1 Corinthians 13 - Yak'usda Ooghuni

Be nékꞌetsꞌinsiꞌ-i, ꞌi ꞌukꞌenus diztiꞌ wheꞌ hoontꞌoh

¹ ꞋEt dune bughuni hiye yalhduk-i ꞌinkꞌez lizasne hiye yalhduk-i cha, tsꞌiyawh be yasduk, ꞌet hoontsꞌi be nékꞌetsꞌinsiꞌ lhústꞌih de, ꞌet de luglos cho ꞌinkꞌez luglosyaz ꞌalhgoh lhendunutsꞌo leꞌ dutisnelh.

² ꞋEt dune ba nus hoosꞌen de, ꞌinkꞌez buba whéꞌ hoontꞌoh hooyoh-un tsꞌiyawh tꞌeóonúszun de, ꞌinkꞌez khuni be tꞌeóonudzun-i ꞌet cha tꞌeooniszin de, ꞌinkꞌez tsꞌiyawh be ꞌalha ꞌuhoontꞌoh-i ꞌustꞌi de whe dzulh hoontsꞌi ꞌudun netísꞌalh de, whuz unꞌa ꞌet hoontsꞌi be nékꞌetsꞌinsiꞌ-i lhústꞌih de, ꞌet de ꞌaw hoonli lhúsloh.

³ Ndai la ookꞌedune tsinli tsꞌiyawh howa núsdla de, ꞌinkꞌez syustꞌe cha dutákꞌun huba butlꞌa yísti, ꞌinkꞌez be nékꞌetsꞌinsiꞌ-i ooyit ꞌustꞌoh de, ꞌet de ꞌaw sba kꞌelha holeꞌ ꞌaítꞌoh.

⁴ Be nékꞌetsꞌinsiꞌ-i, ꞌi gha hoonli talhódini. ꞋI gha nedzi unzoo hukwꞌunꞌa ꞌutsꞌintꞌoh. ꞋI gha ꞌaw howu lheꞌtsꞌoolhni ꞌinkꞌez ꞌaw dune ꞌuzdudilꞌi whe yalhtsꞌulhduk cha, ꞌinkꞌez ꞌaw lheꞌuzduniltiꞌ.

⁵ Ndi be nékꞌetsꞌinsiꞌ-i, ꞌi gha ꞌaw ꞌuyoonne hoontsiꞌ kꞌunꞌa bubulh útsꞌootꞌeꞌ ꞌaitꞌoh. ꞋAw whenichꞌoh hukwa ꞌuzninzun te néꞌtsꞌootꞌen ꞌaítꞌoh. ꞋI gha ꞌaw ꞌa cho tsꞌonólchꞌe ꞌaítꞌoh ꞌinkꞌez ꞌaw hoontsiꞌ-un huwun nuní uznoozut ꞌaítꞌoh.

⁶ ꞋAw tsꞌihꞌun unꞌa lheꞌítꞌoh de, ꞌaw tsꞌuhótꞌeꞌ ꞌaítꞌoh. ꞋEt hoontsꞌi ndai la khuni ꞌalhaꞌ ꞌuntꞌoh-i, ꞌi be tsꞌuhóontꞌiꞌ.

⁷ Be nékꞌetsꞌinsiꞌ-i, ꞌaw whe ꞌetsul ꞌutsꞌooneh ꞌaítꞌoh. Tsꞌiyantsuk neba ꞌalha ꞌuhoontꞌoh. Ntsꞌoh dáhoontꞌoh whe hukwa tsꞌe tsꞌúhooli, ꞌinkꞌez ꞌet tsꞌiyantsuk whúlh tsꞌúzyin.

⁸ Be nékꞌetsꞌinsiꞌ-i ꞌaw oolatoh hooloh. ꞋEt hoontsꞌi ndi be nus tꞌeoonudzun-i ꞌet ꞌetsul ꞌuwhutánelh. ꞋEt lhelhtsꞌun unꞌa yaduk-un, ꞌet cha gak whutaleh. ꞋInkꞌez ndi be tꞌeóonudzun-i, ꞌi cha ꞌetsul ꞌutinelh.

⁹ ꞋAndit be tꞌeóonudzun-i ooloh za tsꞌutꞌi ꞌinkꞌez be nus tꞌeoonudzun-i, ꞌi cha ooloh za tsꞌutꞌi ꞌet huwa.

¹⁰ ꞋEt hoontsꞌi ꞌoh de oolatoh tileh de, nkede la whusahóoltsꞌut de, ꞌet de ndet la whuloh za unli-i, ꞌi tsꞌiyawh ꞌetsul ꞌuwhutánelh.

¹¹ ꞋEt tsꞌoodun usdli daꞌ, ꞌet tsꞌoodun kꞌunꞌa yasduk, tsꞌoodun kꞌunꞌa nuní nuszut, ꞌinkꞌez tsꞌoodun kꞌunꞌa lhtahawhúsdle. ꞋEt dune susdliꞌ whe tsꞌoodunne kꞌúneꞌ zustꞌen-un, tsꞌiyawh ꞌudun neóonusdla.

¹² ꞋEt be náꞌuzdunulꞌen be dzoh naꞌdunuzꞌen léꞌustꞌoh. ꞋEt ꞌawet whusahooltsꞌut de, ꞌet whuzisꞌen-un, ꞌet soo tsꞌihꞌun ntsꞌenꞌa la tsꞌunulꞌen, ꞌet whuz unꞌa tsꞌuhooꞌen suliꞌ. ꞋEt ꞌawet whulukhun za tꞌeóonúszun ꞌet hoontsꞌi ndet la whusahooltsꞌut de, ꞌet de ntsꞌenꞌa la Yakꞌusda tꞌesunínzun, ꞌet si cha whuz unꞌa za tsꞌiyantsuk tꞌewhuntiszeh.

¹³ ꞋEt ndi tawh whúdidoh-un, be ꞌalha ꞌuhoontꞌoh-i, be hukwa tse hóodli-i, ꞌinkꞌez be nékꞌetsꞌinsiꞌ-i ꞌet ta whultꞌoh ꞌawhuz ꞌet njan whuzdla. ꞋInkꞌez ꞌukꞌenus díztiꞌ-i, ꞌi bé lhkꞌetsꞌusiꞌ-i, ꞌi ꞌuntꞌoh.