1 Corinthians 1 - Yak'usda Ooghuni

Yakꞌusda ba ꞌilhunaoodulhne keyoh Corinth tsꞌe, Paul hadih ꞌubulhni

¹ Si Paul Yakꞌusda hukwaꞌ ninzun kꞌunꞌa, ꞌi be Jesus Christ oosalꞌaꞌ-un suhutni, ꞌinkꞌez neulhutsin Sosthenes huyulhni, ꞌen cha.

² Keyoh Corinth tsꞌe Yakꞌusda ba ꞌilhunaoosdilne hinli, nohni ndi ꞌudustlꞌus kꞌut nohtsꞌo kꞌeꞌusges. Christ Jesus ꞌen oochꞌeꞌne ꞌahli ꞌinka ꞌet whe Yakꞌusda ba ꞌudun nenohninla. Yakꞌusda oochꞌeꞌne nohuwhutni. Nohni ꞌinkꞌez mbene la neMoodihti Jesus Christ yooziꞌ be yutsꞌu tedudlihne, ꞌenne cha Yakꞌusda oochꞌeꞌne ꞌuhintꞌoh. ꞋEnne buMoodihti unli ꞌinkꞌez wheni cha neMoodihti unli.

³ NeBá Yakꞌusda ꞌinkꞌez Jesus Christ neMoodihti tsꞌun nohba tenadusdli ꞌet whe nohdzi doghel ꞌinkꞌez ye unzoo-i nohbulh ootꞌeꞌ.

Yakꞌusda ꞌen gha tsꞌiyaintsuk nohghaltsꞌut

⁴ Jesus Christ oochꞌeꞌne ꞌahli ꞌet huwa Yakꞌusda ye unzoo-i nohghaltsꞌut. ꞋEt huwa sYakꞌusda tsꞌun ꞌahoolhyiz musi dusni.

⁵ Yakꞌusda ye unzoo-i nohghaltsꞌut. ꞋEt huwa ꞌen ghun tꞌeoonihzin ꞌinkꞌez ntsꞌenꞌa la ooghu yalhduk, ꞌet whuz unꞌa ꞌen gha tsꞌiyantsuk whe ꞌon nus unzoone suhliꞌ.

⁶ Ntsꞌenꞌa la Christ ghun nohdasniꞌ-un, ꞌi tsꞌihꞌun unꞌa nohdzi yudiltsꞌut.

⁷ ꞋEt huwa ꞌaw hoonliyaz nohgha untꞌai-i ꞌaw nohba ndukw lhiloh whe neMoodihti Jesus Christ netoh be hoodutaltsilh-un, ꞌet hukwa tsꞌe hooli.

⁸ ꞋEt ꞌudekꞌez dzin whutsꞌun, ꞌet ꞌen gha be tsꞌilhtus-i be nudutalhyalh ꞌet whutsꞌun. ꞋEt whe la neMoodihti Jesus Christ oodzin de, ꞌet dzin ꞌaw be nohkꞌeholtsꞌit-i hootaloh.

⁹ Yakꞌusda ꞌaw nohla dootnih ꞌaitꞌoh. ꞋEt huwa duYeꞌ bulh ꞌilho oohleꞌ ha nohkaꞌ daniꞌ. NeMoodihti Jesus Christ ꞌen ꞌuntꞌoh.

Lhchꞌaz úzdotni-un Christ neba hukwaꞌ ninzun eh?

¹⁰ Sulhutsinke, neMoodihti Jesus Christ ꞌen booziꞌ gha nohtsꞌu tédusdlih, ꞌet nohnihchꞌoh nohtoh lhchꞌa natihdulh whuchꞌa, ꞌet huwa nohni ꞌilhoh kꞌunꞌa za nuni untihzut nohtsꞌu hukwaꞌ nuszun. ꞋEt whe ꞌilhone ꞌahli hukwꞌunꞌa ꞌutihnelh ꞌinkꞌez tsꞌiyantsuk whe lhgha nuni untihdeh ꞌinkꞌez lhkꞌunꞌa za ꞌutihtꞌelh.

¹¹ Sulhutsinke Chloe ooyoh dilhtsꞌine, whulohne, ꞌenne bula toh tsꞌe nohni lhedahdulh-un whulh ꞌúdastsꞌo.

¹² Njan ꞌet ꞌuwhudusni, whulohne nohtoh njan duhutni, “Paul oochꞌeꞌ usdli,” kꞌus “Apollos oochꞌeꞌ usdli,” kꞌus “Cephas oochꞌeꞌ usdli,” kꞌus “Christ oochꞌeꞌ usdli,” ꞌet whuz unꞌa hukwa lhedahdulh.

¹³ ꞋEt tsꞌihꞌun ꞌuhoontꞌoh nuhzun eh? Christ chꞌaz ditni eh? Kꞌus Paul ꞌen eh tulalhgus kꞌut nohba dazsai? Kꞌus Paul booziꞌ, ꞌi gha eh too be ꞌulhya?

¹⁴ Yakꞌusda musi dusni whe nohni nohtoh ꞌaw ꞌilhoghun hoontsꞌi too be lheꞌusdlel wheꞌ hoontꞌoh. Crispus ꞌinkꞌez Gaius ꞌenne za too beꞌ busdla,

¹⁵ doo ka whulohne ꞌuhudooniꞌ, sichꞌoh sooziꞌ gha dune too beꞌ ísꞌen hudooniꞌ tilah.

¹⁶ ꞋInkꞌez Stephanas ooyoh dilhtsꞌine, ꞌenne cha too beꞌ busdla. ꞋUyoonne cha tilah too beꞌ ꞌusdla ꞌet ꞌaw whunalhuzuzni.

¹⁷ ꞋAw dune too beꞌ oosꞌen huba iloh whe Christ whuz de sutilhꞌaꞌ. Khuni unzoo-i be bubulh yatisduk huba ꞌusinla. ꞋAw dune khuni whunih be iloh njan nohbulh yasduk, doo ka la Christ ootulalhgus ꞌantsꞌi ꞌuntꞌoh ooleꞌ.

Yakꞌusda ye ulhtus-i ꞌinkꞌez ye whunih-i, Christ ꞌen ꞌuntꞌoh

¹⁸ Mbene la nintaꞌnisdilne ndi khuni tulalhgus ghun ꞌenne whusni khuni za buba yinli. ꞋEt hoontsꞌi wheni ꞌi be uzdutijihne tsꞌooleꞌ hubaꞌ hoontꞌoh, ndi khuni ꞌi Yakꞌusda ye ulhtus-i neba ꞌuntꞌoh.

¹⁹ ꞋEt whuz unꞌa Yakꞌusda ooghuni ꞌukꞌeguz, “Whunih naꞌdudilꞌine, ꞌenne hiye whunih-i musai tiselh, ꞌinkꞌez mbe la tsꞌiyantsuk tꞌeooninzunne, ꞌenne hiye tꞌeooninzun-i gak tiselh.”

²⁰ Ntsꞌe ꞌuhoontꞌoh whunihne hoonli? ꞋInkꞌez ntsꞌe ꞌuhoontꞌoh Moses be ꞌudustlꞌus ꞌukꞌu nunáguzne hoonih? ꞋInkꞌez ntsꞌe ꞌuhoontꞌoh ꞌukꞌenus whunih naꞌdunudzunne hoonli? ꞋEt ꞌalha ꞌuhoontꞌoh ndai la ndi yun kꞌut whutꞌenne ye whunih-i, ꞌi Yakꞌusda tsꞌiyawh be tsꞌuwhusnih yulhtsi? A, ꞌalha ꞌuhoontꞌoh.

²¹ ꞋEt huwa Yakꞌusda whunih whe ꞌuntꞌoh ꞌet huwa whunenulhtun, ndi yun kꞌut whutꞌenne, ndai la hiye whunih-i, ꞌi be ꞌenne ꞌaw Yakꞌusda tꞌehinuzun. ꞋEt kꞌus ndi khuni unzoo-i ooba ꞌalhaꞌ lheꞌhootꞌohne, ꞌenne buba whusni kꞌunꞌa be yatsꞌulhduk leꞌ hoontꞌoh, ꞌet hoontsꞌi ꞌi be Yakꞌusda hoontꞌiꞌ whe mbene ooba ꞌalha ꞌuhoontꞌohne, ꞌenne hubulhyih.

²² ꞋEt Lizwifne huwa ꞌitꞌen-un za hukonuta ꞌinkꞌez ndunne Greekne, ꞌenne hiye whunih-i za haꞌ hoozilhtsꞌai.

²³ ꞋEt hoontsꞌi wheni Christ tulalhgus kꞌut dazsai-un, ꞌet za howu yatsꞌulhduk. Lizwifne ꞌankwꞌus buba dzoh suliꞌ, ꞌinkꞌez ndunne Greekne, ꞌenne ndi khuni whusni buba yuzdliꞌ.

²⁴ ꞋEt hoontsꞌi mbene hudutijih ha bukaꞌ daniꞌ Lizwifne ꞌinkꞌez Greekne, Christ ꞌen Yakꞌusda ye ulhtus-i buba unli, ꞌinkꞌez ye whunih-i cha buba unli.

²⁵ Yakꞌusda ye whusni-i, ꞌi dune ye whunih-i, ꞌi anus ꞌultus, ꞌinkꞌez ndai la Yakꞌusda ye tetsun-i, ꞌi dune ye ulhtus-i, ꞌi anus ꞌultus ꞌet huwa.

NeMoodihti ꞌaw ꞌen za ncha tsꞌóolhꞌeꞌ hubaꞌ hoontꞌoh

²⁶ Sulhutsinke nohni ꞌoh daꞌ dutihjih ha nohkaꞌ daniꞌ inleꞌ, ꞌet dantꞌohne ꞌahli tꞌeoonuhzun. Yun kꞌut whutꞌenne whuz unꞌa ꞌuninzunne tsꞌiyawh, ꞌaw lhane iloh nohtoh duba whunihne unli, ꞌinkꞌez ꞌaw lhane iloh nohtoh dune be hoolhtus unline, ꞌinkꞌez ꞌaw lhane iloh nohtoh dune nchane unli.

²⁷ ꞋEt hoontsꞌi Yakꞌusda hukwaꞌ ninzun, ndi yun kꞌut ndai la whusni-i, ꞌi be ndunne duba nawhutnihne, ꞌenne yooya ubutilhtselh. ꞋInkꞌez ndi yun kꞌut ndai la huye tetsun, ꞌi be duba naltusne, ꞌenne yooya ubutilhtselh.

²⁸ ꞋEt telꞌen whe whuzdli, ꞌinkꞌez mbe la yuchꞌa yo nenilya, ꞌenne Yakꞌusda ꞌutahabanla. ꞋInkꞌez doo cha ndai la ꞌantsꞌi unli hoontsꞌi, ꞌi cha ꞌutahayanla, ꞌi be ndai la yun kꞌut ꞌuntꞌoh unli-i, ꞌi be gak yutilhtselh. ꞋEt whuz unꞌa Yakꞌusda hukwaꞌ ninzun.

²⁹ ꞋEt whe ꞌaw ꞌilhoghun hoontsꞌi Yakꞌusda nalh ncha naꞌdudolꞌeꞌ ꞌaitꞌoh.

³⁰ ꞋEt huwa Yakꞌusda gha Christ Jesus ꞌen oochꞌeꞌne ꞌahli. ꞋEn ꞌuntꞌoh Yakꞌusda gha be tsꞌuwhunih-i neba yulhtsi, ꞌinkꞌez be tsꞌihꞌun unꞌa ꞌuhoontꞌoh-i cha neba yulhtsi, ꞌinkꞌez ꞌen gha ꞌudun neneninla, ꞌinkꞌez naneoket cha ꞌuja.

³¹ ꞋEt ꞌukꞌeyanguz whe ndutni, “Mbe la ncha naꞌdudutalꞌeꞌ hukwa ꞌutꞌen, ꞌet ꞌaw ꞌuhotꞌeꞌ ꞌaitꞌoh. NeMoodihti ꞌaw ꞌen za uzdólhtiꞌ hubaꞌ hoontꞌoh.”