Mateo 27 - Sinia' Jlamtis 1994

Jesús tikiniejeje pa Pilato

¹ Ti k'iejli motie wikie'eyi siojopo i'nio', pa'yijis jika anechiyasas siu'neje japo kijilas, iyoyeyisi siunie janwoyisi ti inikiujlis ape'e ka tiliana ja Jesús.

² Tilie'nitieja ti iyoyeyisi ka nekisi ti ijioyisiji ja Pilato, jla'am ti anechiyas Roma jlele.

Judas inila'nit pijia'm

³ Judas, ti jla'am ti iwi'in ja Jesús, ti i'wina ti tena'a ti jitis poyi, wuj ti jitienkiujnieye ilia'an. 'Yina yami'ni siukiwa treinta wikijniest'ejes ti yikiajle siojopo tajle, pa'yijis jika anechiyasas siu'nie japo kijilas,

⁴ ti iyo'ate: —Awoyi 'ni 'yake'. Ekialp'an ni i'nio' ka tiliana, 'yina ti laj jitisa'. Isiujlisie'ne pet ti iyoyits'i 'ate: —Nak je kasts'ajane, akimet a'am.

⁵ Judas ipi'ya wek ti kia'iyo, yameje'ni jlaja Sinia' ji'wuk jakiak wikiniet'aj ti isiajiete'n kiajwe. Sekyi'i ti yama ti inits'ejwa'n pijia'm.

⁶ 'Yina siojopo pa'yijis jika anechiyasas it'iayek'i'ni kiwak wikijniest'ejes, sekyi'i iyoyis'ne 'ate: —Siujlie'e wikiniet'aj, je 'es ka yinaja janak jiwe, niwa totie'ni wita'm ti tekiajlaja pa Sinia', kajeyepa ti laja ni 'woyis.

⁷ Jak je iyoyiji'ni inikiujlis ape'e jakiak wikiniet'aj ti iyo ka inekisi siojo ajnat ti inatiwa jiwo jikimet t'ipi. Sek titijik'i'n k'iye siupapo je 'wet'ise' ti 'yalataja'n.

⁸ It'imina 'nakayi siu'niwa jlomas, je tiliki ki jle' ti iyo'ate 'Woyis Ji'wet.

⁹ 'Yina sekyi'i ti 'yakajak'iyi ti yiyi siupa iyot'iyipi pak Sinia' jijwejlanik jiwo Jeremías, ti yi'i ni ji'wet, ti iyo'ate, “Isimayits'i jakiak wikiniet'aj ti treinta, siojokia yinisi' ti iwinis napo Israel jlele.

¹⁰ Jakiaka'ne ti laja ti yamisi ki ajnat jikimet t'ipi pa Inatiwa Jiwo, iyo jla'am ka tiwonaja ni Saka'niona.”

Ti Jesús tenaja jitieyi'i pa Pilato

¹¹ Ti Jesús tokiji ja anechiyas Pilato siojo yi'i, Pilato i'yasen'ne ti iyone 'ate: —¿A'am ti Judíojos jika anechiyasts'a'm? Jesús isiujlie ti iyo'ate: —Siunie jiwone.

¹² Jlam'ne siojopo pa'yijis jika anechiyasas siu'neje japo kijilas 'yakatatjliyisi siunie iyonisi, ti ijiutkinisi ape'e pi jitis ijwil kawoyi. 'Yina Jesús je takakiujlie'n.

¹³ It'imina'ne ti Pilato i'yasa'nine ti iyone 'ate: —¿Je pe'yak'i'ni napo siunie tiwona'a?

¹⁴ Jesús lajk'iyi paka iwoyi ka inkiujlie, jak je iyoyiji'ni siojo anechiyas Pilato kawojliyi ti i'wi'in ti kia'iyo, ti je isiujlie japo.

Pilato takajlunie ka Jesús tiliana (Mc 15.6-15; Lc 23.13-25; Jn 18.38—19.1,4-16)

¹⁵ Ti yiyetaja janak Judíojos jiliakijnieye Pascua, anechiyas iniujwat'ni kisie'e ni ijwienjli siunapo t'otiek'i a'laja'm, siupa iyo jla'am napo i'nio' ka inojwatis kisie'e.

¹⁶ Jakiak najkap siojokia ti yi' insat jiweje siojo i'nio' jle' iyo'ate Jesús Barrabás, i'nio' ti jle' po'.

¹⁷ Ijiatjliyi Pilato i'yasam'ne japo i'nio' ti je pini', ti iyo'ate: —¿Tepa yi'i siupa jiwoyeyi ka nojwana kisie'e siu'napo? ¿Mi 'naka 'ni Jesús Barrabás, ni'ne ka 'nakaye 'ni Jesús tiwonaja'ni 'ate Injwajieti ti Sinia' jijliujwanik?

¹⁸ Lapakawo ti 'naka ti it'imina ti tiwena, 'naka ti a'tiejesiam'ni.

¹⁹ 'Yina ti Pilato yijin'ni ts'e tenaja'a ni siunapo ti kia'iyoyetaja ti jitis po' ti ti'yenajata. Sekyi'i siujlieja jik'iemjla ijliu'ne ja jikawo ka ijwejla'm ki ji'lij ja jik'iemjla ti iyo'ate: —Ká ani'notinie'e siu'nie iyo, naka ti ijiate jla'am ti 'es. Kajeyepa ti siukia ajnaje po' ki ijwijlik ti wuj ti je 'esk'i ti naka jla'am ti ijwijlik ijioyi'ni. 'Yina je aleyi ti itiej ene'ni 'ate.

²⁰ Lapakawo ti 'yakajle'n japo i'nio' ti iyo ka inojwanis kisie'e jak Jesús Barrabás, siojopo pa'yijis jika anechiyasas siu'neje japo kijilas, jlampet ja Jesús 'yaka ti iyo ka ilanis.

²¹ Anechiyas sekyi'i yikiajlayi'i ti i'yajts'ape'e japo i'nio': —¿Tempa siupa jiwoye ka isio' ilie'ne? Iyonis'ne 'ate: —¡Barrabás!

²² Sekyi'i Pilato iyo'ne 'ate: —¿Tepa jayone pet jiat'eje 'ni Jesús, 'ni tiwonaja'ni 'ate Injwajieti ti Sinia' jijliujwanik? Sekyi'i ti wikie'eyeyi ti isiujlisie ti iyoyists'i 'ate: —¡K'iejwat'e pijia'm japa cruz!

²³ 'Yina Pilato sekyi'i iyo'ne 'ate: —¿Yot'iyi'ni jlam'ne lajk'ipa ka k'iejliyeyi paka woyi ka je 'esie? Kat'ajayi ti tanisi ape'e ti kia'iyoyisi: —¡K'iejwat'e pijia'm japa cruz!

²⁴ Pilato siuti i'wina ti je 'yakajle'n japok i'nio' kajeyepa ti wuj ti jwesis, sekyi'i ti t'ajlayi ki i'niat, ti jikioye ilij ti yine jitieyi'i japo. Sekyi'i iyoye 'ate: —Je ya'am ka itisa' siunie ja tiwonaja ti ja tiliana. Asa'am ti astes.

²⁵ Sekyi'i ti wikie'eyi japo i'nio' ti iyoyits'i 'ate: —¡Ijiate sam ti sitis, siu'neje napo silis!

²⁶ Pilato ijiatjliyi jikio' ilie'ne ja Barrabás, sekyi'i ti takajlunieyi ja Jesús ka ijiawos ink'a'ni. Itime ti yikiajlayi ka ink'iejwatits'i japa cruz.

Jesús wuj ti ijiawos iliaki (Mc 15.16-20; Jn 19.2-3)

²⁷ Ijiawos yamisi'ne ja Jesús ti ijioyisi 'wet'e ja anechiyas, 'yina wikie'eyi siojopo ijia tokis tijwayisiap.

²⁸ Sekyi'i ti ilienayisi ki ji'wu', its'iuyitis ape'e kia jikiecha ti isiat.

²⁹ Sekyi'i ti iyonayisi jletik t'aka siu'niwa k'itienis ti isimisik'i ti yinis jletik'i. Sekyi'i ti yinayis jikiojyi ni a'la' ti iyonis jik'iuye, t'akosjlete'l itiyeyisijin'ni kiajwe ti iliakiyis ti iyonisi 'ate: —¡Ampey, Judíojos jika anechiyas!

³⁰ Ijwiets'iunisk'i'ni jla'yi ti yikiajlats'i'ni siukia a'la' ti yinis jikiojyi, ti yejesiajam'ni jlaja jletik.

³¹ Itimisi siukia iyo ti iliakiyis, sekyi'i ti ilienayisi kia 'yujienisk'i isiat, yikiajlayi siukia ijiate ti ji'wuyiji, sekyi'i ti yamayisi ti ja tik'iejwata'a japa cruz.

Jesús ti tik'iejwataja'a japa cruz (Mc 15.21-32; Lc 23.26-43; Jn 19.17-27)

³² Jlampa yama'ni ti yamisk'i, 'nayiji sek isiutieyisi'i ni i'nio', siojo jle' iyo'ate Simón, Cirene jlele. Jaka'ne ti its'iuyeje ti itijlia jlajak Jesús jika cruz, kajeyepa ti tijliukieje.

³³ Ijioyisiji siujlieja tiwonaja'ni 'ate Gólgota, ka iyonat'iyi 'neje 'ate Ijnetik Jleli 'Wet.

³⁴ Yiyisi siojo ijioyisi, sekyi'i ti iwinatajasia'm kia at'es ti tijlijnataja siukia pajyi. Ijyijlitataja'm, 'yina je ya'm isia'm.

³⁵ Jlampa yinayis pijia'm ti its'iejwatits'i jlaja cruz, sekyi'i ti tiliakinits'i ape'e ki ji'wu', ti inik'isajayisi.

³⁶ Itimisi ti yiyek'iji'n ti i'yenits'i ape'e.

³⁷ Ape'e wat jla'a jletik sek its'iejwatayits'i ni a'la' t'aj ti inamtis yi'i, siunie ti titiajlataja ti ja tiliana, ti iyo'ate, “'NAKA 'NI JESÚS, JUDÍOJOS JIKA ANECHIYAS.”

³⁸ Times japo kajlajnatas tijwanaja'a ja Jesús ti tik'iejwata'a jlaja cruz. Ijwienjli ja tom jijweyeje, ijwienjli ja tom ji'lieme.

³⁹ Iniujwappe siojopo i'nio', jla'm iliakiyisjli, jlete'l i'wiatayi'ik'i'ni jiwek

⁴⁰ ti iyonisi 'ate: —A'am ti jijwelpe ti janetiajnate'n jlaja 'najla'wet, 'yina jlomas janajapeja ti jateme ti ja ekial pijia'm, ¡jejlikiame kiu' paka wo kanijwajiet! ¡Sojmajyi'n ti jataj'le jana cruz!

⁴¹ Jlam'ne pet siojopo pa'yijis jika anechiyasas siu'neje japo jiwos pet ni Moisés jika'neyasajnaye, siu'neje japo kijilas, kia'iyojliyisi ti iliakiyis iyo japo ijia, ti iyoyits'i 'ate:

⁴² —¡Jlam'ne 'yijene pi iyone ti ijwiejiete'n papo ijia, ka kiak iwoyi pit ka inijwajiet! Ti ijwil jla'am ti Israel jlele jika anechiyas. ¡Yot'iyi'ni ti je tisiojmajyi'n, 'nakayeyijna'a ti ja'wina pet sekjane'yi ka je 'yakakiukiena'a!

⁴³ Jla'am ti jitiej iyoma pa Sinia'. ¡'Esiji ka Sinia' injwajiet 'nakayi, siuti jawojonk'iye! Ijwilpe'eje jla'am ti Sinia' Jlas.

⁴⁴ Siojopo kajlajnatas, jiliaye iniuj wita'm ti tik'iejwata'a jlaja cruz, kia'iyojliyi pit ti iliakiyis.

Jesús ti 'yala (Mc 15.33-41; Lc 23.44-49; Jn 19.28-30)

⁴⁵ Siukia ti 'najlikis paj ti najapeja jakia inetitinki yiyi jla'a kilie' kie', ti ajnatiok itij'wape 'ni ajnat.

⁴⁶ Jakiaka'ne siojokia ti yiyeyi, Jesús tajwiyeje'n ti 'yakets'ijiap ti iyo'ate: —Elí, Elí, ¿lama sabaktani? (In'lej kiecha ti iyo'ate, “Inia', Inia', ¿yot'iyi'ni ti jilik'i?)

⁴⁷ 'Yina po' siojopo sekyi'i ipi'yayis, iyoyis'ne 'ate: —Tajnin'ni k'iye pa Sinia' jijwejlanik jiwo Elías siusie.

⁴⁸ Je pajtaja, t'osiye ja ijwienjli ti t'osiyi ja inkats'ili 'yutieja'm ni at'es ti pajyi, sekyi'i yina'a ja sisej ti ilie'nit'i. Sekyi'i ijieyeyi ja Jesús iyone 'ate: —Ts'ojwa'm.

⁴⁹ Jlampet japo ijia iyoyis pet 'ate: —Ena'yate, ja'yenakiamkiunie'e ent'a ja'nes pi Elías kanjwajiet.

⁵⁰ 'Yina Jesús yikiajle'e 'neje ti tajwijyi'n, sekyi'i ti 'yala.

^51-54 Jakayi'ne ti its'isat'ik'ipe jak 'najla'wet tip'onajajam'ni ts'iji jik'ioyi, tajlap 'niji pijia'm ti ijiuti isia'm. Sekyi'i ajnat ti'wesiye, siuniwa sisajas ti wus its'isajamk'i. Siojo tokis jika anechiyas, siu'neje japo jla'yis ti i'yena ki t'ajwes ki Jesús, ti i'wina ti kia'iyo, ti ajnat ti'wesi, wuj ti jnots'ijnits'i. Sekyi'i iyoyis'ne 'ate: —¡Ijiatp'aneje ti Sinia' jlas siukia! Sekyi'i ti 'ajlajamk'i kiwa a'no'l, je pini' napo Sinia' jilist'ipi ti 'yalt'ijyimpe, napok napo yapik'i pijia'm. Jak je iyoyi yiyi jakiak jloma ti Jesús iniuk'i kisie'e ti tajla'm ki a'no', kia'iyo iniu kisie'e, sekyi'i 'yuyeyisi janak Jerusalén, isi' ti 'es, Sinia' ji'wet. 'Yina je pini' papo i'nio' i'wi'in ti kia'iyo.

⁵⁵ Asejnia japo tojwi'ni ja yiyits'i ti i'yenisi'ni. Japokaye'eje japo ti namisk'i, ti iniuyeje ti tajlayis Galiléaja.

⁵⁶ Japoka japo María Magdala jleliki, siu'neje jlaja Zebedeo k'iemjla, siu'neje jlaja María 'neje, siujlieja Santiago siu'neje José jletis.

Jesús ti tip'onaja'a (Mc 15.42-47; Lc 23.50-56; Jn 19.38-42)

⁵⁷ Jlampa majleyeyi ka kilie' i'no, 'nesa ni i'nio' ti jle' iyo'ate José, Arimatea jlele, ti jwajla i'wi'in. Kia'iyo yamk'ijin'nijpe ja Jesús.

⁵⁸ Jaka'ne ti ijioyi jak Pilato ti ti'yasane ki Jesús ka jlama ka ineki ka intejk'iye. Pilato sekyi'i takajlunie'ne ka tiwenaja'm.

⁵⁹ José tiwenajam'ne, sekyi'i ti yikiajlayi wita'm ja lotakinie ja lemi ti ink'ie', 'es ti lajk'ipa ka jit'iojliye ka ne'yi.

⁶⁰ Sekyi'i José yamayi ti jamp'o'ne yi'i pa jika ajnat jla'am, ti pajk'i ta'a ti wakal ti titijikia'm yiji jlaja tikijnaki, sek yina'a. Itime ti ip'ionayija'm jla'a sisaj ti wuj, sekyi'i ti yama.

⁶¹ María Magdala jleliki, siu'neje jlaja María 'neje, sek 'wanjliyits'i yik'ijin'ni seka'a ti tejeyits'i ja a'no'.

Ijiawos siupapo i'yena pa Jesús t'o'

⁶² Siukia ti jlomaye'eje, jloma ti i'nio 'wanjlijyi'n, siojopo pa'yijis jika anechiyasas, siu'neje japo Fariséojos, ijioyi ja Pilato,

⁶³ ti iyonisi 'ate: —'Ni 'yaka anechiyas, sitiej je alanajak'i'ni siojo iyopi kiaka siukia ti 'wanjle'e kiu', ti iyo'ate, “Jlomas janajapeja ka iniuyena'a kisie'e ti jatiajla'm ni a'no'.”

⁶⁴ Jakajliete, 'esiji ka ajlo' papo aka tokis ka ijiatayi ka 'yenaja pa t'o', paj ka ineyeyinie'e janak jloma ti yitine. Kajeyepa 'lojwinie'e ka t'eyasajnas nami'ni siu'nie ajnaj ka iname ni t'ajwes ka nekisi, kanwonayijna'a 'ate napo i'nio', ti janjwel ka inapi pijia'm, “Iniu kisie'e.” Ka nak ijiatayijna'a ka inka'm ape'e siunie iyo ti 'nelanjie'e, niwa inka sintijieyis.

⁶⁵ Pilato isiujlie'ne ti iyo'ate: —Ijiatp'ane, maye'ni, 'najanayi siunie jiwoyeyi. A'asiye napo ijiawos ti ja'yenayi.

⁶⁶ Sekyi'i yam'ni'ne, yiyisi ti ilisanayisi ti 'yitisiame siujlieja sisaj ti ip'ionisiaja'm, jla'yi ti jikajwukis yinayits'i. Sekyi'i ti sek iliyeyisi'i japo tokis ijia ti i'yenkinisie.