Hechos 8 - Sinia' Jlamtis 1994

^1-2 Saulo jitienkiujnieye iyone'ate, “'Esiji ti 'ya'al.” Po' papo i'nio' ti ijiatt'iyijipe ti iyoyi puwa Sinia' jlamtis, papoka'ne siupapo itijisk'iye jla'yi ti yapits'i ape'e pa Esteban. Pakayi siupa ti wuj ti inilayiti papo Sinia' jilis yiji jlaja Jerusalén, ti tisiejek'i'yi. Wikie'eyi papoka ti netiank'iji'n ape'e siupuwa ajnatis Judea siu'neje japa Samaria. Japokata japo injlojwajnas sek 'wanjle'e yi'i jlaja Jerusalén.

Saulo yamk'i'ni papo Sinia' jilis

³ Saulo wuj ti ini'net ti t'ekijiam'ni papo Sinia' jilis, 'yuyits'i sekyi'i itionk'i kisie'e ti tajlijk'i kiajwe puwa ji'wuki'l, ayijnies asejnia ti ijios insat jiweje.

Sinia' jika'niye yija'm japa Samaria

⁴ Ajnat pa yiyits'i siupapo i'yiltan'ni, jlam yamtiyisjliyi pa inka'niye ti 'es.

⁵ Ijwienjli'ne siojo jle' iyo'ate Felipe jak tijna 'niji yi'i jlaja Samaria, isi' siujlieja jlamt'iyijpe, ti iyoyi jika'niyeja' siupa Injwajieti Sinia' jijliujwanik, paka Sijwajieti.

⁶ 'Loj papo i'nio' nojweje, 'yina its'iuyisie siupa iyo siupa ijwi'il, i'winis siupuwa iyo puwa i'winki'n.

⁷ 'Loj siupapo imose'l yijits'i tijwajyi siupa jiwet'ia iyo, tajwiyek'i wita'm ti iniuyetak'i kisie'e. Kia'iyojliyi siupapo inlaye siupa je t'onk'i ti yi'i, siu'neje papo je t'ojni'n.

⁸ It'imint'iyijpe ti wuj ti jinikanitiejeye po' papok sek ji'wet'e.

⁹ I'nio' siupa jle' iyo'ate Simón yiji jlajak isi', aye'wujimpe, jlam wuj ti initonit. Itioyi'i puwa jlomas ti 'yak'emijietk'i papo i'nio' yiji jlaja Samaria siupa iniwone.

¹⁰ Wikie'eyi siupapo i'nio' jleyis po', siu'neje papo i'nio' lajk'iyi pet pa kanwoyi, iyoyists'i 'ate ti je 'yakakiuyis: —'Naka 'ni siu'nie Sinia' jijweye.

¹¹ Ijiate itioyi'i ti kia'iyo, ti aye'wu 'yakajmank'iji'n papo i'nio', jak je iyoyiji ka je ink'iuyisieje pa aye'wu.

¹² Je 'esiji ti poye pet siupa iyo ti je takakiunisi siojo Felipe iyoyi jika'niyeja' pa Sinia' jika anechijiayas iyo siu'neje pa Sijwajieti Jsús, 'yina tiniejienajan'ne, asejnia kia'iyojliyi wikie'eyi.

¹³ Kia'iyojliyi pet siupa aye'wu ininekial, sekyi'i tiniejiena'ne. Sekyi'i yamak'ijin'ni ja Felipe, jlam jnots'iniji'ni ti i'winata siupuwa k'iejliyi ti Felipe iyo ti i'wink'i'n ti a'tisk'iji'n.

¹⁴ Siojopo injlojwajnas ti t'ijieyeyi papo Samaria jlele ti isimits'i pa inamtik, sek ijliuyisi'ne japo Pedro jla'yi ja Juan.

¹⁵ 'Nesat'iyis'nijpe, sekyi'i ti t'ajlayis ape'e papo i'nio' ka Sinia' jikimet ti 'es inejiapk'i.

¹⁶ Pakayi ti Sinia' jikimet je yijlijiapk'iji, 'najatat'ipi jla'am ti tiniejienaja'n ti yamisi pa Saka'niona Jesús jle'.

¹⁷ Pedro jla'yi ja Juan ti jikioye yinak'i ape'e, jiwekie'eja t'ipi ti Sinia' jikimet yiyits'i.

¹⁸ Siupa Simón ti i'wina japa Sinia' jikimet ti 'es ti yi' ape'e papo Pedro ti jikioye yink'i ape'e papo, sekyi'i ijwiltajam'ne japa jika wikiniet'aj,

¹⁹ ti iyo'ate: —¡Wenak'i'm pet 'nak injweye, ja 'nakayeyijna'a siupa isio' jayi'n ape'e ka kia'iwoyeyipi pet Sinia' jikimet ti 'es ineyejepi!

²⁰ Pedro isiujlie ti iyo'ate: —¡Alaye janoj wita'm jana aka wikiniet'aj ti janetia'n! ¡'Yina siunie akiowe jiwone, ti jiwota ka aki siunie Sinia' iyo ji'wajieta'!

²¹ Je tejeyi paka kia'iwo, jiwo ti je 'nes, Sinia' in'we'en.

²² Wo ajosik ink'ieye, leyi siunie atankiujnieye ti je 'es. Nip'elisine pa Sinia', ent'a janleyi ti jantajlat'a'm siunie ake' ti jiwoyi.

²³ Kajeyepa ti a'we'en siunie je 'es ti inla'nit, it'imina ti je inkaj'ni.

²⁴ Simón ipi'ya wek ti kia'iyo, sekyi'i iyo'ne 'ate: —¡Jakajliete ts'ajlanayinie'e pa Sinia', ka je inek'i siunie jiwoye ti jijwelak'i'm!

²⁵ Jlampa iliyet'iyijpe japo injlojwajnas ti takamtijniene pak aye'wu, jla'yi ti iyo jika'niyejayi papo i'nio' puwa Sinia' jlamtis, itijwits'i siupuwa isi'il ijia yiji jlaja Samaria ti ijioyits'i, ti iyoyis jlamtikie', sekyi'i ti yapiliet'iyispe 'niji yi'i jlaja Jerusalén.

Felipe yisitk'iye pa Etiopía jlele

²⁶ Jlampa yamat'ipi 'niji paka, Saka'niona jijliujwanik poli jlele iyona 'ate ja Felipe: —Kasit, majna'a, tanie'e 'nijiye iniwuki, sekjane'yi ka noyek'ina'a siunie 'nayi tal Jerusalenne, ti ijio pet Gázaja, 'nayi ti iniu 'nijiye ajnat laj i'nioye'e.

²⁷ Felipe yam'ne. 'Yina ini'wenayi pa i'nio' Etiopía jlele, kia'iyo pet jijweye po' jitieyi'i japa anechiyaski Etiopía jleliki, jlam ti wikiniet'awo. Teje mit ti tal Jerusalenne, ti iyunit pa Sinia'.

²⁸ Jika kaleta japa yiji ti yapi, yamtijien'ni pa namk'i'ni siupuwa inamtis yi'i pa imp'esinik, Sinia' jijwejlanik jiwo Isaías 'yit'jini'ipe.

²⁹ Sinia' jikimet iyone'ne 'ate: —Maj ka esitk'iye siojona kaleta.

³⁰ Felipe jla'm iyoni'ni 'ate ti ya'am. 'Yina yi' k'iye i'wi'in pa i'nio' ti yamtijie'n siupa injwejlanik jiwo Isaías ilisant'iyijpe, i'yasen'ne ti iyo'ate: —¿'Najane siupa ijwi'il siunie jlamtijie'n?

³¹ Isiujlie ja Felipe ti iyo'ate: —¿Tepa jawo ka ts'ajane ti lajk'ipa ka ts'eyasane? Ijialas'ni'ne ja Felipe ka nejiape'n, ti yama'ni ti yiyisi japa kaleta.

³² Sinia' jlamtis siupuwa iyo'ate puwak yamtijie'n: “Iyo'ate jana 'wolepo' ti tilianajata, ti tikinieje, ti je yap. Iyoye'ate na 'wolepo 'woma, ti tisiojok, ka kia'iwo ka jikiwet ilajna'm.

³³ Siuti je iyo ka ini'manit, kajeyepa ti inijlasat isia'm. 'Yina ¿tempa jantejnisie ka jilis poye ape'e 'ni ajnat siuti ja titiajlana'a 'ni ajnat?”

³⁴ Etiopía jlele i'yasen'ne ja Felipe ti iyo'ate: —Jwelkiamk'i'm kiu', ¿tempa siupa injwejlanik jiwo yamtiyi? ¿Jlamt'e, ni'ne ka 'wenayeyi paka injwel'ni?

³⁵ Felipe itiajlate siupuwa Sinia' jlamtis ti yamtijie'n pa i'nio' Etiopía jlele, jla'm iyonayi 'ate ti yamtiyi k'iye puwa inamtis ti ijwi'il pa Jesús.

³⁶ Yamat'i'nijpe, yiyisi siupa yi'i japa i'niat, sekyi'i ti iyo'ate pak i'nio': —Siujlie'e i'niat. ¿Tempa jantomi'ni ijyik'i ka siniejiena?

³⁸ Ijliuye'ne pa kaletawo ka inajapajne'n japa kaleta. Tisiojmayet'ik'ijimpe, yamayet'iyisiampe pa i'niat, sekyi'i Felipe iniejien'ne paka.

³⁹ 'Yina ti tajlat'iyisiampe pa i'niat, Sinia' jikimet yame'ne ja Felipe. Sekyi'i pakatajayijk'i ti i'wi'in siupa Etiopía jlele. Yama jla'am siupa Etiopía jlele siupa tejejyi, wuj ti inkaj'ni.

⁴⁰ Felipe yiyet'iyi'iji siojopa ajnat jle' iyo'ate Azoto. Itijwits'i puwa isi'il jilis ti ijioyits'i ti iyo jlamtikie', ti ijwil puwa Sinia' jlamtis, paj ti yiyet'iyisipi jlaja ajnat Cesarea.