞌen ꞌet whuchꞌa ꞌet huwa dune ꞌilhone hinli whe didutchꞌoh buꞌat hóleꞌ ꞌinkꞌez tsꞌekoo cha dichꞌoh buki hóleꞌ hubaꞌ hoontꞌoh.

³ ꞋEt dune duꞌat tsꞌihꞌun unꞌa yukꞌeootsiꞌ yughusda huwa ꞌinkꞌez tsꞌeke cha ꞌet duki whuz unꞌa za yukꞌeootsiꞌ hubaꞌ hoontꞌoh.

⁴ Tsꞌeke ooki hoonli-un, ꞌen duyustꞌe yumoodih lhiloh, ooki ꞌen za yumoodih unli. ꞋInkꞌez whuz unꞌa za dune ooꞌat hoonli-un, ꞌen duyustꞌe yumoodih lhiloh, ooꞌat ꞌen za yumoodih unli.

⁵ ꞋAw lhchꞌoh oohkeꞌ huba lheꞌhootꞌoh. ꞋEt hoontsꞌi ꞌatsulyaz whe soo hootahni ꞌinkꞌez tenadutihdli hukwaꞌ nuhzun de, ꞌet nanulhtꞌo soo lhgha hoonuhtꞌiꞌ de, ꞌet sooꞌ whutatꞌelh. ꞋEt hukwꞌelhꞌaz doo cha za lhkꞌeoohsiꞌ ꞌinkꞌez lhzih nenaoohtꞌas, doo ka la ꞌaw nohyustꞌe ooghu tihle huba soo lheꞌahtꞌoh de, ꞌet Satan nohootalhdzih.

⁶ ꞋAw ꞌoh te neꞌoohtꞌen ha iloh ꞌunohdusni. ꞋAntsꞌi ꞌet whuz unꞌa ꞌet dohtꞌen hukwaꞌ nuhzun de, ꞌet huwa dusni.

⁷ ꞋEt tsꞌiyanne dune si skꞌunꞌa za nducha ꞌuhintꞌoh ꞌet whuz unꞌa hukwaꞌ nuszun. ꞋEt hoontsꞌi Yakꞌusda tsꞌiyanne ꞌilhoghun hinli whe ndai la huwa yuꞌaih-i, ꞌi bugha ininꞌai. Tsꞌiyawh ꞌilhoghun hinli lhendowh didowh-i, ꞌi bugha ininꞌai.

⁸ ꞋEt mbene la soh núdilhne ꞌinkꞌez tsandilhne cha, ꞌenne diz unꞌa ꞌubudúsni, si skꞌunꞌa za ꞌuhintꞌoh de, ꞌet de buba hootazooꞌ.

⁹ ꞋEt hoontsꞌi ꞌaw ꞌoohududotun ꞌaitꞌoh de, lhgho dóltsꞌiꞌ. Kwun kꞌunꞌa lhtsꞌonintꞌi de, lhgho dilhtsꞌi de, ꞌet ꞌon nus sooꞌ hoontꞌoh.

Lhghu dilhtsꞌine ꞌaw lhchꞌa nahoodilh ꞌaitꞌoh

¹⁰ ꞋEt lhghuskene, ꞌaw si iloh dusni, neMoodihti ndi khuni yutulhuhizyeꞌ ꞌi ꞌuntꞌoh, ꞌaw tsꞌeke duki chꞌa naoojaꞌ junih.

¹¹ ꞋEt hoontsꞌi duki chꞌa nasja de, ꞌe ꞌaw ꞌuyoon ghu naoodaꞌ junih. Hukwaꞌ huninzun de, huhoontꞌiꞌ whe lhzih nenahootꞌas hubaꞌ hoontꞌoh. ꞋInkꞌez dune duꞌat ꞌún yutooneh junih.

¹² ꞋEt ꞌawet whulohne nohtoh, si nohdutasnelh, ꞌaw neMoodihti iloh ꞌutni. Mbe neulhutsin ꞌen ooꞌat ooba ꞌalha ꞌuhoontꞌoh-un lhiloh de, ꞌet hoontsꞌi duki ꞌilhiz ooleꞌ hizih oodaꞌ hukwaꞌ ninzun de, ꞌet de duꞌat ꞌún yutooneh huba lheꞌhootꞌoh.

¹³ ꞋInkꞌez tsꞌeke ooki ooba ꞌalha ꞌuhoontꞌoh-un lhiloh de, ꞌilhiz wheni yuzih tidalh hukwaꞌ ninzun de, ꞌet de duki ꞌún yutooneh junih.

¹⁴ ꞋEt ooki ooba ꞌalha ꞌuhoontꞌoh-un lhiloh, ooꞌat gha Yakꞌusda ba ꞌudun nelti whe ꞌuntꞌoh. ꞋEt whuz unꞌa ooꞌat ooba ꞌalha ꞌuhoontꞌoh-un lhiloh, ꞌet hoontsꞌi ooki ꞌen gha Yakꞌusda ba ꞌudun nelti whe ꞌuntꞌoh. ꞋEt whuz unꞌa ndulhúhootꞌoh de, buzkehke Yakꞌusda ba ꞌatsꞌun unꞌa ꞌuhutitꞌelh wheꞌ ꞌuhoontꞌoh. ꞋEt hoontsꞌi Yakꞌusda ba ꞌudun nelyane huzdliꞌ.

¹⁵ ꞋEt hoontsꞌi mbe la ooba ꞌalha ꞌuhoontꞌoh-un lhiloh whenája de, whute natoojaꞌ. ꞋEt whuz unꞌa nduhooja de, mbe la neulhutsin kꞌus neulhtus unline, ꞌaw lhtsꞌu nóhnoolhtꞌine hooloh hubaꞌ hoontꞌoh. ꞋEt hoontsꞌi nedzi doghel-i, ꞌi be ndi yun kꞌut uzdoltsꞌiꞌ, ꞌet huba Yakꞌusda ꞌutáhanéanla.

¹⁶ ꞋEt nohni nohgha tilah nohkike hudoojih. ꞋInkꞌez nohni nohgha tilah nohꞌatke hudoojih, ꞌinkaꞌ dusni.

Dantꞌohne ꞌahli whe Jesus Christ tsꞌu nálhyane suhliꞌ, ꞌet whuz unꞌa za oohtꞌeꞌ

¹⁷ ꞋEt ntsꞌenꞌa Yakꞌusda ba ꞌilhunaoosdilne bubeꞌ ꞌutꞌen kꞌoh buba ꞌuwhusdla, ꞌet nohni cha ꞌet whuz unꞌa nohba whutatꞌelh. ꞋEt ntsꞌo whudaꞌ Yakꞌusda nohba ꞌutahanohanla ꞌinkꞌez ntsꞌenꞌa la ndi yun kꞌut dolhtsꞌiꞌ, ꞌet whuz unꞌa ndi yun kꞌut dulhtsꞌi.

¹⁸ Mbe la ꞌudaꞌ yuka dune unli-i kꞌut huyuztꞌus ꞌinkꞌez ꞌutꞌahayalhti de, ꞌet de lhitꞌus hukwꞌunꞌa ootꞌeꞌ junih. Kꞌus mbe lhitꞌus-un unli daꞌ, ꞌinkꞌez ꞌutꞌahayalhti de, ꞌet de yuka dune unli-i kꞌut huyuztꞌus hukwꞌunꞌa ootꞌeꞌ junih.

¹⁹ ꞋEt yuka dune unli-un kꞌut huyuztꞌus kꞌus lhitꞌus-un, ꞌet ꞌantsꞌi ꞌuhoontꞌoh. Yakꞌusda ooghuni netlꞌa ídanꞌai ookꞌuneꞌtsꞌutꞌen de, ꞌet za neba hooncha wheꞌ hoontꞌoh.

²⁰ Ntsꞌenꞌa la ꞌilhone hinli whe dahintꞌoh la whe ꞌutahabalhti, ꞌet whuz unꞌa ꞌuhootꞌeꞌ hubaꞌ hoontꞌoh.

²¹ Nyun ꞌulhna inli whe ꞌutahanyalhtih de, ꞌet huwu ni ꞌonleꞌ junih. ꞋEt hoontsꞌi nyumoodih nladutitnih de, ꞌet de ndineh.

²² ꞋEt mbene la neMoodihti ꞌutꞌahayalhti-un ꞌulhna unli whe ꞌen neMoodihti yula naditni kꞌunꞌa ꞌuntꞌoh ꞌet huwa. ꞋEt whuz unꞌa mbe la neMoodihti dutijih ha yukaꞌ daniꞌ, ꞌulhna lhiloh hoontsꞌi, Jesus Christ ye ꞌulhna unli.

²³ Dahoolcho whe nanohonket, ꞌet huwa ꞌaw dune be ꞌulhna oolheꞌ junih.

²⁴ Sulhutsinke ntsꞌenꞌa la dahtꞌoh dune ꞌahli whe Yakꞌusda ꞌutahanohanla, ꞌet whuz unꞌa za oohtꞌeꞌ hubaꞌ hoontꞌoh.

Mbe la ꞌaw dune kꞌus tsꞌeke tꞌelhnusze-un, ꞌenne bughun yatilhduk

²⁵ ꞋEt mbe la ꞌaw dune kꞌus tsꞌeke tꞌelhnusze-un, ꞌenne bughun nohbulh yatisduk. ꞋEnne bughun neMoodihti ꞌaw khuni stlꞌalhdiꞌal ꞌet hoontsꞌi neMoodihti sgha teꞌninzun whe stꞌa ninintan-un ooba whutisdleh ꞌet huwa ndiz unꞌa nohbulh yatisduk.

²⁶ Ndi ꞌandit be dzoh nahdeh-i ꞌet whula gha tsꞌe dune ntsꞌenꞌa ꞌuhintꞌoh, ꞌet whuz unꞌa za ꞌuhootꞌeꞌ hubaꞌ hoontꞌoh nuszun.

²⁷ Tsꞌeke ghu sinda de, oochꞌa natandalh hukwa ꞌontꞌen junih. ꞋEt oola nadintni de, ꞌet de ꞌuyoon haꞌ nonzin junih.

²⁸ ꞋEt hoontsꞌi lhghu sahke de, ꞌaw lubeshi lhuhooloh. ꞋInkꞌez tsꞌeke ꞌaw dune tꞌelhnusze-un ki yutꞌi de, ꞌaw ooba lubeshi lhuhooloh. ꞋEt hoontsꞌi mbene la lhghu dilhtsꞌine, ndi yun kꞌut dzoh notideh, ꞌinkꞌez ꞌet whuchꞌa whuz unꞌa nohba hukwaꞌ nuszun.

²⁹ Sulhutsinke ꞌandit tsꞌihꞌun unꞌa nohdutasnelh, ndet nohtsꞌu hooltsꞌulh-un ꞌawet nilhdukw whe ꞌuhoontꞌoh. ꞋInka njan whutsꞌun njan duztitelh whe ꞌuhoontꞌoh. Mbe la buꞌat hoonline, ꞌenne hoontsꞌi buꞌat hooloh kꞌunꞌa ꞌuhootꞌe.

³⁰ Mbe la ꞌukꞌenudlehne, ꞌaw ꞌukꞌelhnusdlene kꞌunꞌa ꞌuhintꞌoh. ꞋEt mbe la huhoontꞌiꞌne, ꞌaw lhuhootꞌiꞌne kꞌunꞌa ꞌuhintꞌoh. ꞋEt mbe la hoonli ooketne, ꞌaw buchꞌeꞌ lhiloh leꞌ hintꞌoh.

³¹ ꞋInkꞌez mbene la ndi yun kꞌut whuchꞌeꞌ huyutꞌi de, ꞌaw buchꞌeꞌ lhiloh kꞌunꞌa ꞌuhintꞌoh. Ndi yun kꞌut uzdilhtsꞌi-un hukwꞌunꞌa gak whutileh ꞌet huwa.

³² Howu ni ꞌahli-un, ꞌet whuchꞌa nohtsꞌu hukwaꞌ nuszun. Whunilhꞌen, mbe la soh nuyá-un, ꞌen neMoodihti be ꞌutꞌen kꞌoh ꞌinkꞌez ooba hootazooꞌ, ꞌet za howu ni ꞌaztan.

³³ ꞋEt hoontsꞌi mbe la ooꞌat hoonli ꞌen ndi yun kꞌut uzdilhtsꞌi-un hukwꞌunꞌa ꞌinkꞌez duꞌat ooba hootazooꞌ ninzun-un, ꞌet za howu ni ꞌaztan.

³⁴ ꞋEt mbene la ooki hoonli-un ꞌinkꞌez ꞌaw dune tꞌenuszun-un bulh lhelhtsꞌun unꞌa ꞌuhintꞌoh. Ndun ꞌaw dune tꞌenuszun-un neMoodihti ꞌen za ghun nuninuzut. ꞋEt whe ꞌen duyustꞌe ꞌinkꞌez dichꞌoh ooyughi bulh ꞌi cha lubeshi ooghu hooloh-un unli. ꞋEt mbe la ooki hoonli-un, ꞌen ndi yun kꞌut uzdilhtsꞌi-un hukwꞌunꞌa, ꞌinkꞌez ooki ba hootazooꞌ, ꞌet za howu nuninuzut.

³⁵ ꞋOn ꞌun nohba hootazooꞌ-un, ꞌet huwa ndi khuni unohdusni. ꞋAw kꞌoh nónustꞌi iloh wheꞌ dusni. ꞋEt hoontsꞌi ndai nohnichꞌoh be tihzooꞌ-i ꞌinkꞌez ꞌaw whelhahtsaz whe nohdzi ndulcho ꞌi be neMoodihti ooghaꞌ dunulhya, ꞌet huwa ndi khuni unohdusni.

³⁶ ꞋEt ꞌaw dune tꞌenuszun-un ndun dune yulh nintaꞌtitꞌelh ninzun de, ꞌinkꞌez ꞌawet kꞌéninyai whe ꞌudaꞌ teninya whe ꞌuntꞌoh, ꞌet de whute lhghu hookeꞌ hubaꞌ hoontꞌoh, ꞌaw lhuhóotsiꞌ.

³⁷ ꞋEt hoontsꞌi mbe la dune dudzi dulcho-i be dantꞌoh whe dune tileh ꞌet tꞌeooninzun de, ꞌinkꞌez ꞌet huwa ꞌaw ꞌat titꞌelh hukwa lheꞌustꞌen whe dichꞌoh hukwaꞌ ninzun hukwꞌunꞌa ꞌuntꞌoh de, ꞌet ndiz unꞌa dudzi be nahizya ꞌet whe sooꞌ titꞌelh.

³⁸ ꞋEt whe la mbe la ꞌat titꞌelh-un ꞌet dúja de, ꞌet hoonzoo wheꞌ hoontꞌoh. ꞋInkꞌez mbe la ꞌat lhítꞌel de, ꞌet ꞌon nus hootázooꞌ.

³⁹ ꞋEt Moses be ꞌudustlꞌus ndutni, “Mbe la ooki hoonli-un, ꞌet ooki ꞌawhuz khuna de, ꞌet ꞌilhiz ooleꞌ lhulh ꞌuhootꞌeꞌ hubaꞌ hoontꞌoh. ꞋEt ooki dazsai de, mbe yukaꞌ ninzun ghu natidalh, ꞌet whuz unꞌa ootꞌeꞌ, hukwaꞌ ninzun de.” ꞋEt hoontsꞌi Yakꞌusda ooba ꞌalhaꞌ yintꞌoh-un, ꞌen za yughu noodaꞌ hubaꞌ hoontꞌoh.

⁴⁰ ꞋEt hoontsꞌi ntsꞌenꞌa la hoontꞌiꞌ whe dantꞌoh de, whuz unꞌa za ootꞌeꞌ. ꞋEt whuz unꞌa nahizusya. ꞋInkꞌez si cha Yakꞌusda dichꞌoh ooyughi ꞌustꞌi nuszun.