Hechos 22 - Sinia' Jlamtis 1994

¹ —I'lijwas, jla'yi japo ti asa'am ti inkijliyejyi'n, k'iuyek'imna'a siunie jayo ti jayamti itipe'e.

² Ti ipi'yayisie ja Pablo ti iyoyi ki Hebréojos ji'lij, sekyi'i ti ijiatayiji ti its'iuyisk'i 'ate. Pablo jlam yinjliyi ape'e ti iyo'ate:

³ —Judíok'i'm, ajyijyi'n jana Tarso, yiji jana Cilicia, sikijliyeje siujlie'e Jerusalén, ti ani'neyasa'n. Gamaliel t'eyasanikk'i'm, atej'weje'n ti ani'neyasane ki iyo ki Moisés jika'neyasajnaye, siupapo sitise'l t'ipi isi'me naka. Wuj ti ajalas ka iyoyi naka siunie iyo pa Sinia', anipejlanit ki iyo ni ijiusik, iyoye'ateye jiwoyeyi siu'nie jloma.

⁴ Ti pajk'i ata'yi ilia'm siunapo iniuk'i siunie 'Nayi Ink'ie', paj ti awoyeyi ka iliajne'n ayijnies, asejnia ti aki'mik'i ti ajoyi'ni insat jiweje.

⁵ Siunapo pa'yijis jika anechiyasas, siu'neje napo kijilas jle' po', 'yijene pi iyone ti jlam je awo. Kajeyepa ti napokape ti tajle ki isio' jlele ti iwinisk'i'm ka 'ajla its'ioye ka ijiojwa'm napo si'lijwas Judíojos yiji jana Damasco, ti akk'i'ni siunapo yamk'i pa Jesús, ti awo ka ijioyi'ni Jerusalenne, ti tajaki'n.

Pablo yamtiyi ti 'nelanjie'e iyoye jlosik ink'ieye

⁶ “'Yina 'nayiji jlampa je sitiojwape Damáscojo, ti 'najlikiyeta, siukia jla'al jlaja kates 'lan poliyi ti 'esi', ti itijwe'n itipe'e, sesi'liet jakayi.

⁷ Sekyi'i ti ayet'ipi ajnat'e ti siniujwe'n, ape'yayi'ni pa ina'lap tom poliyi ti iyo'ate, “Saulo, Saulo, ¿yot'iyi'ni ti jitie'yi ijyilia'm?”

⁸ “Awo'ne 'ate ti akiujlieyi, “'Yaka anechiyas, ¿te'na'm?” Siojo ina'lap ti pesieje iyo'ne 'ate, “Ya'am, Jesús Nazaret jlelek'i'm, siunie jitie'yi ilia'm.”

⁹ Siojopo ya'yis i'winis jiwekie'e siojo jla'al jlaja kates, 'yina je ipi'yayis siojo ina'lap. Sijwanjli ya'am ti ape'ya.

¹⁰ Sekyi'i ti a'yasaja'n ti awo'ate, “¿Ten siupa jayo, 'Yaka'niona?” 'Yina isiulk'im'ne ti iyo'ate, “Neppijia'm, maj, jo Damáscojo. Sek ja ajyi ka tijwelaja'amna'a siupa janiwone.”

¹¹ “Lapakawo ti siwojwa'n talokie siujlieja kates ti a'we'en ti 'esi', jak je iyoyiji'ni siojopo ya'yis sitionayis isija'm.

¹² “Sekyiye'epe siojo i'nio' jle' iyo'ate Ananías yi'i jlajak isi', ijiate jla'am ti iyoyi ki inamtik, jla'yi ti 'yotat ki Moisés jika'neyasajnaye. Wikie'eyi siojopo Judíojos yiji jlaja Damasco ijiunitis ti 'es.

¹³ 'Yina Ananías ijiok'i'ne ti i'yenk'i, sekyi'i iyonk'iji'ne 'ate, “Isiecha Pablo, 'esiji ji'wejne'n”. “Jak je iyoyiji'ni je yiji puwa ka jlomasa 'esieyiji ti a'yen kisie'e.

¹⁴ Iyo'ate ti yinayi'iji ape'e, “Sitise'l t'ipi Jinia' jla'am ijniejiet'a'm ti iyo ka intant'ieje siunie iyo kanwoyi, ka a'we'en ti ijiate jla'am ti 'es, jla'yi ka ape'yayi ti jlame ti tamti.

¹⁵ Am ti ja akajwejlan'ni ti ja aki ape'e 'ni ajnat ti jajwejla'm napo i'nio' siunie iyo ni ji'we'en, jla'yi ki iyo ni jipe'ya siukia jloma.

¹⁶ Nisiamaja'ni, ká anijwatanitna'a; ninajie'n nineyine pa Saka'niona, kanlej niwa ajoski'la iyo.

Pablo yamtiyi ti Sinia' ijliuyi papo je Judíojos

¹⁷ “Ti apilie'eje Jerusalenne, 'oyeyi jlaja 'najla'wet wuj, ti awo 'yejlayeja'. Sek a'yi ti poye na a'we'en.

¹⁸ A'we'en ni Saka'niona ti iyonk'i 'ate, “Jlam woni'ni 'ate ka tajla'm jla'a Jerusalén, 'wanjliyi ja ke ink'iu'wa'm napo i'nio' 'nak yi'i siuti sijwelta.”

¹⁹ “Sekyi'i akiujlie ti awo'ate, “Jla'm ijiattaja ka je 'najanisi paka wonk'i, ti ajoyits'i niwa Judíojos t'ajla'wetis ti awojyin'ni siunapo i'nio' iyoyi ni amtik, ti ajoyi'ni insat jiweje, ti tajaki'n.

²⁰ 'Yina jla'm ijiat ka je yamape ti sek a'yi ti tilianajape ki akawo Esteban ti jlam ti injwe'el, tiwet'ianaja ka je yama 'neje ti a'yena kiwa ji'wuye siojopo takalankiji'n, ti ajwela ka 'esie ki iyoyisi.

²¹ “Saka'niona isiulk'i'm ti iyo'ate, “Maj, kajeyepa ti ya'am ti jajliu'. Jajliu'wa siunapo i'nio' ji'wetis je jnanjliyi, ti je Judíojos”.”

Pablo inijwejla'm pa tokis jika anechiyas ti jla'am ti Roma jlele

²² Sek jla'a siukiwa jlamtis ti tik'iukie ja Pablo, sekyi'i ti ijiatayiji ti tanisi ape'e ti iyoyits'i 'ate: —¡Je 'esiji ka 'wanjliye'e. Lana' jla'm 'esiji ka inetia'n!

²³ Jlam tanjlik'i wita'm, jla'yi ti ji'wuye ipiatisits'i, siu'neje ti ajnat itietisi'ni pijia'm.

²⁴ Tokis jika anechiyas takajlunie ka toki kiajwe siojopa tokis 'loj ji'wuk, ka tak'ajaki'n ka injwe'el siupa titiajlataja ti kia'iyo ti tank'i wita'm papo i'nio'.

²⁵ Wakajle ja Pablo ti tilie'nitie, ti jota tajak'ni, Pablo i'yasen'ne ja tokis jika anechiyas siojo sek yi'i, ti iyo'ate: —¿Ma 'esiji jiat'eje ti asa'am ka aja'ni pa ti Romano, siuti je 'yakaj siupa jitis iyoyi?

²⁶ Siojo anechiyas ipi'ya wekie'e ti kia'iyo, yama ti ijwile ja jika anechiyas, ti iyo'ate: —¿Tepa jawo, siu'nie i'nio' ti Románop'an?

²⁷ Sekyi'i ja tokis jika anechiyas yam'ne ti ijioyi ja Pablo, i'yasen'ne ti iyo'ate: —¿Ijiate ti Románo'a'm? Pablo isiujlie ti iyo'ate: —Ji'yu.

²⁸ Tokis jika anechiyas iyo'ne 'ate: —Ti awoyeyi ka iyo Románoja je jlase' jakia wikiniet'aj atej'we ti akat'i'n itipe'e. 'Yina Pablo iyo'ne 'ate: —Ya'm ijiate ti Románok'ime, kajeyepa inia' Romano.

²⁹ It'imina'ne siojopo tijliuktieje ka inajas'ni, ti ipi'yayeyis ti kia'iyo, yama'ni ti tajlisie. Kia'iyojliyi ja tokis jika anechiyas je ijwiyeyiji'ni ti je ijwi'yape kajeyepa ti jla'am ti wikijnies ilie'niti.

Pablo tokiji papo Judíojos jlosikis jiwos

³⁰ 'Yina ja tokis jika anechiyas ti iyotaja ka 'najane paka wone siupa jitis iyoyiyi ja Pablo. Jak je iyoyiji jloma kiecha jakia ti tilienajayits'i kiwa t'aka ti wikijnies, sekyi'i ti takajlunieyi japo ijnosikis jiwos, siu'neje japo pa'yijis jika anechiyasas, ti iyoyeyi ka initotk'i wita'm. Sekyi'i titiona'ne kisie'e ja Pablo, ti titionaja japo ijnosikis jiwos.