1 Corinthians 6 - Yak'usda Ooghuni

Khun te Yakꞌusda ba nohulhutsin unli-un, ꞌen ndi yun kꞌut nahiyilh-un but neóolhtelh junih

¹ ꞋEt mbe nohtoh ooba ꞌalha ꞌuhoontꞌoh-un, ꞌuyoon bulh dulhyoh ꞌuhutni de, ꞌet ntsꞌenꞌa ꞌuwhutatꞌelh whe ooba ꞌalhaꞌ lheꞌhootꞌohne but nebutalhtelh buba nahoodeh ha? ꞋAw nduhóotꞌen huba lheꞌhóotꞌoh! ꞋInkꞌez ntsꞌenꞌa ꞌuwhutatꞌelh whe Yakꞌusda oochꞌeꞌne ꞌaw bubut neyolhtelh ꞌaitꞌoh?

² ꞋAw tꞌeoonuzáhzun yakꞌusda oochꞌeꞌne ndi yun kꞌut ooba ꞌalhaꞌ lheꞌhootꞌohne, ꞌenne buba nahotiyeh? ꞋEt nohni ndi yun kꞌut ooba ꞌalhaꞌ lheꞌhootꞌohne buba nahutihyeh de, ꞌet ntsꞌenꞌa ndi hoonliyaz lhdulhyoh ꞌuntꞌoh-i nohni ba nahutihyeh huba soo lheꞌahtꞌoh?

³ ꞋAw eh tꞌeoonuzáhzun Lizasne, ꞌenne hoontsꞌi buba natsꞌotiyeh? ꞋEt ꞌalha ꞌuhoontꞌoh. ꞋEt huwa ndi yun kꞌut lhdulhyoh ꞌuntꞌoh-i ghun natsꞌotiyeh huba sooꞌ tsꞌuldzooꞌ whe ꞌutsꞌintꞌoh?

⁴ ꞋEt ndi yun kꞌut whe ꞌutꞌen lhdulhyoh ꞌuntꞌoh-i ghun buba natsꞌotiyeh de, ꞌet de nohni Yakꞌusda ba ꞌilhunaoosdilne toh, mbene la nohba soo lheꞌildzooꞌne ooba ꞌalha ꞌuhoontꞌohne hoontsꞌi, ꞌenne za nohba nahutiyehne ubuzulhtsi.

⁵ Yooya oohleꞌ ꞌinkaꞌ nohdusni. ꞋAw lakw nohni nohtoh ꞌaw ꞌilhoghun hoontsꞌi dune whunih-un nohba nahutiyeh-un hooloh?

⁶ ꞋEt hoontsꞌi lheꞌahja! ꞋIlhoghun dune dulhutsin ooba nahutideh tsꞌe yoolhti. Ndunne nahiyilhne ooba ꞌalhaꞌ lheꞌhootꞌohne hoontsꞌi bubut nenilhti?

⁷ ꞋInkꞌez njan dune ba nahutideh tsꞌe yoolhti, ꞌet whe ꞌudaꞌ nohnichꞌoh chꞌa naꞌnulhde whuzdliꞌ. Dune ꞌutsꞌun unꞌa neꞌnohulhꞌen de, di ha lhoohoozulhchoot? Kꞌus dune nohꞌeꞌhuwhulhtsꞌit de, whute ꞌuhoontꞌoh.

⁸ ꞋEt hoontsꞌi ndahtꞌen-un, ꞌet whe nintaꞌahtꞌi ꞌinkꞌez nohulhutsinke ꞌeꞌwhulhtsꞌit.

⁹ ꞋAw tꞌeoonuzahzun Yakꞌusda whe lerwe unli-un, ꞌet mbe tsꞌihꞌun lheꞌitꞌohne, ꞌenne ꞌaw bugha lhuhootasꞌal? Khun nohnichꞌoh naꞌdunoohtꞌah junih! Mbe dune tsꞌeke bulh lubeshi ꞌulhꞌenne, kꞌus ꞌukꞌeltsi ooba ꞌalhaꞌ ꞌuntꞌohne, kꞌus mbene la lhghu dilhtsꞌine lubeshi tsꞌu nintꞌine hinli, kꞌus dudulh dunene hoontsiꞌ kꞌunꞌa bulh nintaꞌutꞌihne ꞌinkꞌez tsꞌekoo dudulh tsꞌekoo bulh nintaꞌutꞌihne,

¹⁰ kꞌus ꞌundunutꞌihne, kꞌus ꞌuyoonne chꞌeꞌ haꞌ ninzunne, kꞌus tanutnaine cha, kꞌus ꞌuyoonne dzoh neꞌduniꞌne, kꞌus ꞌon nus dáhatnine cha, ꞌenne tsꞌiyawh nduntꞌohne Yakꞌusda lerwe unli-un, ndai la Yakꞌusda oochꞌeꞌ unli-i, ꞌi ꞌaw huyólhchoot ꞌaitꞌoh.

¹¹ ꞋInkꞌez nohni whulohne nohtoh ꞌet ndahtꞌen inleꞌ. ꞋEt hoontsꞌi tunanohuzguz leꞌ ꞌahtꞌoh. Yakꞌusda ba ꞌudun nenohninla cha, ꞌinkꞌez tsꞌihꞌun dune nohulhtsi. ꞋEt ndi tsꞌiyawh Jesus Christ neMoodihti booziꞌ gha ꞌinkꞌez neYakꞌusda ooyughi gha cha ꞌet whuz unꞌa ꞌunohínla.

Neyustꞌe ꞌinkꞌez neyughi te, ꞌi be Yakꞌusda uzdólhtiꞌ

¹² ꞋEt ꞌaw hoonliyaz whuchꞌa nusjoot-un hooloh, ꞌet hoontsꞌi whulukhun sba lheꞌhoozooꞌ. Hoonliyaz whuchꞌa nusjoot-un hooloh, ꞌet hoontsꞌi ꞌaw hoonli kꞌuneꞌ soolꞌen-i hooloh, ꞌilhiz wheni ꞌet ndutistꞌelh.

¹³ ꞋUtꞌalh-i nebut ba ꞌuntꞌoh ꞌinkꞌez nebut tꞌalh-i ba ꞌuntꞌoh, ꞌet hoontsꞌi ꞌet ndi nankultꞌoh ꞌi Yakꞌusda ꞌantsꞌi ꞌuntꞌoh yutilhtselh. ꞋEt whuz unꞌa nduhoontꞌoh, neyustꞌe ꞌaw dune kꞌus tsꞌeke bulh lubeshi ꞌuhulhꞌen hukwꞌunꞌa beꞌ tsꞌootꞌen huba lheꞌyilel. ꞋEt neyustꞌe neMoodihti ba ꞌulya ꞌinkꞌez neMoodihti neyustꞌe ba ꞌuntꞌoh.

¹⁴ ꞋEt Yakꞌusda ye ulhtus-i, ꞌi be neMoodihti dunaidilhti, ꞌinkꞌez wheni cha ye ulhtus-i, ꞌi be dunanedutalelh.

¹⁵ ꞋAw eh tꞌeoonuzáhzun nohyustꞌe Christ ooyustꞌe ooloh unli? Ntsꞌenꞌa ꞌuwhutatꞌelh whe Christ ooyustꞌe ooloh unli-i whe ꞌulꞌen-un tsꞌeke ooyustꞌe whuloh tiselh? ꞋAw whuz unꞌa lheꞌhootꞌoh!

¹⁶ ꞋAw eh tꞌeoonuzáhzun dune tsꞌeke ꞌulꞌen-un tsꞌu nedinja ꞌet buyustꞌe ꞌilho suliꞌ hukwꞌunꞌa ꞌuhintꞌoh? ꞋEt whuz unꞌa ꞌukꞌehooguz whe ndutni, “Nanki ꞌilho yustꞌe suliꞌ?”

¹⁷ ꞋEt mbe Jesus Christ tsꞌu nedinja-un, ooyughi cha ꞌen bulh ꞌilho suliꞌ whe ꞌuntꞌoh.

¹⁸ ꞋEt huwa dune kꞌus tsꞌeke bulh lubeshi ꞌuhulhꞌen ꞌet whuchꞌa neꞌoohtꞌen. ꞋEt ꞌuyoo lubeshi ꞌaw neyustꞌe gha lhitasnal, ꞌet hoontsꞌi mbene la dune kꞌus tsꞌeke bulh nintaꞌantꞌen de, ꞌet de dichꞌoh duyustꞌe lubeshi be nintaꞌyulhꞌih.

¹⁹ Nohyustꞌe ꞌi Ndoni oolugliz whucho ꞌuntꞌoh ꞌinkꞌez nohyudinda, ꞌaw tꞌeoonuzáhzun eh? ꞋEn ꞌuntꞌoh Yakꞌusda nohgha ininꞌai ꞌet huwa ꞌaw nohnichꞌoh chꞌeꞌ lhahloh.

²⁰ Lheꞌhoolcho whe ꞌuneinla ꞌet whe Yakꞌusda naneonket ꞌinka nohyustꞌe be ꞌinkꞌez nohnichꞌoh nohyughi be cha Yakꞌusda ba whudolhtiꞌ oochꞌeꞌne suhliꞌ ꞌet huwa.