Hechos 14 - Sinia' Jlamtis 1994

Pablo jla'yi pa Bernabé yiyis Icóniojo

¹ Ti Pablo jla'yi ja Bernabé yiyis Icóniojo, 'yuyisi'ni papo Judíojos ti yiyis kiajwe japa t'ajla'wetis. Iyo'ate ti yiyis Antioquíaja, ti tipe'yakie ti iyoyis jlamtikie', 'loj papo i'nio' iyo jlosikis ink'iejyisa', Judíojos siu'neje papo je Judíojos.

² Jlam'ne papo Judíojos siupapo je iyoyisink'iye, papoka'ne ti 'yijijie'ne papo je Judíojos ka inta'yi ilia'm, ti ijwil ka impe'ya'ni ja Pablo ka poye paka wo.

³ It'imint'iyijpe ti sek pa'a japo injlojwajnas, wuj ti ini'neti'n ti iyoyis jlamtikie', ti ijwilis pa Sinia' ti takap'ijliuski. Sinia' 'yakajanit siupa iyone ti ijwijla'm pakayi ti jijweye iwijna'm ka inkajli ka inlesane puwa k'iejliyi, siupuwa ti yisi'lietk'i'ni papo i'nio' ti i'winatajas, siu'neje puwa inia'an k'iye siupuwa ja'nakaj.

⁴ Inik'isa papo i'nio' sek ji'wet'e. Po' papo iyo'ate: —'Esiji jla'am siunapo Judíojos ijwi'il. Ijia papo iyo'ate: —Jla'm ijiate jla'am napo injlojwajnas ti 'es ni ijwi'il. Jlam pak iyots'i'ni papo i'nio'.

⁵ Siupapo Judíojos siu'neje papo je Judíojos, siu'neje papo anechiyasas, inikiujlisiap'ne japo injlojwajnas ka inajas'ni, jla'yi ti sisajas iyo ka inkienisi.

⁶ Pablo siu'neje ja Bernabé 'yijenayi pi iyonisi, ti t'olanajasi. I'yiltan'ni'ne ti ijioyis 'niji yi'i siupuwa isi'il yiji japak ajnat Licaonia, siojopa Listra siu'neje japa Derbe, siu'neje puwa ijiojwape'n.

⁷ Iniuyisk'i'ni puwa isi'il ti iyoyis jlamtikie', ti ijwilis pa Sinia' jika'niye ti 'es.

Pablo sisajas titietajaja'n ti yi'i Lístraja

⁸ Pojompe pa i'nio' je t'on'ni yi'i japak ajnat Listra. Lajk'ipa ka ne'yi japaka jlomaye ka 'esieyiji ka t'iskiujni'n, kajeyepa ti jlam je t'on'ni ti 'nelanjie'e yiyeje'n. Sek yi'ijin'ni pak i'nio',

⁹ ti its'iuye'ni ja Pablo ti iyo jlamtikie'. Pablo jitiej yikiajli'ne, itiant'ieje ta'a pa i'nio' ti jitienkiujnieye po' ka ini'manit.

¹⁰ Pablo ka kia'iwo ka ilakiyi'i ti iyo'ate: —¡Kasit, jnajietits'i'n 'niwa asatis! Takasitiet'ipi pa i'nio', iniuyeyik'i ti tisiojma pijia'm. 'Esieyiji ti t'iskiujni'n.

¹¹ Siupapo i'nio' ti i'winayis siupa iyo ja Pablo, tanat'iyisijpe ape'e, ti iyoyis Licaonio ji'lija' ti iyo'ate: —¡Diosis p'an 'napo na'm ajnat'e ti ijiots'e, ti iniwojwa'n i'nioye!

¹² Sekyi'i yiyinisi'ne pa jika diosis siupa jle' iyo'ate Zeus ja Bernabé, jlam pet ja Pablo paka pet pa dios Hermes, ti ijwilis ka pakaye siupuwa diosis ka jikawoye ka pakaye siupa jlame.

¹³ Siupa dios jika pa'yi t'ipi pet, siupa t'ajla'wet tomi 'nayija'm siupa ti t'oyajetaja japa isi', namat'iyijpe puwa wakiajas ti iyo ka ilajne'n. Ijiosisk'i'ni puwa a'la' jlokie ti ilisa'n, ti iyotajas ka wunitis japo Pablo.

¹⁴ Ti Pablo 'yijenayisi pa iyonisi, its'isatat'iyisimpe puwa ji'wuye jitieyi'i papo i'nio', kajeyepa ti jlam jnots'inijits'i'ni ti kia'iyo. Yamat'ipi jikiowe'e papo ti iyo'ate, ti tani'ni:

¹⁵ —I'lijwas, ¿yot'iyi'ni ti kiak jiwoyeyi? I'niolts'e'm awok'iate jiwoyeyi. Niwak it'imina ti 'nak ajok'i, ti awok samtikie' niwa Sinia' jlamtis ka leyeyi niwaka ti je i'manitie. Ataj womayi jla'am pa Sinia' ti laj jlaja, ti jilisanik ni poli jla'yi 'ni ajnat, jilisanik ni i'niat lajlik'i, wikie'eyi siuniwa jlele.

¹⁶ Ijiate pa Sinia' ti pajk'i ti yine'ate papo i'nio' siupa itiliaja ka woyi.

¹⁷ 'Yina je paj ka leyi ti i'winkina papo ti ijiate jla'am ti Sinia', ti inineniji'ni siupa iyone ti ip'ilisi'n. Jla'am ti ijliu'wase ni pejla, jla'yi siunie ti 'es ti jiliena'yi ni asak. Jlam'neje ti tajle ti po' ni jitiuwa, jla'yi ti 'etsaka, sekyi'i inkasajyin'ne.

¹⁸ 'Yina jwajla'a pa netia'n ka je inkajle papo, ti tomista'ni k'iye ka tilianaja'n puwa wakiajas, jla'yi ka je kiak iniwonisi ka inwunitis.

¹⁹ Paj ti 'nesat'i'nijpe papo Judíojos 'nak nojwaja'm, ti tal 'niji yi'i japa Iconio siu'neje japa Antioquía, siojopa yiji pet japa Pisidia. Sekyi'i ti 'wena t'ipa iyoyeyipi pa jitienkiujnieye papo i'nio', ti yiyeyisi papoka sekyi'i ti sisajas titietajat'iyijimpe ja Pablo. 'Yina ti ijwilis ka 'na'al, yamat'iyisijpe kisie'e ti itiajlajna'm japa isi'.

²⁰ Sinia' jilis nojweje, sekyi'i ti iniyet'ipi pijia'm, yapiliet'ijyi isija'm. Siupa ti jlomayet'ijyi, Pablo jla'yi ja Bernabé yamat'i'nijpe ti tejeyis 'niji yi'i japa isi' jle' iyo'ate Derbe.

Pablo jla'yi pa Bernabé yapiliet'iyits'iji 'niji yi'i japa Antioquía ti yiji japa Siria

²¹ Ti iyoyet'iyispe jlamtikie'e japa Derbe, 'loj papo ininekial ti iniwojwa'n Sinia' jilis ink'iejyisa'. Jlam sek ji'niayisiji yi'i japa Listra, siu'neje japa Iconio, siu'neje japa Antioquía yiji pet japa Pisidia.

²² 'Yakela papo i'nio' sek ji'wet'e ti iyone'ate: —Je pajna'a ka aleyeyi ti astaj jiwomayi ni Saka'niona, lapakawo ti siunie i'nio' ni iyo ka ijnoyi ni Sinia' jika anechijiayas wuj ti janilayiti, niwa jiwet'iaye ti jajnoyi.

²³ Sekyi'i ti tiwok jleyisa' siupapo janoyeje papo ijia tajlits'i puwa ji'wetis ti tijniejieta'ak'i siupa jikijmaye janwo, t'ajlat'iyispe ape'e, jla'yi ti ininel'lianiti'n. Iyonisi'ne 'ate ti itimat'iyisijpe: —'Esiji ka Saka'niona, siunie je jikakiuye, ja 'ye'nase'm, jla'yi ti janoye'ase'm.

²⁴ Ti yamat'iyis'nijpe, iniuyet'iyispe 'niji yi'i japa ajnat jle' iyo'ate Pisidia.

²⁵ Yiyisi japa isi' Perge sekt'ipa iyoyisie'epe jlamtikie', ti ijwil puwa Sinia' jlamtis. Itimisi ti tejeyet'iyispe 'niji yi'i japa Atalía.

²⁶ Sek tajlits'i ti yiyis kasejkanaja, ti ijioyis 'niji Antioquíaja, isi' siujlieja yiji jlaja ajnat Siria, siujlieja ijioyist'iyipi'iji. Pakayi ti 'yakela papo Sinia' jilis ka inkatate puwa Sinia' jlamtis ka inwoyisi, siupa ti jiwekie'aja ti itimisi pa jikijmayejes.

²⁷ Ti 'nesat'i'nijpe, tanat'iyipi papo i'nio' Sinia' jilis ti initotisk'i wita'm ti ijwijla'm wikie'eyi siupuwa Sinia' iyone, jla'yi ti iyo 'niayija papo i'nio' je Judíojos, ka kia'iwo ka intankiunisi pet pa Sinia'.

²⁸ Pablo jla'yi ja Bernabé 'loj puwa jlomas ti 'wanjlejap papo Sinia' jilis sekyi'i.