Hechos 5 - Sinia' Jlamtis 1994

Ananías takajla'n kiajwe pa Sinia', siu'neje japa Safira

¹ Po'neje siupi i'nio' jle' iyo'ate Ananías, siu'neje japa jik'iemjla jle' iyo'ate Safira, kia'iyo iwi'in pa jika ajnat.

² 'Yina ti pajk'i ti inipe'yayi japa asejnia, ti iyo ka injwekisi'n japa jiwa siojopa jika ajnat laja. Ijiatjliyi kiak iyonisi'ni, jiwa japa yikiajle papo injlojwajnas jiwa 'neje japa 'wanjliyisi.

³ Pedro iyone'ne 'ate: —Ananías, ¿yot'iyi'ni ti jinine'nate k'iye ni sitiejiejwa imosik ti ijiojwa'm ni ajosik? Jijweki'n jana wikiniet'aj, jiwo sintiyeja'm jana Sinia' jikimet ti 'es, ti jijwel ka apejlati'n jana wikiniet'aj aka ajnat laja, siojona jlekialts'e.

⁴ 'Est'itieje ka je awe'en, 'yina siuti jiwe'en, 'est'itieje 'neje ka apejlati'n, 'yaka akimet. ¿Yot'iyi'ni ti kiak jiniwone? 'Yina je napoka kawo sintiyeja'm napo i'nio', jiwo sintiyeja'm pa Sinia'.

⁵ Ananías, ti ipi'yaye ti kia'iyo, yamat'ipi isia'm, mom 'yal'ne. Wikie'eyi papo i'nio' ti t'ijieyeyi jlots'ini po'.

⁶ 'Nesat'i'nijpe papo jwemik, ilisanat'iyisijpe ti its'ijwanisik'i siupi yinisi, sekyi'i ti yamat'iyisijpe ti itijisk'iye.

⁷ Inetitinki najape puwa yiji ti 'nesat'ipi japa jik'iemjla, 'yina je 'yijene siupi iyo pa jik'iemjla masa.

⁸ Pedro i'yasen'ne ti iyo'ate: —¿Ma ijiatt'iyiji ti laja kiak iyo siupa aska ajnat ti jiwena' siojokia jiniamayik'iji? Isiujlie ti iyo'ate: —Ji'yu, laja kia'iyo.

⁹ Pedro iyo'ne 'ate: —¿Yot'iyi'ni ti kiak jiniwonayi ti jitieye'yi ilia'm japa Sinia' jikimet? Je pajk'iyi'iji ti 'nes'ni siojopo yame'eje ki ak'iemjla masa, kiak jawo'ojyi pet ti ja tikinie'aja ti ja titijik ak'ioye.

¹⁰ Ijiatjliyi je pajtaja Safira iniuyet'iyijimpe kiajwe ja Pedro, jiliaye iyoye'eje 'ate pa jik'iemjla masa ti 'ya'al. Siupapo jwemik ti 'yuyet'ispe 'wuk kiajwe, sekyi'i i'winis'ne japa i'nioki masa ti sek iniuyi'iji'n, yamat'i'nijne ti itijisk'iye, yinisiap pa jik'iemjla masa t'o'.

¹¹ Wuj ti jnots'ijnits'i papo Sinia' jilis, siu'neje papo i'nio' ti t'ijieyet'iyisijpe pi jiwet'ia iyo papoka.

Siupuwa iniank'iye siupuwa ja'nakaj, siu'neje puwa ti yisi'lietk'i papo i'nio'

¹² Je pini' siupuwa injlojwajnas iyo, i'winki'n siupuwa iniank'iye puwa ja'nakaj, siu'neje ti yisi'lietk'i'ni papo i'nio'. Ininenisi'ni yi'i ja Salomón jika 'wuk kiwet, ti initotisk'i'ni wita'm.

¹³ Ijia siupapo i'nio' isipe ka ijnoyisi, 'yina tonitie japo injlojwajnas.

¹⁴ Je jlase' papo i'nio' siupapo je 'yakakiu pa Saka'niona, ayijnies asejnia kia'iyojliyi.

¹⁵ Siupapo je isis titionajak'i kisie'e ti tenajats'i puwa jika'wulis japa isi', jlam 'wenajliyi siupapo tiniayejek'i ape'e puwa jlo'witis, kajeyepa ti iyoyits'i 'ate: —Ka Pedro inotiena'a 'ne k'emna'a ka jipela jiwekie'e ka ne'yi ape'e, ja ne'yi siunapo je isis, pak janjwa'.

¹⁶ Po' papo tajlits'i siupuwa isi'il je tojwape'n jlaja Jerusalén, kia'iyo je isis papo namisi, siu'neje papo po' puwa yiji ti 'yakajyi'n. 'Yina papoka wikie'eyi ti tijwajyi'n.

Anechiyasas jiwak yi'ne papo injlojwajnas

¹⁷ Siupa pa'yijis jika anechiyas ti wuj, ti 'yijenat'iyijpe pi iyone, siu'neje papo Saducéojos sekyi'i ti yijap, je jlase' pi iyo ti a'tiejesiam'ni japo injlojwajnas.

¹⁸ Jak je iyoyiji'ni ka je tikimajak'i ti t'otiek'i a'laja'm.

¹⁹ Ajnaj ti Saka'niona jijliujwanik poli jlele ijyijlat'ik'ipe ti 'yajliniti ti iliejnamk'i puwa 'wuk kiwitawa p'otis japa insat jiwe, sekyi'i iyonat'iyijpe 'ate ti itionak'i kisie'e:

²⁰ —Maye'ni, joyeyi jana Sinia' ji'wuk. Kasitieyijna'a ka ajwela' ape'e napo i'nio' siunie iyo jana in'wasankiye ink'ie' ti tajle ni Sijwajieti Jesús.

²¹ Ijiatjliyi, 'yina k'iejli mot ti yamat'i'nijpe ti ijioyisi japa Sinia' ji'wuk, ijyijlitayisi ti taka'neyasajne'n. Jlampa ijiutiet'ik'ipe wita'm papo jla'yis pa pa'yijis jika anechiyas ti wuj, siu'neje papo jlosikis jiwos, siu'neje papo Judíojos ti kijilas, ijliuyet'iyispe papo tokis ka neki japo injlojwajnas ti yi' insat jiweje.

²² Yiyet'iyisijpe, 'yina je i'winis 'ne, yapiliet'iyis'nijpe wekie'e ti takajwejlane papo jika anechiyasas, ti iyo'ate:

²³ —'Napo saka anechiyasas, ti awakieyi jlaja insat jiwe, je t'ekiye ki iyo ti jikie' t'etieje jawa 'wuk kiwitawa, siojopo tokis i'yena kia'iyo sekyi'i ti je tajlisie. Je 'esiji ti 'oyejayi, je a'wena paka i'nioye ka sek ne'yi jik'ioyi jlaja insat jiwe.

²⁴ Siupa pa'yijis jika anechiyas, siu'neje pa tokis jika anechiyas ti tijna'yi ti i'yena japa Sinia' ji'wuk, siu'neje papo pa'yijis ti kia'iyo anechiyasas, ininekiajlat'iyisijpe ti ini'yasis, ti iyoyits'i 'ate: —Ijiate wata'a, ¿majmat'e wata'a ka nojwi siu'niwa wask'i'nelaja kia'iyo?

²⁵ Jlampa iyoyet'ipi 'ate siupa takajwejlane, ti iyo'ate: —Siojopo i'nio' jit'iutietak'i'ne a'laja'm, siojopo yits'e Sinia' ji'wuk jana yi'i, 'yiyasajne'n japo i'nio'.

²⁶ Yamat'i'nijpe papo tokis, jla'yis papo jika anechiyasas, ti yamisi japo injlojwajnas. 'Yina lajk'ipa ka iwonisi ka insayits'i lapakawo ti je ijwiye papo i'nio' ka sisajas intatisiji'n.

²⁷ 'Nesat'iyisijpe, sekyi'i ijioyisiji'ni papo jlosikis jiwos, pa'yijis jika anechiyas siupa jlamt'iyijpe iyone'ne 'ate:

²⁸ —Je awenata'asempe ka woye jleye pa Jesús, jla'yi ti jit'iyasajnayi napo i'nio'. ¿Ten na siunie jiwoyeyi? Siunie jiwoyeyi jit'iyasanayi napo i'nio' itijwi'ni jana Jerusalén, siu'neje ti jlotkints'e ti jijwela' ka sama ka liana siupa i'nio' jijwela'.

²⁹ Pedro inikiujli japo injlojwajnas ijia jla'yis, ti iyo'ate: —Sa'am je 'esiji ka je iniajnata ka yoki siunie Sinia' ijliuyets'e'm, lapakawo ti 'yu'we ti kia'iyo ti lajk'ipa ka ijnojliji.

³⁰ Sitise'l Jiniajimpe pet paka'ne pinitia iniujwa'n kisie'e ti tajli pa a'no', siupa ti jlena pijia'm ape'e japa cruz, ti jilianayepe ja Jesús.

³¹ 'Yina ti jla'am pa Sinia' ti isi'me, ti iyojwa'n anechiyasa' ti wuj, yijne'n jijweyeje, jla'yi ti iyojwa'n Injwajietiwoye, Israel jlele ja 'esieye siuti janwoyis jlosikis ink'iejyisa', sekjane'yi ka Sinia' inetiajnatana'a k'iye niwa jikeyis iyo.

³² Ti sa'am kasts'ajane pa awonaja, jla'yi ti sa'am ti ajwela niwaka, siu'neje ki iyo jana Sinia' jikimet ti 'es ti iwijna'm siunapo its'iuye siunie iyo.

Gamaliel ji'lij

³³ Siupapo ijnosikis jiwos, ti ipi'yayeyis ti kia'iyo, jwesis'ne. Iyoyet'itiejespe ka inlajne'n japo injlojwajnas.

³⁴ 'Yina po' pa i'nio' Fariseo, jle' iyo'ate Gamaliel, yiji papok anechiyasas, pak tajlampet siupapo taka'neyasajne'n siupa Moisés jika'neyasajnaye, i'nio' ti 'est'ijyimpe, it'imina papo i'nio' ti its'iuye. Paka'ne siupa takasit ti iyo'ate: —Mayeyi kiu kisie'e.

³⁵ Sekyi'i ti iyonat'iyijpe 'ate papo jijniujliejwas: —'Napo i'lijwas Israel jlele, siupa jijwelata ka wonayi siu'napo i'nio', joskiyeyijna'a.

³⁶ Ataj wunitiek'i siupa i'nio' jle' iyo'ate Teudas, ti jla'am ti ini'najnat ape'e papo ijia, cuatrocientos papo i'nio' jla'yis, ayijnies 'najli. Paj ti tilianajat'ipi, 'yina wikie'eyi siupapo jla'yis netiank'iji'n, sek jla'a, 'yaka netia'n.

³⁷ Yit'iyijpe'eje ki jloma poye'eje na ja'nakaj Galilea jlele jle' iyo'ate Judas, ti tetitinak'i papo i'nio', kia'iyojliyi po' papo i'nio' yamk'i ti jla'yis, tiliana ti iyoye'eje 'ate pa jikiecha, netiank'iji papo jla'yis.

³⁸ It'imina ti kiak awo'nase, leyeyi, enajyi wek 'ate. Enayi 'ate siunie iyoyisi, je ijiat ka jlaj je poye siuti jantal i'nioyi.

³⁹ Jlajma ijiatayi jla'am ka intajle pa Sinia', ja ke atoma'yi ilia'm. Joskiyeyi 'lojwinie'e ka taye ilia'm pa Sinia'. Ijia its'iuye'ne pa Gamaliel,

⁴⁰ sekyi'i ti tanajat'iyipi japo injlojwajnas ti ja tak'ajaki'n. Sekyi'i tiwonaja'ne 'ate: —Leyeyina'a ti jletina pa Jesús, jla'yi ti jit'iyasanajyi'n napo i'nio'. Titimaja ti tilienajat'ijyits'ipe,

⁴¹ yamat'i'nijpe ti tajlisie papo anechiyasas, wuj ti inkase'n kajeyepa ti Sinia' yina'ate ka kiak tiwonaja ti tiliakik, 'yaka Jesús jle' ti it'imina.

⁴² Jlomask'i ti ijioyisi japa Sinia' ji'wuk ti taka'neyasajne'n, jla'yi ti ijioyits'i puwa ji'wuki'l papo i'nio', ti iyo ka'niyeja' pa Jesús ti jla'am ti Injwajietiwo ti Sinia' jijliujwanik.