Hechos 21 - Sinia' Jlamtis 1994

Pablo ijio Jerusalenne

¹ Jlampa atajlajayi japo si'lijwas, asojmayejamk'i jlaja kasejkana, akinie'ni ta'a ti amita ts'iji yi'i jlaja ajnat jle' iyo'ate Cos, siujlieja i'niat itijwape'n. Siojokia ti jlomaye awakieyi jlajaka isi' jle' iyo'ate Rodas; sek atajla'a ti atayeja'aja 'niji yi'i jlaja Pátara.

² Ti a'nesaja'ni, a'wenak'i jiwekie'e jlaja kasejkana ti janek ti ijio Feníciaja, sekyi'i jlajak akiniejak'iji.

³ A'wenaja'ni jiwekie'e jlaja Chipre. Ti akinieja'ni, alekieyi 'niji si'lieme, ti atayeja 'nijiye siujlieja isi' jle' iyo'ate Tiro, ajnat ti yiji jlaja Siria. Sek tijwosa'aja'n siojowa wask'i'nelaja yiji jlaja kasejkana.

⁴ Sek kas'wanjle'e'ne, paj ti saka i'nio 'wanjlijyi'n ijwienjliye. Awokieyijyin'ni japo si'lijwas ti Sinia' jilis pet sek ji'wet'e. 'Yina siojopa Sinia' jikimet 'yakajanitia'm pet ka je inwenis ja Pablo kajno Jerusalenne.

⁵ Ti awakiek'i siukiwa jlomas aninenaja, sekyi'i ti akinieja'ni ti jatiajlaja japo si'lijwas. Pajlat ti namisek'i kisie'e jlaja isi', jijwa'yis namisik'i pet, jilis kia'iyojliyi. Ti awakie jikiuts'i ja i'niat lajlik'i, sek awak'i ti ts'akosjlete'l ateyejayijk'iji'n, ti awok ts'ajlayeja', kaswikie'eyi ti awok ts'ajlayeja'.

⁶ Atemaja ti atejwilajayi japo si'lijwas, sekyi'i ti asojmayejamk'i jlaja kasejkana, yama'ni pet ti yapi'ni.

⁷ Atajla Tírojo ti anok i'niatk'i, paj ti awakieyi siujlieja ajoki Tolemaida. Awaki japo si'lijwas ti atejwilajayi, 'yina saka jloma ijwienjli wekie'e ti kas'wanjleje'n.

⁸ Jloma kiecha ti akinieja'ni ti ajok Cesaréaja. Ajok ji'wete ja Felipe ti inka'niye ti 'es jiwo, tajla'm siojopo ijwienjli sikio' itij'we times tom'niji iniuyeje'ni japo injlojwajnas, jak awakiap'ne.

⁹ Jilis japo ijniujlits'i asejnia, laj jijwa'yisa, japoka'ne siojopo iyo injwejlanawokila'.

¹⁰ Jlampa kaspaja'a ti sek awak'i ti awakiap, 'nesape ja Sinia' jijwejlanik jiwo siojo jle' iyo'ate Agabo, tal Judéaja.

¹¹ Ijiots'e yi'i siojo awak'i, isimayi ja Pablo jika'wak ti inits'ejwane jikioye, jisietis, itij'we ti inits'ejwa'n jla'am, sekyi'i iyo'ne 'ate: —Siojona Sinia' jikimet ti 'es iyo'ate ti ijwi'l, siunie jika'wak ni aki'meje, ti kiak ja tiwonaja siuka aniwoniji'ijyi ka netiena'a Jerusalenne. Siunapo Judíojos janekiajle napo i'nio' 'wenayi.

¹² Ti ape'yakieyi ti kia'iyo, sekyi'i ti ajwelajanta ka inip'elisinaja ti je awenata. Siojopo ji'wet'ise' kia'iyojliyi ti je iwinista. Awonajataja 'ate: —Ká akna'a ka ajo Jerusalenne.

¹³ Isiults'em'ne ti iyo'ate: —¿Yot'iyi'ni ti jlapajyi'n, jla'yi ti je inkasajyi'n? Pajk'i ta'a ti aniwakajlanit ti ja inilayiti siunie jayo ka yita Jerusalenne, 'wanjliyi ka kia'iyo ka silie'nitie ni'ne ka siliana, 'yina 'esijyi ti naka ti jant'emink'i ni Saka'niona Jesús ti akk'i.

¹⁴ 'Yina a'wena ti je akajla ja Pablo, sekyi'i awok'ne 'ate: —'Esiji ka jlama jla'am pa Sinia' siupa iyo kawo.

¹⁵ Jlomas 'nak nojwaja'm ti sikijmatis alesanajak'i'ni ti awokieyi ka na'ni, jak je iyoyiji akinieja'ni ti ajok Jerusalenne.

¹⁶ 'Nak nojwaja'm japo si'lijwas tal Cesaréaja 'yuninsek'i. A'nesa'ni ti kassokiejayiji ja sikiecha Mnasón, tajle jlaja ajnat jle' iyo'ate Chipre, inamtik jiwo paj t'ipi. Awakiap'ne kajeyepa ti iyo si'weta'.

Pablo ijio isik'i ti ijioyi pa Santiago

¹⁷ Ti a'nesaja Jerusalenne, si'lijwas japo Sinia' jilis pet, ti kas'wena wuj ti inkase'n.

¹⁸ Jak je iyoyiji'ni, jloma kiecha ti ajokie isik'i ti ajok ji'wete ja Santiago, ti sa'yi ja Pablo. Siojopo i'yena papo ijia Sinia' jilis ijyiwite ti sekyi'i.

¹⁹ 'Yina Pablo ijwilaja'm japo je Judíojos siojo Sinia' iyone, ti paka 'esi ni jikijmaye iyo, ti itimayi ti itijwila.

²⁰ Jak je iyoyiji'ni ti ipi'yayisie, iyunitisie pa Sinia'. Sekyi'i iyonayisi 'ate ja Pablo: —'Na isiecha, ji'wen 'neje ti 'loj napo Judíojos ti je takakiunisi pa Jesús 'nakayi, ti je iyoyisink'iye ka je tiwoki siunie jike' iyonisi pet, siunie iyo ni Moisés jika'neyasajnaye.

²¹ Jla'yi ti pajk'i ti t'ijieyisi ti jit'iyasajne'n papo si'lijwas Judíojos yi'i puwa ajnatis ijia kanleyisi kan'yenis siunie iyo ka tiwoki. Ijwilis ka impe'ya ka awo'ate, “Je 'esiji ka kiak awonayi napo asles ayijnies, ka ewaja'yi ni t'isie'n jlas ni kia'le. Leyeyi siuniwa jiniwonayi.”

²² “¿Tepat'e janiwonaja siuti kia'iyo? Janjie'ya ti ji'nis 'naka'a.

²³ Siunie 'esk'i ka woyi, ká akamana'a sitipe'e siunie jayona'a. 'Yejne'n, 'esiji ti po' siunapo i'nio' yi 'neye, ijniujlits'i napo, ti pajk'i ti inipe'yayisi pa Sinia' siupa iniwonisi.

²⁴ Napok ja a'yisa', janilesaniji iyot'iyipi pa Sinia' ka tiwoki, kat'inna ape'e ka tiwoki jika awusiesa', jankajanit ti jlam je iyoyisi ti po' siunie iyoyisi, ti inipe'yayisi pa Sinia'. Ja'nakayeyijna'a ti ja ti'wena ti je ijiatk'i siunie tiwona'a, ti injwela ka je awoyi siunie ni inka'neyasajnaye.

²⁵ “Siunapo je Judíojos ti pajk'i ti ininekiajlisi pa Jesús, pajk'i ti sip'esinik atatajaja, ti ajwelaja'm siu'nie awonaja. Ti je 'esiji ka intowis siunie 'nisie'n ti wakal ti t'otata ti tekiajlaja niwa diosis jiniliaja. Siu'neje ni 'woyis, ni'ne ka nakaye siuniwa ti pajk'i ti 'yajle'n pakaja. Je 'esiji ka woyisi siunie iyo ni i'nio' jla'yi jana i'nioki ti 'yakama ape'e siunie 'esk'i ka tiwoki.”

Pablo jikojwas isi'me

²⁶ Pablo yamk'i'ne siojopo i'nio' ijniujlits'i, siukia ti jlomaye'eje iyoyeyi siukia iniwone ti ini'notatiji, kia'iyojliyi siojopo i'nio' ijniujlits'i. Sekyi'i ti yama'ni ti ijioyisi jlaja 'najla'wet, ti ijwile ja pa'yi siupa jloma ininejni siupapo i'nio' siupa iniwonisi, ti iyoyis ji'wajieta' jitipe'e ti yikiajle pa Sinia'.

²⁷ Jlampa majleyeyi ka nets'i siojokia i'nio 'wanjlijyi'n, 'nesa'nijpe siojopo Judíojos tal Ásiaja, i'wi'in ja Pablo yi'i jlaja 'najla'wet. Ijwisin'ne japo i'nio', sekyi'i t'ekiyejayi ja Pablo, ti isimits'i.

²⁸ 'Yina tanayi japo i'nio' ti iyo'ate: —¡Israel jika kia'lis, joniemet, noyeyits'e'm! ¡Siu'nie i'nio' yamk'i'ni napo ti 'yiyasane siuniwa wask'i'nelaja ti teje selia'm ti Judíojosts'e'm, teje'yi ilia'm ni Moisés jika'neyasajnaye, siu'neje jana 'najla'wet! ¡Je najata, siu'neje ni iyo ti iliaki jana 'najla'wet, ti jla'yis'ni napo i'nio' je Judíojos ti 'yuyisietaja kiajwe!

²⁹ Ji'lij kia'iyonisi kajeyepa ti i'winis siojo Éfeso jlele, ja jle' iyo'ate Trófimo, ti jla'yi ja Pablo isija'm, ti ijwil ka Pablo ina'asi'ni ti 'yuyetaja jlaja 'najla'wet.

³⁰ Yaka titietaja'm japo i'nio', ti yama'ni ti t'osi'ni ti i'yenisi, yiyisi wekie'e ti isimayits'i, itionayis kisie'e ti tajlisi kiajwe jlaja 'najla'wet. Sekyi'i ti ip'ionayisiamk'i jawa 'wuk kiwitawa.

³¹ K'iejlipa iyoyeyisi ka ilanis, ti yiyeyi ja tokis jika anechiyas Roma jlele siukia iyo japo i'nio' ti jlampa iyots'i'ni.

³² Tanayi japo jika ijiawos, siu'neje japo jijniujliejwas ti kia'iyo anechiyasas, t'osiye'ni ti ijioyisi siojo yi'i japo i'nio'. I'winis ilia'm japo tokis jika anechiyas, sekyi'i ti iliyeyisi ti yejes'ni ja Pablo.

³³ Siojo tokis jika anechiyas yamitayi ja Pablo, sekyi'i ti takajlunieyi ka timesiek'i puwa wikijnies ka tilie'nitieje, 'yina i'yasam'ne japo i'nio' ti iyo'ate: —¿Ten siu'nie i'nio'? ¿Tempa jitis iyo?

³⁴ 'Yina ti jlam pak iyots'i'ni japo i'nio', 'wena japo tom ts'e, 'wena japo 'wenayi siupi yiyiji, jak je iyoyiji'ni ja tokis jika anechiyas ka 'najane siupa jitis. It'imina pa tokis jika anechiyas ti takajlunie ka tokiji siupi yi'i japa tokis 'loj ji'wet.

³⁵ Ti yiyeyisi siupa tiniukk'i'ni ijio'we pijia'm japa tokis 'loj ji'wet, Pablo tokis ijieyeyis pijia'm kajeyepa ti jwesis japo i'nio'.

³⁶ Je iliyisk'i siojo tokiji, yamisk'i'ni ti iyoyits'i 'ate: —¡Lana'! ¡Lana'! ¡Lana'!

Siupa Pablo iyo ti tamti jlam jitipe'e

³⁷ Ti Pablo je tikiniejliyi'iji ti ja toki siupa yi'i papo tokis 'loj, i'yasen'ne ja tokis jika anechiyas ti iyo'ate: —¿'Esiji ka 'yakamtijniena kiu'? Tokis jika anechiyas isiujlie ti iyo'ate: —'Najanp'ane ki Griego ji'lij.

³⁸ ¿'Yina amt'e siupa Egipto jlele siupa inilane papo anechiyasas, ti cuatro mil papo tokis inwak jiwos jikawos yi'i japa ajnat laj i'nioye'e?

³⁹ Pablo isiujlie pet ti iyo'ate: —Je ya'am. Ijiatataja jiwekie'e ti yam Judíok'i'm, 'yina je japaka ka tiajle siojopa ajnat jijwel'ni, atajla'm pet jana ajnat Tarso, siojona yiji pet jana Cilicia, janak i'wit. Siojona isi' atajla'm wuj ti jle' po'. ¡Wenk'i'm kiu wata'a ka yamti'yi ape'e napo i'nio'!

⁴⁰ Ijiatjliyi tokis jika anechiyas 'yajlinit'ne k'iye ka intamti ape'e japo i'nio'. Sekyi'i Pablo takasit'ne, ijio'ne ape'e siojo tiniukk'i'ni, jikio' ijie'ne ape'e japo i'nio' ti iyo ka tik'iukie, ti jantamti. Its'iuyisie 'ate, tamti'ne ti iyo Hebréojos ji'lija', ti iyo'ate: