Tito 2 - Sinia' Jlamtis 1994

Inka'neyasajnaye siunie 'es ti tajle pi Sinia'

¹ Siuti am ja k'iejliyeyi pa jawoyi, 'esiji ka 'wena je 'asap'e ki iyo ni inka'neyasajnaye ti 'es, tajle ni Sinia'.

² Siuti a'lej jawejna'm napo kijilas, ka kiak awoyepi 'ate, “Niwonayi'ate iyo siunapo jikijmaye 'es, asts'oniye jansets'ik'i, ke inesi'lie'yi siunie jawoyeyi; astankiujnieye ja'wanjliyi wita'm, kia'iyojliyi ni asemijnaye jla'yi ti jatoma ilia'm siunie aswet'ia ti poyeta.”

³ Jlampet siunapo asejnia ti kia'iyo isijlijyi'n kiak jawonjliyi ti jajloye, ka wonayipe 'ate, “Ni'wenki'n siuti jinilesaniji jitieyi'i pa Sinia', 'esiji ka ataj je ajotiej napo as'lejwas. At'es ja ke wokiye. Woyeyi ni 'es, 'nakayi ti kiak jawo pet siunapo in'yena jawoyi ni 'es.

⁴ Siunapo jlosie, 'esiji ka 'eyasajne'n, 'nakayi ti janemi'n napo jilis, siu'neje napo jijwa'yis.

⁵ 'Esiji ka'ye'en siunie iyo ka woyi; 'esiji ka inilesaniji; 'esiji ka'yena ni ji'wet, jankimk'iji'n, jla'yi ti jamp'elisijne'n napo ijia; 'yina ti yi kiajwe napo jijwa'yis, 'esiji ka ink'iuye.” Siuti kiak jawo napo jlosie ti jijwa'yis po', ja lajk'ipa ka inets'e ka inlaki siuniwa Sinia' jlamtis.

⁶ Jloye napo jwemik ka'ye'en siunie iyoyi.

⁷ 'Wenkina wikie'eyi siuniwa isis ti jiwoyi. Siuti jit'iyasanataja'n ká anijwekia'm ti i'nes jitieyi'i pi Sinia', jla'yi ti ijiate siunie jiwoyi.

⁸ Lesaniji siunie jiwone niwa amtis ti jlamtiyetaja niwa Sinia' jlamtis, 'nakayi ja ke inets'e paka iwo'ate, “Je 'es siunie jlamtiyi.” Siuti kiak jawo amtis jajnajyi, ka kia'iwoyenie'e pet siunapo ti atajiejwas, siuti ja ke 'najane paka iwone ka i'najwejla'ana'ak'i wita'm, kajeyepa ijwil je 'es ni awoki.

⁹ Siunapo inkawos wone pet 'ate, “K'iuyeyi napo aska anechiyasas siunie iyo ka woyi. Ke injwesisa k'iye siuti iyo asosikie, ká akiujlie siuti po' pa itiajlat'ase'm.

¹⁰ Siupuwa jikijmatis pi aska anechiyas, ká akajlanayi 'wanjliyi ka 'wena. 'Wenkinayi pet siuti jiwoyeyi ni 'es, jla'yi ti jiliyeyi ni aske' ti pajk'i ti je 'es. Siuti kiak janiwonayi, jan'wenana'a napo i'nio' ti ijiate ti 'es ni inka'neyasajnaye ti ijwil ni Sinia' ti Sijwajieti.”

¹¹ Sinia' pajk'i ti 'yakajanitk'i siunie ti wuj ti ip'ilisi'n wikie'eyi napo i'nio', kajeyepa ti iyojonk'iye ka injwa'a.

¹² Siuti kasp'elisi'n, kajeyepa ti kasts'eyasane ka iliki siunie je 'es siuniwa kasteliaja ka iyoki ti yi'i ni ajnat. 'Nakayi ti ja'yena siu'niwa jlomas siunie jayoki, jla'yi ti jajnajyi siunie janiwonaja jla'yi ti ja'yukk'i siunie iyo ni Sinia'.

¹³ Naka'ne ni siunie iyotaja ka iyoki ka inijijwiyejenk'iye janak jloma ti 'es ka napitiemet pi Sijwajieti Jesús, Sinia' ti wuj.

¹⁴ Jlam ti ininekial ti ijioyi ni jiliaye, jakayi ti tiliana, lapakawo ti iyo ka kasjwajiete niwaka siuniwa je isis. Initiajnat wikie'eyi ki iyo niwa sakeyis, ja'nakayeyi ti ja sama siunapo jika kia'lis ti 'wena ijiut'e, ti awokink'iye ka iyoki siunie 'es.

¹⁵ 'Niwaka ti jaka'neyasane. Kajanit ki iyo ni ajweye ti tekiajla'a pit, jalaskini ni 'es ka woyi, jloye ka leyi ti iyo ni je 'es. Je 'es ka je tiwok ajaye, 'esiji ka ink'iu'wa'm.