Juan 8 - Sinia' Jlamtis 1994

¹ 'Yina Jesús teje'ne 'niji yi'i jlaja tikijnaki Olivokiet.

² Siukia ti jlomaye'eje ti k'iejli mot, yapilieyi'ijyi jlaja 'najla'wet. I'nio' 'yakapajlayisi, sekyi'i yiyeje'n ti 'yiyasajne'n japok i'nio'.

³ Siojopo jiwos pi Moisés jika'neyasajnaye, siu'neje japo Fariséojos, itionayisi ja Jesús jlaja asejnia ti 'yuyi'ni pi jikiecha jik'iemjla. Yinayis jikiowe'e japo i'nio' nojk'i wita'm.

⁴ Ijwilayisiam'ne ja Jesús ti iyo'ate: —Inka'neyasajnawo, siujlie'e i'nioki ti'wenajaja jikiecha k'iemjla ti 'yuyi'ni.

⁵ Siunie Moisés jika'neyasajnaye iyo'ate, siojona asejnia kiak iniwone janak sisajas tikienajayi ti tiliana. 'Yina ¿tepi jiwo pet?

⁶ Lapakawo ti kiak iyotaja ka intajlatisie, it'imina ti kiak iyoyisi ti i'yasisi'n, jla'yi ti ijyijlitis. 'Yuye isia'm, sekyi'i ti ip'isina ni ajnat ti jijwuki isiene.

⁷ 'Yina ti i'yasis'ni, e'tieje'ne ti tijna pijia'm, sekyi'i iyo'ne 'ate: —Siunie ti asa'am jane'yi pa ja laja jikeye, nak inanayijna'a ka sisajas intateje'n.

⁸ Yikiajlayi'iji ti 'yu isia'm, ip'isina ni ajnat.

⁹ Ti ipi'yayisie ja Jesús ti kia'iyo, sekyi'i ti ijwienjlik'i'ni ti yam'ni, japok inian'ni japo kijilas ti yam'ni. Jesús i'win'ne ti ijwienjli jlaja asejnia ti 'wanjlejap,

¹⁰ tijnaye pijia'm sekyi'i iyone'ne 'ate: —¿Najapo? ¿Lajk'i wekie'e pa ka k'iejliyi pa ka inwo'naja?

¹¹ Iyo'ne 'ate jlajak i'nioki ti isiujlie: —Lajk'ipa, 'ni Ika'niona. 'Yina Jesús iyone'ne 'ate: —Kia'awo je asa'am. 'Yejne'n, maj, ke ekiajle'ena'a ka awo ni ake'.]

Jesús jla'am ti jika kates napo i'nio' yi' ajnat'e

¹² Jesús iyonayi'iji 'ate japo i'nio': —Ya'am ti jika katesk'i'm napo i'nio' yi' ape'e 'ni ajnat. I'nio' ni jana'am ijyik'i ja ke int'iskiuniejejyinna'a ni ajnatiok, siojona kates in'wasankiye tajle janejyi.

¹³ Iyo'ne 'ate japo Fariséojos: —Siunie jijwe'el, laj lajaye, 'yaka am a'am ti jitiajlat'a siunie jijwe'el.

¹⁴ Jesús iyo'ne 'ate ti isiujlieyi: —Siuniwa yamtis, ijiate wek yam yamata ti anijwe'el, lapakawo ti laja po'. Siunie atajli ts'ajane pi awone, siunie jajiojwi kia'iyojliyi, siuti asa'am je 'najanayi.

¹⁵ Siunie jiwoyeyi, jitis iyo pi i'nio' ti ji'yena', jiwoyeyi siupi jijwela' ka ijnewiteje ni i'nio'. Ya'am je'ne ka yama ka'ye'en ni jitis iyo ni i'nio'.

¹⁶ Siuti ja yama ti ja'ye'en ni jitis iyo ni i'nio', ja 'esie. ¿Tepa jawo ka kiak je iwo ti jantaja wita'm ki iyo siunie ijiatk'i? 'Yina ja ke sijwanjlajap ka'yenta siunie ja iyo, ti po' ni Inia', nak ja inoyijk'i'm, ti Jlam ti sijliu'.

¹⁷ Siuniwa inamtis ti tajle pi Moisés t'ipi iyo'ate, “Siunapo ti times ti ijniulwita'm siupi iyo ti ijwi'il, nak tiwok lajaye kajeyepa ti ijiatk'i siunie ijwi'il.”

¹⁸ Kiak iyo'ni siunie ajwe'el, awo ti yam ya'am ti anijwe'el, siunie Inia' kiak iyojliyi sijwe'el ti Jla'am ti sijliu'.

¹⁹ Sekyi'i japo Fariséojos i'yasayisi'n ti iyo'ate: —¿Tepa yi'i pi ana'? Jesús isiujlie ti iyo'ate: —Asa'am je intant'iejak'i, siunie Inia' kiak iyojliyi je intant'iejayi. Siuka intant'iejak'i intant'iejtaja ni Inia'.

²⁰ Jesús yits'e yi'i jlaja 'najla'wet ti kia'iyo, iyo niwa jlamtis, yi'i siojowa tiwoki'ni ji'wajieta' pi Sinia' siojowa ti titietajak'i'ni. Siuti je yijliyi'iji siojopa jika jloma, it'imina'ne ti lajk'ipa ka inki'me.

Jesús yikiajlayi'iji ti inijwejla'm papo i'nio'

²¹ Jesús iyonayi'iji 'ate japo i'nio': —Jayik, siuti asa'am ja siwoyejyin'ni, ja i'wanjliyejyi ni aske' ka inetianatie. Siunie jajiojwi je 'najanayi paka wonayi ka ajoyeyi.

²² Siojopo Judíojos iyo'ne 'ate ti yinisi kiowe'e: —¿Ent'a iyo ka inila'an, it'imina ti kia'iyo ti iyo'ate, “Siunie jajiojwi je 'najanayi paka awonayi ka ajoyeyi”?

²³ Jesús iyo'ne 'ate: —Asa'am as'wet 'ni ajnat. Jlam pet ti ya'am i'wit pet siunie 'niji pijia'm.

²⁴ It'imina ti kia'awo ti awo'ate, “Ja ke atajlajyi ni aske' ka inetianatie.” Siuti ja sakakiuye ti ya'am siunie ti awo'ate “ya'am”, ja ke atajlajyi ni aske' ka inetiajnatie.

²⁵ 'Yina ti ipi'yayisie ti kia'iyo, i'yasayisi'n ti iyo'ate: —¿Te'na'm? Jesús isiujlie japo ti iyo'ate: —Siunie iyo ti 'nelanjie'e ni i'nio' ni ajwe'el ti ya'am, naka.

²⁶ Po' siuniwa jayo'nase, jla'yi ti ja'ye'en siunie jiwoyeyi. Ijiatk'i siuniwa jlamtis ni i'nio' sijliu', jla'yi ti lajk'ipa jikiechaye ka ijwi'il, najata jla'am siunie iyo ka ijwi'il, ka ijwijla'm napo i'nio'.

²⁷ 'Yina je itiant'iejesk'i japo i'nio' ti ijwi'il pi Jinia' ti yi' poliyi.

²⁸ It'imina'ne ti iyo'ate: —Ijiatjliyijna'a ka tenata pijia'm ni I'nio' Jlas, jiwekie'ejana'a ka intant'iejayi ti jla'am siunie ti iyo'ate “ya'am”, jla'yi ti ja intant'iejayi ti je awo ka iyo ka itiajlatk'i siunie awo. Je'e, 'wenajliyi siunie Inia' ts'eyasane ti ajwel pet.

²⁹ Siunie I'nio' sijliu' yi' ijiap. Je sijwankite'n pi a'yi, kajeyepa ti awo siunie iyo ka iyo.

³⁰ Ti kia'iyo ja Jesús je pini' japo i'nio' je 'yakakiu.

Sinia' Jlas iliejnits'i niwa t'aka iyo napo inke' kipijnas

³¹ Jesús iyonayi'iji 'ate siojopo Judíojos je 'yakakiuyis: —Siuti ja ke aleyeyi siunie iyo niwa yamtis, asa'am ti ja ijiatayi ti 'yiyasajna'yase'm.

³² Ja intant'iejayi ki iyo ni ijiatk'i, siuni ijiatk'i 'yiniyijna'a ka inlanajyits'i.

³³ Iyoyis'ne 'ate ti isiujlieyisi pet: — ¿Yot'iyi'ni ti kiak jiwo, ti jiwo 'ate, “Ja ke kipijnasa'asem'ne paka ne'yi paka i'nioye”? Jlam'ne atajlaja'm pi Abraham t'ipi, lajk'ipa ka i'nioye ka jikipijnasats'e'm.

³⁴ Jesús iyone'ne 'ate japoka: —Ijiate, ijiatk'i siunie jayo, ti siunie i'nio' iyoyi ni jloski'la, nak siunie jikipinik ni inke'.

³⁵ Siunie i'nio' tiwoki inkipinikie' je paj ka napili pi ji'wet, jlampet siunie inas nak je paj pet ka intajla papo jiniewot.

³⁶ Siuti kia'iyo ni Sinia' Jlas, ti iniuyeje pa ti kiak iyo, 'yina kiak janwo'nase pet jlam ja ijiatayijna'a ti janlanajyits'i.

³⁷ Ijiate ti jinijwelayi pi Abraham ti asnaye, 'yina ti je kima'yi ilia'm niwa jlamtis, it'imina'ne ti jiwoyeyi ka siliana.

³⁸ Ajwel pet siunie a'we'en ti ajiap ni Inia', jlam pet ti asa'am siunie jijwela' siunie ti jipe'yayeyi ni asna' ti tajle.

³⁹ Ipi'yayis'ne ti kia'iyo, iyoyis'ne 'ate: —¡Abraham, pak sinia'! Jesús isiujlie'ne pet ti iyo'ate: —Siuka ijiatayiji ka jilisa'ase'm pi Abraham t'ipi, ka in'wenayeta ka woyeyi niwa iyot'iyi pi jla'am.

⁴⁰ 'Wenajliyi ti jiwoyeyi ka siliana' ti ajwelta'ase'm siunie ijiatk'i ti Sinia' ts'eyasane. ¡Abraham je kiak iniwone siunie jiwoyeyi!

⁴¹ Asa'am jiwoyeyi siunie jikijmaye iyo ni asna'. Iyoyis'ne 'ate: —Je sa'am siunapo jiniewot je 'yakaj, 'yina sinia' ijwienjli siupa atajlaja, paka Sinia'.

⁴² Jesús iyo'ne pet 'ate: —Ka ijiatayiji ti jijwela' asna' pi Sinia', ka seminayeta ti atajle pi Sinia', ya'am ti a'neye. Ti ana'am, je 'ne ka yama ka itiajlatk'i siunie awo, 'wenajliyi ni Sinia'.

⁴³ ¿Yot'iyi'ni ti kiak iyo ti je woyeyi ka intant'iejayi siukia awo? 'Nakayi jla'am ti je woyeyi ka ak'iuyeyi niwa yamtis.

⁴⁴ Imosik jilists'ase'm, siuti jitiajlayi, it'imina ti jiwoyeyi siunie iyo kanwo. Siunie imosik ti 'nelanjie'e ta'a ti tajlap'e ti iyo kalankijietaja, je paj ka ijiatak'i pa kanwo, lapakawo ti ijiateje ti yinjlajap siunie je ijiatk'i jitiowiji. Siuti ijwilata siuniwa sintijieyis, 'yakaja'a ti jla'am, jla'yi ti jla'am ti jinia' niwak sintijieyis.

⁴⁵ Siuti ya'am ti ajwe'el siunie ijiatk'i, it'imina ti sakakiuye.

⁴⁶ “¿Tepa jane'yi pa ti asa'am, ka inkajanit itipe'e ti po' pa awoyi 'yake'? Siuti ijiatk'i siunie ajwe'el, ¿yot'iyi'ni ti sakakiuye?

⁴⁷ Siunie ti Sinia' jlas its'iuye ki iyo niwa jlamtis ni Sinia', 'yina siuti je lijts'ase'm, ¿tepa jawo ka k'iuyeyi?”

Ti Abraham lajlik'iji pa, Sijwajieti ta'a jla'm ti po'o

⁴⁸ Siojopo Judíojos ipi'yayis jiwek ja Jesús ti kia'iyo, sekyi'i iyonayisi 'ate: —Ijiate siunie awona'a ti ajwela ti am Samaria jlele'a'am, ti imosik yi' awa'm.

⁴⁹ Jesús isiujlie pet ti iyo'ate: —Lajk'ipa imosikie' ka ine' iwia'm. Siunie awo jiwunitieye e'ne ni Inia', 'wenajliyi pet siunie jiwoyeyi ti je woye ijiaye ti ya'am.

⁵⁰ Ejlojli'iji jiwekie'e, lapakawo ti je awo ijliak'aliye ti kia'iyo, ka je siwunit napo i'nio'. 'Yina po' siunie ti iyotajank'iye ka siwunitie, naka siunie ja'nakajanit ki iyo napo i'nio', ti jla'am ja ijiatayi ti jajnajyi siunie janwo ka 'notatajajna'a.

⁵¹ 'Yina awo'ate, jla'am je awo siunie ti awo'ate, i'nio' ni janwo niwa yamtis ja ke inetia'n.

⁵² Iyo'ate japo Judíojos ti isiujlie: —¡Ijiate ti awok'ija 'ate ti ajwela ti imosik yi' awa'm! Jlam'ne siupapo injwejlanawos t'ipi pajk'i ti 'yajle'n, Abraham kia'iyojliyi, ti jiwo'ate ti jlamti, “I'nio' ni janwo niwa yamtis ja ke inetia'n.”

⁵³ ¿Ent'a jit'ia'n ape'e pa sinia' Abraham t'ipi, jlam'ne je k'iejeyeyik'i'ni ti 'ya'al, siu'neje papo injwejlanawos t'ipi? ¿Tent'ipa siupa jini'yejnap?

⁵⁴ Iyo'ate ja Jesús ti isiujlie: —Ka yama ya'am ka iniwunit, siunie awo ti aniwunit siu'neje niwa yamtis laj lajaye. I'nio' ni siwunit, naka Inia' ti jiwoyeyeta 'ate ti jijwela' “Sinia'”.

⁵⁵ 'Yina je intant'iejayi. Jlampet ti ya'am sitiant'ieje. Siuka ijwi'il ka iyo'ate, “Je sitiant'ieje”, wuj ti jayo sintiye, ka iyoyena'a 'ateye jiwoyeyi. Ti ya'am jlam je awo ti sitiant'ieje, jla'yi ti awoyi niwa jlamtis, ti iyo ka iyo.

⁵⁶ Abraham siupi jitiajlajia'm, ipini'yi ti iyo'ate, “Je ijiat ke i'wi'in siojona jloma ti ja'nes 'ne ajnat'e pi Saka'niona.” 'Yina ijiatjliyi kia'iyo ti i'wi'in, wuj ti ipini'yi.

⁵⁷ Siojopo Judíojos iyonisi'ne 'ate ja Jesús: —Jlam'ne je jleyi puwa ka cincuéntaja puwa aka najkapisie, ¿ti jijwe'el jiwe'n ape'e pi Abraham?

⁵⁸ Jesús isiujlie'ne pet ti iyo'ate: —Ijiate, ijiatk'i siunie awo, ti ya'am pajk'i ta'a ti sipo', ti siupi Abraham lajlik'ijipa.

⁵⁹ Sekyi'i ti isimayisk'i'ni kiwa sisajas ti iyotaja ka intatisiji'n. Jlampa yama ti inijwekia'm, ti tal kiajwe jlaja 'najla'wet.