Hechos 4 - Sinia' Jlamtis 1994

Judíojos jlosikis jiwos i'yasis'ni pa Pedro jla'yi pa Juan

¹ Pedro jla'yi ja Juan jet'i ilitajasipe ti takamtijniene papo i'nio' ti 'nesat'i'nijpe papo pa'yijis jika anechiyasas, siu'neje papo Saducéojos, siu'neje pa tokis jika anechiyas tijna'yi japa Sinia' ji'wuk.

² Ti'yikisane kajeyepa ti Pedro jla'yi ja Juan 'yiyasajne'n papo i'nio', jla'yi ti iyo jika'niyeja' pi Jesús ti iniu kisie'e ti tajla'm pa a'no'. 'Yina ti iniu kisie'e, nak 'yakajanit ti ijiatk'i ti siunapo 'yajle'n kia'iyo 'wena je ijio'we, naka ti tajle'e.

³ Sekyi'i tikima'ak'i'ne ti t'otiek'i a'laja'm, jlampa no'otiet'iyijpe, 'yina yam'ne jlomayi ti yi 'wuk kiajwe.

⁴ Je iwit'iane 'loj papo i'nio' siupapo its'iuye siupa ijwi'il, papok je 'yakakiu. Japak tajlap'e siojopa jloma jle' Pentecostés ti po' papo iyo Sinia' jilisa', siupa nojt'ijiampe papok i'nio', ti 'najli papo ayijnies ti 'yakaj, ti tetina cinco mil.

⁵ Siupa ti jlomayet'ijyi siupapo Judíojos jika anechiyasas initotk'i wita'm yi'i jlaja Jerusalén, siu'neje papo kijilas jle' po', siu'neje papo taka'neyasane pet siupa Moisés jika'neyasajnaye.

⁶ 'Yina Anás sekyi'i, pa'yijis jika anechiyas ti wuj, siu'neje pa Caifás, siu'neje papo ijia jleyis iyo'ate Juan jla'yi pa Alejandro, wikie'eyi papo ijia papo pa'yijis jika anechiyasis ti wus.

⁷ Sekyi'i iyo'ne 'ate ti takajlunieyisi: —Mayeyi, namayeyi 'ne. Ijiawos yamat'iyipi, yinat'iyispe jikiowe'e papo anechiyasas, i'yasat'iyisimpe ti iyo'ate: —¿Tempa i'nio' jle' jijweye siupi ajweye jitiajlayiji, siuti jikajlayi siunie jiwoyeyi?

⁸ Pedro Sinia' jikimet ti 'es tipoyiji, isiujlie'ne papo ti iyo'ate: —Asa'am ti jika anechiyasts'ase'm napo i'nio', jla'yi ti kijilasts'ase'm:

⁹ siuti kas'yaseje'n naka ti siojo i'nio' ti 'es, jla'yi siupa akienaja, ti jiwoyejyink'iye ka 'najanayi siupa ijwiejiet,

¹⁰ jajwi'lase'm ja 'najanayi, jla'yi napo Israel jlele. Siunie i'nio' yi 'ne ti ji'wena', lajk'ipa jikiechaye ka 'esieyi ka injwajiet, Jesús Nazaret jlele jle' i'mienit, ti jijweye po'. Naka siunie jik'iejwata'yijpe jana cruz, jlomas 'nak nojwaja'm Sinia' iniujwa'n kisie'e ti tajle ni a'no'.

¹¹ Sinia' jlamtis t'ipi iyoyet'ipi 'ate: “Siojona sisaj ti 'wukiu'ul jiwos iwit'iane, janakp'an sisaj ti ijiateje jla'am ti 'es.” Siojopa sisaj naka ni Jesús,

¹² 'yina naka ti kasts'isisi, kajeyepa ti lajk'ipa ape'e 'ni ajnat ka jikiechaye ka ineye paka Sinia' injlots'e ka pakaye ka kasjwajiete'n.

¹³ Siupapo anechiyasas ti i'wi'in japo Pedro ti t'otale t'o'n ti tamtits'iji'n, 'yina je jlase' pi iyo ti 'yakelit kajeyepa ti itiant'iejesi ti jwajla'a je 'yijene japo i'nio'. Sekyi'i ti itijnisieyisi ti japok Jesús jla'yis.

¹⁴ 'Yina sekyi'i 'neje siupa i'nio' ti tijwa'a, jak je iyoyiji'ni papo anechiyasas ka 'najaneje paka ji'lij iwonisi ka intajlatisie, ka inamiteje'n.

¹⁵ Tijliukk'i'ne kiuwat kisie'e. Kiakt'ipa iyoyeyisipi ti jitiej ijiutisie, jlam ininekiajliyisi,

¹⁶ ti iyo'ate: —¿Tepat'e jayonaja siu'napo i'nio'? Siu'napo Jerusalén jlele 'yijene pi iyonisi, siuniwa iyo niwa ilisanisi ti Sinia' iniuyeje, ti yisi'lietk'i ti i'winatajas. Lajk'ipa ka iniwonaja ka ijwila ka 'yakakiuk.

¹⁷ Je 'esiji ka yina'ate ka injlasat siunie iyo ni jika'niye ti yameje'n ape'e 'na ajnat ti ijwi'il ni Jesús jle'. 'Esiji ka si'lij 'yatinitiejapk'ina'a siupa jayonaja.

¹⁸ Jak je iyoyiji'ni tanajat'iyi'iji ti iyonisi 'ate: —Siunie jayona'a, siunie jiniwonayi ti jit'iyasanajyi'n napo i'nio' jla'yi ti jijwela' ni Jesús jle', ¡leyeyina'a!

¹⁹ Pedro jla'yi ja Juan isiujlie papo ti iyo'ate: —Ja asama pet ti ja atankiunie'ni ka 'esieyiji jitieyi'i pa Sinia' ka iyoki siunie 'yijients'e'm, ni'ne ka iyoki siunie jiwoyeyi ka iyoki.

²⁰ Jeyi kat'aja, je kasts'ajane paka iyonaja ka iliki ti awoki saka'niyeja', 'yaka a'wena jla'yi ti ape'yak.

²¹ Siupapo anechiyasas, ti ipi'yayis ti kia'iyo, iyoyis'ne 'ate, “Leyeyi siunie jiniwonayi, 'lojwinie'e ka tisiejek'iase'm.” 'Yina je i'winis'ne paka intajlatisie ka je 'esie, it'imina'ne ti inkio' tiliena'ak'i. Kajeyepa ti i'wi'in papo i'nio' ti iyunitis pi Sinia', lapakawo ti i'winis siupa i'nio' ti tijwa'a,

²² jla'yi ti i'winis ti jika najkapis 'loj pa i'nio', 'yaka'm ape'e puwa cuarenta.

Sinia' jilis t'ajle pa jijweye

²³ Pedro jla'yi ja Juan inkio' tiliena'ak'i, sekyi'i ti yamat'i'nijpe ti ijioyi japo ijia jla'yis. Inijwejla'm siupa tiwonaja, siupa pa'yijis jika anechiyasas iyone, siu'neje papo kijilas jle' po'.

²⁴ Jlampa itimat'iyisijpe ti inijwejla'm japo ijia, iyoyet'iyisipi ka int'ajle'n. Inikiul'ne ti iyoyeyis t'ajlayeja', 'yina iyoyis'ne 'ate ti t'ajlaja'n: —'Yaka'niona, a'm ti alesanik ni poli jla'yi 'ni ajnat, jla'yi ni i'niat lajlik'i, siu'neje niwa jlele jla'am.

²⁵ Jijwejla'm pa akawo David, ka lajak'i japa akimet ti 'es ti yamtijie'n ti iyo'ate: “¿Yot'iyi'ni ti jwesis napo i'nio' yi' ape'e 'ni ajnat? ¿Yot'iyi'ni ti iyo kawoyisi siunie ti laj lajaye?

²⁶ Anechiyasas yi' ape'e 'ni ajnat initotk'i wita'm, ti inijloyisk'ijin'ni ti iniwakajlanitis, ti iyo ka intayits'i ilia'm ni Saka'niona jijliujwanik ti Injwajieti.”

²⁷ “'Wanjliyi ijiatk'i, Herodes jla'yi ni Poncio Pilato ti initotk'i wita'm 'neyek'i, ti ininenisi'ne yi'i siujlie'e isi', jla'yis napo Roma jlele, siu'neje napo Israel jlele, ti tejeyets'i ilia'm ni Jesús, ni akawo ti 'es, siunie ajlojwanik ti Injwajieti.

²⁸ Ijiatjliyi 'yina siupa jiwoyet'iyipi kawo, siu'niwa jlomas 'nak yiyi, ti iyo napo i'nio', siunie ti a'm jiwakajlanit t'ipi.

²⁹ 'Nakayi 'Yaka'niona, 'yejne'n siunapo ti iyo ka je inwents'e'm ka iyoki siunie taj'la. Wents'e'm, ti akawosts'e'm, ka ts'otale t'onieyi ka ijwila niwa amtis.

³⁰ Kajanit ni ajweye iyo ka ajwajiete'n napo i'nio' je isis, jla'yi niwa iniank'iye siuniwa ja 'nakaj pet ajnat'e, siu'neje niwa ti yisi'lietk'i napo i'nio', 'esi ni jle' iyo ni akawo ti 'es Jesús.”

³¹ 'Yina ti itimayisi ti iyo t'ajlayeja', ti'wesiyet'ipi siojopa 'wuk ininenisi kiajwe. Sekyi'i Sinia' jikimet ti 'es tipoyijits'i, jak je iyoyiji'ni ka ijnots'iniji'n ti ijwilayis puwa Sinia' jlamtis.

Sinia' jilis initesis

³² 'Yina wikie'eyi papo i'nio' Sinia' jilis ti je pini' ijniul wita'm, jitienkiujnieye ijwienjli. Lajk'ipa kawo'ate, “Siu'niwa a'we'en isijmatis ya'am.” Tepa jawo ka kiak je iwo ti ijniul wita'm papo i'nio', inik'isajasi siupuwa jikijmatis ti i'winis.

³³ Kat'ajat'iyijpe japo injlojwajnas ti jijweye po' ti iyoyetajas jika'niyeja' pa Jesús ti iniu kisie'e ti tajli pa a'no', jla'yi ti je jlase' pi iyo ti Sinia' iniuyeje.

³⁴ Lajk'ipa ka ne'yi paka insetia'n paka k'iejliyeyi, kajeyepa ti iwin'ni puwa jika ajnatis jla'yi puwa ji'wuki'l, siojopa laja

³⁵ yikiajlisi japo injlojwajnas, ti iwijnamk'i pet siupapo jwajla'a je i'win pet.

³⁶ Iyoye'ate iyot'iyipi ja i'nio' jle' iyo'ate José, (injlojwajnas iyont'iyisi'nijpe 'ate Bernabé, ti iyo'ate “Je k'ijliaja”), tajla'm papo Leví t'ipi, ji'wett'iyijpe japa Chipre, i'niat iniujwape'n.

³⁷ Jak i'nio' iwi'in pa jika ajnat, sekyi'i ti yikiajlayi japo injlojwajnas ka in'ye'en.