Hechos 19 - Sinia' Jlamtis 1994

Ti poyeta pa tiniejiena yi' Éfesojo pak tetinape pa Jesús jle'

¹ Apolos je t'eki pet Coríntojo, jlampa Pablo yama'aja ti ijio Éfesojo, iniu 'niji yi'i japa ajnat tikijnakiyis yi'i. 'Yina sek i'wi'ne papo Sinia' jilis,

² iyo'ne 'ate ti i'yasa'm: —¿Ma yi'ase jana Sinia' jikimet ti 'es ti jininekiajlayet'ipi? Isiujlisie ti iyo'ate: —Je'e, je kasts'ajaneje paka yonaja japak Sinia' jikimet ti 'es.

³ Pablo yikiajlayi'iji ti i'yase'n papo, ti iyo'ate: —¿Tempa jitiajlayiji ti inajienajajyi'n? Iyoyis'ne 'ate: —Atajlajaja ja Juan siunie iyo ni jika'neyasajnaye.

⁴ Pablo sekyi'i iyone'ne 'ate: —Ijiate, Juan iniejiejne'n siupapo iyot'ipi jlosikis ink'iejyisa'. Ijwijla'm papo ka je inkakiuyis siupa 'wanjlit'ipi isia'm, ajwel pa Jesús.

⁵ Ti 'yijenayisi pi iyonisi, sekyi'i tiniejienajan'ne, ti inineyinisi pa Saka'niona Jesús jle'.

⁶ Ti Pablo jikio' yinak'i ape'e, Sinia' jikimet ti 'es yi'ne ape'e ti jlamis, jlamtis 'wenayi papo i'nio', sekyi'i ti iyoyeyis jika'niyeja' siupa iyo japa Sinia' jikimet ti ijwijla'm.

⁷ 'Yina itijwa'm sikioye times tom'niji 'nak nojwaja'm papoka i'nio'.

Pablo 'yiyasajne'n papo i'nio'

⁸ Pablo jika we'lajas najape ti sekyi'i japak isi'. Jika jlomas je initiajnati ti ijioyi'ni japa t'ajla'wet papo Judíojos, t'otale t'o'n ti ijwi'il pa Sinia' jika anechijiayas, ti ijialasta ka 'najanisi siupa iyo ti ijwijla'm papo i'nio'.

⁹ Po' siupapo t'ojnine, 'wenajliyi ti 'yakakiuyis, ti ijwilis ka je 'esie siunie 'Nayi Ink'ie' siunie Pablo yamk'i, ti yine jitieyi'i papo i'nio' ti ijwi'il. Pablo tajla'ne, tane'ni siupapo Sinia' jilis, ti ijioyiji japa inka'neyasajnaye 'wet, i'nio' siupa jle' iyo'ate Tiranno jika'neyasajnaye 'wet. Sek yiniji'ni wikie'eyi puwa jlomas ti sek ininenisi'i'ni ti takamtijniejne'n.

¹⁰ Paj ti jika najkapis timesie ti kiak iyoyi, jak je iyoyiji siupapo i'nio' siupapo tajle japa ajnat Asia, siu'neje papo Judíojos siu'neje papo je Judíojos, tipechiyeyi puwa Sinia' jlamtis.

Siupa iyot'ipi pi jiwet'ia papo Esceva jilis

¹¹ Sinia' i'winki'n pa jijweye, siupa ti wuj ti yisi'lietk'i papo i'nio', siupi iyo ja Pablo.

¹² Jak je iyoyiji'ni 'wanjliyi ti ijnetik p'ot jlas pa, ni'ne ti lotakiniewa pa, siupa ti isie'ne jawa t'ajwes ja Pablo, ti tikiniejejataja siupapo je isis, sekyi'i tijwayet'ijyipi pi jiliaye pa i'nio' ti kiak tiwonaja. Jak je iyoyiji siupuwa imose'l iniuk'i kisie'e.

¹³ 'Yina po'neje papo Judíojos ti yikiajli'ni japa isi', ti yamk'i'ni papo i'nio', kajeyepa ti aye'wu'l pet, kia'iyo yokiosk'i kisie'e puwa imose'l yijits'i papo i'nio'. Yit'i'yi japa jloma ti iyotajasi ka ineyinisiji ki Jesús jle', ti isientaja papo i'nio' jiwet'ia po'. Kiak iyonatajasi 'ate ti yiyetajasi papo i'nio' ti yokiosta kisie'e puwa imose'l: —Etijnape pa Jesús, siupa Pablo yameje'n ti ijwil, ajlo'wase'm ka noyek'i kisie'e.

¹⁴ Kiak iniwone papo jilis pa pa'yi jle' iyo'ate Esceva, siupapo ijwienjli sikio' itij'we times tom'niji.

¹⁵ Yit'i'yipe japa jloma siupuwa imose'l yijits'i papo i'nio' isiujlie papoka ti iyone'ate: —Siunie Jesús kastant'ieje, Pablo kia'iyojli kasts'ajane pa awonaja. Siuti asa'am, ¿te'nase'm?

¹⁶ Iyojlitieje ti t'ekiyeyi ijwienjliyeta lapakawo ti je jlase' pa jijweye iyo. Its'isatayik'i ape'e papo i'nio' paj ti 'najliyek'iji'n, ti je itieyisi. Sekyi'i ti t'osiye'ni ti yapi'ni ti i'yiltan'ni, lapakawo ti itime ti iyo kieye papo, ti iyone ti t'ekiyeyi.

¹⁷ Wikie'eyi papo ji'wet japa Éfeso, siu'neje papo Judíojos siu'neje papo je Judíojos, ti 'yijenayisi pa iyonisi paka, wuj ti je ijwijyits'i pakayi. 'Yina Jesús jle' yamaja'n ape'e na ajnat, ti tonitie.

¹⁸ 'Loj papo je 'yakakiuyis, inijwelisi siupa iyoyisi. Je inijwekisi ti ijiatk'i ti iyoyisi pi aye'wu jikijmaye.

¹⁹ Siupapo iniwojwa'n t'ipi aye'wula' yamayisi kiwa jip'esijna', ti jwat 'yutiamk'i jitieyi'i papo sek yinayi'i. Ti ti'yena japa laja siupa nojwe'e puwa imp'esijna', cincuenta mil puwa wikijniest'ejes nojwe'e.

²⁰ Je jlase' pi jijweye puwa Saka'niona jlamtis, jak je iyoyiji itijwaja'n ape'e pi ajnat ti yajme'n ape'e.

Pablo jitienkiujnieye po' ka ijno Rómaja

²¹ Jlampa yama 'niji siupa iyoyisi, Pablo itienkiun'ni ti iyo'ate: —'Estaja ka ijio Macedóniaja, sekjane'yi ka ijioyena'aja Acáyaja, kayoyena'a 'ate 'niji Jerusalenne. Paj ka yiyena'a Rómaja.

²² Sekyi'i ti ijliuye siojopo jla'yis, siojopo times, ti iniuye'eje 'niji Macedóniaja, japoka japo Timoteo jla'yi ja Erasto. 'Yina Pablo 'wanjli jlam seka'a Ásiaja.

Je isisk'i papo Éfeso jlele

²³ Wujwe pi iyo papo Éfeso jlele ti initajlatisi siunie 'Nayi Ink'ie'.

²⁴ I'nio' pa jle' iyo'ate Demetrio pak itiajlat ti 'nelanjie'e, siupa wikijnies jlotis jiwo, ilisane'ni niwa k'iejliyi yi'ne'ni pa jipe'el japa dioski Artemisa. Wuj japa wikiniet'aj 'yakajliji'ni siupa jikijmaye iyo, ti jla'yis'ni papo ijia.

²⁵ Siukia ti jlomaye tanayi papo ijia jikijmaye kia'iyo ti initotis wita'm, Demetrio iyo'ne 'ate: —'Napo i'lijwas, 'najanayi pi jiwonayi siunie sikijmatis atajlajaje naka siunie sikijmaye iyo.

²⁶ Mejla'ala ka je a'wena siunie i'nio' jle' iyo'ate Pablo, jla'yi ti jipe'yaye 'nakayi siunie ijwi'il, siuniwa diosis ti i'nio' lisajna' je ijiat ka diosisayi. It'imina napo i'nio' ti jitienkiujnieye 'wena iyone, kajeyepa ti isimis ilia'm siunie ijwi'il, jla'yi ti je 'yakakiuyis. Je 'najata'a 'naka'a, siu'napo yi'ne Éfesojo, itijwits'i siuniwa isi'il jilis yiji jana Asia.

²⁷ Siuti ja tena'ate, janetia'n ni sikijmaye, janjlas isia'm. Ja ke samkataja, siojona dioski Artemisa kiak jawo ja tiliki ti tonitie. Sekjane'yi ka tiwet'ianajayijna'a siunapo i'nio' yi' ape'e 'ni ajnat ileyeyijna'a ka 'yenis, jlam'ne Asia jlele wuj ti ijiunitis.

²⁸ Nak it'imina ti ipi'yayisie, inikiul'ne ti iyoyits'i 'ate: —¡Artemisa, Éfeso jlele jika dioski, jla'ak ajonitie!

²⁹ Jlampa iyoyets'i'ni papo i'nio' yiji japak isi'. Yamisi'ni ja Gayo siu'neje ja Aristarco, siojopo Pablo jla'yis, ji'wet yi' Macedóniaja, ijioyisi'ne ts'e yi'i'ni papo ti kia'iyo ti initotk'i wita'm.

³⁰ Pablo ijialastaja'ni papo ka inkamtijniene, 'yina Sinia' jilis je yinits'i 'ate ka ijnoyi.

³¹ Pablo t'ajajnajwas po' seka'a yi'i japa isi', ti anechiyasas, papok siupapo ji'lij itieteje ja Pablo ti iyo'ate: —Ke in'wejts'ina'a.

³² Jlampa iyots'i'ni papo i'nio'. Ijia papo 'wenayi pa yiyisiji ti ijwilis, ijia papo ijiateje ti je 'yijeneje paka wonisi siupa iyoyisi siupa taj'leyi ti kiak iyoyisi.

³³ Tanaja'ni pa Alejandro, Judíojos papok tane, ka Alejandro injwela ape'e papo, ti jlamis ti Judíojos je ini'noti pak jiwet'ia iyo papo i'nio'. Alejandro jikio' yejayi ape'e papo i'nio' ka ink'iuyits'iate.

³⁴ Je 'es jla'am ti titiant'iekieyi ti Judío pet, kat'ajayi ti tank'i wita'm. Paj ti timesie puwa inetitinki yiji ti kia'iyo, ti je iliyisi ti iyoyits'i 'ate: —¡Artemisa, Éfeso jlele jika dioski, jla'ak ajonitie!

³⁵ Iyo'ne 'ate siupa isi'i jip'esinik jiwo siupa tijnajia'm, ti jiwekie'aja ti 'yakal papo i'nio ti its'iuyek'i 'ate: —I'lijwas, ti asa'am Éfeso jlele'yase'm, 'yejne'n, wikie'eyi napo i'nio' yi' ape'e 'ni ajnat 'yijene pi iyone ti sam ti a'yenaja siujlie'e dioski Artemisa t'ajla'wet, siu'neje jana sisaj jipel yi'i ti tal poliyi ti na'm isia'm.

³⁶ Lajk'ipa ka ne'yi paka inkakiuni naka. Kamaja. Ká awoye jiwet'iaye, ti je ikajli'ijyi.

³⁷ Awokjlitieje siunapo i'nio' jiniamayi, lajk'ipa ka k'iejliyi ka je 'esie paka wone siujlie'e dioski Artemisa t'ajla'wet, siu'neje ka ilaki, jeyi kat'aja.

³⁸ Siuti Demetrio jla'yi napo jla'yis japoye pa siupa itiajlatisie, 'yina po' siunapo jiwos, siu'neje jana jloma janenisi, jan'yenis. 'Esiji ka ijnoyisi, sekjane'yi sek intajla'ana'a ka injwelisia'm siupa initajlatisi, ja 'esieje'n pa ja 'esieje'n.

³⁹ Siuti japoye paka jalasa ka woyeyi, 'esiji ka anitotiek'i wita'm, 'yina jakinieyi siunie iyo ni inka'neyasajnaye, jiwekie'ejana'a ka lesanajyi.

⁴⁰ Siunie jiwoyeyi, je ijiat ka je at'emints'e Románojos kassotienaja siunie jiwoyeyi, ti je 'yenajiap'ni wata'a. Siut'itiena'a ka kas'yase'n siupa jitis taj'le siu'napo i'nio' ti jlampa iyots'i'ni, ti je kasts'ajaneje pa siupa initajlatisi, ¿tepat'e si'lij jayonaja ka isiujlieje?

⁴¹ Yiyik'i wekie'e ti kia'iyo, sekyi'i ti ijliuye'ni.