Mateo 6 - Sinia' Jlamtis 1994

Jesús 'yiyasane papo siunie tiwonaja ti tiwok ji'wajieta' ni i'nio' ti p'ijliusie

¹ “Siuti jiwoyeyi siunie 'es jitieyi'i napo i'nio', ke nakaye ti janitonitieyi siunie ti jawoyejyink'iye ka in'wenaja'ni. Siuka kiak janiwonatiejenie'e, siunie Asna' ti yi' poliyi ja ke inwe'nase'm paka k'iejliyeyi ka as'wajieta'.

² “Siuti janoyeje napo p'ijliusis ti jawo 'wajieta', ká ane'ni ka ajwele ape'e napo i'nio', ká aniwone 'ate napok i'nio' ti sintijyis ti initoniti'n. Jak je iyoyi ti yiyeta 'najla'wetise, 'ni'ne ti yijits'i niwa jika'wulis jana isi', ti iyoyeta 'wajieta' napo p'ijliusis, yinayi jitieyi'i napo i'nio', ti jla'm iyo ka ti'wena ka tonitieje siunie iyoyisi. Ijiate siunie jayoyi jlam je awo, nak it'imina'aja ti ikajli naka, ti siunapo i'nio' ti ijiunitis.

^3-4 Siuti jiniuyeje ni p'ijliusie ti jiwo 'wajieta', nijweki. Ká awoyi jika'niyejayi ni akio' ni a'la'm siunie iyo ni jikijmaye ni ajweye. Ja'nakayeyijna'a ni Asna' ti i'wi'in niwaka ti jijwekieyi ti jiwoyeyi janwe'na'm pet ni as'wajieta'.

Jesús 'yiyasane papo pa 'najlaye

⁵ “Siuti jiwoye asts'ajlayeja', ká aniwonayi 'ate napok siunapo sintijyis. 'Neliaja ti takasitk'i ti iyoyis t'ajlayeja' yi'i niwa 'najla'wetis, siu'neje yi'i niwa jikatoki'l niwa jika'wulis, ti iyo ka ti'wena. Ijiate sekyi'i 'yakajlaja'ijyi naka ti tonitieje ni iyoyisi.

⁶ Siuti a'am ti jawo 'ajlayeja', jajoyena'a 'wuk kiajwe, sekjane'yi ja p'onajamna'a ka ne'yi japa jane'yi niwa jitiojwa'l jana a'wuk, ka sek enayi'ina'a ti jawo 'ajlayeja', ti janjwanjliyiji'n ni Asna' ti je ti'wena, ti sek yi'i. Siunie Asna' ti i'wi'in ni jiwoyi ti jinijwekieyi, janwe'nase'm pet ni as'wajieta'.

⁷ “Ti jit'iejla, ká aniwonaye 'ate napok siunapo je t'ekiyeje ti je isis, ti ijwi'il kawoyis t'ajlayeja', ti je ijliasat ape'e pi t'ajlaye ti iyo, kajejlikiamt'e intoyitisi'i, ijiate jla'm ti jlam t'ajlis'ni wekie'e, kajeyepa ti ijwilis ti je iliakiyisi'i'ni ti iyoyis t'ajlayeja', ja ijiatayi ka tik'iukie.

⁸ Kiak ká aniwonayi iyoyi napoka, 'yina ni Asna' pajk'i ta'a ti 'yijene pi iyone siunie jisitiana, ti je t'iejlajliyi'ijyi pi k'iejliyi ni jisitiana.

⁹ Siuti jit'iejlaye, woye'ate: Sinia' ti jle poliyi, 'esiji ka t'otata ni e'.

¹⁰ Siunie aka anechijiayas 'esiji ka inesajap. 'Esiji ka tiwoki 'ne ajnat'e siunie iyo niwa amtis, iyo'ate tiwonaja ts'iji poliyi.

¹¹ Wents'e'm siupa jatiuwa siu'nie jloma.

¹² Ka atajlatts'e'm jiwek siunie sitis iyo kasp'elisijne'n, wone 'ate awonaja pet siunapo ti po' ni yints'e'm ti je 'es, ti ap'elisinaja'n.

¹³ Ke kassena'ate ka wiekia'm niwa inkajejlasayejes, 'wenajliyi ka kasjwajiete.

¹⁴ “Siuti kiak jawoyeyi, ti astaj ja ke awunitiek'i siunie iyo'nase napo as'lejwas, 'yina kiak jawo'ijyi pet ni Asna' ti yi' poliyi, jitiej ja ke inwunitk'i siunie jiwoyeyi jitieyi'i.

¹⁵ Jlampet ti ja ke ap'elisinajyi'n napo as'lejwas ka netiajnat ni jitis ti yi' aselia'm, kiak jawo'ojyi pet ni Asna' ti yi' poliyi, ja ke imp'elisinajyi'n pet ka netiajnat ni astes iyo.

Jesús 'yiyasane siunie janiwone ni i'nio' ti iyo ka ininel'lianit

¹⁶ Siuti jininel'liajanitie ti jiwoyeyi ni asts'ajlaye, ká aniwonaye 'ate napoka napo sintijyis ti initoniti'n. Inikajanit ti je inkase'n, iniwone 'ate siunapo ti jijliak'ali po', ti iyojonk'iye ka ti'wena ti ininel'lianiti'n. Ijiate siunie jajwi'lase'm, nak it'imina ti 'yakajli, siunie ti tonitieje ni iyoyisi.

¹⁷ Siuti kiak jiwo ti jininel'liajanit, atokio le',

¹⁸ 'nakayi ti ja ke intejnisie'a'm napo i'nio' kiak jiniwone. Janajatajana'a jla'am ni Asna' ni je 'yaka ape'e, ti yi' asap ti ja 'najane. Jla'am ti i'wine siunie jiwoye ti jinijwekieyi, janwe'nase'm ni as'wajieta'.

Inkijmatis niwa yi' poliyi

¹⁹ “Ká ajwos puwa askijmatisa 'ne ajnat'e, jiwos jantojw sekyi'i jano'we, siu'neje ti kajlajnatas ja'noyi ti jankajlane'ni.

²⁰ Jla'm ijiate jla'am ka ajwos niwaka akijmatis ts'iji poliyi, ti lajk'i puwa jiwosa' ka intojw, jla'm ijiate ti je netia'n ka paja, jla'yi ti lajk'i papoka kajlajnatasa' ka 'noyi'ni ka inkajlane.

²¹ Siunie yi'i niwa askijmatis, ijiate ajosik sek yiye'e pet.

Jika kates niwa 'najwes

²² “Siuniwa sitiete 'yiniye ka janakaye, ts'ajwes jika kates. Jak je iyoyi siuti isis niwa atate, 'yina wikie'eyi pet ni 'ajwes siunie jla'al janak kates yiji.

²³ Jlampet ti je isis, kia'iyo wikie'eyi pet ni 'ajwes ti ajnatiok yiji. ¡Siuti kia'iyo janak kates ti yi' awa'm laj jlala, je jlase' pet ni ajnatiok yi' awa'm!

Ká atemisiete napo aska anechiyasas

²⁴ “Je ti'wena pa ka intemisiet papo jika anechiyasas, kajeyepa janemi'n pa janjwanjli, ti siupa kiecha jane'waja, ni'ne ka je intajla pi jikiecha siupa jikiecha pak jantajla. Je 'najanayi paka wonayi ka ijiatayiji ka awoye Aska'niona pa Sinia', siuti inteliajayi niwa askijmatis ti ji'wena'.

Sinia' i'yena napo jilis

²⁵ “'Nak ajwe'lase'm ti awo'ate, Ká awoye asjlak'aliye ti jawoye'ate, ¿Tent'ipa jats'esi? Ke injlak'aliyejyin'ni k'iye siupa jatowa', siu'neje ni ja'yayejyi'ni, siu'neje ni ja'wuyejyi. ¿Ma je t'i 'yaka'm ape'e ni laja iyo jana a'wasankiye siunie jitiujw? ¿Tepi iyo pet ni 'ajwes: jet'e 'yaka'm pet ape'e siuniwa jit'iuts'iji'n?

²⁶ 'Yejne'n niwa ajwejnas. Je ji'wen kankawijnajne'n, je ji'wen'neje kanla'ne pa ka jiwomikie' ka wakajla ka ti'wena 'neje kawo jikapiskiye. Je iyojliyi ni Asna' ti yi' poliyi ti iwijna'm ni itiujw. Astaj enayi 'ate, asja'yaka'm ape'e niwak ajwejnas.

²⁷ ¿Ent'a po' pa 'yijene pi iyone ti jwamjla'a ti ijliasate'n puwa jlomas tenaja jana ji'wasankiye ti yi' ape'e 'ni ajnat ti ijiate ti iyo jijliak'aliye?

²⁸ “¿Yot'iyi'ni ti injwesieyeyijin'ni k'iye paka as'wuye? Ji'wena' niwa a'la' jlokie, je isimatak'iji'n, jla'yi ti je tijlijne'n. 'Yina yamjli wek ti ijliask'i'ni pijia'm.

²⁹ Siupa anechiyas Salomón t'ipi kia'iyo isisieta puwa ji'wuye 'yuts'iji'n, 'yina awo'ate ti ajwe'lase'm, je ijlien'ni ka ne'yi japaka a'la' jlokieja siunie k'iejliyi.

³⁰ Jlam'ne pa Sinia', jla'am ti kiak iyone niwak a'la' jlokie ti isis siu'niwa jlomas, jlam'ne ti jlomayeta titietajayik'i jana inka'we, sekyi'i jwat itiujwa'a. 'Yina ya'am awo'ate, ¿Yot'iyi'ni ka je in'yenase'm ti asa'am ijiate ti jilists'ase'm? Janwe'nase'm ni ja 'oyets'i. ¿Yot'iyi'ni ti je ijiate ka ataj womayi?

³¹ “Ká awoye asjlak'aliye, ka woye'ate, ¿Tent'ipa jatiuwa? ni'ne ka woye'ate, ¿Tent'ipa ja'yaki? ni'ne ka woye'ate, ¿Tent'ipa ka'yuk'i?

³² Jlam'ne siunapo i'nio' je t'ekiyeje ti iyoyi ni je 'es, niwaka ti iyoyi jijliak'aliye ti jikiowe ijioyi. Jlampet ti asa'am, siunie Asna' ti yi' poliyi 'yijene ta'a pi iyone niwaka ti injwesieyejijyi'n k'iye.

³³ 'Yina nak janajnata ti ja ijiatayi ti ja atankiunie'ni ti astaj ja enayi 'ate ni Sinia' jika anechijiayas, siu'neje na iyo ka woyeyi. Je jwel ka je a'wena' pet niwaka ajwe'el.

³⁴ “Ká awoye asjlak'aliye siunie ti jiwoye'ijyi 'ate, ¿Tent'ijyi ni ja'wi'in ka jlomata? ¿Jot'e ka je ak'iujwap'eje jiwekie'e ka jlomaye siunie injwesiejejyi'n k'iye ti jiwo ka woyi? ¡Jlam'ne je pini' siuniwa wask'i'nelaja je 'najane pa ka wone!