Hechos 12 - Sinia' Jlamtis 1994

Santiago tiliana, ti t'otieja pet a'laja'm pa Pedro

¹ Pak siupa jloma ti iyoyeyi pa anechiyas Herodes ti teje'yi ilia'm papo Sinia' jilis, yit'i'yipe pa itiej.

² Iyoyet'iyipi ka ila'an pa Santiago, Juan jikilia, ti sijnat jitiok isiene.

³ Pakat'iyijpe ti Judíojos iyo jiliakijnieyeja' ti jijlinkitis je yijnits'i puwa woyejes, 'yina Herodes i'wi'in ti Judíojos itiliaja siupa iyo ti ilia'an pa Santiago, iyoyet'ipi 'ate: —Jwanayi'i jiat'eje na Pedro ka 'otie a'laja'm.

⁴ Sekyi'i t'otiej'ne a'laja'm, tokis ijniujlits'i papo i'yena, kiajatak'i'ni ti inik'iuyejesi'ni, ijniujlits'i'ni papo its'iuyejesi'ni. Iyotaja ka no isia'm japa inlakijnieye, jiwekie'ejejata ka titiona kisie'e, ka tena jitieyi'i papo i'nio', ka jlam iwonisiji ka ijnotkinisi paka jitis iwo.

⁵ Ijiatjliyi Pedro yi' insat jiweje, tokis i'yena ka je i'no'o, 'yina jlam t'aljlijyi'n papo Sinia' jilis, ti 'yejlanis ja jikiecha.

Sinia' ijwiejete pa Pedro japa insat jiwe ti yitaja

⁶ Japak siojopa ajnaj tomk'iye ti jota ka tena jitieyi'i papo i'nio' ja Pedro, ti jlomaye ti jota ka ti'yasajni. Pedro yi' kiowe'e papo tokis times ti i'yena, ti imia'a. Wikijnies tiilie'nitije jawa jisietis jikioyi kia'iyojliyi. Ijia 'neje papo yiji pa 'wuk kiwet ti i'yena.

⁷ Jlam nesi'liet'iyijpe ti 'yaka pa Saka'niona jijliujwanik poli jlele, jla'al itijwayiji'n kiajwe japa insat jiwe. Siupa injlojwanik poli jlele isiejts'e'ne ja Pedro ti 'yujwat'ni, iyone'ne 'ate: —¡Jlam woni'ni 'ateye, neppijia'm! Ta'a'ne ti iniuk'iji'n puwa wikijnies t'aka'a, ti t'ekijyits'i.

⁸ Sekyi'i pa injlojwanik poli jlele iyone'ne 'ate: —Etia'm ni aka'wak, ekiajlits'i niwa asati. 'Yina Pedro iyoyi'ni siupa tiwonaja, siupa injlojwanik poli jlele iyonat'iyijpe 'ate: —Tate atepe'e ni a'wu', naj, na'm ijyik'i.

⁹ Pedro t'asayik'i'ni pa injlojwanik poli jlele ti iniuyek'i kisie'e. Ka kia'iwo ka jlosikie pa ka ijiatak'i ni'ne ka jeye siupa injlojwanik poli jlele iyoyi, 'wenajliyi ti ijwilta ka ijwejlikie jiwekie'e.

¹⁰ 'Yaka'm ape'e siupapo tokis tome'e siupa 'wuk kiwet inia'an, sekyi'i yiyeyisi'iji siupa tomi ilia'm, kia'iyojliyi tijwayeyisi'ijyi. 'Yina ti yiyeyisi siupa 'wuk kiwet wikinie ti iti 'niji jika'wuyi japa isi', yaka jlamt'e iwopi ti ijwienjli jla'am ti t'ekijia'm pa 'wuk kiwet. Iniuyet'ik'ipe kisie'e, ijwienjli pa jika'wu 'yakamits'i ape'e, ti injlojwanik poli jlele iliyet'ik'ipe, sekyi'i ijwienjliye jla'am ja Pedro ti ya'am.

¹¹ Sekyi'i ja Pedro jiwekie'ejat'ipi ti nojwayi ape'e siupa tiwonaja, sekyi'i iyo'ne 'ate: —Ijiatp'ane ti paka pa Sinia' ti ijliuk'i siojo jijliujwanik poli jlele, jla'yi ti si'manit, siunie Herodes jotawonk'i, siu'neje japo Judíojos jotawonk'i.

¹² Jlampa itijnisieyiji ja Pedro, sekyi'i ijio'ne ji'wete jlaja María, Juan Marcos jlet, sek nojwe'e papo i'nio' ti iyoyis t'ajlayeja'.

¹³ Pedro ipiejam'ni pa 'wuk kiwet ti yiyeyi, siupa tome kisie'e jika'wuyi japa isi'. Siojopa jlosie jle' iyo'ate Rode japak i'ye'n ilia'm, ti itijnistieje ka i'nio' 'wenayeyi pa.

¹⁴ 'Yina siuti ti itiant'ieje puwa jlamtis iyo ja Pedro, t'osiyet'ipi jik'ioyi japa 'wuk ti takajwejlane papo i'nio'. Wuj ti inkaj'ni, jlam'ne ka jla'm iwone 'ate ka 'najlinit k'iye. Yiyi papo ti iyonat'iyijpe 'ate: —¡Pedro siusie yits'e 'wuk kiwit'e!

¹⁵ Tiwonajat'iyijpe 'ate: —¡Atajt'imi je 'es! Je takajla japa Rode, iyoyet'ipi 'ate: —¡Jlam je awo! Iyoyet'iyispe'eje 'ate: —¡Je jla'am, paka jla'am pa injlojwanik poli jlele ti i'yena!

¹⁶ Jlam'ne ja Pedro je iliyi ti ipiejam'ni pa 'wuk kiwet. Paj ti 'yajlinitieyisia'm jiwekie'e pa 'wuk kiwet k'iye, je jlase' pi iyo ti jnots'ijnits'i papo i'nio' ti i'winayis ja Pedro.

¹⁷ Sekyi'i jikiot'ipa yejayiji'nijpe papo, ti ijliuye kank'iuyits'i 'ate, ijwijla'm papo siupa Sinia' iyone. Yine'ne ape'e ti iyo'ate: —Jwelajiamna'a ja Santiago siunie iyo 'na awoyi, siu'neje japo si'lijwas. Yamat'ijyi ti itimayi, ti 'wena ijiojwi.

¹⁸ Ti jlomayet'ipi, je jlase' pa iyo pa jijliak'ali papo tokis ti isitianisiet'ipi, jlam pak iyoyisits'i'ni.

¹⁹ Herodes takajlunie'ne ka tiwokijyin'ni, 'yina siuti je ti'wena, jiwak yikiajla jla'am papo tokis siupapo i'yena siupa ajnaj. Sekyi'i takajlunie'ne ka tilianaja'n papok tokis. Jlam pa yamat'ipi 'niji kiaka, Herodes ijlias Cesaréaja ti taj'le japa Judea.

Ti 'yalat'ipi pa Herodes

²⁰ Herodes wuj ti jiwak yi'ne papo ji'wet japa Tiro, siu'neje papo yiji japa Sidón. Jak je iyoyiji'ni ti inikiujlis ti iyo ka ijnoyisi pa anechiyas. Inip'elisinisi siupa jikawo jle' iyo'ate Blasto, ti kia'iyo anechiyas pet, ti yitieyi'i, ijioyisi ti i'yasisi ka inoyeje. Ti'yasanisi ka inkamajas, kajeyepa siupapo Tiro jlele siu'neje papo Sidón jlele pak 'esisi, jlak tajlijisi'ni japa jika ajnat.

²¹ Ti yiyet'iyipi siojopa yitijni, sekyi'i Herodes 'yuts'ijin'ne puwa ji'wuye, siupuwa tejeye ti tamtiyeta. Sekyi'i yiyet'ijyimpe, sektaj'le'ne ti tamtiyet'ipi.

²² Sekt'ipa tajla'ape papo i'nio' ti tanisi ape'e, ti iyoyits'i 'ate: —¡Je i'nio' ni tamti'ni, 'yiniye ka pakaye pa Sinia'!

²³ 'Yina ti je iyunit siupa ti jlam ijiate jla'am ti Sinia', ta'a'ne siupa Saka'niona jijliujwanik poli jlele ti jiliaye itione, jiwos itiujwkinayi. Sekyi'i 'yal'ne paka.

²⁴ Sinia' jlamtis jlam yamjlijyi'n ape'e pa ajnat, lapakawo ti tikiniejeje'n.

²⁵ Bernabé jla'yi ja Saulo itimisi siupa jikijmaye, tajlis Jerusalenne, ya'asiyis ja Juan Marcos.