Mateo 14 - Sinia' Jlamtis 1994

Juan inajiejnawo ti 'yalat'ipi

¹ Kiwak jlomas ti Herodes siojo ti tijna'yi pet jlaja Galilea ti iyo anechiyasa', t'ijieyet'iyijpe ja Jesús.

² Kiak t'ipa iyonayijipi papo jikawos 'ate: —Kiaka Juan siukia inajiejnawo ti yapi pijia'm ti tajli ni a'no', it'imina 'ni jijweye iyo ti i'winki'n niwaka siuniwa ti je ti'wena'ni.

³ Kajeyepa kiwak siukiwa jlomas ti Herodes ti takajlunie pa Juan ka tikima'a ka t'otie a'laja'm, japaka jla'am siojopa jijwelis Herodías ti it'imina. Herodes ji'yini jla'am siupa jle' iyo'ate Felipe, jik'iemjla japaka i'nioki, ti Herodes ijiale pa ji'yini ti yiyi.

⁴ Japak Juan je iwintajam'ne ti iyone'ate: —Wuj ti je 'esk'i siunie jiwoyi ti jleyi.

⁵ Herodes iyoyetaja ka ila'an pa Juan, 'yina papoka jla'am papo i'nio' ti je ijwiye, kajeyepa ti ijiate ti tiwunitie ti Sinia' jijwejlanik jiwo.

⁶ Siupa ti yiyet'iyipi siojopa jloma, siojopa ti yit'iyijyimpe pa Herodes, sekyi'i iyo'ne jiliakijnieyeja' pakayi. Siojopa Herodías jlase' tiliakinie t'ipi kiowe'e papo i'nio' siupapo Herodes tanits'i ka ijnoyi japa jiliakijnieye. Herodes wuj ti yimi'n ti kia'iyo.

⁷ It'imina'ne ti kiak t'ipa iyonayijipi 'ate: —Je e'na'm paka k'iejliyeyi ka 'ajlik'i'm. Je takalakijie'n siupi iyo ti ijwijla'm.

⁸ Siojopa jlosie lapakawo ti pajk'i ta'a ti jlet 'yiyasan'ni, ti iyone 'ate: —Ejni pa tetik japa Juan jletik ti jawenk'i'm.

⁹ Ijiate je yiminatak'i ja Herodes, lapakawo ti itime pi ji'lij jitieyi'i siupapo isijwane. Jak je iyoyiji'ni takajlunieyi ka tiwenaja'm siupa ti'yasane siojopa jlosie.

¹⁰ Sekyi'i ijliuye'ne papo jika ijiawos ka jletik tiliena'a pa Juan.

¹¹ Ijiatjliyi, yam'ni'ne papo tokis ti yamisi pa Juan ti jletik ilienits'i. Itiunieyisi japa jlosie, sekyi'i ti itiunieyi pet japa jlet japa jlosie.

¹² Siojopo t'eyasajnas jla'am pa Juan, yamat'iyisi ti yamisi ti itijisk'iye. Itimisi ti ip'ionits'i ti yam'ni'ne sekyi'i ijwilisi ja Jesús.

Jesús 'yakojniejne'n papo i'nio' cinco mil

¹³ Jesús ti 'yijenayi pi iyone, sekyi'i yam'ne ti yiji jlaja kasejkana ti iwiets'ila ji'wechaja jlaja tewuk iliyi ti ijioyi siupa ajnat laj i'nioye'e ti inijwankit. Je 'es ti ti'niejenajayi'ijyi ja tiwonaja, jla'am ijialasjli ape'e ti tajla jlaja isi', jlam yamjli ti je ilik'i ja jikius jlaja i'niat ti ts'ijiye, ti jant'as ajnat'e ti yamat'ijyi ti 'nesat'ipi siojo ijiojwi.

¹⁴ 'Yina ti tisiojmayeje'n, i'yejne'n japo i'nio', sekyi'i wuj ti ip'ilisijne'n, jakayi ti je pini' japo ijwiejiete'n japo je isis, ti tokiji'ni.

¹⁵ Jlampa no'otie, siojopo t'eyasajnas ja Jesús ijioyeyisi ti iyonisi 'ate: —Ja no'otie wek, jla'yi ti laj i'nioye' siu'nie awak'i. Jloye wek napo i'nio' ka nek'ni ka ijnoyi siunie isi', ka nekisi jla'am siupi k'iejliyi pi iyo ka intojwis.

¹⁶ Jesús iyo'ne 'ate ti isiujlie: —¿Yot'iyi'ni ka nek'ni? Impoye wenajia'm paka intojw.

¹⁷ Iyoyis'ne 'ate ti isiujlie: —'Niwakata wek woyejes jilis, ijwienjli sikio' itijwe niwa yi'ne, times 'neje niwa si'yus jilis.

¹⁸ Jesús iyone'ne 'ate japo: —Toniekiamk'i siu'.

¹⁹ Sekyi'i ti takajlunieyi japo i'nio' ti je pini' ka nek'iji'n, neyisk'ijin'ni jiwek jawa jop. Isimayi siojowa woyejes ijwienjli sikio' itij'we, siu'neje jawa times si'yus, sekyi'i i'yena poliyi ti jinikanitieyi iwijna'm pa Jinia'. Itime ti its'isaja'm, sekyi'i ti iwinayi japo t'eyasajnas, ti iwink'i pet japo i'nio'.

²⁰ No'we japo i'nio' ti ti'yekiujni'n, paj ti yip'isieje'n. Siojopo t'eyasajnas yamak'i'ni siojowa jijwa'al 'wanjle'e, paj ti itijwa'm niwa sikioye times tom'niji jawa tenajats'i jijwa'al ti 'wanjle'e jawa tipoyijk'i.

²¹ Japok siojopo i'nio' ti ti'yekiujni'n cinco mil ja nojwaja'm, 'etsaka 'neje japo asejnia, kia'lis 'neje japok je tetinak'i pa nojwa'm.

Jesús t'iskiujni'n ape'e pa i'niat

²² Jlampa paja ape'e siukia iyoyi, Jesús ijliuye'ne japo t'eyasajnas ka inanisk'iye ka ineyis kasejkanaja, ti jajno i'niat ji'wechaja, 'yina ti je itime ti isiejk'i kiojia'm japo i'nio'.

²³ Itime ti isie kiojiamk'i japo i'nio', sekyi'i Jesús ijioye ape'e jlaja tikijnaki, ti iyo t'ajlayeja'. Paj ti ajnaja ijwienjli jla'am ja Jesús ti sekyi'i ape'e jlaja tikijnaki.

²⁴ Jlampa yiye jikiowe'eyi jlaja kasejkana je jnanjliyi ja jikius, 'yina ti tejeyisi ilia'm pa jlajwu, it'imina'ne jawa ji'wukijlimpejes ti itie'e'ni siujlie'e yiyisi.

²⁵ Siuti jloma iniuye ts'iji, jakayi'ne ti Jesús yiyeyi, ti t'iskiujni'n ape'e ja i'niat.

²⁶ Je 'es ti i'winayis ilia'm, sekyi'i ti tajwiyisk'i wita'm kajeyepa ti je ijwiyisie. Iyoyeyis 'ate: —¡'Yena'yi ilia'm ni insak'al!

²⁷ Jesús kiak iyonayi ti ijliuyi'ni: —¡'Otale t'onitie. Ya'am, ke ijnots'inak'i'm!

²⁸ Ti Pedro ipi'yaye ti kia'iyo, iyo'ne 'ate: —'Yaka'niona, siuti a'am, jejlitkiame kiu' ka ank'i ka 'yiskiujni'n pet ape'e 'ni i'niat.

²⁹ Jesús iyone'ne 'ate: —¡Jomet! Pedro ijyijlitayi ti tisiojmajyi'n ti tajla'm jlaja kasejkana, ti t'iskiujni'n ape'e ja i'niat, ti ijioyi ja Jesús.

³⁰ Je 'es ti i'wina ki jlajwu ti wujwi, sekyi'i ti je ijwiyeje. Pedro i'wi'in ti yam'ni isia'm, tana'nine ti iyo'ate: —¡Si'manit, 'yaka'niona!

³¹ Jesús ta'a ti isimk'i, sekyi'i ti kiak iyonayi 'ate: —¡Je ijiate pakawo ka ijiatayiji ka atankiu'n! ¿Yot'iyi'ni ti laj atankiujnieyeja'?

³² 'Yina ti yiyeyisia'm jlaja kasejkana mamiyek'i ki jlajwu.

³³ Jakayi'ne siojopo ijia yiji jlaja kasejkana, t'opiyeyis kiajwe ti iyunitis iyoyeyis 'ate: —¡Ijiatp'ane ti Sinia' jlajts'a'm!

Jesús ijwiejiete'n papo i'nio' je isis

³⁴ Yiyeyis i'niat ji'wechaja, 'nesayisi siujlieja ajnat jle' iyo'ate Genesaret.

³⁵ Siojopo i'nio' sekyi'i itiant'ieje ja Jesús, sekyi'i ti takajwejlanayisi pet siojopo ijia yi'ik'i jawa ji'wetis. Siojopo je isis tikiniejayiji ja Jesús,

³⁶ ijwilisiam'ne ja Jesús ka je k'iejliyeyi paka woyi ti iyo ka jakataja wek ka inkiesits'i ja ji'wu'. Ijiatjliyi wikie'eyi siojopo isiejts'e, japok isisi'ne.