1 Corinthians 3 - Yak'usda Ooghuni

Ndoni ookꞌu nulheꞌzahtꞌenne ꞌahli

¹ ꞋInkꞌez sulhutsinke nohni Ndoni kꞌuneꞌ ꞌutꞌenne kꞌunꞌa, ꞌet ꞌaw whuz unꞌa nohbulh yaoosduk ꞌaitꞌoh. ꞋEt hoontsꞌi nohyustꞌe lubeshi ootsꞌu nintꞌine kꞌunꞌa, ꞌet whuz unꞌa nohbulh yasduk. Christ oochꞌeꞌne ꞌahli ꞌet hoontsꞌi ꞌantsꞌi ꞌawhuz chalhtsꞌul ꞌahli hukwꞌunꞌa ꞌahtꞌoh. ꞋEt whuz unꞌa nohbulh yaoosduk hubaꞌ hoontꞌoh.

² Lilet nohgha sdzoh. ꞋInkꞌez ꞌaw dutsꞌun-i iloh nohghasꞌaih, ꞌaw tihꞌulh huba soo lheꞌulhcho ꞌet huwa. ꞋInkꞌez ꞌawhuz tihꞌulh huba soo lheꞌahtꞌoh.

³ ꞋAwhuz nohyustꞌe lubeshi tsꞌu nintꞌi. Nohni tsꞌiyawh eh tꞌeoonuhzun? Nohtoh ꞌoonih-i, ꞌi hoonih, ꞌinkꞌez lhedádulh, ꞌinkꞌez lhendowh nenahdil hukwꞌunꞌa ꞌahja. ꞋEt whuz unꞌa ndahtꞌen de, ꞌet ꞌalhaꞌ ꞌawhuz nohyustꞌe lubeshi tsꞌu nintꞌi whe ꞌahtꞌoh. Ndi yun kꞌut whutꞌenne kꞌunꞌa neꞌáhtꞌen.

⁴ ꞋIlhoghun ꞌutni, “Si Paul oochꞌeꞌ ꞌustꞌoh,” ꞌinkꞌez ꞌuyoon cha ꞌet dutni, “Apollos oochꞌeꞌ usdli.” ꞋEt whuz unꞌa ndudahni de, ꞌet ꞌalhaꞌ ꞌawhuz nohyustꞌe lubeshi tsꞌu nintꞌi?

Yakꞌusda ꞌen gha za tsꞌuntiyeh. Soo cho khahdli, ndet dzin whusahooltsꞌut de, ꞌet tsꞌiyawh ꞌilho ꞌutꞌen kwun be tꞌentidzeh

⁵ ꞋEt huwa sudutahnelh hukwaꞌ nuszun, Paul mbe unli, kꞌus Apollos ꞌen cha mbe ꞌuntꞌoh? ꞋAntsꞌi Yakꞌusda ba neꞌutꞌenne za ꞌuhintꞌoh. ꞋEnne bugha nohni nohba ꞌalha ꞌuhoontꞌohne suhliꞌ. Ntsꞌenꞌa la neMoodihti Yakꞌusda ba neꞌutꞌenne ꞌilhone whe bugha ooninꞌai.

⁶ ꞋAꞌ nusdle, Apollos too be nainulhtsul, Yakꞌusda ha inulhyeh.

⁷ ꞋEt ꞌinka mbe la ꞌaꞌ nanla-un, kꞌus mbe la too be nainulhtsul-un, ꞌenne ꞌantsꞌi ꞌuhintꞌoh. Yakꞌusda ꞌen gha za ha ntiyeh.

⁸ ꞋEt ꞌawet ꞌaꞌ nanla-un ꞌinkꞌez too be nainilhtsul-un, ꞌenne ꞌilhoh za ꞌuhintꞌoh. ꞋInkꞌez ntsꞌenꞌa la ꞌilhone whe dichꞌoh ꞌuhitꞌen hukwꞌunꞌa, ꞌet whuz unꞌa buba ꞌukꞌelha whutaleh.

⁹ ꞋEt wheni Yakꞌusda bulh ꞌutsꞌutꞌen ꞌinkꞌez ꞌen ba lhulhutꞌenne tsinli. ꞋInkꞌez nohni Yakꞌusda oohaniyeh kꞌet ꞌahli ꞌinkꞌez Yakꞌusda ooyoh cha ꞌahli.

¹⁰ Yakꞌusda ye unzoo-i, ntsꞌenꞌa la sgha ininꞌai, ꞌet ꞌi gha si, yoh ꞌuwhulhꞌen-un be whunih-i kꞌunꞌa, ndi yoh ookꞌoh whuzꞌai-i, ꞌi lhadusdla. ꞋInkꞌez ndo unꞌa ꞌuwhutilhꞌelhne huwolhleꞌ ntsꞌenꞌa la yoh ꞌuwhulhꞌen hukwꞌunꞌa.

¹¹ ꞋAw dune, ꞌudun yoh ookꞌehooltsꞌuk-i ooleh ꞌaitꞌoh. ꞋIlho ꞌudaꞌ ꞌuja, ꞌinkꞌez ndi yoh ookꞌoh whuzꞌai-i, ꞌi Jesus Christ, ꞌen ꞌuntꞌoh.

¹² ꞋEt ndi yoh ookꞌoh whuzꞌai-i mbe la ndo unꞌa ꞌuwhutilhꞌelh whe gold, silver, tse diztiꞌ-i, kꞌus duchun, tlꞌo, tlꞌo zukw, ꞌet ꞌi be hoolya de,

¹³ ꞌet ndet dzin whusahooltsꞌut de, ꞌet tsꞌiyawh ꞌilho ꞌutꞌen kwun be tꞌentidzeh. Ndi be ꞌuhoolya-i kwun be tꞌenidzin hukwꞌunꞌa.

¹⁴ Ndi beꞌ hoolya-i kwun be lhdikꞌil de, ꞌet de ꞌenne za huba ꞌukꞌelha whutaleh.

¹⁵ Yoh hoolya-i whudankꞌun de, ꞌet de ꞌen tsꞌiyawh ninta hotalelh. ꞋEt hoontsꞌi yoh ꞌuhoonlane kwun toh ha nabanla hukwꞌunꞌa ꞌubutilhyih.

¹⁶ ꞋAw tꞌeoonuzuhzun nohni Yakꞌusda oolugliz whucho ꞌahli ꞌinkꞌez Ndoni nohyudinda?

¹⁷ Mbe la Yakꞌusda ooyoh nintaꞌwhunilhꞌen-un, ꞌen cha Yakꞌusda nintaꞌyutalhꞌelh, Yakꞌusda oolugliz whucho lubeshi huwu hooloh ꞌet huwa. ꞋInkꞌez nohni ndi lugliz whucho ꞌahli.

Ndi yun kꞌut ye whunih-i, ꞌi Yakꞌusda ba whusni ꞌuntꞌoh

¹⁸ Khun nyunchꞌoh naꞌdunontꞌah junih. ꞋEt nohtoh ꞌilhoghun ndi yun kꞌut ye whunih-i be dune whunih naꞌdunudzun de, ꞌet de dichꞌoh ndi yun kꞌut whusni hininzun-i, whuz unꞌa naꞌdudooltselh hubaꞌ hoontꞌoh. ꞋEt whe tsꞌihꞌun unꞌa whunih-un dune utileh.

¹⁹ Ndi yun kꞌut ye whunih-i, ꞌi Yakꞌusda ba whusni kꞌunꞌa ꞌuntꞌoh. ꞋEt whuz unꞌa ꞌukꞌehóoguz, “Nyoonne whunihne dichꞌoh huye duzoh-i, ꞌi be Yakꞌusda ubilhgooh.”

²⁰ Doo cha za ꞌukꞌeíguz whe ndutni, “Nyoonne whunihne nuni hunuzut-un, neMoodihti tꞌeooninzun ꞌi ꞌantsꞌi gaih unli.”

²¹ Tsꞌiyawh nohchꞌeꞌ ꞌuntꞌoh. ꞋEt huwa ꞌaw ꞌilhoghun dune ꞌon nus unzoo ꞌuzdooniꞌ ꞌaitꞌoh.

²² Paul, kꞌus Apollos, kꞌus Cephas, kꞌus ndi yun kꞌut, kꞌus be tsꞌukhuna-i, kꞌus be yatsꞌadlah-i, kꞌus ꞌandit ndai tsꞌutꞌi-i, kꞌus ndet whusaootiltsꞌulh-un, ꞌi tsꞌiyawh nohchꞌeꞌ ꞌuntꞌoh. ꞋEt huwa ꞌaw ꞌilhoghun dune ꞌon nus unzoo ꞌuzdooniꞌ ꞌaitꞌoh.

²³ ꞋInkꞌez nohni Christ oochꞌeꞌne ꞌahli, ꞌinkꞌez Christ, Yakꞌusda oochꞌeꞌ unli.