1 Corinthians 5 - Yak'usda Ooghuni

ꞋIlhunaoodulhne butoh lubeshi nintaꞌbulhꞌih

¹ ꞋEt tsꞌiyanne whulh ꞌuhuditsꞌo, nohtoh dune tsꞌeke bulh lubeshi ꞌuhulhꞌen. ꞋEt nduhutꞌen-un, hukwaya hoonli kꞌet ꞌonghohne ꞌudun yun kꞌut whutꞌenne ꞌaw howu yahutoolhdih ꞌaitꞌoh. Tsꞌiyanne whulh ꞌuditsꞌo dune dubá ooꞌat ꞌen yuchan tꞌesti.

² ꞋInkꞌez nohni ꞌududúlhtiꞌ ꞌet hoontsꞌi soo cho huwu ni oohleꞌ hubaꞌ hoontꞌoh, ꞌet mbe la ndutꞌen, ꞌen nohtahanaóolhꞌaꞌ hubaꞌ hoontꞌoh.

³ Syustꞌe be nohtoh lheꞌustꞌoh ꞌet hoontsꞌi sichꞌoh syughi be nohtoh ꞌustꞌoh ꞌinkꞌez ꞌantsꞌi nohzih susda le ꞌustꞌoh. ꞋEt huwa si ndun mbe la lubeshi ꞌulhꞌen-un, ꞌen ꞌudaꞌ ooba nahisda.

⁴ ꞋEt huwa Jesus Christ neMoodihti booziꞌ gha ꞌilhunaoozahdil de, ꞌinkꞌez sichꞌoh syughi cha, ꞌinkꞌez Jesus Christ ye ulhtus-i, ꞌi be,

⁵ ꞌet ꞌilhunaoodulh te, ꞌet ndun nduja-un, ꞌen Satan ootlꞌa itilhtelh ooyustꞌe nintaꞌyutalhꞌelh ꞌet wheni. ꞋEt la Jesus Christ neMoodihti oodzin de, ꞌet de ndun ooyughi yutilhyih wheꞌ hoontꞌoh.

⁶ Huwahdloh-un ꞌaw lheꞌhoozooꞌ. ꞋAw tꞌeoonuzuhzun eh ꞌantsꞌi lhes ilhjut, ꞌi nilhtlus de, lheꞌtinelh untildoh.

⁷ ꞋEt huwa ndi lhes ilhjut-i tsꞌiyawh ꞌuntulhdil. ꞋI ooyit ꞌet whe la nohni ꞌandit lhes lhuntildoh-i kꞌunꞌa oohtꞌeꞌ. Nohni ꞌandit lhes lhuntildoh-i kꞌunꞌa ꞌahtꞌoh ꞌet huwa. Christ, ꞌen Yakꞌusda be ꞌusbai neba unli, ꞌet wheni neba hizilhghi ꞌet huwa.

⁸ ꞋEt huwa tsꞌonólhni whe ꞌalhgoh naꞌtsꞌootꞌalh leꞌ tsꞌootꞌen, ꞌaw lhes ilhjut-i bulh iloh. Ndi lhes ilhjut-i, ꞌi hoontsiꞌ-un ꞌinkꞌez lubeshi ꞌutsꞌulhꞌen-un ꞌi kꞌunꞌa ꞌuntꞌoh. ꞋEt hoontsꞌi ndi ꞌandit lhes lhuntíldoh-i, ꞌi ꞌuntꞌoh be tsꞌihꞌun ꞌuhoontꞌoh ꞌinkꞌez khuni ꞌalhaꞌ ꞌuntꞌoh-i kꞌunꞌa ꞌuntꞌoh.

Mbene la nebulh ꞌuntꞌohne, ꞌenne za buba natsꞌoohooyeh hubaꞌ hoontꞌoh

⁹ ꞋEt ꞌudaꞌ ꞌudustlꞌus be nohdasniꞌ mbe la dune tsꞌeke bulh lubeshi ꞌuhulhꞌen ꞌenne khun ꞌilhiz ooleꞌ buchꞌoh oohtꞌeꞌ.

¹⁰ ꞋEt hoontsꞌi mbene la ooba ꞌalhaꞌ lheꞌhootꞌohne ꞌaw ꞌenne iloh buchꞌoh oohtꞌeꞌ whe dune tsꞌeke bulh lubeshi ꞌulhꞌenne, kꞌus ꞌuyoonne chꞌeꞌ haꞌ ninzunne, kꞌus ꞌundunutꞌihne, kꞌus ꞌukꞌeltsi ooba ꞌalhaꞌ ꞌuntꞌohne cha, ꞌaw ꞌenne iloh buchꞌoh oohtꞌeꞌ iloh whe nohdúsni. ꞋEt whuz unꞌa ndahtꞌen de, ꞌantsꞌi ndi yun oochꞌa tihyalh hukwꞌunꞌa ꞌutihtꞌelh leꞌ hoontꞌoh, tsꞌiyanne ndi yun kꞌut ꞌet nduhútꞌen ꞌet huwa.

¹¹ ꞋEt ꞌawet nohtsꞌo kꞌeꞌisguz mbe la Jesus Christ gha neulhutsinke butsꞌútnine, ꞌinkꞌez dune tsꞌeke bulh lubeshi ꞌulhꞌen-un, kꞌus ꞌuyoonne chꞌeꞌ haꞌ ninzun-un cha, kꞌus ꞌukꞌeltsi ooba ꞌalhaꞌ ꞌuntꞌohne, kꞌus ꞌuyoonne dzoh neꞌduniꞌ-un cha, kꞌus tanutnai-un cha, kꞌus ꞌundunutꞌih-un cha, ꞌet mbe la Jesus Christ gha neulhutsinke butsꞌútnine nduntꞌohne dune, ꞌenne ꞌet nduhútꞌen de, ꞌaw ꞌen ubulh lheꞌzoohtꞌen, ꞌaw bubulh ꞌutihꞌulh-un ꞌet hoontsꞌi ꞌaw ꞌuhotꞌeꞌ ꞌaitꞌoh.

¹² ꞋInkꞌez mbene la nebulh lheꞌitꞌohne, ꞌenne si sba lheꞌhootꞌoh buba nahutisyeh huba. ꞋEt nebulh ꞌuntꞌohne, ꞌenne za buba natsꞌotiyeh hubaꞌ hoontꞌoh.

¹³ ꞋEt ndunne mbene la nebulh lhéꞌitꞌohne, ꞌenne Yakꞌusda buba nahutiyeh. ꞋEt hoontsꞌi neulhutsin tankꞌus neꞌútꞌen-un, ꞌen nohnichꞌoh nohtahanaóolhꞌalh.