Hechos 9 - Sinia' Jlamtis 1994

Saulo iyo jlosik ink'ieye

¹ Saulo je iliyi ti t'olana ka ilajne'n papo i'nio' iyoyi ki inamtik. It'imint'iyijpe ti ijioyi pa pa'yijis jika anechiyas siupa jlamt'iyijpe,

² ti ition kisie'e pa jikio' jlele, ka t'ajlinitie k'iye ti iyo kajnoyits'i puwa Judíojos t'ajla'wetis yi'i japa isi' jle' iyo'ate Damasco. Iyojyi'n siupapo yamk'i siupa 'Nayi Ink'ie', paka pa Jesús. Wikie'eyi ayijnies asejnia isi'mik'i ti ijios'ni insat jiweje, yi'i japa Jerusalén.

³ Jlampa yiyeje pi 'niayi, 'yina je toj'we japa isi', yisi'liet siupa jla'al siojopa kates tal poliyi, ti yiyet'ipi ape'e.

⁴ Saulo iniuyet'ijyimpe ti taj'l ape'e pa jiliajwa, ipi'yayi'ni siupa ina'lap tom poliyi, ti iyo'ate: —Saulo, Saulo, ¿yot'iyi'ni ti jiniajme'n ijyik'i ti salas kawo atajiejwayek'i'm?

⁵ Saulo isiujlie ti iyo'ate: —'Ni 'yaka anechiyas, ¿te'na'm? Iyo'ate siupa ina'lap ti isiujlie pet: —Ya'am Jesúsk'i'm, ti jiniajmen'ni ijyik'i ti jiwo atajiejwayek'i'm.

⁶ Neppijia'm, maj jojwa'm jana isi'. Sek ja a'yi ka tijwelajamna'a siunie jawoyi.

⁷ Wuj ti jnots'ijnits'i papo jla'yis ja Saulo, kajeyepa ti ipi'yayis siupa ina'lap ti pesieje, 'yina je i'winis siupa i'nio' ti jla'lap.

⁸ Sekyi'i ti iniyet'itiejpe pijia'm, ijwilat'itiejpe ka'yen kisie'e ka 'esieyiji, 'yina Saulo iyo talokie. Siupapo jla'yis itionat'iyis'nijpe, ti ijioyisieja'm jlaja isi' jle' iyo'ate Damasco.

⁹ Jika jlomas najape puwa yiji ti je i'wijne'n, jla'yi ti je ti'yekiu'n, jla'yi ti je i'ya i'niati.

¹⁰ Pope ja i'nio' jle' iyo'ate Ananías yi'i jlajak isi', Sinia' jlas. Jaka'ne siojo Saka'niona ini'wenkijna'm ti iyo'ate: —¡Ananías! Isiujlie ti iyo'ate: —A 'neye, 'Yaka'niona.

¹¹ Sinia' iyone'ne 'ate: —Kasit, maj, nok'i siunie jika'wu jana isi', siunie tiwonaja'ni 'ate Tijnajyi. Ja ayi ja ji'wet ja Judas, sekjane'yi ka a'yasanayi'nina'a pa Saulo, Tarso jlele. Sek yi'i, je ilijliyi'ijyi ti iyo t'ajlayeja'.

¹² Po' siunie ti'wenkinaja, i'nio' pa Ananías ijioyi, sekyi'i jikio' yi'n ape'e. Yikiajlayi'iji ti i'wijne'n, iyo ni ti'wenkinaja.

¹³ Ananías ipi'ya ti kia'iyo, iyo'ne 'ate: —'Yaka'niona, 'loj japo i'nio' ape'ya ti jitiej ijiutisie pak i'nio', jla'yi siunie iyo ti wuj ti je 'es, iyone napo aka kia'lis ti isis ti yiji jana Jerusalén.

¹⁴ 'Nakp'an pa yiye'e, lapakawo ti pa'yijis jika anechiyasas 'yajlinit k'iye, jla'yi ti tijliukie kanki'mek'i wikie'eyi siunapo inwunit, ka tikinieje'ni Jerusalenne.

¹⁵ 'Yina Ananías Sinia' jlam iyonjliyi 'ate: —Maj joyi, lapakawo ti ya'am ti aki'me nak i'nio', jla'am ti ja sijwe'el, jla'yi ti jawo jika'niyejayi siunapo i'nio' lajk'iyipa kawo, siu'neje napo jika anechiyasas, siu'neje napo Israel jika kia'lis.

¹⁶ Ja'winkijna'm ti jayama ti jat'imina ti ja wujwa ti janilayiti siunie ja tiwonaja.

¹⁷ Ijiatjliyi Ananías yam'ne ti ijioyi ja Saulo siupa yi'i. Yiyi ti 'yuyeyi, sekyi'i jikio' yina ape'e ti iyone'ate: —Isiecha Saulo, Saka'niona Jesús, siunie ini'wenki'na'm ti jleji na a'nayi ti jlalasta ka ata'yi ilia'm, sijliu'wa 'nakajanena'a ka ekiajle ka 'wejne'n, jla'yi ti Sinia' jikimet ti 'es jampo'a.

¹⁸ Ta'a t'ipi ti iniuk'iji'n siupuwa yi' ape'e puwa jitiete'l 'yiniye niwa si'yus jlotis, sekyi'i 'esiji'ni, yikiajlayi'iji ti i'wijne'n. Inippijiam'ne, sekyi'i ti tiniejienaja.

¹⁹ Jijweye poye ti itimat'iyijpe ti ti'yekiu'n. 'Nak nojwaja'm puwa jlomas ti 'wanjleje'n ti yijap papo ijia Sinia' jilis yi'i jlaja Damasco.

Saulo iyo jlamtikie' niwa Sinia' jlamtis

²⁰ Ijioyits'i puwa Judíojos t'ajla'wetis, ti ijwijla'm papo i'nio' ti Jesús pak Sinia' jlas.

²¹ Jlam jnots'inijits'i'ni siupapo ipi'ya, iyoyisie t'ipi 'ate: —¿Ma 'wena 'na tijwela'nijpe, yamk'i'ni japo i'nio' Sinia' jilis yi'i jlaja Jerusalén, iyo ni inamtik? 'Wena ja ke iwonts'e ti 'nes'ne, ti ja kassekiajle napo pa'yijis jika anechiyasas.

²² Saulo jla'm ini'netjli ti ijwijla'm papo Judíojos sek ji'wet'e yi'i jlaja Damasco ti Jesús jla'am ti Injwajieti ti Sinia' jijliujwanik. Iyoyet'iyispe 'ate: —¿Ten siunie iyo ni i'nio'?

Saulo Sinia' jilis i'mienit ti tiwoktaja ka tiliana

²³ 'Loj puwa jlomas yam'nijiye. Inikiujlie papo Judíojos ti iyo ka ilanis ja Saulo

²⁴ 'yina t'ijieyi siupa jota tiwonaja. Jlomas jla'yi puwa ajnajas ti inijijwintajas k'iye, itijwits'i puwa jika 'wuk kiwitawa jlaja isi', ti tiwasokiap.

²⁵ Ijia yinat'iyisipi japa inlesanki siojopa tajwak tikimajak'i ti wuj, ti itiujmatis ji'wechaja siupa tip'onajap jlaja isi'. Jlam'ne ajnaj, tijwajyi papo jikojwas, 'yina je i'yakanis'ne.

Saulo yi' Jerusalenne

²⁶ Saulo ijio Jerusalenne. 'Nes ti ijioyet'itiejepi siojopo ijia Sinia' jilis, 'yina je ijwiyisieyi'iji lapakawo ti takakiunisi ka Sinia' jlasa pet.

²⁷ Bernabé yamk'i'ne ti iniank'iye ti ijioyi japo injlojwajnas, iyoyet'ipi 'ate: —I'lijwas, 'yejne'n siu'nie i'nio', 'nak sikiechaye'eje. Yit'i'yipe pa jloma ti yiji pa ji'niayi, Saka'niona Jesús ini'wenkijna'm, jla'yi ti ji'lij iwijna'm. 'Yina ti yiyet'iyipi siojopa isi' wuj ti ini'net ti ijwi'il pa Jesús.

²⁸ Ijiatjliyi, Saulo sek 'wanjle'e yi'i jlaja isi' Jerusalén, ti yijap japo ijia Sinia' jilis. Wuj ti ini'net ti ijwi'il pa Jesús.

²⁹ Takamtijniene papo Judíojos, jla'yi ti iniewitiji'n, siupapo iyo pa Griego 'lij, it'imina'ne ti t'olanaja ka tiliana.

³⁰ Siojopo ijia Sinia' jilis, ti 'yijenayi pi iyonisi, ijioyisi'ne Cesaréaja. Sektaj'le ti ijliuyisie Társoje.

³¹ Jak je iyoyiji'ni 'yakamaja siojopo Sinia' jilis yijits'i wikie'eyi siojowa ajnatis t'ipi Judea, Galilea, Samaria. Jlam yamjlijyi'n puwa Sinia' jlamtis, wuj ti toskiyisie pa Sinia', Sinia' jikimet ti 'es iniuyeje, it'imina'ne ti 'loj papo i'nio' t'opiyiji, ti iniwome.

Eneas tijwa'a

³² Japaka siojopa jloma ti Pedro t'iskiujni'n, ijioyits'i japo ijia Sinia' jilis, ijioyet'iyipi papo Sinia' jilis yi'i jlaja isi' Lida.

³³ Sek i'wi'ne'ne siupa i'nio' jle' iyo'ate Eneas, inlaye siupa je it'iunitk'i pa ti yi'i. Pak yi'i paka i'nio' jika najkapis ijwienjli sikio' itij'we najape tom'niji puwa yiji ti yi' jlo'wit'e.

³⁴ Pedro iyone'ne 'ate: —Eneas, Sijwajieti Jesús injwajiet. Neppijia'm, jot wita'm na ajotik. Kapajat'iyijpe wata'a pa Eneas ti 'es.

³⁵ It'imina'ne ti wikie'eyi siupapo ji'wet jlaja Lida, siu'neje papo ji'wet jlaja Sarón, ti i'winis ti 'es pa i'nio', iyoyis jlosikis ink'iejyisa'.

Dorcas yapi pijia'm

³⁶ Pope jlaja asejnia ti Sinia' jlase' yi'i jlaja isi' Jope, jle' iyo'ate Tabita, (Griego ji'lij pet iyo'ate Dorcas). Wuj ti 'es siupa iyo ti iniuyeje papo p'ijliusis.

³⁷ Yit'i'yipe japa jloma ti je 'esiet'ipi, sekyi'i 'yal'ne. Ijia iniejienat'iyispe, itimisi ti yinat'iyispe 'wuk kiajwe, 'wuk siojopa tomi pijia'm.

³⁸ Siupapo Sinia' jilis ti t'ijieyet'iyisijpe ti Pedro yi' Lídaja, je tojwape'n jlaja Jope, ijliuyis'ne papo times ka iwojyi'n. Yiyisi ti iyonat'iyisijpe 'ate: —Jlam woni'ni 'ateye ka jo ts'iji Jópeje.

³⁹ Sekyi'i ja Pedro yamk'i'ne siupapo i'nio' name. 'Nesat'i'nijpe tokieyiji siojopa 'wuk tomi pijia'm, yi'i jlaja i'nioki masa, jlam'ne papo ijia asejnia ti ask'ilieki nojwisiji ti yapits'i ape'e. Iyoyet'iyispe 'ate: —Lotakijnies siu'niwa ilisane'nijpe jakia i'nioki masa, ti 'wasanjli kiu.

⁴⁰ Pedro iyone'ne 'ate papo, ti ijliuk'i kisie'e: —¡Noyek'i kiu kisie'e! Sekyi'i pa Pedro t'akosjlete'l itiyyiji'n, iyoyet'ipi t'ajlayeja'. Jitiej itieteje'ni siujlieja i'nioki masa, ti iyo'ate: —¡Tabita, neppijia'm! I'yenat'ipi kisie'e, i'win jiwekie'e ja Pedro, ti ijialasat'ipi ka ineppijia'm.

⁴¹ Pedro isim'ne kio'yi japa i'nioki, sekyi'i ti 'yakasitienat'ipi. Sekyi'i jiwekie'ejat'ipi ti i'yase papo Sinia' jilis, siu'neje papo ask'ilieki, i'winkina papo ti 'wasa'n jlaja Dorcas.

⁴² Siupapo ji'wet jlaja Jope ti 'yijenayisi pi iyone, it'imina ti je pini' papo i'nio' iyo jlosikis ink'iejyisa', ti je 'yakakiuyis pa Saka'niona.

⁴³ 'Loj puwa jlomas ti Pedro sekyi'i, yi'i jlaja Jope, yijap'ni siojo 'nejes jiwo jle' iyo'ate Simón.