Hechos 20 - Sinia' Jlamtis 1994

Pablo ijioyi papo yi' Macedóniaja siu'neje papo yi' Gréciaja

^1-2 Ti nojwa isia'm siukia iyo papo i'nio', ti jlampa iyoyisits'i'ni, Pablo tanayi papo Sinia' jilis, ti ijliuye ti ijwijla'm siupa 'es ka iniwonisi. Itime ti inijwelayi papo ti iyoyeyi ka inek ti ijio Macedóniaja, itioyi'i ki iyo ti tamti ti 'yakela papo i'nio'. Paj ti yiye Gréciaja,

³ jika we'lajas najape ti sek yi'i. 'Yina k'iejli pa iyoye'ijyi ka inilan pijia'm ti jota inek, iliyeyiji ti iyotaja ka nekk'i japa kasejkana, iniuye wek ajnatk'i ti yapilie'eje 'niji tajli ti 'nelanjie'e, siojo iniu Macedóniaja.

⁴ Siojopo 'yunink'i ja Pablo, japoka Sofater, Pirro jlas Berea jlele, siu'neje ja Aristarco jla'yi ja Segundo ti tajlis Tesalónicaja, Gayo ti tal Dérbeje, jla'yi ja Timoteo, Títico, Trófimo ti tajlis Ásiaja.

⁵ Inian'ni'ne sik'ioye japo si'lijwas ti awak kasejkanaja', its'iuyisi'n sik'ioye yi'i jlaja Troas.

⁶ Ti yama 'niji siojokia jloma ti inlakijnieye, ti titiuwajata niwa woyejes laj jijlinkitajets'i, akinie'ni 'ne ti atajla Filíposse. Ja ke iyoyiji'ni jlomas ijwienjli sikio' itij'we ti ejejlajayi ts'e Tróasse, sek kas'wanjle'e'ne paj ti saka i'nio 'wanjlijyi'n ijwienjliye ti sek awak'i.

Pablo i'mienit pa jwemik jle' iyo'ate Eutico, ti 'yalta

⁷ Siojokia jloma inkijmaye, anitotiek'i'ne wita'm ti anikijwana ti a'yaki jakia Saka'niona Jlak ti 'Es. Pablo iyo jlamtikie' k'iye japo i'nio', paj ti je k'iejeyeyi'i, paj ti ajnaj kioweja ti je iliyi. 'Yina ti 'yakatate ti iyo jlamtikie', kajeyepa ti iyo ka nek jakayi siukia ti k'iejli mot.

⁸ Aninenaja'a siujlieja 'wuk tom pijia'm, yi'i jawa katese'l ti jwat tena'ak'i.

⁹ Jwemik siojo jle' iyo'ate Eutico yi'iji'n ja 'wuk kiwet jlas tomi pijia'm ti imia'a, ti Pablo itioyi'i ti iyo jlamtikie', paj ti jika ijnieti poye, iniujwen'ne ti taj'l ape'e jlaja 'wuk siujlieja tomi pijia'm. 'Yina 'yal'ne kiaka jwemik masa, ti ti'yenajayi.

¹⁰ Pablo sekyi'i yam'ne pet ti tisiojmajyi'n ti i'yene. Yiyi ti t'opiyeyi ape'e, ti its'iejwap pa jwemik masa, sekyi'i iyone'ne 'ate japo i'nio': —Ká awoye asjlak'aliye, 'wasa'n.

¹¹ Sekyi'i ti apilieja'aja pijia'm ti alesanaja jakia Saka'niona Jlak ti 'Es, sekyi'i ti atowaja. Atemaja ti Pablo iyoyeyi'ijyi ka iwo jlamtikie', paj ti jloma 'yakajayiji'n jiwekie'eja ti ya'am.

¹² Ti 'wasa'n ja jwemik, kiaka'ne ti it'imina ti je jlase' ki iyo japo i'nio' ti inkase'n.

Pablo tal Tróasse, ti ijio 'niji Milétojo

¹³ Anana'ni sa'am ti akiniek'i jlaja kasejkana ti ijio 'niji yi'i jlaja isi' jle' iyo'ate Aso, kajeyepa ti Pablo iyo'ate: —Yam ja ke iyina'a kasejkanaja, ka yikta, jla'm ijiat ka ijyilta'ase ts'iji Ásojo, ka yiyena'a pet kasejkanaja, siojopa jawayejyi.

¹⁴ Ti anitajakieyi ti awak ts'e yi'i jlaja isi' jle' iyo'ate Aso, sekyi'i ti si'niayi ijwienjliye ti ajok Mitiléneje.

¹⁵ Sekyi'i ti akinieja'ni, siukia ti jlomaye'eje anewajla'a jlaja Quío. Jloma ti awakieyi siujlieja ajnat i'niat itijwape'n, siukia ti jlomaye'e a'nesaja'ni Milétojo.

¹⁶ Kiak iyoyi siukia awoki, kajeyepa ti Pablo je iyo ka pajaja'n Ásiaja, it'imina ti je yam Éfesoje, ti neyat ts'iji Jerusalenne, ti je iyo ka inetiajnati siojokia jloma ti Pentecostés.

Jlamtis pa Pablo ti inijwejla'm papo i'yena papo ijia Sinia' jilis yi' Éfesojo

¹⁷ Pablo ti yi' Milétojo, takajluni'ni siojopo i'yena papo ijia Sinia' jilis yi' Éfesojo, ka jnoyi siupa yi'i.

^18-19 Iyone'ne 'ate ti 'nesa'ni: —Mejla'ala ka je 'najanayi siunie awo ti a'yi aska kiowe'e, ti 'nelanjie'e a'nesape Ásiaja. 'Yejne'n ki k'iek'i'ni ti je aleyi ti anoyeje pa Sinia' ni jikijmaye, 'yina ka kia'iwo ka iyo ka initoniti, je'e. Yi'i na jloma ap, kajeyepa ti a'we'en siunie inkajejlasaye ti iyotaja ka wonk'iji napo Judíojos.

²⁰ 'Yina ka pakayeyi ka inip'elisin'ni, je awojliyi ti akatate, akjliyi ti ajwe'lase'm niwak siuniwa ja insisieyi, siuniwa awoyi yamtikie' jitieyi'i napo i'nio', jla'yi ti akijits'i ti yi' 'wetits'ik'i.

²¹ Je sikip'e ti ajwejla'm napo Judíojos siu'neje napo je Judíojos, ti awone 'ate, “Woye asosikis ink'iejyisa', tankiunieyi pa Sinia' jlas Jesús.”

²² “'Yejne'n, 'nakayi siojona Sinia' jikimet ti 'es 'yijienk'i'm ka ijio Jerusalenne. Siupa iliaye jawo seka'a je ts'ajane.

²³ Najata jla'am ts'ajane pi awone ti siojopa isi' jajioyi iyo jana Sinia' jikimet ti 'es ti ijwilk'i'm ti jajioyi jana insat jiwe, siu'neje pa iwit'ia jawo, ti inijijwijyi'n its'ioye.

²⁴ Ejlojli wekie'e, 'yina je awoyi yitinikie' niwaka, kajeyepa ka ikajli wata'a ts'iji ka yitak'i siu'nie yaj jane'yi, siu'nie awo ti akk'i, jla'yi ti aki ni inka'niye ti tajle ni Sinia', siunie Saka'niona Jesús yikialk'i, naka ni Sinia' jikap'ijliuskiye. Wuj ti ts'ajkaj'ni ti kia'iyo.

²⁵ “'Nakayi jlam je awo, siuti asa'am siojopo ajwelajajampe ni Saka'niona Sinia' jika anechijiayas, ja ke ekiajlayi'i ka si'wena'.

²⁶ 'Yakajk'i ki i'lij ti awo'ate, siupa ti jiwet'ia japoye, je yam'ne ka t'imina.

²⁷ Kajeyepa ti pajk'i ta'a ti ajwe'lase'm siunie iyo ni Sinia' ka woyi, je ajwek'iase'm.

²⁸ Ká anikiwaliye, ni'notatayiji, 'yenayi napo 'eyasajnas Sinia' jilis. Sinia' jikimet ti 'es pajk'i ti inwojwana sontas jiwosa', ka 'yenayi siunapo Sinia' iyo jika kia'lisa', ti takat'ini ape'e pa jlas ji'woyis ti yamayi.

²⁹ Ts'ajane ta'a pa awone siuka yiktiejna'a ja'nes'ni napo i'nio' ti jawo'ate niwa k'iwajlas ti jwesis, ti jana'am jikiowe'e napo Sinia' jilis, ti jawo ka inetiajnat.

³⁰ 'Wanjliyijna'a ka poye paka ne'yi pa ka inka'neyasajnayeja', siupa ka je ijiatak'i, ti jawojonk'iye ka intoni jlek'i papo Sinia' jilis.

³¹ Ká anikiwalinitie. Astaj wunitiek'ipe siukiwa jlomas yam'niji ti najkapis najape ti a'yasap, jloma ajnajpe ti 'eyasanajyi'n, je ts'ome yi'i pa jloma ti ap'ase'm ti awota'ni asosikie'.

³² “'Nakayi 'esiji ka Sinia', jla'yi niwa jlamtis ti takap'ijliuski, jan'ye'nase'm, jla'yi kanoye'ase'm. Siuniwa jlamtis 'yijene 'neje kanoye'ase'm ka ijiatayi ka astankiujnieye poye, jla'yi kawe'nase'm ni jikap'ijliuskiye, jikimet napo Sinia' jilis ti isis.

³³ 'Najanayi ti je sijwesiejejyi'n paka k'iejliyeyi siupa ti asetia'n, isiowe je yi'i jana wikiniet'aj, siu'neje niwa lotakijnies, ji'wuye paka ne'yi paka isiechaye.

³⁴ 'Wenajliyi pet ti akijme'n, 'nakayi'iji ti a'we'en siunie asetia'n, jla'yi siunie isitia'n siojopo yi'ni ijiap.

³⁵ K'iejliyi'iji pa akima, sekyi'i ti ajwanayija'ajme pet ti 'eyasanajyi'n ti awo ka kiak aniwonayi, ka anoyeyeje siunapo p'ijliusis siupa isitia'n. Astaj enayijpe 'ate siusiwa Saka'niona jlamtis ti 'yakaj, ti iyo'ate, “Siunie iyo 'wajietiye, ni Sinia' iyone ti ip'ilisi'n 'yaka'm ape'e siunie ti tiwok ji'wajieta'.””

³⁶ Yiyik'i ja Pablo ti tamti, sekyi'i ti takosjlete'l itiyeyiji'n ti iyo t'ajlayeja'. Siojopo jla'yis kia'iyojliyi pet.

³⁷ Yape'n, its'iewayisi'ni ja Pablo, jla'yi ti its'iuyis jik'iolo'we.

³⁸ Pak ilia'an japo ti jitiej yinisi'ni 'ate siupa Pablo 'lij ti iyo'ate, “Ka pajana'a ka si'wena'.” Sekyi'i yamayisik'i ti ijioyeyi jlaja kasejkana.