Santiago 3 - Sinia' Jlamtis 1994

Iyo ni inkiwet

¹ I'lijwas, je 'esiji ka ijiatayi ka 'lojwa siunapo ti janiwojwana inka'neyasajnawosa', 'yina ti 'najanayi pi jiwonayi siuti sa'am ti 'eyasanaja'n napo i'nio' je ijiat ka Sinia' ke kas'ye'en siojona jloma ka netiejenie'e.

² Awoyi ti kajeyepa ti je ijwienjli paka je inkameje'n siunie iyoyi, kaswikie'eyi. Jlampet siunie ti je 'yakajme'n siunie iyoyi, nak ijiate ti 'es ni i'nio', nak 'yijenayi pi iyone pet ti to'm ilia'm ni iyo ni t'isie'n.

³ Ataj naye'yi siunie iyo niwa a'lentas. Ti awoki ka sama sa'am siupa ka iyonaja, nak it'imina ti awok jikiwet t'akaye, sekyi'i ti asakanaja siunie jayonaja ti awak'i ape'e.

⁴ Siuniwa kasejkana kia'iyo. 'Wanjliyi ka wujwa japa, 'wanjliyi 'neje ka wujwaja pa jlajwu, 'yina ti po' siojona jikie' jlase' jle' iyo'ate timón, janaka'ne ti isime napo jiwos siupa iyo ka nekiajli jana kasejkana 'yakaj'le.

⁵ Kia'iyo ni sikiwet. Ijiate ti je 'esietajayi jiwa ni ts'isie'n, 'yina je iyojliyi ti initoniti ki iyo ti isinitieja'm siupi iyoyi. 'Yina siunie jwat ti t'otieja'm ni 'la'an. Je iyo ka je intej'we pi 'la'an ti je jlasiyeta.

⁶ Siunie sikiwet iyo'ate ni jwat. Ji'wet pet ni je 'es ti yi siwa'm ti 'yijene pi iyone ka inkajyi'n paka i'nioye. Lapakawo ti naka jla'am ni ji'wet pet ni imosik ti ijliane'e'ni wikie'eyi niwa jlomas. Jak je iyoyiji ti jijweye po' ni i'nio', iyoyi ji'wasankiyeja' ti jlomas ti yat'e.

⁷ Ni i'nio' ti iyo ka iwo jiliajwaja' ka ne'yi siuniwa pini' jwesis ti yi 'lajni, 'yijene pi iyone, ni'ne ka niwakaye ajwejnas, ni'ne ka niwakaye injlajas, siu'neje niwa i'niat lajlik'i jlele pet. Ijiate yin'ne jlajap ni i'nio'.

⁸ 'Yina siunie ajwe'el sikiwet, lajk'ipa ka i'nioye ka inikajleje'e ka je inekk'i. Naka ni siunie ti wuj ti je 'es ti istie' ka 'yakama ape'e, jla'yi ti janaka 'najlati ti ijioyi ti initiajnat ni i'nio'.

⁹ Sikiwet nak tajle ti awunitie ni Sinia', jla'yi ti akienaja ti si'lij je 'esi napo si'lijwas napo Sinia' jilisajna' jla'yi ti napok jipelis.

¹⁰ 'Wena je taj'le niwaka ti isis siu'neje niwa je isis samtis ni sikiwet. I'lijwas, nak wuj ti je 'es.

¹¹ 'Yejne'n, je ti'wena japaka i'niata ka inkajaje, jla'yi ka payeje pi jiwa ka nijle'en.

¹² Siojona higok ti iyoyeta jlaye, ¿mi ja jlaye puwa olivok jla'? Ni'ne ka siojona ts'ejniek jit'io ¿jlaye jana higok jla'? I'lijwas kiak jawo siunie i'niat ti inkaje, je nak ka titiajlajaje jana i'niat ti tosijyi.

'Najankijnieye ti tal poliyi

¹³ Siuti po' ni ti asa'am ti 'yije'en, jla'yi ti itiant'ieje siupi 'es siu'neje ni je 'es niwa wask'i'nelaja, 'esiji ka je inijweki ti jlam ti 'yakajli ti iyoyi ni 'es. 'Esiji ka je initoniti siunie iyo ni 'yijene.

¹⁴ Jlam ti kiak jawoyeyi jani'yenayi pa yit'iyi pi ijiate ti 'yije'en, siu'neje ti ijiulsinaja'm ni jikiecha ni iyo ti 'yije'en. 'Yina ti niwaka ti je inkanitiejyi'n. Je 'esiji ka anitonitieyi, 'yina ti je ijiatk'i siunie jiwoyeyi.

¹⁵ Kajeyepa siunie 'najankijnieye ti kia'iyo, je tal Siniayi. Tajle ni i'nio' ni jitienkiujnieye jla'yi ti tajle jla'am ni imosik.

¹⁶ Siuti kiak jiwoyeyi ti jinikawona', jla'yi ti jinitonitiejyi'n ti jijwe'el ka 'najanajyi'n, nakaye'eje ti it'imina ti inetianak'iji'n, sekyi'i ti jiwoyeyeyi'iji wikie'eyi siuniwa askeyis ti je isis.

¹⁷ Jlampet siunapo ti ijiate ti tal Siniayi siunie iyo ti 'yije'en, napokaye pet ti kia'iyo ti siunie inia'an ti yiyi ti 'najleje'n ni jlosik; je ti'wena ka iwoyi jijliak'aliye puwa wask'i'nelaja, 'wenajliyi ti 'yakama; siupi ijia iyo kawoyi its'iuye. Takap'ijliuskijyi'n; je ti'wena paka jikeye ka je 'esie iyom wita'm papo 'namaja, jla'yi ti je yinjlajap naka nik'emijieye; isis napo i'nio'.

¹⁸ Siunapo ti ijialasink'iye naka, ka ts'ijiye inses. Ijiate napok 'yakamaja pet ti iyoyi ni 'es, ti 'yakatate ni inkamankiye.