Romanos 3 - Sinia' Jlamtis 1994

¹ Ent'a po' pi i'nio' iyo'ate, “¿Ten jiat'eje pa 'esi pa ti iyo Judíoja?”, ni'ne ka wo'ate pa, “¿Ten siupa 'yakajliji pa ti kiak iniwone ti t'isie'n jiwa tejwak'i?”

² Ajwel'ni laja po', je jlase' ni 'esi napo Judíojos. 'Nelanjie'e Sinia' je isiwita ka 'wena ijnoti kiwa jlamtis iyone.

³ Ent'a po' 'neje pi iyo'ate, “¿Tepat'e janwo ka kia'iwo ka poyeta papo ka inleyi ni 'es? ¿Sinia' kiakt'e jawo pet ti janleyi papo i'nio'?”

⁴ ¡Jeyi kat'aja! 'Wanjliyi ka kia'inwoyi ni i'nio' ti iyoyi naka ti iyo sintiye, 'yina Sinia' je paj pet kanlek'i ni siunie iyo ti je tak'emiyeje wek siuniwa jlamtis iyo. Jak je iyoyiji siuniwa Sinia' jlamtis ka je iwo'ate: “'Yaka'niona, amtis niwak 'yakajanit'i atepe'e ti a'm ti ijiate ti i'nes, Jla'yi ti a'm ti ja 'an pijia'm siuka kia'iwotajanie'e ka injwel kan'ye'en napoka ti injwel je i'nes.”

⁵ Ni'ne ka poye paka i'nioyi kawo'ate, “Siuti 'esiji ti awoki ni siunie je 'es ti awoki, 'yina naka ti 'yakajanit ni Sinia', ti ijiate jla'am ti tijnajyi, ¿tepa si'lij jayonaja ilia'm siukia ka kiak iwotajanie'e ti jansats'e'm? ¿Jot'e ka yok'iate, Wuj ti je 'es ni Sinia'”?

⁶ ¡Kiak ja ke iwo! Kajeyepa siut'itie ka kia'iwo ka Sinia' je ijnajyi, ¿tepat'e janwone kan'yenta pet napo i'nio' ni jitis iyoyi?

⁷ Ni'ne ni i'nio' jawo'ate, “Napo i'nio' iyunit ni Sinia' kajeyepa ti iyoyi ni siunie ijiatk'i, 'yina ni siunie ti ijiate ti tajleyi naka ti awoyi niwa 'yaka sintijieyis. Ijiatjliyi, ¿yot'iyi'ni ti sijwe'el ni Sinia' ti itis po', ti awoyi ni ijiuski'la?

⁸ Siuti kiakt'i iyoyi nakp'an ijiate ti 'es ka iyoki ni je 'es, siuti jayokink'iye ni 'es.” Po' napo i'nio' ti samtiyis ti ijwil ka 'yiyasane napo niwaka. ¡'Yina Sinia' je ijiat ka je insa'ak'i napoka, ti ja tenaja naka!

Kaswikie'eyi ti sitis po'

⁹ Siuti kia'iyo, ¿ti sa'am ti Judíojosts'e'm samt'e ti a'na ape'e siunapo 'wenayi? ¡Jeyi! Jlam'ne pajk'i ti a'wena ti sam ti Judíojosts'e'm, siu'neje napo ti je Judíojos, lajk'iyipa ka int'ane pijia'm. Kasjnojlits'i ti awak kiajwe ni siunie je 'es.

¹⁰ Jlam'ne ni siuniwa Sinia' jlamtis iyo'ate: “Tiwet'ianaja ka injwanjli ka ne'yi paka 'esie'.

¹¹ Lajk'ipa ka jlosik poye, lajk'ipa ka inwojyi'n pa Sinia'.

¹² Je ijwienjliyi paka 'wanjliyeje ni Sinia' ji'niayi, wikie'eyi ti iliyisk'i. Ji'wet ijwienjli siunie iyo ti laj lajaye. Lajk'ipa ka 'esie'.

¹³ Siuniwa jlak ji'niajia iyoye pet 'ate siuniwa t'o'l napo i'nio mases 'alk'i ape'e, siuniwa jika sintijieyis talk'i nak jikiwet. Yink'i kiajwe niwa jipasta siunie inlayi ti 'yakawisa'n ti tajle ni injla.

¹⁴ Siuniwa jikiwitawa tipoyijits'i ni siunie pajyi ti ji'lij iliyajapk'i napo ijia ti iyo jiwet'iaye.

¹⁵ K'ajlijyits'i 'neje ti iyo ka inkalankijyi'n,

¹⁶ ajnat pi iniuyits'i, wuj ti iliaki napo i'nio' ti initiajnat ti k'iejliyi pi iyone.

¹⁷ Ijiate ti je 'yijenisi paka iwonisi ni siunie inkamankiye.

¹⁸ Ijiate ti je jnots'ina pa Sinia'.”

¹⁹ 'Nak siunie Sinia' jlamtis ijwi'il. Kasts'ajane pa awonaja ti siuniwa Sinia' jlamtis yi'i ni ji'wet napok ijwi'il siunapo ti iyoyi, 'nakayi ti ja lajak'ipa ka intamti ka wo'ate, “Ya'am laj itisa'”, jla'yi ti ja wikie'eyeyi ti Sinia' ja ke injla'an ti jan'ye'en siunie jitis iyo.

²⁰ Kajeyepa ti Sinia' ja ke inets'e paka inlesajne'n 'wanjliyi ka kia'iwo ka na'am ape'e ki iyo ki inka'neyasajnaye. Ka kiak je iwoyi pa ti 'nakata wek jla'am ti tejeye ka kasts'ajane paka iyonaja ti sa'am ti i'niolts'e'm ti sakeyis po'.

Lapakawo ti nak it'imina ti tijwa' pa ti jitienkiujnieye po'

²¹ 'Nakayi Sinia' ikajanit siunie iyo ti ilisajne'n napo i'nio', 'yina je naka inka'neyasajnaye ka intajle, siuti ja'yena niwaka Sinia' jlamtis yi'i naka inka'neyasajnaye siu'neje napo injwejlanawos t'ipi jip'esijna', sekyi'i ni siunie Sinia' iyoyi.

²² Sinia' jla'am ti ilisajne'n siunapo ti je 'yakakiuyis ni Jesús ti Injwajieti Sinia' jijliujwanik. 'Yina kiak iyone 'neje wikie'eyi siunapo je 'yakakiu kajeyepa ti je i'ye'en paka t'oniyeja' paka i'nioye',

²³ 'yina lajk'ipa ka 'wanjliye'e ka je iwoyi ni jloski'la; wikie'eyi je jnanjlajape ni Sinia' ki iyo ti 'es.

²⁴ 'Yina Sinia' je lajk'i ki iyo ni jikap'ijliuskiye, it'iminayi ti isisk'i, siu'neje ti je t'aj'l ape'e japa ka lajaye, ka lajak'i ki iyo pi Sijwajieti Jesús ti jla'am ti initojmat.

²⁵ Sinia' jlam ti iwi'in pi Sijwajieti ka insa'ni ki ji'woyis, sekyi'i 'ya'al. 'Yina ti iyoyi ji'niayija' napo i'nio', lapakawo ti iyo ka inetiajnat ni jitis iyo jla'yi ka jiwak inojwi ni Sinia', iyo ti je 'yakakiuyis ni Sijwajieti. Jak je iyoyiji'ni 'yakaja ti tijnajyi ni Sinia', isiwaliye'e niwak inkeyis ti pajk'i, ijiatjliyi lajak'i paka iwo.

²⁶ Siu'nie jloma 'yaka ni Sinia' ti tijnajyi, 'yina ti ilisajne'n napoka ti je 'yakakiuyis ni Jesús.

²⁷ Ijiatjliyi, ¿ma po' siupa ti je iliyi ti initoniti ni i'nio'? ¡Lajk'ipa! ¿Yot'iyi'ni 'nakat'iyi pet ti ya'm ape'e ki iyo ni inka'neyasajnaye? ¡Jeyi kat'aja! 'Nakayi jla'am ti je takakiuni nak it'imina.

²⁸ 'Yina kiak iyoyiyi, Sinia' je nak inka'neyasajnaye kant'emina ka injloyi ni i'nio' ka inlesajne'n, 'wenajliyi jla'am siunie ti laj jikakiujnieyeja' naka ti Sinia' ilisajne'n pet.

²⁹ Ent'a ¿Sinia' napokatat'e jla'am Judíojos ti Jinia'? ¿Jet'e Jinia' 'neje pet wikie'eyi siunapo i'nio' yi' ape'e 'ni ajnat? Ijiate wikie'eyi napo ti Jinia' pet.

³⁰ Jlam'ne ijwienjli 'neje ni Sinia', lajk'ipa ka jikiechaye. Jla'am ti ilisajne'n pa yita'a pa ti jitienkiujnieye po', 'yina je i'ye'en paka t'oniyeja' pa ka i'nio' ka Judíoja' ni'ne ka je Judíoja'.

³¹ Siuti kia'iyo, ¿ti sitienkiujnieye po' nakat'e ijliasat isia'm ni laja iyo pit naka inka'neyasajnaye ti talt'iyipi pa Moisés? ¡Ajwel'ni je'e! 'Yina kat'ajayi pet ti iyo jijweyeja'.