Marcos 6 - Sinia' Jlamtis 1994

Jesús yi' Nazarette

¹ Ti Jesús tajla'a siupa yi'i, yapilieyi jlaja jika ajnat pet ya'asi japo t'eyasajnas.

² Ti yiyeyi siojopa jloma ti i'nio 'wanjlijyi'n, ijioyeyi japa 'najla'wet sekyi'i ti taka'neyasana. Jlam'ne siupapo i'nio' ti je pini' ti ipi'yayisie init'ipa 'yenape papo i'nio' ti ipi'yayisie, ka iwojlinijisipi pa ininekiajlayisi ti iyoyis 'ate: —¿Tepat'i yi'ipe ti ini'neyasa'n? ¿Tepat'e tajle'e siunie ijiate ti 'yije'en ni i'nio' siu'neje ni ti 'yijene pi iyone ti ijwiejiet pa?

³ ¿Awo ka 'nakajliye siu'nie in'wetis jiwo, María jlas, ji'niayi ijwienjliyi japo Santiago, Judas, siu'neje ja Simón? ¿Awo ka 'nakjli ine'yi japo jika asejnia 'ne awak'i? Nak it'imina papo i'nio' ti a'tiejajam'ni ni iyo ja Jesús ti i'nioyi.

⁴ Jesús iyo'ate: —Lajk'ipa ape'e 'ni ajnat pa injwejlanik jiwoye ka je tiwok lajaye, 'yina ijiatjliyi jla'am ti yi'i japa jika ajnat, siunapo ji'wetijwas jla'am, siu'neje napo ji'niayi ijwienjliyi, je iyoyeyisi 'neje k'iye.

⁵ Pakayik'i'ne ti t'onie'e'ni kan'wenki'n paka k'iejliyeyi k'iye papo i'nio', pakatajimpe wek jla'am ti jikio' yink'i ape'e papo i'nio' ti ijwiejiete'n.

⁶ 'Yijenajant'itiejpe pa iyo ja Jesús, ti kia'iyo papo i'nio' sek ji'wet'e ti 'yakakiuyis. Jlampa yamajampe 'nijiye kiaka, Jesús ya'am ti ijioyits'i siupuwa ajnatis jilis ti je tose ti taka'neyasa'n.

Jesús ijliuye papo t'eyasajnas ka injwe'el ni Sinia' jika anechijiayas

⁷ Sekyi'i tanayits'i japo t'eyasajnas itijwa'm niwa sikioye times tom'niji, itimisietamk'i'ni ti ijliuye'ni, sekyi'i jijweye iwijnamk'i siunie ti imose'l je to'm ilia'm, sekyi'i ti iniuyek'iji kisie'e.

⁸ Iyone'ne 'ate: —Siuti ja askiuniek'iji'n, ja ke k'iejliyijna'a paka atonie ti jakinie'ni, 'yina janajataja wek ni askiajat ti jatonie'ni. Ká awoye aseliye, ká atonie pa asaka', ni'ne ka woye aska wikiniet'aja'.

⁹ Woye asatiye, 'yina ká a'lonitie puwa as'wuyeye japuwakataja jla'am siupuwa jit'iuyets'iji'n.

¹⁰ Ajnat pa jawaye'yi siupa jit'iuye'yi ka sek awayeye'yipe, paj ka awayeyets'ipe siojopa jloma janinenajyi, sek jane'yi ka ajlasaye'nipe.

¹¹ Jane'yi siojopa ajnat jijnieyeyi, siuti ja ke inki'm aselia'm siu'neje ni jikinieyiji'n ti ja ke inwo ka ink'iuyisie, sekjane'yi ka tajlayeyijpe, sekjane'yi ka ajnat alanayejyits'ipe niwa asati' ja'nakayeyi ti jan'wena siunie jiwonayi, jitiej inenayisijna'a 'ate ti jitis po'.

¹² Sekyi'i ti yamajan'nipe japoka t'eyasajnas ti iyo jika'niyejayi papo i'nio' ti iyo'ate: —Woye asosikis ink'iejyisa'.

¹³ Siu'neje ti je jlase' puwa imose'l iniujwank'i kisie'e, siuti impe' 'yilinik'i papo je isis, papok isisie'eje.

Juan inajiejnawo ti 'yala

¹⁴ Siupa anechiyas Herodes t'ijieyi ja Jesús, lapakawo ti jle' itijwi'ni papo i'nio'. Kajeyepa ti po' papo ti iyo'ate: —Kiakat'e kia inajiejnawo masa Juan, yapi pijia'm ti tajla'm pa a'no', jak je iyoyiji ti jijweye po', siu'neje ti 'yijene pi iyone ti i'winki'n ti pa k'iejliyi.

¹⁵ Po' papo iyo'ate: —Nak Elías ti injwejlanik jiwo. Po 'neje papo iyo'ate: —Injwejlanik jiwo wek, 'ate iyo siupapo ijia ti inian'ni.

¹⁶ Herodes ti 'yijenayi pet pa iyone kiaka, 'yina iyo pet 'ate: —Ya'am awo'ate ti 'naka Juan, siukia akajluniepe ka jletik tiliena'a. 'Yina 'nakayi yapi pijia'm ti tajla'm ni a'no'.

¹⁷ Kajeyepa ti siupa ti pajk'i Herodes takajlunie ka tikima'a pa Juan ti ka wikijnies tilie'nitieje ka t'otie a'laja'm. 'Yina ti japaka jla'am siojopa jijwelis jla'am ti it'imina, ti jle' iyo'ate Herodías, siupa ji'yini Felipe jik'iemjla japaka ti tajlane.

¹⁸ Pakayi ti Juan iyone'ate pa Herodes: —Je 'esk'i ka awo ak'iemjlaye jana a'yini jik'iemjla.

¹⁹ 'Yina Herodías naka'ne ti it'imina ti wuj ti t'a'ti yi'ne pa Juan ti je iliayiji, sekyi'i iyoyetaja'ni kanla'an, lapakawo ti je 'yijene pa ka iwone.

²⁰ Kajeyepa ti Herodes i'wi'in ti tijnajyi paka Juan jla'yi ti 'es jitieyi'i pa Sinia', 'yina naka'ne ti je ijwi' ape'e, 'wenajliyi jla'm ti i'yenta. Ejlo'o wek pa iyo pa Herodes ti po' siupa iyo ti je 'es, 'yina its'iuye'ni jiwek.

²¹ 'Yina yit'i'yipe japa jloma Herodías jiwekie'aja ti 'esiape'n siupa iyo kanwone pa Juan, yiniji siojopa jloma ti Herodes iyo jiliakijnieyeja' ti yiyeyi siojopa yijijyi'n. Sekyi'i t'ajlayits'i siupapo jikawos t'as jitieyi'i, siu'neje papo ijiawos jika anechiyasas, siu'neje papo anechiyasas ijia yiji jlaja Galilea.

²² Siojopa Herodías jlase' 'yuyi siupi yi'i japa inlakijnieye, sekt'i tajla'ape ti tiliaki'n japaka jlosie. Herodes yimi'n ti tiliaki'n japaka, siupapo anechiyasas ijia kia'iyojliyi yiminis, jak je iyoyiji'ni pa Herodes iyone'ne 'ate japak jlosie ti ijwijla'm: —'Yasane siupa jisitia'n, jawi'na'm.

²³ Yikiajlayi'iji ti ijwijla'm siupa iyone ti 'nelanjie'e, Herodes je ka inlakiyijk'i jiwek siupa iyo ti ijwijla'm, ijiatk'i, sekyi'i iyone'ne 'ate: —Siupa jawo ka 'ajlik'i'm je e'na'm, jawi'na'm ni'ne ka ijyiwitajna'm siujlie'e ajnat ti akie' ape'e ka yikiaj'la.

²⁴ Siojopa jlosie ti ipi'ya wek ti kiak tiwonaja, sekyi'i iniuye kisie'e ti yapili japa jlet ti ijwile, yiyi ti iyonayi 'ate: —¿Tent'i pa ja'yasane? Siojopa jlet isiujlie ti iyo 'ate: —'Yasane japa Juan inajiejnawo jletik.

²⁵ Sekyi'i ti yama'aja ti yapili pa anechiyas t'osiyeyiji'ni, yiyi ti iyonayi 'ate: —Awotajank'iye ka jla'm awoni'ni 'ate ka ejni its'ioye pa tetik japa Juan siunie inajiejnawo jletik.

²⁶ Sekt'iyi'i'ni pak anechiyas ti itienkiun'ni jitienkiujnieye je 'esk'i t'eyit'e ka je inwejna'm siupa ti'yasane, lapakawo ti yine jitieyi'i papo ijia anechiyasas ti je iliakiyijk'i jiwek ti ijwijla'm siupa jan'yasane.

²⁷ Sekyi'i ijliuye pa tokis ka intoni japa Juan jletik.

²⁸ Sekyi'i siupa tokis ya'am ti ijio insat jiweje ti jletik ilie'ne pa Juan, sekyi'i ti yinaje pa tetik ti yameje japa jlosie, sekyi'i yikiajlayi pit japa jlet.

²⁹ Siupapo t'eyasajnas ti 'yijenayisi pi iyonisi, yamayisi ti itijis k'iye.

Jesús 'yakojniejne'n papo i'nio' cinco mil (Mt 14.13-21; Lc 9.10-17; Jn 6.1-14)

³⁰ Jlampa yamajampe 'niji kiaka, ti 'nesa'ni pet japo jijliujwajnas, sekyi'i ti nowayisiji ja jika anechiyasis ti ijwilisia'm wikie'eyi siupa iyoyisi, siu'neje pa taka'neyasane.

³¹ Lapakawo ti 'loj papo i'nio' ijioyi'ni, yam'ni sekyi'i 'nes'ni papo ijia, ijialas ka je in'yekiujni'n papo ijia. Jak je iyoyiji ti Jesús tanayi japoka ti iyone 'ate: —Joniemit ja kas'najli, jayokijyi'n siupa ajnat ka laja i'nioye'e ka yajapa kiu' wat.

³² Ijiatjliyi yam'ni'ne ti ijioyisi siupa ajnat yitinits'i ka ineyits'i, ti yiyis kasejkanaja.

³³ Jlam'ne 'loj papo i'wink'i ti yamajimpe, 'yina ti itiant'iejesk'i. Jak je iyoyiji je 'nesta'nine ti 'nesa'ni jla'am ta'a lapakawo ti t'osiyeyijits'i'ni papo i'nio' je ijwienjli japa ka isiye ka intajle papo i'nio', wikie'eyi puwa isi'l jilis tajlits'i.

³⁴ Jak je iyoyiji ti tisiojmayejejnimpe ja Jesús, i'yena ape'e papo i'nio' ti je pini', sekyi'i ti ip'ilisijnin'ni'ne, kajeyepa ti iyo'ate niwa 'wolepo' ti laj jiwoye, sekyi'i ti ijyijlitayi ti 'yiyasajne'n. Je pini' siupuwa wask'i'nelaja 'yiyasane papo.

³⁵ Siupa ti no'otie t'eyasajnas ijioyi ti iyonisi 'ate: —No'otie wek, jla'yi ti lajk'iyipa ka ink'ipata ka ne'yi siu'nie awak'i.

³⁶ ¿Yot'iyi'ni ti je jliu'ni jiwek 'napo i'nio' kanek'ni, kanapilisi siuniwa isi'il jilis je tose'n, siu'neje niwa jiwomik ji'wet napo, kank'iajwajyi'n ti janeki siupa kantowis?

³⁷ 'Yina Jesús isiujlie ti iyo'ate: —¿Yot'iyi'ni ti je wenajia'm asa'm paka intojw? Isiujlie'ne pet ti iyo'ate: —¿Jijwelat'e ka ijno'li ape'e ka doscientos denarios tenaja ka tikinieja paka jlaka napo i'nio' ti je pini'?

³⁸ Jesús iyone'ne 'ate ti i'yasa'm japo t'eyasajnas: —¿Tepa nojwaja'm puwa woyejes jilis yi'ase? Maj ka 'yenayi. 'Yina i'winis'ne pa nojwaja'm puwa woyejes, sekyi'i ti yama'nijne ti ijwilisi, yiyisi ti iyonayisi 'ate: —¡Ijwienjli sikio' itij'we jiwek 'niwa woyejes, times 'neje jiwek 'niwa si'yus jilis!

³⁹ Sekyi'i ti takajlunieyi kanek'iji'n papo i'nio', ka 'nak k'ielajamk'i'ni ti yik'iji'n ape'e pa jop ti jiwats'oyi ape'e.

⁴⁰ 'Nak k'ielajamk'i'ni papo i'nio' ti yik'iji'n, yi'i ti cien papo, cincuenta papo 'wena initotisiji.

⁴¹ Sekyi'i ti Jesús isimayi puwa ijwienjli sikio' itij'we woyejes, siu'neje puwa times si'yus. Sekyi'i i'yena poliyi, ti jinikanitieyi iwine pa Sinia', itime ti its'isajaja'n sekyi'i ti yikiajlayi japo t'eyasajnas ka wenk'i papo i'nio'. Paj ti puwakaye'eje pet siupuwa si'yus ti times jiwek, ti kiak iyone ti itij'wa ape'e papo i'nio'.

⁴² Sekyi'i ti'yekiunieje'n papo i'nio', paj ti yip'isieje'n.

⁴³ Siupapo t'eyasajnas yamak'i'ni puwa jijwa'al 'wanjle'e siupuwa si'yus siu'neje puwa woyejes, paj ti itijwa'm sikioye times tom'niji niwa jijwa'al tenajats'i'ni niwa tipoyijk'i.

⁴⁴ Cinco mil papo i'nio' pa nojwa'm ti ayijnies 'najli papo ti'yekiujni'n.

Jesús t'iskiujni'n ape'e pa i'niat (Mt 14.22-27; Jn 6.16-21)

⁴⁵ Yam'niji kiaka, Jesús ijliuye japo t'eyasajnas ti iyone 'ate: —Maj, nana'ni wats'ilaja i'niat ji'wechaja, jajiok ts'iji yi'i jana Betsaida, janijwele kiu' napo i'nio'.

⁴⁶ Itime ti isie jikiojiamk'i papo, sekyi'i ti yama ti ijio ape'e japa tikijnaki ti iyo t'ajlayeja'.

⁴⁷ Jlampa ajnajajampe, siojopa kasejkana yiye jikiowe'e japa i'niat, Jesús ijwienjli jla'm ti sek 'wanjle'e siupi yiyits'i ti 'nelanjie'e.

⁴⁸ 'Yina i'wini'ni japa kasejkana ti t'o'ni'ni kanek kajeyepa ti tejeyi ilia'm pi jlajwu. Siupi ti jloma je tojwayi Jesús ijyijlayi, ti ya'an japo t'eyasajnas ti iniu ape'e pa i'niat ti t'iskiujni'n, sekyi'i ti iyoyetaja ka inojwap ti jla'm iyone.

⁴⁹ Jak je iyoyiji siuti i'winayis ilia'm ti t'iskiujni'n ape'e pa i'niat, sekyi'i itijnisiejesi'ne ka insak'ala pa, 'yina yejlatk'i wita'm.

⁵⁰ Lapakawo ti wikie'eyi ti i'winis ilia'm je jlase' pa iyo ti jnots'ijnits'i. 'Yina ta'a'ne ti ijliuye ti iyone 'ate: —¡Jweyitiek'i'm, ya'am, jwajla'a paka woyeyi!

⁵¹ Sekyi'i ti tisiojmayeja'm japa kasejkana, 'yina netianak'i pet pa jlajwu. Kawojliyisi pa ti i'winayis ti kia'iyo.

⁵² 'Yaka mawat t'o'n japo i'nio', jak je iyoyiji kantejnisisk'i, 'yina i'winatajas siupa ti 'yitsakanit puwa woyejes siu'neje puwa si'yus.

Jesús ijwiejiet papo i'nio' je isis yi'i japa Genesaret

⁵³ Jlampa yiyeyis i'niat ji'wechaja, yi'i japa ajnat jle' iyo'ate Genesaret, 'yina sek ilie'nitieyits'i japa kasejkana jikiuts'i pa i'niat.

⁵⁴ Tisiojmajyi'n jiwek ja Jesús ta'a ti titiant'ieki.

⁵⁵ Je iyo ka jwatajayis'ni k'iye papo i'nio' ti yikiajli'ni japak ajnat ti yamk'i'ni papo je isis, ti yamayisiji pa Jesús, siupi yi'i ti je iliyi ti yam'ni, iniayik'i ape'e puwa jlo'witis.

⁵⁶ Ajnat japa yi'i, ni'ne ti yiji japa isi' wuj, ni'ne ti je wuj, ni'ne ti yiyi puwa ji'wetis jilis papo i'nio', siupa jano'we sek yinayits'i k'iye papo je isis, yi'i pi jika'wu japa isi'. Sekyi'i ti inip'elisinayisi ja Jesús ka pakataja jiwek ji'wu' ka inkiejts'e. Jak je iyoyiji wikie'eyi siupapo isiejts'e pa ji'wu' papok isis'ne.