1 Corinthians 2 - Yak'usda Ooghuni

Jesus Christ tulalhgus kꞌut neba dazsai-un, ꞌet huwun za nohbulh yatisduk

¹ Sulhutsinke ndet la nohtsꞌo whusasya-un whe Yakꞌusda ghun nohbulh yasduk, ꞌaw ꞌududitiꞌ khuni ꞌi be ꞌinkꞌez ꞌaw ndi yun kꞌut huye whunih-i be cha nohbulh yalhusdih.

² ꞋEt huwa seni lhadusdla ꞌudechoo nohtanusya whe ꞌaw ꞌudun seni toh whudoꞌaꞌ hukwa lheꞌnuszun. Jesus Christ ghun ꞌinkꞌez tulalhgus kꞌut neba dazsai-un, ꞌet za seni toh whudoꞌaꞌ hukwaꞌ nuszun inleꞌ.

³ Nohtanusya daꞌ, ꞌet whenuzjut ꞌinkꞌez syustꞌe dutlut whe ꞌinkꞌez tesun whe

⁴ sghuni be nohbulh yasduk, ꞌaw ndi yun kꞌut dune ye whunih-i khuni ulhtus-i, ꞌi be nohbulh yalhusdih. ꞋEt kꞌus tꞌeoonahzun sghuni Ndoni tsꞌe hadiltsꞌut ꞌinkꞌez dilhtus suliꞌ.

⁵ ꞋEt whe Yakꞌusda ye ulhtus-i, ꞌaw dune ye whunih-i, ꞌi be iloh nohba ꞌalhaꞌ hoteꞌ.

Yakꞌusda ye whunih-i, ꞌi be yatsꞌulhduk

⁶ ꞋEt hoontsꞌi mbene la dune suliꞌne, ꞌenne khuni whunih-i be bubulh yatsꞌulhduk. ꞋEt hoontsꞌi ndai la yun kꞌut be whutnih-i kꞌus ndi yun kꞌut whumoodihne, ꞌenne hiye whunih-i, ꞌaw ꞌi be iloh bubulh yatsꞌulhduk. Ndunne ꞌantsꞌi gaih gak hutileh.

⁷ ꞋEt kꞌus Yakꞌusda ye whunih-i, ꞌi be yatsꞌulhduk. Ndi neghuni buba wheꞌ hoontꞌoh hooyoh-un ꞌinkꞌez nunutꞌiꞌ bulh ꞌuntꞌoh. Yakꞌusda ndi yun itilelh whutso ꞌet whuz unꞌa lhaoodinla. ꞋI neba diztiꞌ whe ꞌuntꞌoh.

⁸ Ndi khuni neba whe ꞌuntꞌoh hooyoh, ꞌi ndi yun whumoodihne ꞌaw ꞌilhoghun daja ni tꞌeininzunne hooloh. ꞋEt ndi khuni neba whe ꞌuntꞌoh hooyoh tꞌehininzun de, ꞌet de neMoodihti whudiztiꞌ-un, ꞌen ꞌaw daꞌ tulalhgus kꞌelhúhiyilhtel ooleꞌ.

⁹ ꞋEt hoontsꞌi ndiz unꞌa Yakꞌusda neba lhaoodinla. Ntsꞌenꞌa la ꞌukꞌehooguz-un, ꞌet huwa ꞌuhooja whe ndutni, “Mbene la Yakꞌusda kꞌensiꞌne, ndet whe Yakꞌusda buba lhaoodinla, ꞌi tsꞌiyawh duna be lhuhuhoosꞌen, ꞌinkꞌez dudzeh whe ꞌaw lhuhodítsꞌil, whuz buba hooncha kꞌet ꞌaw howu nuni hunoozut ꞌaitꞌoh.”

¹⁰ ꞋEt hoontsꞌi Yakꞌusda ooyughi ꞌi be whunenilhtan. ꞋEt Yakꞌusda ghun Ndoni neba nahoole-un tsꞌiyawh whunenulhtun, ndai la yoo yoh ꞌuntꞌoh-i, ꞌi hoontsꞌi ꞌi yunenulhtun.

¹¹ ꞋEt nohtoh ntsꞌenꞌa la dune dahintꞌoh ꞌaw dune tsꞌihꞌun tꞌebuninzunne hooloh. Ooyughi ooyudinꞌai-un ꞌi gha za tꞌeoonínzun. ꞋEt whuz unꞌa Yakꞌusda dantꞌoh la ꞌaw tꞌe ininzun-un hooloh, Ndoni ꞌen za tꞌeinínzun.

¹² ꞋAw ndi yun kꞌut neꞌwhutꞌen-un huwa iloh Yakꞌusda ghun tꞌetsꞌoninzun, Yakꞌusda ooyughi negha dinꞌai. ꞋEt Yakꞌusda ꞌantsꞌi negha íyanlih-i, ꞌi tsꞌiyawh tꞌetsꞌunoozeh ha.

¹³ Di ooghu yatsꞌulhduk-i, ꞌaw dune ye whunih-i iloh ꞌuntꞌoh whe whuneodulhꞌeh. Ndoni ꞌen gha whutsꞌodulꞌeh. ꞋI za ghu yatsꞌulhduk. ꞋEt whuz unꞌa ntsꞌenꞌa la be ꞌalhaꞌ nudzun-i Ndoni tsꞌu ha dultsꞌit-i ꞌinkꞌez ntsꞌenꞌa la Ndoni ye yalhduk-i, ꞌi tsꞌiyawh lhzih neztilelh. ꞋEt whuz unꞌa Ndoni ꞌen whuneodulhꞌeh.

¹⁴ ꞋEt hoontsꞌi mbe la Ndoni lhitꞌih-un, ndai la Yakꞌusda ooyughi ootsꞌu ha dultsꞌit-i, ꞌi ꞌaw lheyulhchoot, whusni be hoonli kꞌunꞌa oobaꞌ yintꞌoh ꞌet huwa. Soo Ndoni ꞌen gha za tꞌehontizeh, ꞌet huwa Ndoni daja ni ꞌaw tꞌeoonoozeh ꞌaitꞌoh.

¹⁵ ꞋInkꞌez Ndoni yukꞌuneꞌ ꞌutꞌen unli-un, ꞌen tsꞌiyawh tꞌeooninzun. ꞋAw ꞌuyoonne dune yuba nahooyehne hooloh.

¹⁶ ꞋEt whuz unꞌa ꞌukꞌeguz whe ndutni, “Mbe tꞌeooninzun neMoodihti daja ninzun, kꞌus mbe whuyodalhꞌeꞌ whe hoonli tꞌewhuntizeh?” ꞋEt hoontsꞌi wheni Christ beni neghu dizꞌai, ꞌet huwa wheni tꞌetsꞌoninzun.