Hechos 13 - Sinia' Jlamtis 1994

Ti isimak'iji'n papo Saulo jla'yi pa Bernabé ti yameje'n puwa Sinia' jlamtis

¹ Sinia' jilis ti yiji jlaja Antioquía po' japo Sinia' jijwejlanawos yiji, siu'neje japo inka'neyasajnawos. Japokajimpe japo Bernabé siu'neje ja Simón, siojo tiwonat'iyi'nijpe 'ate “Isiojwats'i”, siu'neje ja Cirene jlele Lucio, jla'yi ja Manaén, (jijniujliejwa pa Herodes ti iyo kia'lisa', siupa iyo anechiyasa'a jlaja Galilea), siu'neje ja Saulo.

² Yit'i'yipe pa jloma, 'yina ti initotk'i'ni wita'm ti ijwilis pa Saka'niona jla'yi ti iyunitis pa Sinia', siu'neje ti ininel'liajanitis, Sinia' jikimet ti 'es iyone'ate japo: —'Wena jotieyi pet its'ioye 'na Bernabé jla'yi 'na Saulo, 'yaka yam ti aki'me ti atajieta ni isijmaye.

³ Jlampa iliyet'iyisijpe japo i'nio' ti ininel'liajaniti'n, jla'yi ti iyoyis t'ajlayeja', inkioye tenajat'ipi ape'e, sekyi'i ti inijwelaja'm japo ti iyoyeyi ka nek'ni.

Bernabé, Saulo jla'yi pa Juan Marcos ijioyis 'niji yi'i japa Chipre

⁴ Sinia' jikimet ti 'es ijliu' 'niji yi'i japa Seleucia. Sekyi'i ti yiyet'iyispe kasejkanaja, ti ijioyis 'niji yi'i japa ajnat jle' iyo'ate Chipre, i'niat lajlik'i tijwajiape'n.

⁵ Ti yiyeyisi siojopa isi' Salamina, sek tajlapits'i'ne ti iyoyis jlamtikie', ti ijwi'il puwa Sinia' jlamtis, ijioyits'i puwa t'ajla'wetis papo Judíojos. Siojo Juan Marcos yamk'i japoka ti iniuyeje.

⁶ Jlampa iyoyeyi'ijyi ka injlasis ti tajlayisia'm japa Salamina, iniuyet'iyispe jikiowik'i japak ajnat siojopa i'niat tijwajiape'n, ti ijioyis 'niji yi'i japa isi' Pafos. Sekyi'i'ne ti i'winis siupa i'nio' je ijiat ka injwejlanik jiwoye, jla'yi ti aye'wu. Paka i'nio' Judea jlele jle' iyo'ate Barjesús.

⁷ Yijap pa Sergio Paulo siupa anechiyas, pak anechiyas wuj ti 'yije'n jlosiki. Takajluniet'iyipi japo Bernabé jla'yi ja Saulo, ti iyo ka impe'ya ka iwo jlamtikie'.

⁸ 'Yina siupa i'nio' aye'wu, (Griego ji'lij pet ti iyo'ate Elimas), je yine'ate pa anechiyas, tomik'i'ni ti iyotaja ka ijiatayiji ka intankiuni pa Sinia'.

⁹ Sekyi'i ja Saulo, jle' 'neje ti iyo'ate Pablo, ti Sinia' jikimet ti 'es tipoyiji, i'yejne'n 'ne pa aye'wu,

¹⁰ ti iyone'ate: —Ijiate wata'a 'na jiwoyi ti wuj ti je 'nes. Ijnoski'la'n ti jiliaki 'napo, jitieye ilia'm ni 'es. ¡Lapakawo ti imosik jlajts'a'm! ¿Yot'iyi'n ti je liyi, ti jiwo ka akajyi'n ni Sinia' ji'niayi ti tijnajyi jla'am?

¹¹ 'Yejne'n, 'nakayi Sinia' jansa'am. Jawo talokie, jantoyi'i ti ja ke a'wejne'n. Ka pajayi wata'a pa Elimas ti ajnatiok yiye ape'e, jlam sek isiesk'i'ni ti iyotajyin'ni paka to'on, sekyi'i ijiate ti iyo talokie pak i'nio'.

¹² Siupa anechiyas ti i'wina ti kia'iyo, ijiatat'iyijpe ti itienkiuni pa Sinia'. Jlam jnots'iniji'ni ti ipi'yaye pak inka'neyasajnaye, ti ijwi'il pa Saka'niona.

Pablo iyo jlamtikie' yi'i japa Antioquía 'neje, siojopa yiji japa Pisidia

¹³ Paj ti yamat'i'nijne ja Pablo siu'neje japo jla'yis, ti tajlayisia'm japa Pafos, ti tejeyis 'niji yi'i japa isi' jle' iyo'ate Perge, ti yiyis kasejkanaja, yiji pet siojopa ajnat Panfilia. 'Yina Juan Marcos ilik'i japo Pablo, sekyi'i yapi 'niji Jerusalenne.

¹⁴ Yamat'iyis'nijne, yiyet'iyispe Antioquíaja siojopa yiji japa ajnat Pisidia. Japaka siojopa jloma ti i'nio 'wanjlijyi'n 'yuyet'iyisipi papo Judíojos ti iyoyis t'ajlayeja', sekyi'i yiyet'iyisimpe paka'a.

¹⁵ Ti itimat'iyisijpe ti yamtijienis puwa Sinia' jlamtis yi'i pa Moisés jika'neyasajnaye. Sekyi'i siupapo i'yena japa 'najla'wet i'yasat'iyipi ka poye paka injwele ape'e pet papo.

¹⁶ Pablo takasitiet'ipi, jikio' yejayi ape'e papo i'nio' ka ink'iuyits'i 'ate, sekyi'i 'esieje'n ti tamti, ti iyo'ate: —Israel jika kia'lis, siu'neje japo je ilijyi ti iyunit pa Sinia', k'iuyek'i'm ti jayamti.

¹⁷ Israel jika kia'lis Jinia' papok tijna'yi pet papo sitiselt'ipi, 'yina paj ti isajayija'm, ti iyo jika kia'lisa', ti yiyits'i japa ajnat ti je 'wetis, japak Egipto. 'Yina Sinia' siupa jijweye ti je jlase', pak itiajla'ne japak ajnat t'ipi.

¹⁸ Sinia' wuj ti inilayiti siupa iniwonisi papo Israel jika kia'lis, ti iyoyisi pa je 'es, 'yina cuarenta puwa najkapis puwa yiji ti yi' pa ajnat laj i'nioye'e.

¹⁹ Ijwienjli sikio' itij'we times tom'niji puwa isi'il yiji japa ajnat Canaán puwa initiajnate'n, yikiajle'ni papo sitiselt'ipi ka iwo ji'weta'.

²⁰ Cuatrocientos cincuenta puwa najkapis puwa yiji ti kia'iyo. “Yam'niji paka sekyi'i ti iyoye jika anechiyasisa' papo, paj ti yiyeyi siojopa yiji pet pa Sinia' jijwejlanik jiwo Samuel.

²¹ Paj ti ti'yasanayisi paka jika anechiyasa' ka Reye, 'yina Sinia' iwijnam'ne pa Saúl, Cis jlas tajla'm papo Benjamín, paj ti cuaréntaja puwa najkapis puwa yiji.

²² 'Nak nojwaja'm puwa jika najkapis yiji ti iyota anechiyasa', ti Sinia' ijialayi pa jijweye ti iyo anechiyasa'. Siupa jikijmaye iyotaja pa Saúl, yikiajle pa David, Isaí jlas ti iyojwa'n anechiyasa'. Paka siupa ti Sinia' iyo'ate ti ijwil'ni, “A'we'en na David, Isaí jlas, wuj ti ts'ajka'a, 'yina ti iyoyi wikie'eyi siuniwa awo ka iyoyi.”

²³ “Ijwienjli'ne siupa jika kia'le pa David paka pa Jesús, siupa Sinia' ijliuyi papo Israel jika kia'lis ka in'maniti'n. 'Yina ka 'wena iwo wata'a siupa iyo jla'am pa Sinia' ti ijwilt'ipi

²⁴ 'Yina ti je 'nesjli'ijyi pa Jesús, Juan iyoyi jika'niyejayi papo i'nio' Israel jika kia'lis, ti iyo'ate, “Woye asosikis ink'iejyisa', jla'yi ka inajienajyi'n.”

²⁵ Siupa Juan ti majleyeyi ka inets'i siupa jlaj, iyoyet'ipi 'ate, “Siunie jikamayeyijk'im'ni 'wenayi, jlam ja ijiatayi jla'am siunie jantomi ijyik'i, nak tiwet'ianaja ka 'yakajli ka niwakataja jisieti t'aka ka liejnits'i.”

²⁶ “I'lijwas ti Abraham jilists'ase'm, siu'neje japo je iliyi ti iyunitis pa Sinia', k'iuyeyi siu'niwa Sinia' jlamtis ti ijwil japa Injwajieti, sa'am ti ijliuts'e.

²⁷ Siupapo i'nio' ji'wet japa Jerusalén, siu'neje papo anechiyasas sekyi'i, je po' japa jlomaye ka intant'ieje pa Saka'niona Jesús, ti Injwajieti. 'Wanjliyi jlomasata ti ipi'yayis siupuwa injwejlanawost'ipi jlamtis ti yiyetaja siojopa jloma i'nio 'wanjlijyi'n, ti yiyis 'wuk kiajwe. 'Yina ti yinayits'i pa jitis pa Jesús, pakayi ti yiyeyi siupa k'ie' siupapo injwejlanawos ti ijwi'il.

²⁸ Je i'winatajas siupa ka ijiatayiji paka jitis iwo, je iyojliyi ti i'yasisiji'n pa Pilato, ti iyo ka inlanis, ti its'iejwatits'i japa cruz.

²⁹ Ijiatjlit'iyijpe ti nojwa'asia'm siupa iyo puwa inamtis siupa ja tiwonaja, jiwekie'aja t'ipi ti tenaja'n pa t'ajwes mases, ti tokiji pa a'no' ti titijik k'iye.

³⁰ 'Yina Sinia' iniujwa'n kisie'e ti tajli pa a'no'.

³¹ 'Loj puwa jlomas ti kia'iyo'ni ti ini'wenkijnam'ni siupapo jla'yis t'ipi ti tajlis Galiléaja, ti ijioyis Jerusalenne. 'Napoka'ne siu'napo ti ijwi'il, ti ijwijla'm papo i'nio'.

^32-33 “'Nak anamaja'a siunie Sinia' jika'niye ti 'es, ti iyo'ate: Sinia' iyonat'iyipi papo sitise'l, ti ijwijla'm, ijiatp'aneje siuti je pete, siunie iyo ti iniujwa'n kisie'e ni jlas Jesús, ti tajli na a'no'. Siunie iyo niwa inamtis ti yi'i na salmo jijwukis timejts'i, ti iyo'ate: “A'am ti yajts'a'm. Siu'niwa jlomas yam ti Anak'i'm.” 'Yina kasts'isisi ti atomajak'i pijia'm.

³⁴ Sinia' pajk'i ta'a ti ijwi'il pa Jesús ti jano kisie'e ti jantajli pa a'no', 'nakayi ti ja ke insotieje pa t'ajwes mases, ti iyo'ate puwa jlamtis t'ipi: “Jayikiaj'lase siuniwa wask'i'nelaja, ijiateje jla'am ti isis, David ajwejla'm.”

³⁵ Siunie jikiecha iyo'ate: “'Yaka'niona, lapakawo ti ja ke e'nate ka insotieje 'niwa t'ajwes 'na akawo ti 'es.”

³⁶ “Ijiate pa David ti iyoyi siupa Sinia' iyone, ti yi' ape'e 'ni ajnat, 'yina ti 'yalat'ipi, t'o' tenajap papo jiniewot mases, insoti puwa t'ajwes t'ipi kajeyepa.

³⁷ Jlam pet siupa i'nio' Sinia' iniujwa'n kisie'e, je kia'iyo ka insotieje puwa t'ajwes t'ipi.

³⁸ It'imina, 'napo i'lijwas, ajwe'lase'm ti Jesús jijweye po' ka inetiajnat niwa inkeyis, 'yina ka lajak'i ti jla'am it'imina ti akajli ti awo yamtikie'ase.

³⁹ Jla'am ti it'imina ti netia'n siunie jitis napoka, siunie Moisés jika'neyasajnaye je 'yijene paka wone ka netiajnat, ajwe'el siunapo je 'yakakiu.

⁴⁰ Joskiyeyi, 'lojwinie'e ka ne'yase siuniwa iyo niwa inamtis, ti iyo'ate:

⁴¹ “'Yejne'n siuti kakiujnietasts'ase'm, je ijiate ka je ine'yase siunie ti jlam ja jnots'inayijits'i'ni ka inojwatie'e. Majleyeyiji ka nejyi ka kia'iyone, 'yina japoye siojona jloma ti kiak jawo ti ja'winki'n siuniwa ja a'tiesiek'iji'n, ti ja 'wanjliyeyi ka poye paka injwe'lase'm, ja ke ak'iuyeyi.”

⁴² Pablo siu'neje japo jla'yis, ti iniuyet'ik'ipe kisie'e ti tajlis kiajwe japa t'ajla'wet papo Judíojos, ijliuyet'iyisijpe ja Pablo, ti iyo'ate: —Apiliemetna'aja, jane'yi japa jlomaye, siuka netiejenie'eje siojopa jloma ti i'nio 'wanjlijyi'n, ti jajwelakiu'ujwe niwaka.

⁴³ Ti pajlatat'ik'ipe kisie'e siupapo i'nio' nak nojwaja'm papo Judíojos, siu'neje pa jike' iyonisi papo Judíojos, yamisk'i ja Pablo siu'neje ja Bernabé. Sekyi'i japo Pablo iyonisi'ne 'ate ti ijliuyisie'ni: —Ká akakiunieyi siunie Sinia' jikap'ijliuskiye ti yi'nase'm. Ni'netie, ataj ká alana'yi ti jiwoyeyi.

⁴⁴ Siojopa inkijmaye tomits'iji ti yiyeyi siojopa jloma ti i'nio 'wanjlijyi'n, ijiatat'iyijpe ti 'loj papo i'nio' 'yuyi japa 'najla'wet ti its'iuyisi puwa Saka'niona jlamtis.

⁴⁵ Siupapo Judíojos ti i'wina papo i'nio' ti 'loj, sekyi'i jiwak yi'ne'ne japo Pablo, kajeyepa ti ijiulsinaja'm papo. Iliakiyis'ne japo Pablo, jla'yi ti tejeyits'i ilia'm siupa ijwi'il.

⁴⁶ Pablo jla'yi ja Bernabé ji'lij 'yitiet'ik'ipe pet, ti iyo'ate ti isiujlisie: —Ajwel'ni je akamak'iji'n ti ajnaye'ase, ajwela'ase'm niwa Sinia' jlamtis ti Judíojosts'ase'm. 'Yina siuti je jikima'yi ilia'm, jijwelaye ka je asama ka askimita' siojona in'wasankiye ti laj jlaja. Siuti janaj'ni ti jatiajla'ase'm, jajioki siunapo i'nio' je Judíojos.

⁴⁷ Lapakawo ti kia'iyo siunie iyo ka iyoki ni Saka'niona, ti jla'am ti iyo'ate: “Awojwa'n jika katesa' napo i'nio' siunapo je Judíojos, ka i'nechia ti ja jijwajietiye'a'm, ti ja akiji napo i'nio' siunapo ji'wet tose.”

⁴⁸ I'nio' siupapo je Judíojos ipi'yayis ti kia'iyo, wuj ti inkase'n. Iyoyet'iyispe 'ate: —¡Wuj wata'a ti 'es 'ni Saka'niona jlamtik! 'Yina siupapo Sinia' ijniejiet'e japa in'wasankiye ti laj jlaja, papok'ne siupapo iyo jlosikis ink'iejyisa'.

⁴⁹ Sinia' jlamtis yajme'n ape'e pak ajnat.

⁵⁰ Siupapo Judíojos inijloyisijin'ni siupapo asejnia, ti anechiyaski'l, siu'neje papo ayijnies ti kia'iyo anechiyasas, siupapo je iliyis'ni kiajwe japa 'najla'wet ti ijioyisi. Ijliuye papoka ka poye paka iwonisi ja Pablo ka ijnotis kisie'e.

⁵¹ Pablo siu'neje ja Bernabé jisieti t'ipa ipiatat'ijyits'ipe, ti 'yakajanit ti jitis je jwajla'a papo i'nio'. Sekyi'i ti yamat'i'nijpe ti ijioyisi siojopa isi' jle' iyo'ate Iconio.

⁵² 'Yina wuj ti jikanitieyi po' jla'yi japa Sinia' jikimet ti 'es tipoyiji papo Sinia' jilis.