1 Corinthians 16 - Yak'usda Ooghuni

Yakꞌusda oochꞌeꞌne sooniya buba ꞌilhunatsꞌoꞌai-i

¹ ꞋEt ꞌawet ndi Yakꞌusda oochꞌeꞌne sooniya buba ꞌilhunatsꞌoꞌai-i, ꞌi ooghu yatisduk. ꞋEt yun kꞌut Galatia ꞌilhunahodulh, ntsꞌenꞌa butoh budásniꞌ daꞌ, ꞌet nohni cha ꞌet whuz unꞌa ndóhtꞌen.

² ꞋEt ꞌilhoghun ꞌahli whe daltsuk atꞌen be hoonzooꞌ ꞌahja, ꞌet lisman ꞌudechoo dzin, ꞌi whuloh lhadáhle. ꞋEt de nohtsꞌóozusya de, ꞌet ꞌoh whuya whudizulh-un ꞌaw ꞌilhunaꞌóhꞌalh huba lheꞌhóotꞌoh.

³ Ndet nohtsꞌóozusya de, ꞌet nahootásꞌalh noheꞌdustlꞌus ꞌi be mbene la nohkaꞌ nahzun, ꞌenne ndi sooniya Yakꞌusda oochꞌeꞌne buba bugha ínahꞌai-i, ꞌi bulh Jerusalem tsꞌe ꞌubutisꞌalh.

⁴ ꞋEt si cha whuz tisyalh huba hootázooꞌ de, ꞌet de ꞌenne sulh hútidulh.

Paul datínelh

⁵ ꞋEt yun kꞌut Macedonia ꞌet ꞌoh whuya lhutísyalh. ꞋEt ꞌoh whuya lhusúsya de, ꞌet nohtsꞌu tísyalh.

⁶ ꞋAtsul whuba tilah ꞌet nohzih oosdaꞌ kꞌus khit duwhulyiz tilah nohzih oosdaꞌ. ꞋEt whe la ntsꞌe la tisyalh tsꞌe, nohni sla oohtꞌen ha.

⁷ ꞋOh whuya usyalh de, ꞌaw nohkꞌulh túzisyal. ꞋEt huwa ꞌaw ꞌandit nohoosꞌen ꞌaitꞌoh. ꞋEt hoontsꞌi sMoodihti usunínzun de, ꞌet ꞌatsulyaz nducha nohzih usdaꞌ.

⁸ ꞋEt hoontsꞌi dzin Pentecost, ꞌet whutsꞌun keyoh Ephesus tisdalh.

⁹ ꞋEt dati kꞌus úncha-i, ꞌi sba dáhaidahankez léꞌhooja, ꞌinkꞌez lhane schꞌaz ditnine hoonli.

¹⁰ ꞋEt Timothy nohghu ninya de, ꞌaw hoonli whe lhníljut whe nohzih oodaꞌ. ꞋEt tsꞌiyawh nohni nohba ꞌuhoontꞌoh. Si skꞌunꞌa neMoodihti be ꞌutꞌen kꞌoh neꞌutꞌen ꞌet huwa.

¹¹ ꞋEt huwa nohni nohtoh ꞌen ꞌantsꞌi nohba ooleꞌ junih. ꞋEt hoontsꞌi oodzi dizghel whe stsꞌun nátoolhꞌaꞌ. Si ꞌinkꞌez lhulhutsinke tubulh ooba tsꞌilhꞌi.

¹² ꞋEt neulhutsin Apollos ꞌen ghun ꞌunohdutásnelh. ꞋAndit neulhutsinke bulh nohtsꞌun tóoyaꞌ ꞌet ooba hukwaꞌ nuszun, ꞌet hoontsꞌi ꞌaw hukwa lheꞌnizun. ꞋEt huwa saꞌ howu bulh yásduk. ꞋEt hoontsꞌi ntsꞌowhuya whudizulh-un ndet ooba hoonzoo de, ꞌet de nohtsꞌun tóoyaꞌ.

Soo cho huwahli

¹³ ꞋEt soo cho huwahli. Be ꞌalha ꞌuhoontꞌoh-i, ꞌi be whudutsꞌo whe sahyin. Nohni nohdzi hóoni whe ꞌet núdolhyaꞌ. Ulhtusne oohleꞌ.

¹⁴ Ndai la ooghahna-i, ꞌi tsꞌiyawh be nékꞌetsꞌinsiꞌ-i bulh oolhꞌen.

¹⁵ ꞋEt sulhutsinke soo cho ꞌunohdusni. Tꞌeóonáhzun Stephanas ꞌinkꞌez ooyoh dilhtsꞌine, ꞌenne yun kꞌut Achaia ꞌet ꞌudechoo ooba ꞌalha ꞌuhoontꞌohne huzdliꞌ. ꞋInkꞌez tꞌeóonáhzun ntsꞌenꞌa la Yakꞌusda oochꞌeꞌne buba néꞌhutitꞌen-un huwa ꞌuhududulya.

¹⁶ ꞋEt huwa nohdutásnelh, nduntꞌohne ꞌinkꞌez mbene la soo cho hoolhtus whe nebulh ꞌútꞌenne, ꞌenne nohnichꞌoh butlꞌáꞌ dudulhye.

¹⁷ Nkedaꞌ Stephanas, Fortunatus, ꞌinkꞌez Achaicus, ꞌenne sgho nindil daꞌ, ꞌet huwa whunúsni. Ndai la sghá lhikulh-i ꞌenne bugha sgha nínkat.

¹⁸ ꞋEt whula gha tsꞌe sichꞌoh syughi ꞌinkꞌez nohnichꞌoh nohyughi cha ꞌenne bugha do naꞌuja. ꞋEt huwa nduntꞌohne, ꞌenne tsꞌihꞌun unꞌa neꞌboolhꞌen.

Yakꞌusda yé unzoo-i nohbulh óotꞌeꞌ

¹⁹ ꞋEt yun kꞌut Asia dunne ꞌilhunahodulh-un, ꞌenne cha tsꞌiyawh hadih nohuhútni. Aquila, Priscilla, ꞌinkꞌez duyoh Yakꞌusda ba ꞌilhunaoodúlhne, ꞌenne cha soo cho hadih nohuhútni.

²⁰ Tsꞌiyawh neulhutsinke, ꞌenne cha hadih nohuhútni. Lubeshi yit nalhudahtsꞌoos. ꞋI be hadih lhudahtni.

²¹ Si Paul sichꞌoh sla be ꞌukꞌu nusúsguz. ꞋI be hadih nohdúsni.

²² NeMoodihti Jesus Christ mbene la ꞌen yukꞌelhísiꞌ-un, ꞌen Yakꞌusda ye huske-i be ookꞌehóotaltsꞌulh. O sMoodihti ꞌa cho netsꞌínyalh!

²³ NeMoodihti Jesus Christ ye unzoo-i nohbulh óotꞌeꞌ ꞌet za nohba hukwaꞌ nuszun.

²⁴ Be nóhkꞌesiꞌ-i Christ Jesus ꞌen gha, ꞌi tsꞌiyawh nohbulh óotꞌeꞌ hukwaꞌ nuszun. ꞋEt ndo honeh.