Juan 1 - Sinia' Jlamtis 1994

Sinia' jlamtis iyo i'nioye

¹ Ti 'nelanjie'e t'ipi siunie inamtik ta'a ti po'o, ti je wakaljli'ijyi niwa wask'i'nelaja. Siunie inamtik yijap ta'a pi Sinia', 'yina jla'am ti Sinia'.

² Jla'am ti yijap pi Sinia' ti 'nelanjie'e lajk'i puwa niwa wask'i'nelaja yi' ape'e 'ni ajnat.

³ 'Yina ka lajak'i ti jla'am ti Sinia' ilisanayi wikie'eyi niwa wask'i'nelaja yi' ape'e 'ni ajnat, jla'am ti it'imina ti Sinia' ilisane.

⁴ Naka'ne ni siunie in'wasankiye tajle; janaka'ne siojona 'esi' napo i'nio' iyoyisi jika katesa'.

⁵ Janaka ti yata'm jikiowe'e ni ajnatiok, siunie ajnatiok je 'yijene paka inwone ka'nojmat'e.

⁶ Pope jak i'nio', jle' iyo'ate Juan, ti Sinia' ijliu'.

⁷ Ijwi'il siunie iyo ti i'wi'in janaka kates. Ti ijwijla'm napo i'nio' janaka kates ti i'wi'in, 'nakayi ti ja wikie'eyeyi ti ja ke inkakiuyis.

⁸ Juan je janaka kates, 'wenajliyi pet siupi titiejkinaja ti tijliukieje ka injwe'el siunie iyo janaka kates.

⁹ Siojona ijiate jla'am ti kates ti ja'nakajanit'i ape'e wikie'eyi napo i'nio' yi' ape'e 'ni ajnat, majleyet'ipi ilia'm.

¹⁰ Siunie i'nio' ti inamtik pajk'i ti yikiajlin'ni ape'e 'ni ajnat, jla'am ti it'imina ti Sinia' ilisane 'ni ajnat, 'yina kiakayetak'i lapakawo siunapo yi'i 'ni ajnat je itiant'iejesi.

¹¹ 'Nese 'ni jika ajnat, 'yina siunapo tijnayi ti jika kia'lis je isi'm ilia'm.

¹² Siunapo isi'm ilia'm, siu'neje napo je 'yakakiu, napok iyo ji'niayija' kanwo Sinia' jilisa'.

¹³ Ijiatjliyi napok Sinia' jilis, 'yina je napoka napo i'nio' ka intajla ka jlama ka impojonit, jla'yi ka jitienkiujnieyeja' ni i'nio', 'wenajliyi jlam pa Sinia'.

¹⁴ Siunie inamtik ti iniwojwa'n i'nioye, yisajap. Je jlase' ki iyo ni jlemijnaye ti po'o, jla'yi ki iyo ni ijiatk'i ti yiyi. A'wena ki iyo ni jla'al ti wuj ti 'es, jla'yi ni jle' ti wuj, ti jlamkata ti tekiajlaja, 'yina kajeyepa ti jlam ti Jlas ijwienjli pi Sinia'.

¹⁵ Juan 'yakets'ijiap siunie jika'niye ti iyo'ate ti ijwile pijia'm: —'Naka siu'nie ajwel'nijpe ti awo'ate, “Po'o ni i'nio 'wanjli isia'm ti 'yaka'm itipe'e, nak siunie i'nio' ti po ta'a ti 'nelanjiejat'ipi, ti ya'am siliejlik'iji.”

¹⁶ Laj jlaja ki iyo siunie iwints'e'm ti ipijlatine sitipe'e ti kasp'elisijne'n,

¹⁷ Siunie inka'neyasajnaye ti tajle pi Moisés t'ipi ti tekiajlaja, siunie inemijnaye jla'yi ni ijiatk'i yisajap lapakawo ti naka jla'am Sijwajieti Jesús ti it'imina.

¹⁸ Lajk'ipa ka in'we'en pi Sinia'. Ijwienjli jla'am ti i'wi'in siunie Jlas ijwienjli, ti jla'am ti Sinia', ti ijwienjli yiyi'i pi Sinia'. Jla'am ti i'winkints'e'm, it'imina ti kastant'ieje.

Juan inajiejnawo 'yakajanit'i ape'e siunie iyo ni Sijwajieti Jesús

¹⁹ Siunapo anechiyasas Judíojos yiji jana Jerusalén ijliuyet'ipi napo pa'yijis siu'neje napo jla'yis Levítajas ti ijioyisi ja Juan ti i'yasisi'n ti iyo'ate: —¿Te'na'm?

²⁰ 'Yina je iyo'ni ka inijwek ti iyo'ate: —Sinia' je sijliu' ka iyo Injwajietiwoye.

²¹ Yikiajlayisi'iji ti i'yasisi'n: —Jakajliete, ¿te'na'm? ¿Amt'imi siupa injwejlanik jiwo Elías? Juan iyo'ne 'ate: —Je ya'am. Jlam yinjliyisi ape'e: —¿Amt'e jiat'eje siupa injwejlanik jiwo ti ja'nes? Isiujlie ti iyo'ate: —Je'e.

²² Iyonayisi 'ate: —Jlam woni'ni 'ate: jwelts'e'm, janaj'nina'a jajwilaja siojopo kasjlok. ¿Tent'ipa siupa jiwo jiat'e?

²³ Juan isiujlie ti iyo'ate: —Ya'am siunie jla'lap ni i'nio' ti tan'ni ape'e 'ni ajnat mami'yi, iyot'iyipi pa injwejlanik jiwo Isaías ti iyo'ate, “Wakajlanit pi ji'niayi k'iye ni Saka'niona ka jnajyi.”

²⁴ Iyo'ne 'ate siojopo Fariséojos jikawos

²⁵ ti i'yasisi'n: —¿Yot'iyi'ni jiat'eje ti jiniejiejne'n napo i'nio'?, ti jijwe'el ti je injwajietiwo'wa'm, jla'yi ti jijwe'el je a'am siupi Elías, siu'neje ti jijwe'el je a'am siupi injwejlanik jiwo.

²⁶ Juan isiujlie japo ti iyo'ate: —Ya'am anajiejni napo i'nio' ni i'niat. Po' ni i'nio' yi' aska kiowe'e ti je intant'iejayi,

²⁷ ti 'wanjli isia'm. 'Yina tiwet'ianaja ka nakataja wek ka 'yakajli ka iliejnits'i niwa jisieti t'aka'.

²⁸ Yi'i jlaja ajnat jle' iyo'ate Betania yi'i ja tewuk Jordán taj'le ni kilie' sek yinayi'i ja Juan ti iniejiejne'n japo i'nio', sekyi'i kiaka ti kiak iyo.

Jesús jla'am ti initiajnat niwa jikeyis ni i'nio'

²⁹ Siukia ti jlomaye'eje, jakayi'ne ja Juan ti i'wi'n ilia'm ja Jesús ti ijioyi. Iyo'ne 'ate ja Juan: —¡'Yena'yi ilia'm siunie naka Sinia' jiliajwa 'wolepo 'woma, ti initiajnat ni jloski'la napo i'nio', ti Sinia' ijliu' ajnat'e!

³⁰ 'Nak ajwel'nijpe ti awo'ate, “Po'o ni i'nio 'wanjli isia'm ti jana'am, ti 'yaka'm itipe'e. Naka i'nio' inia'an ti po'o ti ya'am je ajlijyi'ijne.”

³¹ 'Yina kia'iyo je sitiant'ieje ti 'nelanjie'e. Ti ya'am ti ana'am, anajiejni ni i'niat napo i'nio' ti anajiejne'n, 'nakayi ka intant'ieje napo Israel jika kia'lis.

³² Juan iyoye'eje 'ate: —'Yina kia'iyo a'wenaja siujlieja Sinia' jikimet ti 'es ti yi' ape'e, ti 'yiniye ni ojwo' ti nama isia'm ti tal poliyi.

³³ Ti 'nelanjie'e je sitiant'ieje kiu'. 'Yina siunie sijliu' ka iniejiejne'n napo i'nio', ka iniejiejni ni i'niat, iyonk'i 'ate, “Siuti ja'we'en siunie i'nio' Sinia' jikimet ti 'es janame ti jane'yi ape'e, janakaye siunie i'nio' ti janajiejni jana Sinia' jikimet ti 'es napo i'nio'.”

³⁴ “Pajk'i ti a'we'en 'naka i'nio'. Ya'am ti akajanit'i ape'e ti 'naka Sinia' Jlas.”

Jesús t'eyasajnas ti iniajnat

³⁵ Siukia jlomaye'eje, ini'wenayi siojopo times t'eyasajnas.

³⁶ Juan i'wink'i ja Jesús ti t'iskiujnin'ni, sekyi'i iyo'ne 'ate: —¡Ji'wenak'i, 'nak Sinia' jiliajwa 'wolepo 'woma ti ijliu' ajnat'e!

³⁷ Siojopo times Juan t'eyasajnas ti ipi'yayeyis, yamayisk'i siojo ijiojwi ja Jesús.

³⁸ 'Yina i'yen'ne ji'wechaja ja Jesús, i'wi'in japo ti yamk'i, sekyi'i iyo'ne 'ate ti i'yase'n: —¿Tempi jiniamayi? Isiujlie'ne ti iyo'ate: —Inka'neyasajnawo, ¿tepa jle'yi?

³⁹ Jesús iyo'ne 'ate ti isiujlie: —Joniemet, 'yenayi. Yama'ni ti i'yenisi siojo yi'i'ni. Paj ti no'otiyeyiji sek 'wanjliyits'i'ne.

⁴⁰ Ijwienjli siojo jle' iyo'ate Andrés, siojo Simón Pedro jikilia,

⁴¹ ta'a ti ya'am ti ijioyi ja ji'yini, yiyi ti iyonayi 'ate: —A'wena siojo Injwajieti ti Sinia' Jijliujwanik, yits'e.

⁴² Andrés yameje'ni ja ji'yini ja Jesús, sekyi'i ti iyonayi 'ate: —A'am ti e' iyo'ate Simón, ti Juan jlajts'a'm. 'Yejne'n, e' jawo'ne 'ate 'nakayi Cefas.

Jesús tane pa Felipe siu'neje pa Natanael

^43-44 Siukia ti jlomaye'eje Jesús iyoye'ijyi ka inta 'niji yi'i jlaja ajnat jle' iyo'ate Galilea. Sek ini'wene'e'ne siojo i'nio' jle' iyo'ate Felipe, Betsaida jlele, siujlieja isi' taj'le siojopo Andrés jla'yi ja Pedro. Iyonayi 'ate ti tanayi: —Na'm ijyik'i.

⁴⁵ Felipe yam'ne ti ijioyi ja Natanael, yiyi ti iyonayi 'ate: —A'wena siojo ijwilt'ipi ta'a siupa Moisés siu'neje papo injwejlanawos siupuwa 'yit'iyijpe. Je 'wena pa i'nio' ka jikiechaye naka Jesús, José jlas, Nazaret jlele.

⁴⁶ Natanael iyo'ne 'ate ti isiujlie: —¿Mi 'est'iyiji ka poye pa kantajla'm japa Nazaret ka 'esie? Felipe iyo'ne 'ate ti isiujlie: —Jomet. Jlam 'esijyi ka a'we'en.

⁴⁷ Jesús iyo'ne 'ate ti i'wina ilia'm ja Natanael: —Siunie 'la'n ilia'm, nak Israel jika kia'le ti lajk'i paka t'oniye ka je 'esie.

⁴⁸ Natanael isiujlie'ne pet ti iyo'ate: —¿Yot'iyi'ni ti intant'iejk'i? Jesús isiujlie ti iyo'ate: —Pajk'i ta'a ti a'we'na, ti Felipe je ijiojli'ajyi, ti jle kiajwe jlaja higok.

⁴⁹ Natanael iyo'ne 'ate: —Inka'neyasajnawo, ¡am ti Sinia' Jlajts'a'm, sa'am ti Israel jika kia'lits'e'm saka anechiyasts'a'm!

⁵⁰ Iyo'ne 'ate ja Jesús ti isiujlie: —¿'Nakat'iyi jla'am ti ajwe'el ti a'we'na ti jle kiajwe jlaja a'la', it'imina ti je sakakiu? Je ijiate ka já a'we'en siuniwa ijiatk'iji'n kapajata.

⁵¹ Jesús yine'ne ape'e ti iyo'ate: —Ijiate siunie ajwe'el ti awo'ate, ti ja'wena ni poli ti ja 'ajlaja'm. Ja'wena napo Sinia' jijliujwajnas poli jlele ti janekiajlin'ni ape'e ni I'nio' Jlas, 'wena napo janekiajlin'ni kiajwe.