1 Corinthians 12 - Yak'usda Ooghuni

Lhelhyoo neghankat-i ꞌet ꞌilhoghun Ndoni ꞌen za tsꞌiyawh negha yúle

¹ ꞋEt ꞌawet sulhutsinke dantꞌoh-i Ndoni negha yúꞌaih, ꞌi ghun ꞌet cha tꞌeóonóhzin nohba hukwaꞌ nuszun.

² Tꞌeóonúhzun ooba ꞌalha ꞌuhoontꞌohne lháhloh inleꞌ. Ndi yun kꞌut dalhtsiꞌ hukwꞌunꞌa, ꞌet ndi ꞌukꞌeltsi yalhúlhduk-i ookꞌoh tsꞌe ookꞌúneꞌ ꞌahtꞌen ínleꞌ.

³ ꞋEt huwa noheni taóodutaltsꞌulh hukwaꞌ nuszun. ꞋAw ꞌilhoghun dune Yakꞌusda ooyughi gha Jesus Christ ꞌen untsiꞌ dooniꞌ ꞌaitꞌoh. ꞋAw ndúzdooniꞌ ꞌaítꞌoh wheꞌ hoontꞌoh. ꞋInkꞌez Ndoni ꞌen gha za tsꞌutni Jesus Christ ꞌen neMoodihti tsꞌilhꞌi.

⁴ ꞋEt lhelhyoo neghankat-i ꞌet hoontsꞌi ꞌilhoghun za Ndoni ꞌen za tsꞌiyawh negha yúle.

⁵ ꞋEt lhat-un whe neMoodihti ooba neꞌtsꞌutꞌen ꞌet hoontsꞌi ꞌilhoghun za neMoodihti ꞌuntꞌoh.

⁶ Lhat-un whe Yakꞌusda ba ꞌutsꞌootꞌen hubaꞌ hoontꞌoh ꞌinkꞌez Yakꞌusda za tsꞌiyawh ye ꞌútꞌen lhaídulhꞌih.

⁷ ꞋEt tsꞌiyawh ꞌilho whe Ndoni be hóodiltsih leꞌ hoontꞌoh whe wheni tsꞌiyawh neba hoonzoo ꞌulhꞌih.

⁸ ꞋEt ꞌilhoghun dune, ꞌen Ndoni gha khuni be whunih-i, ꞌi yugha nínꞌai. ꞋEt ꞌuyoon dune cha whuz unꞌa za Ndoni ꞌen khuni be tꞌeoonudzun-i yugha óoninꞌai.

⁹ ꞋEt ꞌuyoon cha Ndoni ꞌen be ꞌalha ꞌuhoontꞌoh-i yugha nínla ꞌinkꞌez doo cha ꞌuyoon, ꞌen cha Ndoni ꞌen ulhtus-i whe dune soo naꞌulhꞌen-un, ꞌet yugha óoninꞌai.

¹⁰ ꞋEt ꞌuyoon ꞌen ulhtus-i be huwa ꞌítꞌen tunéꞌ titꞌen ꞌet yutlꞌa hónꞌai. ꞋEt ꞌuyoon buba nus hóoꞌen ꞌet yugha óoninꞌai. ꞋEt ꞌuyoon ꞌet nahootáꞌalh ntsꞌenꞌa la buyughi lhelhtsꞌun unꞌa ꞌuntꞌoh ꞌet yugha óoninꞌai. ꞋEt cha ꞌuyoon lhelhtsꞌun unꞌa yahatilhduk-un yutlꞌa hónꞌai. ꞋEt ꞌuyoon doo cha lhelhtsꞌun unꞌa yahalhduk-un, ꞌet tꞌewhuntázin ꞌet yutlꞌa hónꞌai.

¹¹ ꞋInkꞌez ndi nduntꞌoh-i tsꞌiyawh ꞌilho Ndoni za ntsꞌenꞌa la hukwaꞌ ninzun kꞌunꞌa, ꞌet whuz unꞌa buba lhkꞌé hónla. ꞋInkꞌez ndet la butaoonínla ꞌilho Ndoni ꞌen be za ꞌuwhutꞌen.

Christ ooyustꞌe lhai unli, ꞌet hoontsꞌi ꞌilho za unli

¹² Ndiz unꞌa njan dúhoontꞌoh, dune yustꞌe ꞌilho za unli. Neyustꞌe lhat-un wheni ꞌulya whe ꞌuntꞌoh, ꞌet hoontsꞌi ꞌilho za unli. Christ ꞌen cha ꞌet whuz unꞌa ꞌuntꞌoh.

¹³ ꞋInkꞌez ꞌilho Ndoni ꞌen gha wheni tsꞌiyawh too beꞌ tsꞌulya whe ꞌilho yustꞌe tsꞌuzdliꞌ. ꞋEt Lizwifne tsinli, kꞌus ꞌudun yun kꞌut whutꞌenne tsinli, kꞌus ꞌulhnane tsinli, kꞌus oola naditnine tsinli, ntsꞌoh dantꞌohne tsinli hoontsꞌi ꞌilho Ndoni ꞌi gha tsꞌiyawh tsꞌitnaiꞌ neyulhtsi.

¹⁴ Neyustꞌe ꞌilho za unli ꞌet hoontsꞌi lhat-un wheni ꞌulya whe ꞌuntꞌoh.

¹⁵ Nulhꞌen dune ke ꞌi ꞌutni, “ꞋAw úla lhusdloh, ꞌet huwa yustꞌe oochꞌeꞌ lheꞌustꞌoh.” ꞋEt whuz unꞌa yalhduk de, ꞌet yustꞌe oochꞌeꞌ lhiloh eh? ꞋAwundooh!

¹⁶ ꞋInkꞌez dune dzo ꞌi ꞌutni, “ꞋAw ꞌuna lhusdloh, ꞌet huwa yustꞌe oochꞌeꞌ lheꞌustꞌoh.” ꞋEt whuz unꞌa yalhduk de, ꞌet ꞌuyustꞌe oochꞌeꞌ lhiloh eh? ꞋAwundooh!

¹⁷ ꞋEt dune yustꞌe tsꞌiyawh ꞌuna unli de, ꞌet de ntsꞌenꞌa suba hoonliyaz dótsꞌo? Kꞌus yustꞌe tsꞌiyawh ꞌudzo unli de, ꞌet de ntsꞌenꞌa suba hoonli ꞌoolhtsun? ꞋAw ꞌuhótꞌeꞌ ꞌaitꞌoh!

¹⁸ ꞋEt ꞌinka Yakꞌusda neyustꞌe lhat-un wheni ꞌulya yulhtsi, ꞌet whuz unꞌa hukwaꞌ ninzun ꞌinka ꞌet ꞌúyinla.

¹⁹ Ntsꞌenꞌa suba ꞌilho za ooleꞌ? ꞋEt ꞌúja de, ꞌet ntsꞌenꞌa suba yustꞌe ooleꞌ? ꞋAw ꞌuhótꞌeꞌ ꞌaitꞌoh!

²⁰ ꞋEt whe la ꞌuyustꞌe lhat-un wheni ꞌulya unli ꞌet hoontsꞌi ꞌilho za unli.

²¹ ꞋInkꞌez ꞌuna ꞌula, “ꞋAw nkaꞌ nooszin ꞌaítꞌoh,” dooníꞌ ꞌaitꞌoh. ꞋInkꞌez cha ꞌutsi ꞌuke, “ꞋAw nkaꞌ nooszin ꞌaítꞌoh,” dooniꞌ ꞌaitꞌoh.

²² ꞋEt kꞌus ndi ꞌuyustꞌe whuloh tube tetsun unli ꞌuzninzun ꞌet hoontsꞌi ꞌi ooyit ꞌaw ꞌutsꞌootꞌeꞌ ꞌaítꞌoh.

²³ ꞋInkꞌez ndi ꞌuyustꞌe whuloh ndai la ꞌaw lhdítiꞌ ꞌuzninzun, ꞌi ꞌuntꞌoh ꞌon nus unzoo ꞌinkꞌez sóo neꞌtsꞌoolhꞌen hubaꞌ hoontꞌoh. ꞋInkꞌez ndi ꞌuyustꞌe whuloh-i ndet la ꞌaw dune nalhtsꞌet huba lheꞌhóozooꞌ ꞌi ꞌukꞌenus sóo neꞌoolꞌen hubaꞌ hoontꞌoh.

²⁴ ꞋEt ꞌuyustꞌe soo otꞌen de, soo ꞌúntꞌoh. ꞋEt hoontsꞌi Yakꞌusda tsꞌiyawh lhkayánla. ꞋEt whe la ndai la ꞌuyustꞌe whuloh ootoh huyooloh-i, ꞌi ba ꞌon nus ooba idíztiꞌ kꞌunꞌa ꞌuyínla.

²⁵ ꞋEt diz unꞌa yustꞌe ꞌaw lhkꞌeookat ꞌaítꞌoh. ꞋEt hoontsꞌi ndai la yustꞌe whuloh tsꞌiyawh lhgha hudli.

²⁶ ꞋEt yustꞌe whuloh ꞌilho hoontsꞌi dzoh nuzut de, tsꞌiyawh ꞌalhgoh dzoh nudeh. ꞋEt ꞌilho yustꞌe ooloh hidílhtiꞌ de, tsꞌiyawh ꞌalhgoh lhba hóontꞌiꞌ.

²⁷ ꞋEt whuz unꞌa za nohni cha Christ ooyustꞌe ꞌahtꞌoh. ꞋIlhone ꞌahli whe ꞌi yustꞌe ooloh ꞌahtꞌoh.

²⁸ ꞋInkꞌez ꞌilhunaoodulhne butoh, Yakꞌusda ꞌutahábanla whe whélꞌaꞌne, ꞌenne ꞌudechoo nébuninla. ꞋEt nus hooꞌenne whulh nat-un nébuninla. ꞋEt dune hodulhꞌehne whulh tat-un nébuninla. ꞋEt ꞌon ꞌat-un huwa ꞌítꞌen túneꞌ ꞌutꞌenne nébuninla. ꞋEt ꞌon ꞌat-un dune soo naꞌyulhꞌenne nébuninla. ꞋEt ꞌon ꞌat-un ꞌuyoonne laꞌ ꞌutꞌenne nébuninla. ꞋEt ꞌon ꞌat-un dune moodihne nébuninla, ꞌinkꞌez whulohne lhelhtsꞌun unꞌa yahalhduk nébuninla.

²⁹ ꞋEt wheni tsꞌiyawh eh whélꞌaꞌne tsinli? Wheni tsꞌiyawh eh nus hooꞌenne tsinli? ꞋEt wheni tsꞌiyawh eh dune hodulhꞌehne tsinli? Wheni tsꞌiyawh eh huwa ꞌítꞌen túneꞌ ꞌuztitꞌelh?

³⁰ ꞋEt wheni tsꞌiyawh eh netlꞌa hóoltsꞌut dune soo náꞌtsꞌulhꞌen? Wheni tsꞌiyawh eh lhelhtsꞌun unꞌa yaztilhduk? Wheni tsꞌiyawh eh lhelhyoo khuni tꞌeznuzih netlꞌa hóoltsꞌut? ꞋAwundooh!

³¹ ꞋEt ꞌukꞌenus ꞌuzooꞌ-i negha ntꞌai-i soo cho hukwaꞌ nuhzun, ꞌet hóontsꞌi ꞌon nus hoonzoo-un, ꞌet whunóhuntistun.