1 Corinthians 4 - Yak'usda Ooghuni

Yakꞌusda ghun buba wheꞌ hoontꞌoh hooyoh-un, ꞌet whunohtsꞌunoolhtun ha netlꞌa honꞌai

¹ ꞋAwet dune ꞌet ndiz unꞌa neghu nuni noozut, ꞌantsꞌi Christ laꞌ ꞌutꞌenne ꞌutsꞌintꞌoh, ꞌinkꞌez Yakꞌusda ghun buba wheꞌ hoontꞌoh hooyoh-un, ꞌet whunohtsꞌunoolhtun ha netlꞌa honꞌai.

² ꞋAw ꞌet za iloh, mbe la yutlꞌa honꞌai-un, ꞌet ndun dune hitꞌaninootan hubaꞌ hoontꞌoh.

³ ꞋEt nohni sba nahizahya de kꞌus ꞌuyoonne cha but nenusya, ꞌinkꞌez sba nahuhizya de, ꞌet hoontsꞌi tsꞌiyawh ꞌantsꞌi sbaꞌ hoontꞌoh. ꞋAw sichꞌoh hoontsꞌi duba nahoosdeh ꞌaitꞌoh.

⁴ ꞋEt seni toh dizꞌai-i ꞌaw lhditsun ꞌet hoontsꞌi ꞌaw ꞌet whe iloh tsꞌihꞌun dune usdli. ꞋEt neMoodihti ꞌen sba nahuyeh-un ꞌuntꞌoh.

⁵ ꞋEt huwa ndet dzin whusaootiltsꞌulh whutsꞌun, ꞌaw hoonliyaz buba nahoohyeh-un hooloh. NeMoodihti whusatiyalh whutsꞌun huba sulhꞌi whe tsalhgus yo tsꞌe nunuꞌiꞌ-i, ꞌi tsꞌiyawh tsꞌet ha naítilelh. ꞋInkꞌez dune budzi yo tsꞌe ꞌuhuninzun-un, tsꞌiyawh tsꞌiyanne bunalhtsꞌet ha óotilelh. ꞋEt Yakꞌusda ꞌilhone hinli whe hoonzoo whe bubulh whudutalhtiꞌ.

ꞋIlhoghun dúlhtiꞌ, kꞌus ꞌilhoghun nohba ꞌantsꞌi ooleꞌ junih

⁶ Sulhutsinke wheni si ꞌinkꞌez Apollos bulh ndai la ooghaꞌ tsꞌutꞌen-i kꞌunꞌa nohni nohba ꞌuntꞌoh. ꞋEt whe wheni negha ꞌon nus hodoolhꞌeh. Ndi ꞌukꞌeguz-i ꞌon ꞌun khuni ootanáꞌdohꞌalh junih. ꞋEt whe ꞌilhoghun dúlhtiꞌ, kꞌus ꞌilhoghun nohba ꞌantsꞌi ooleꞌ junih.

⁷ Mbe ꞌunohinla ꞌuyoon dulhulhtꞌoh nohulhtsi? Gak! Di ꞌintꞌi ndai la nghá lhikulh-i? Gak! ꞋEt hoonli ngha ninkat de, ꞌet di ha howindloh whe ꞌaw hoonli sgha lhikulh dutanelh?

⁸ ꞋAwet lhai ahtꞌi. ꞋUdaꞌ hoonzooꞌ ꞌahtꞌoh. Wheni neyit hoontsꞌi lerwene kꞌunꞌa ꞌahtꞌoh. ꞋEt ꞌalhaꞌ uncha ꞌet whuz unꞌa ꞌahtꞌoh. ꞋEt whe la wheni cha nohbulh lerwene tsꞌooleꞌ.

⁹ ꞋEt ndunuszun wheni whelꞌaꞌne hukwꞌeꞌiꞌ ꞌutsꞌultus ꞌet whuz unꞌa Yakꞌusda ꞌuneinla. ꞋAntsꞌi tsꞌiyanne nalh daztitsah hukwꞌunꞌa neꞌinla. Tsꞌiyanne ndi yun kꞌut nehunilhꞌen ꞌuneinla hukwꞌunꞌa whe nehunilhꞌen, lizasne ꞌinkꞌez dunene cha ꞌenne tsꞌiyawh nehunoolhꞌen ha.

¹⁰ Wheni Christ ba whusnine tsinli, ꞌet nohni Christ bulh whunihne ꞌahli. Wheni tetsꞌutsun ꞌinkꞌez nohni ulhtus. Nohni dune nchane ꞌahli, ꞌet wheni ꞌaw lhdítiꞌne tsinli.

¹¹ ꞋAndit dzin whutsꞌun neye ꞌultsꞌilh ꞌinkꞌez tꞌaꞌtsꞌóosda. Nenaih lheꞌizooꞌ ꞌinkꞌez ꞌantsꞌi ꞌoh nutsꞌiya yoh cha lhtsꞌuhootꞌih, ꞌinkꞌez dunene ne-ehuzula.

¹² Whenichꞌoh nela be ꞌutsꞌutꞌen. Hoontsiꞌ-i khuni be neghu yahalhduk ꞌet hoontsꞌi wheni khuni unzoo-i be bubulh yátsꞌulhduk. Dzoh nunehulhdzut ꞌet hoontsꞌi soo whulh tsꞌuzyin.

¹³ Nechꞌaz yahalhduk ꞌet hoontsꞌi wheni kꞌeke be bubulh yatsꞌulhduk. Ndi yun kꞌut whuzukw leꞌ tsꞌuja. ꞋAndit whutsꞌun ndi yun kꞌut ꞌutsiꞌ-iyaz kꞌunꞌa ꞌutsꞌíntꞌoh.

Suzkeh kꞌunꞌa nohkꞌesiꞌ, ꞌet huwa khuni ulhtus-i be nohbulh yasduk

¹⁴ Ndi ꞌukꞌu nususguz-i ꞌaw be yooya nohtiselh huba iloh ꞌusdla. Suzkeh kꞌunꞌa nohkꞌesiꞌ, ꞌet huwa khuni ulhtus-i be nohba dusni wheꞌ dusni.

¹⁵ Soo ꞌukꞌenus dune lhane whe Christ ghun whunohodulhꞌehne hoonli de, ꞌet hoontsꞌi ꞌaw lhane iloh la nohbáke kꞌunꞌa lhunohonílhꞌen. Christ Jesus ꞌen ooghuni unzoo-i, ꞌi be si sgha be tsꞌukhuna-i ahtꞌi ꞌet huwa nohba susdliꞌ.

¹⁶ ꞋEt huwa nohtsꞌu tedusdli si skꞌunꞌa oohtꞌeꞌ.

¹⁷ ꞋEt huwa ndun Timothy nohtsꞌo whesꞌaꞌ. ꞋEn neMoodihti gha syeꞌ kꞌus ookꞌesiꞌ-un ꞌuntꞌoh. ꞋInkꞌez Christ ghun ꞌi tsꞌiyawh ꞌaw yula dootnih ꞌaitꞌoh. ꞋEn si neMoodihti bulh be ꞌutꞌen kꞌoh, ꞌet nohba whunatilnih. ꞋInkꞌez ndulcho whe ndet la Yakꞌusda ba ꞌilhunaoodulhne, ntsꞌenꞌa whubodusꞌeh si, ꞌi tsꞌiyawh nohba whunatilnih.

¹⁸ ꞋEt nohtoh whulohne ꞌuhududiltiꞌ, Paul ꞌaw whusalhtisyal huninzun ꞌet huwa.

¹⁹ ꞋEt hoontsꞌi neMoodihti hukwaꞌ ninzun de, ꞌet sih ꞌaho nohtsꞌo tísyalh. ꞋEt nohghu nusya de, ꞌet de ndunne ꞌududiltiꞌne, ꞌaw bughuni iloh kꞌus huye ulhtus-i dantꞌoh, ꞌet nahootasꞌalh.

²⁰ Yakꞌusda nohtoh kꞌuneꞌ yulꞌen-i ꞌaw khuni be iloh kꞌus ye ulhtus-i, ꞌi be ꞌuntꞌoh ꞌet huwa.

²¹ ꞋEt ndet hukwaꞌ nahzun whe nohtsꞌu tisyalh? Tutsus tilah kꞌus be nékꞌetsꞌinsiꞌ-i ꞌinkꞌez nalhtsulyaz neꞌnohtisꞌen tilah whe nohtsꞌu tisyalh?