Juan 20 - Sinia' Jlamtis 1994

Jesús iniu kisie'e ti tajla'm pi a'no'

¹ Siojokia tajlaja'm ti k'iejli mot, ti ajnaj 'wanjle ajnat'e, María Magdala jleliki ijio a'noyi. Ti yiyeyi, siujlieja sisaj tip'onajaja'm jet'i k'iejets'i'nijpe ti totie ts'ijiye.

² Ta'a ti t'osi ti ijioyi ja Simón Pedro, siu'neje ja Jesús t'eyasanik ti jleminik, ijwijlam'ne japoka ti iyo'ate: —Titionat'ijyi kisie'e ki Saka'niona masa. Je kasts'ajane pi tena'a.

³ Siojo Pedro siu'neje ja Jesús t'eyasanik, ti ipi'yaye, yama'ni ti i'yenisi.

⁴ T'osiye'ni ti yama'ni, ijwienjli'ne siojo 'yakets'ijyine, jak je iyoyiji'ni ka je inane ti sek yiji.

⁵ T'akana isia'm ti i'yen jik'ioyi jlaja kiawe. Jawakata siojowa lotakijnies tekiajlaja wita'm. Ti i'wine jlam'ne je yame siojo yi'i.

⁶ Ji'niajk'i ja jikiecha, Simón Pedro 'nes'ne. Yiyi wekie'e ta'a jla'am ti 'yuyi, sekyi'i i'win'ne jla'am jawa lotakijnies kajeyepa ti yamejeyi siojo yi'i,

⁷ siu'neje ja lotakiniewa tits'ijwanak'i jakia jletik. Ijwienjli je yi'i, najata jla'am ti totie wita'm.

⁸ Kiak iyojliyi siojo inianta ti 'yuyi siojo a'no', ti 'yuyeyi pet sekyi'i ti i'wina, je takakiunieyi.

⁹ Mamjli'ijyi je 'yijenisi paka iwone niwa inamtis t'ipi ti iyo'ate, “Ti ijiate ti jano kisie'e ti jantajli pa a'no'.”

¹⁰ Yapilisni'ne.

Jesús ini'wenkijna'm japa María Magdala jleliki

¹¹ Siujlieja María Magdala jleliki sek 'wanjle'e yi'i ja a'no'. Ti yap'ni t'akana isia'm ti i'yenta jik'ioyi jlaja kiawe.

¹² Sekyi'i i'win'ne papo times Sinia' jijliujwajnas poli jlele ti ji'wuye lemi, yits'e tenat'itie'epe ja Jesús, ti yik'iji'n ijwienjli siupa tome 'niji jletik itijyi, ijwienjli pa tome 'niji jisietis itijyi.

¹³ Siupapo injlojwajnas poli jlele i'yasen'ne jlaja María ti iyo'ate: —Jla i'nioki, ¿yot'iyi'ni ti jlap'ni? Isiujlie ti iyo'ate: —Tikiniet'iyi ki t'ajwes masa ki 'Yaka'niona. Je ts'ajane pa tokiji.

¹⁴ Yiyik'i wek ti kia'iyo, María jitiej yikial'ne ji'wechaja sekyi'i ti i'wina ja Jesús, 'yina je itijnisieje ka jakaye Jesús.

¹⁵ Jesús i'yasen'ne jlaja María ti iyo'ate: —Jla i'nioki, ¿yot'iyi'ni ti jlap'ni? ¿Ten siupi jiwojyin'ni? María ijwilta ka pakaye siupi i'yena ja inwasok. I'yasen'ne ti iyo'ate: —Sip'elisin wata'a, ka ama'a ka ajlasat, jwelk'i'm siupi jle'ne, jayikinie'e.

¹⁶ Jesús tamti ti iyone'ate jlaja María: —¡María! María i'yejnen'ne ti ipi'yaye, iyo'ne 'ate: —¡Rabuni! (Hebréojos ji'lij ti iyo'ate, 'Yaka'neyasajnawo.)

¹⁷ Jesús iyo'ne 'ate: —Akio' lank'i'm, mawat je ajojliyi'ijyi ni Inia'. Maj kiu' wekie'e ka ajwele japo i'lijwas, jwejla'm ti jajioyi kiu' ni Inia', siunie Asna' pet.

¹⁸ María Magdala jleliki yam'ne ti ijwijla'm japo t'eyasajnas ja Jesús, ti iyo'ate: —A'we'neje ja Saka'niona. María ijwijla'm japo siukia Jesús iyone.

Jesús ini'wenkijna'm papo t'eyasajnas

¹⁹ Siukia jloma ti tajlaja'm, ti ajnaj, siupapo t'eyasajnas initaj'ne seka'a yi'i siujlieja 'wuk yiyis kiajwe, ti ip'ionisiamk'i jawa jika 'wuk kiwitawa, ti je ijwiyisink'iye siojopo Judíojos jika anechiyasas. Sekyi'i ti Jesús inikajanitie jikiowe'e japo t'eyasajnas, iyo'ne 'ate: —¡Kamaja!

²⁰ Sekyi'i i'winkijnam'ne japo jawa jikioye, siu'neje ja ji'wet jlaja k'ok t'etajaja'm ts'e jlawe'e. Je jlase' ki iyo ti inkase'n ti i'winayis ja Jika'niona.

²¹ Jesús yikiajlayi'iji ti iyo'ate: —Kamaja'. Iyo'ate siunie ti Inia' sijliu', 'yina kiak ja iyo'nase pet ti jajliuye.

²² Sekyi'i Jesús ipiejwuye ape'e japo, ti iyo'ate: —Kima'yi ilia'm siujlie'e Sinia' jikimet ti 'es.

²³ Siunapo ti jalenkinayi siuni iyo niwa jikeyis, ka netianape niwa jike' iyo. Jlampet siunapo ja ke alenkinayi niwa jikeyis, ja ke inetianape pet.

Tomás je 'yakakiu ti iniu kisie'e pa Saka'niona

²⁴ Tomás, ti Jesús t'eyasanik kiecha, ti tiwonaja'ni 'neje 'ate Timesi, je yiji japo ijia ti Jesús inikajanitieja'm.

²⁵ Ti 'nesa, ijia ijwijlam'ne ti iyo'ate: —Sa'am a'wenaja ja Saka'niona. Tomás isiujlie'ne japo ijia ti iyo'ate: —Ya'am ka je i'wi'in puwa ji'wetis puwa wikijnies ti t'etajajamk'i, ka ijiuki je 'yutk'i siupuwa ji'niajia, siu'neje ka je isies ape'e siupi t'eta'a jlawe'e, siuka isio' je yi'n ape'e, ja 'yakakiu.

²⁶ Tijwajyi jakia inkijmaye ijwienjli, yikiajlayi'iji ti initaj kiajwe jlaja 'wuk. Jakayi'ne ti Tomás sekyiye'e. Siojowa 'wuk kiwitawa wikie'eyi ti tip'onajamk'i. Jesús inikajanit 'ne ti takasiti'n jikiowe'e japo. Iyo'ne 'ate ti itijwilayi: —¡Kamaja!

²⁷ Sekyi'i iyone'ne 'ate ja Tomás: —'Yejne'n niwa isioye, ajwuki 'otk'i. Jonie ni akio', kiejts'e siu'nie yi'i ni t'eta'a. ¡Lek'i siunie jiwo ti kakiujnieta'a'm, wo atankiujnieyeja'!

²⁸ Tomás iyo'ne 'ate: —¡'Ni Inia', 'Yaka'niona!

²⁹ Jesús iyo'ne 'ate: —Je kakiunieyi'ne, kajeyepa ti si'we'en. ¡Jlajma ijiatayi ti Sinia' jamp'elisijne'n siunapo ti je i'winata, lapajawo ti naka jla'am ti je takakiunisi!

Siunie it'imina ti tilisanaja niwaka

³⁰ Je piniyeta siuniwa Jesús i'winki'n, ti yine jitieyi'i japo t'eyasajnas, ti je yiji siu'nie inamtik jiwe.

³¹ Tepa jawo ka je tenaja ti nakaye ti jant'emina ka je akakiuye ja Jesús, ti ijiate ti Sinia' Jlas, Injwajieti ti Sinia' jijliujwanik, 'nakayeyijna'a ti ja'wena' jana as'wasankiye ti t'o'n, siunie ja ke inkakiu.