Hechos 24 - Sinia' Jlamtis 1994

Judíojos ijiutkina pa Pablo ka jitis poye

¹ Ijwienjli sikio' itij'we kiwa jlomas tomk'i ti 'nesa pet na pa'yijis jika anechiyas jle' iyo'ate Ananías, ts'e Cesaréaja, jla'yis siunapo kijilas jleyis po', siu'neje ja tamti ape'e napo jitis po' siojo jle' iyo'ate Tértulo. Ti jla'am ijioyisi ja anechiyas ti ijwilisi, ti ijwil ka poye pa jitis iwo ja Pablo.

^2-3 Ti tokis yamayiji, siojo tamti ape'e napo jitis po' jak iniane ti ijwijla'm ja anechiyas siupa ijwil ka jitis iwo ja Pablo, ti iyo'ate: —'Na 'yaka anechiyas Félix, siunie e'e ijiok'i'ni ape'e 'ni ajnat ti ajweye po', ti sa'am siu'neje napo saka kia'lis jlam je awoki ti kasts'isichia, 'yina it'imina ti akajmak. Kasts'ajka'm ti 'naja'n, it'imina ti yamjli'ijyi wekie'e ti je netiajni siuniwa wask'i'nelaja yiji jla'a saka ajnat. Ijiate 'ni 'yaka anechiyas Félix, ti e'e ijiok'i'ni, sa'am anamaja'a siu'nie iyo 'ni yits'e ti wuj ti kasts'ajkase'n.

⁴ “Ajwel'ni je 'esiji ka kaspa'a siu'nie jayoki, 'lojwinie'e ka poye paka woyi kapajata, it'imina ti anip'elisi'na ka k'iuts'e'm siu'nie jayoki ti jayamtiye.

⁵ A'wena siu'nie i'nio' ti itiejietk'i wita'm napo Judíojos, ti ijioyetaja japa yi'i isi', it'imina'aja napo Judíojos ti po' na jijliak'aliyis. 'Nak iniajnen'ni k'iye siunapo i'nio' Nazarénojos.

⁶ Siu'neje ti iyo jiliakikie siojona 'najla'wet ti 'es yi' Jerusalenne, nak atajlataja ti akima'a.

⁸ 'Yaskiamejen kiu' siuniwa ajwela, je ijiate ka je a'we'en ti ijiate.

⁹ Tértulo yiyik'i wekie'e ti tamti, siojopo Judíojos sekyi'i tamtits'ijin'ne ti iyoyits'i 'ate: —Jlam je iyo ni siunie iyo ni tamti ape'e napo jitis po' ti tamti.

Pablo je 'yujwa'm k'iye siupi Judíojos iyone

¹⁰ Sekyi'i ja anechiyas jikio' iyone'ate ti ijliuye ja Pablo ka intamti pet. 'Yina Pablo iyo'ne 'ate: —'Esiji, 'wanjliyi je ajwek siunie jayo ti jayamti pet. Am ti impaj, pa nojwat'ijia'm puwa aka najkapis ti jlejyi ni akijmaye, ti ji'ye'n ilia'm siunapo i'nio' ti jitis poyeta.

¹¹ Je ijiat ka je a'yasani'nina'a siunie awoyi, jlajmiliet k'iejliyi ti itijwa'm sikioye times tom'niji niwa jlomas ajyi ti 'nak a'nets'e Jerusalenne, ti ana'am ka iyunit pa Sinia'.

¹² 'Yina je si'wenajli'ijyi ka iniewiti paka ine'yi pa, lajk'i 'neje ka ne'yi japa ka jlomaye ka 'yikisane papo ka ine 'najla'wete, ni'ne ka yiji paka yiji siuniwa 'najla'wetis, ajnat paka yi'i siujlie'e isi', ka si'wena ka kia'iyo.

¹³ 'Wanjliyi lajk'ipa ka ijiatayiji siunie ijwilis ka iyo ti takajwejlanits'ia'm.

¹⁴ 'Yejne'n, ya'am je ap'o'n ape'e siu'nie aki pet naka siunie saka kijilas mases Jiniat'ipi pet. 'NAYI INK'IE', ni ijwilis ti je ijiatk'i, nak aki pet. Je 'ats'ape'e siunie iyo ni Moisés jika'neyasajnaye, siu'neje niwa jlamtis papo injwejlanawos t'ipi.

¹⁵ 'Wena je ajo'we pet, siukia yamt'iyisipe pet, ti je 'yakakiuyis pa Sinia', ti janojwank'i kisie'e ka pajata siupapo 'yajle'n, siu'neje papo i'nio' isis t'ipi siu'neje papo ijiatt'iyijpe ti je isis.

¹⁶ Tempi it'imina ti akatattaja ka lajayi itisayi ilia'm pa Sinia', siu'neje napo i'nio'.

^17-19 “Siukiwa najkapis yamts'iji, wuj ti askiujni'n ti atejwits'i niwa ajnatis, 'yina pa k'iet'iyik'ipe ti apilie'eje ika ajnate ti ekiajle japo i'lijwas siojokia ijiutis wita'm japo ijia ti iyo 'wajietiye. Sekyi'i ajo 'najla'wet wujwe ti ani'notatiji k'iye pa Sinia', iyo ki Moisés jika'neyasajnaye iyo ka tiwoki, jla'yi ti ekiajle siukia a'we'en pa Sinia'. Lajatak'iyipe papo i'nioye, jla'yi ti lajk'ipa k'iejliyeyi, ti iyo ti kijlami, ti jlam pak iyots'i'ni. 'Yina jlampa iyoyep'ampe 'ate siojopo Judíojos tal Ásiaja si'wenis'ne ti a 'najla'wete. Japoka'ne siojopo ti 'esiji'ne ti nam'ni ka injwelis siupa itiajlatisk'i'm ti tejeyis ijyilia'm.

²⁰ Ni'ne siunapo 'nak yi'i kanjwelis ka poyet'ipi paka iyot'iyipi, ka k'iejliyeyi paka iyone japo jlosikis jiwos, 'neye ti si'yasajta'ni.

²¹ Nakat'imi jla'am ti jitiajlatak'i'm siukia ti awope 'ate, ti i'lij etk'i ti amti: “Je akakiu pa Sinia' ti janekialk'i pijia'm papo i'nio mases t'ipi.”

²² Félix ti 'yijenayiji pi iyone siukia 'NAYI INK'IE' ti ipi'yaye ja Pablo, ti 'loj napo i'nio' yamk'i, jla'yi ti je takakiunisi, sekyi'i iyo'ne 'ate: —'Nak jaliki'i kiu' wekie'e, jla'm ijiate ka 'nestana'a ja tokis jika anechiyas Lisias, siupa janwoyi. Sek jane'yi ka ts'esieyiji'nejna'a pet siunie jiwoyeyi.

²³ Félix ijliuye'ne papo jikawos ka inekiajlis kiu'ujwe insat jiweje ja Pablo, ti iyo'ate: —Enayijpe 'ate siupa iyo ka iwoyi. Siuti japoye papo t'ajajnajwas ka ijnoyi, ka k'iejliyeyi paka intoni ka inoyeje, 'ajlinitie k'iye.

Félix jla'yiki japa jik'iemjla ti ipi'yayisie pet pa Pablo ti iyo jlamtikie'

²⁴ Jlomas 'nak nojwaja'm ti 'nesa'aja ja Félix ti jla'yiki jlaja jik'iemjla Drusila, ti Judía. Sekyi'i Félix takajluni'ni ka tikinieje ja Pablo, ka tokijiji. 'Yina Pablo, ti yiyeyi, tamtiye ti ijwil siupa iyo pa ti ijiateje ti itienkiuni pa Saka'niona Jesús ti Sijwajieti.

²⁵ Je 'esiji ti ipi'yayeyi ja Pablo ti yiyiji naka ti iyo'ate, “Janilesaniji ni i'nio', jla'yi ti jan'ye'en siupa janwoyi, siu'neje ti japoye jana jloma ti Sinia' jan'ye'en ti ja'nakajanitk'i ape'e siupa jitis jawo.” Naka'ne siunie ti Félix jnots'inaja ti ipi'yaye, sekyi'i iyo'ne 'ate: —'Esiji. Maj. Jlam jayana'anie'eje ka pajata ka itimtieje'nina'a.

²⁶ Jlam'ne ja iyo ja Félix ti Pablo iyotaja ka inkat'en jitipe'e, it'imina'ne ti yikiajle'e'ni ti tane.

²⁷ Paj ti yiyeyi kiwa najkapis times ti kiak iyo'ni, jlampa yiyet'iyipe pet ja Porcio Festo ti iyo anechiyasa', ti its'iuye 'wet'e ja Félix. Félix 'yina ti iyojonk'iye ka 'esieyi wita'm papo Judíojos, it'imina'ne ti jlam sek iliyeyi'i wek insat jiweje ja Pablo ti iliyeyi ti iyo anechiyasa'.