Lucas 23 - Sinia' Jlamtis 1994

Jesús tenaja tieyi'i pa Pilato (Mt 27.1-2, 11-14; Mc 15.1-5; Jn 18.28-38)

¹ Ti tikiniejayi pa Jesús 'yina pajlatisk'i'ne ti ijioyisiji pa Pilato.

² Sekyi'i ti ijyijlitat'iyisijpe ti takajwejlanisia'm siupi iyo pi itiajlatisie, ti iyo'ate: —A'wenajaja siu'nie i'nio', ti itiejietk'i wita'm napo saka kia'lis. Ijwil je 'esiji ti akat'ina'ni ape'e niwa inkat'ijnieyejes, 'etsakaja ti ijwil ka nakaye ni Injwajieti ni Sinia' jijliujwanik, ka anechiyasa'.

³ Pilato i'yasen'ne pa Jesús ti iyo'ate: —¿A'am ti jika anechiyasts'a'm napo Judíojos? Jesús iyo'ne 'ate: —Siunie jiwo ti sijwe'el 'naka.

⁴ Pilato sekyi'i iyone'ne 'ate papo pa'yijis jika anechiyasas, siu'neje papo i'nio': —Je a'we'en paka jitis iwo siu'nie i'nio'.

⁵ Kat'ajat'iyijpe ti ijialaskinisi, ti iyo'ate: —Siunie iyo ni jika'neyasajnaye, wuj ti 'yakajyijne'n napo i'nio'. Tajlap Galiléaja ti 'nelanjie'e, 'nakayi yi'ne Judéaja, ti je ilik'i siunie iniwone.

⁶ Ti Pilato ipi'yaye, sekyi'i i'yasam'ne papo ti iyo'ate: —¿Ma Galilea jlele siu'nie i'nio'?

⁷ Isiujlisie'ne ti iyoyis 'ate: —Naka. Pakayi ti Herodes, siupa anechiyas Galilea jlele, sekyi'i ts'e yi'i jla'a Jerusalén ti ijio isik'i. Sekyi'i pa Pilato takajlunieyi ka tikiniejeje pa Herodes pa Jesús.

Jesús tenaja tieyi'i pa Herodes

⁸ Ti Herodes i'wina pa Jesús, wuj ti inkaj'ni, lapakawo ti pajatak'i ta'a ti iyotaja'ni kan'we'en, siu'neje pi iyo ti i'winkijna'm papo siupuwa ti je kiak iyo ka ti'wena'ni, jlam t'ijieyi'ni jiwekie'e.

⁹ Je pini' siupuwa i'yastajajan'ni, 'yina Jesús je iyo kan kiujlie.

¹⁰ Sekyi'i 'neje siupapo pa'yijis jika anechiyasas, siu'neje papo taka'neyasane pet pa Moisés jika'neyasajnaye, jlam 'yijienista'a ti ijiutkinisi ape'e pi jitis.

¹¹ Herodes jla'yis papo jika tokis wuj ti iliakiyis, iyonayisi 'ate ni i'nio' jiniliak. 'Yujienayisk'i siupuwa isis lotakijnies, ti iyo'ate ni ji'wu' ni anechiyas wuj. Itimisi siupi iyonisi ti iliakiyis, sekyi'i ti yikiajlat'iyisi'iji pa Pilato.

¹² Jlam'ne Pilato jikojwa pa Herodes ti pajk'i, je 'esiji ti iyoyeyisi siupi iniwonisi, sekyi'i 'wena iyoyeyi, iyoyeyi t'ajajnajwaye.

Pilato iyo ka jikio' ila'ne, papokaye jla'am papo Judíojos ti je iyo ka jikio' ilanits'i (Mt 27.15-26; Mc 15.6-15; Jn 18.39—19.16)

¹³ Pilato tanat'iyits'ipi papo pa'yijis jika anechiyasas ti initotk'i wita'm, siu'neje papo anechiyasas t'ipi 'neje, wikie'eyi 'neje papo i'nio'.

¹⁴ Iyoni'ne 'ate: —Asa'am pajk'i'ne ti jiniamayik'i siu'nie i'nio', ti jijwela' 'yakajyijne'n napo i'nio'. A'yasata'ni 'neye ti ene astayi'i, 'yina lajk'ipa ka jitisa' ka'wi'in siupa jitiajlatayi.

¹⁵ Siunie Herodes kia'iyojliyi je i'wi'in paka jitisa', yikiajlats'iji wekie'e. Je 'yu'we ka tiliana, 'yaka lajk'ipa ka ti'wena ka je 'esie ka iwoyi.

¹⁶ Ja 'yakajluniejna'a ka tak'ajak'ni, sekjane'yi ka isio' iliena'ana'a.

¹⁸ Ji'lij ijwienjli papo ti iyo'ate: —¡Lana jla'am naka, jla'm ijiate ni Barrabás ka akio' lana'yi!

¹⁹ Siupa jitis iyo pa Barrabás ti yi' insat jiweje, pakayi ti ti'yikisane'ni papo anechiyasas yiji japa isi', siu'neje ti takalankit'ipi.

²⁰ Pilato ti iyo jla'am ka jikio' ila'ne pa Jesús, it'imina'ne ti ijwilat'itie'eje ape'e papo i'nio'.

²¹ Kat'ajat'iyijpe papo i'nio' ti 'yakets'iyisiap ti iyo'ate: —¡K'iejwata'yi jana cruz! ¡K'iejwata'yi jana cruz!

²² Pajatayik'i ti najapajayiji ti kiak iyoni'ni papo i'nio': —¿Ten jiat'eje siupa je 'es siupa iyoyi? Je 'yu'we ka tiliana, kajeyepa ti lajk'ipa ka jitisa' ka'wi'in. Ja 'yakajluniejna'a ka tak'ajak'ni, sekjane'yi ka isio' iliena'ana'a.

²³ Kat'ajat'iyispe ti tanisi ape'e ti iyo ka tik'iejwata'a japa cruz, 'yina ti je iliyisi ti ijialasis, yiyi jlaja ti i'winayis siunie iyo kawoyisi.

²⁴ Pilato iyo'ne 'ate: —'Esiji, jayoyi siunie salaskinayi.

²⁵ Sekyi'i jikio' ilie'ne'ne siupa iyo jla'am papo ka inkio' tiliena'a, siupa jikalankijieye it'imina ti yi' insat jiweje, jla'yi ti ti'yikisane'ni papo i'nio' anechiyasas. Jlampet pa Jesús, yikiajlayi papo tokis ti its'iuyisie siupa iyo kawo papo i'nio'.

Ti Jesús tik'iejwataja'a japa cruz (Mt 27.32-44; Mc 15.21-32; Jn 19.17-27)

²⁶ Ti yamat'iyisijpe pa Jesús ti jank'iejwatits'i japa cruz, isiutiet'iyisipe pa i'nio' jle' iyo'ate Simón, Cirene jlele, ti tal ojwe, jota napi. Isiejesin'ne ti itilkinisi japa cruz, Jesús ja tik'iejwata'a, ti 'wanjlijap'ni isia'm pa Jesús ti titilki.

²⁷ Je pini' papo i'nio' yamisik'i, wuj ti jijliak'ali po' papo asejnia, yapayija'm ti ip'ilisinis pa Jesús.

²⁸ Jesús jitiej itieteje, sekyi'i iyo'ne 'ate: —Jerusalén jika jlosie, ke sip'elisina'ni, jla'm ijiate ti asa'am ti jani'yena', siu'neje napo asles.

²⁹ Kajeyepa ja na'am siuniwa jlomas ti jawo'ate napo i'nio', “¡Siunapo asejnia jlam je isiu'ujniejne'n ja inkasaje'n, siunapo ti kia'lis je tajla, siunapo ti je itipisiejne'n 'neje paka kia'leja'!”

³⁰ Ja pakayeyi napo i'nio' ti jawone'ate niwa tikijnakiyis, “¡Kiasitipe'e!”, kawonayijna'a 'ate, “¡P'on sitipe'e!”

³¹ Ijwil ka poye siunie tiwonaja janak a'la' ti jiwats'o, ¿ent'a ja kat'ajayi jla'am siunie jiwet'iaye janak a'la' jijwa'lak?

³² Jesús times papo jiliaye iniuyi wita'm, siupapo kajlajnatas ti ja tilianaja'n.

³³ Ti yiyeyisi siupa ajnat jle' iyo'ate Ijnetik Jleli 'Wet, sek tena'a'ne pa Jesús ti tik'iejwata'a japa cruz, tijwanaja'a siupapo times kajlajnatas. Titiujmataja 'niji jijweye pa ijwienjli, jikiecha pa titiujmataja ji'lieme pa Jesús.

³⁴ Pakayi ti Jesús iyo'ate: —Inia', p'elisijne'n jiwekie'e 'napo i'nio', jlam kia'iyo je 'yijenisi siunie iyoyisi. Siupapo tokis ti iyoyeyisi ka inik'isajasi puwa ji'wuye pa Jesús, 'yina tiliakinieyists'i ape'e.

³⁵ Jlam'ne papo i'nio' pa nojwisi'i ti i'yenis pa Jesús, siupapo anechiyasas, ti iliakiyis. Iyoyet'iyispe 'ate: —I'mieniti'n napo ijia. ¿Yot'iyi'ni ti je inijwajiet jla'am, 'nakayi siuti ja ijiatayi ka nakaye siunie Injwajieti Sinia' jijliujwanik?

³⁶ Siupapo tokis kia'iyojliyi pit ti iliakiyis, ti i'yayinisi pa at'es ti tosijyi.

³⁷ Iyonat'iyisijpe 'ate: —¡Siuti jijwel Judíojos jika anechiyasts'a'm, nisiamaja nijwajiet!

³⁸ Po' t'ipi pa a'la' t'aj, ti inamtis yi'i tena ape'e japa jletik pa Jesús, ti iyo'ate, “'NAK JUDÍOJOS JIKA ANECHIYAS.”

³⁹ Ijwienjli'ne siupa papo kajlajnatas ti ji'lij yeje'ni pa Jesús, ti kia'iyo tena pijia'm, iyone'ne 'ate: —¡Siuti ijiate ti a'am ti Injwajieti'a'am siunie Sinia' jijliujwanik, nijwajiet, jla'yi ti sa'am ka kasjwajietana'a!

⁴⁰ Siupi jikiecha isiujlie'ne jla'am ti iyo'ate: —¿Ijiatp'aneje ti je jloskiye pa Sinia', jlam'ne kiak jiwo pet jlejyi ni iyo ni inlaye?

⁴¹ Sa'm ijiate ti 'yuts'e'm ka kiak tiwonats'e, kayinaja ni siunie je 'es awoki, 'yina siu'nie i'nio' lajatak'iyi ka k'iejliyeyi ka woyi, ka je 'esie.

⁴² Sekyi'i kiak t'ipa iyoyeyipi ti inip'elisini pa Jesús: —Jesús, ataj wunitk'ina'a ka atiejena'a ni aka anechijiayas.

⁴³ Jesús isiujlie ti iyo'ate: —Ijiatk'i siu'nie jayo'naja ti siu'nie jloma je ijiat ka je a'ijiap ka yitana'a ji'wete siupa 'es pa Inia'.

Jesús ti 'yala (Mt 27.45-56; Mc 15.33-41; Jn 19.28-30)

⁴⁴ 'Najlikis ti yiyet'ipi ajnat'e pak ajnatiok paj ti yiyeyi japa inetitinki 'najape'e japa kiliekie', ti jiwekie'ejat'ipi ti nojwi.

⁴⁵ Kilie' 'yoma'a, 'yina siupa lotakinie tip'onajaja'm japa 'najla'wet jik'ioyi its'isk'i'ne jikiowek'i.

⁴⁶ Jesús iyo'ne 'ate, ti 'yakets'ijiap: —¡Inia', siu'nie isiak'al ekiaj'la! Yiyik'i wek ti 'yalat'ipi.

⁴⁷ Jlam'ne siupa tokis jika anechiyas, ti i'winaja siupa iyot'iyipi, sekyi'i iyo'ne 'ate, ti iyunit pa Sinia': —¡Ijiatp'aneje 'ni i'nio' ti jlam je iyo ti 'es!

⁴⁸ Wikie'eyi siupapo i'nio' sekyi'i ti nojweje, i'winis pa tiwonaja, t'ot ipiejayis ti jijliak'ali po', ti tajlayisi ti yapiliet'i'nipe.

⁴⁹ Siojopo t'ajajnajwas pa Jesús, siu'neje japo asejnia namk'i, ti namisik'i ti tajla' Galiléaja, sek k'iejliyiji pa takasit'ijin'ni, ti i'yenisi'ni siupa iyo kiwaka.

Jesús ti tip'onaja'a (Mt 27.57-61; Mc 15.42-47; Jn 19.38-42)

^50-51 Pojompe pa i'nio' jle' iyo'ate José, ji'wet japa Arimatea yiji jlaja ajnat Judea. Wuj ti jlosik po' pa i'nio', 'es jitieyi'i pa Sinia', jla'yi ti je iliyi inijijwijyink'iye pa jika anechijiayas pa Sinia'. 'Yina pakayeta siupapo ijnosikis jiwos, lapakawo ti je iniuyeje siupi iyoyi papo ijia siupa iyo kanwonisi pa Jesús, 'yaka je yimink'i.

⁵² Paka ti ijioyi pa Pilato ti ti'yasane pa t'ajwes pa Jesús masa.

⁵³ Ipi'yat'ipi wek pa Pilato ti iwijna'm. Yamat'iyipi ti yijne'n ti ilie'ne ti tajle'e japa cruz, 'yakapajlatayijk'i pa lotakinie, yamat'iyijpe ti ijioyiji pa a'no' yiji japa sisaj, ti k'iejli titimaja, ti lajlik'iji pa ka sek tokiji. Sek tena'a'ne ti tip'onaja.

⁵⁴ Japak siojopa jloma, ti iniwakajlanietak'i papo i'nio' k'iye siojopa jloma i'nio 'wanjlijyi'n.

⁵⁵ Siojopo asejnia jla'yist'iyisik'ipe pa Jesús ti tajlis Galiléaja 'wanjliyisiap isia'm pa José, ti i'winisi siupi yi'i japa ijnaki, i'yenis'ni siupa José yi'ne pa t'ajwes pa Jesús masa.

⁵⁶ Ti tajlat'iyisijpe, yapilie 'wetits'ik'i, ilisanayisi siupuwa jini inkask'iji'n, ti iyo ka 'nelinisik'i. Japak siojopa jloma i'nio 'wanjlijyi'n, ti i'nio' yajapk'iji'n, iyo jla'am puwa Sinia' jlamtis ti iyo ka tiwoki.