Hebreos 9 - Sinia' Jlamtis 1994

Sinia' ji'wuk ti yi' poliyi siu'neje ni ji'wuk yi' pet ajnat'e

¹ Jlampet siupa inia'an ji'lij pa Sinia' pi iyot'iyipi, 'yina po' siupuwa iyot'iyipi pa iniwonisi pet ti siupapo pa'yijis t'ipi je 'esiji kankamits'i ape'e, lapakawo ti jikijmaye kiajwe siojopa ji'wuk t'ipi yi'ne ajnat'e.

² 'Yina japak siojopa 'wuk siojopa 'nejes t'ipi ti wuj ti tenajat'ipi pijia'm. Sekyi'i pet siojopa ji'wetis pet puwa katese'l siu'neje japa tenaja'ni ape'e puwa woyejes ti titiejietaja pet pa Sinia' ti wuj ti t'otata, siojopa ti tome kisie'e ti jle' iyo'ate “'Wuk jitiowe ti t'otata”.

³ 'Yina jlampet siupa jitiowe 'neje ti tojmi 'wechaja paka lotakinie ti tip'onaja ilia'm, japaka pet siojopa ti ijiatt'iyijpe ti Sinia' ji'wuk ti 'ejts'i ti t'otata.

⁴ Sekyi'i'ne pet siojopa ji'wet pet siupuwa ti tiwuniejata ti jini inkajk'i, wikinie maja ti 'najli, siu'neje japak a'la' t'aj siojopa ti 'yakajanitk'i siupa iyot'iyipi pa Sinia' ji'lij ti itijwk'i siupa wikinie maja ti 'najli pi k'ie' ti tena'a, 'yina sek tena'a siojopa inat jiwe ti kia'iyo wikinie maja ti 'najli japak tenaja pet siojopa maná, siu'neje pa Aarón jik'iu'u siupa ti taljijnits'i'nijpe puwa jitiajlas, siu'neje puwa sisajas times ti Sinia' yint'i'yipe puwa jlamtis ti ip'isi'n ti iwijna'm pa Moisés.

⁵ 'Yina times siupuwa i'nio 'yotate yi' ape'e japak a'la' t'aj ti jijwesis po', puwaka ti 'yakajanit pet siunie ti Sinia' yijap papo jika kia'lis. Jijwesis itij'w ape'e pa a'la' t'aj jip'ot, paka pet pa jle' iyo'ate ‘Sinia' jikap'ijliuskiye 'wet’. Ajwel'ni 'nakayi jaliki kiu' wek 'nijiye ti jota ka ijwila; je ijiatena'a, 'etsaka.

⁶ 'Yina kiak iyoyi siuti tilisanak'i puwa ji'wetis puwaka, jak je iyoyiji siupapo pa'yijis t'ipi sek 'yuyits'i'ni yi'i siupa inia'an jitiowe ti isimatak'iji'n.

⁷ Jlampet siojopa tome jik'ioyi, pakata jla'm pa pa'yijis jika anechiyas wuj ti 'alk'iye ti sek 'yu'yi'ni ti iyoyi pi jikijmaye, siuti yik'i pa najkap ijwienjliyiji'ni jiwekie'e ti 'yu kiajwe. Jak je iyoyiji ti 'yuyeta paka'a, siupa pa'yijis jika anechiyas wuj, siupa ji'woyis puwaka ti tilianaja'ni ti takat'ini ape'e siupuwa ti jla'am ti jikeyis, jikeyis 'neje papo i'nio' siupuwa ti jitiej je wujk'iji'n ka 'nakaja ti iyoyi.

⁸ 'Yina kiaka'ne pet, siojopa Sinia' jikimet ti 'es, ti 'yiniye ka iwoyi ji'niayija' ti 'yakajanitk'i sik'ioye ti siojopa Sinia' ji'wuk siupa jitiowe inia'ne je tilikjli'ijyi ti tikijmanaja'n 'yina jlampet siupa ti ijiatt'iyijpe ti t'otata je 'aljli'ijyi k'iye paka 'noyi.

⁹ Wikie'eyi niwaka kas'wenkina pet siunie iyo 'ni jloma awaki. 'Yina ti siuniwa i'nio' ti iyoyi 'wajietayi pa Sinia', siu'neje niwa wask'i'nelaja t'ipi ti tilianaja'n ape'e niwa inkeyis, 'yina je ikajle'n pet ka inlesajne'n siuniwa jlosikis napo i'nio', siunapo ti jlonitieye kiak iyone ti yi'ne.

¹⁰ 'Yina niwakata jla'am siuniwa wask'i'nelaja titiuwa, siu'neje niwa ti ti'yakits'i, siu'neje niwa jikeyis napo i'nio' ti ijwil ka ini'notatisiji ti inileje'n. Niwaka ni siuniwa iniwonisi ti ti'wena ti yi' kisie'e ti 'yaka ti laja japoye paj ka neyeyinie'e siojona jloma ti Sinia' janwojwa'n ink'iejyisa' niwa wask'i'nelaja.

Siuti Sijwajieti tisa'ni ki ji'woyis pakayi ti kasjwajiete'n ti jajiok'i'ni

¹¹ Sijwajieti pajk'i ti 'nests'e, 'yina jla'am ti pa'yijis jika anechiyas wuj, namets'e siuniwa ti ijiate ti kasts'esi ti yisajap. Siunie ti iyo pa'yija', siojona Sinia' ji'wuk ni yi'i ti isijme'n i'nio' je lisanki, 'yina wuj ti 'es 'yaka'm ape'e siojona Sinia' ji'wuk yi'ne ajnat'e.

¹² Sijwajieti pajk'i ti i'yaka'n kiajwe siojona Sinia' ji'wuk jitiowe ti t'otata siojona yi' poliyi, ijwienjliyiji jiwek pakatajak'i. Je ka nakaye ji'woyis siuniwa sontas, ni'ne ka janakaye wakia pi ji'woyis, ka nekiajle pi Sinia'. 'Yina 'wenajliyi jla'am siunie ji'woyis ti yikiajle, sekyi'i i'yakan'ne sik'ioye siojona sijwajieti ti laj jlaja.

¹³ Ijiate ti siunie ji'woyis niwa wakiajas, siu'neje niwa sontas, siu'neje ni wakia 'woma ti tiwunie ni siunie jilio', ti siunie pa'yi isia'ye ape'e napo i'nio' ti t'ojlijyi'n jitieyi'i ni Sinia', ti jijweye po' ka netiajnat siunie jit'iojli ni i'nio', 'yina najata wek jlam siunie tome kisie'e ti 'yakajle'n.

¹⁴ 'Yina jlampet siunie Sijwajieti ji'woyis ti kia'iyo ti tisa'ni jla'm ijiatayi jla'am ti 'yaka'm ape'e niwaka ni jijweye iyo. 'Yina Sijwajieti siunie t'oniye ti 'es po'o siunie ti jla'am ti ininekiajle pi Sinia', ka lajak'i pet ki iyo janaka Sinia' jikimet ti 'es, ti je paj ka netia'n. Siunie Sijwajieti ji'woyis kia'iyo initiajnat sik'ioye siuniwa sitienkiujnieyejes ti je isis siu'neje ti ijialts'e siuniwa je isis ti kastone jana ts'ajlati ti ja kasnetia'n. Sek jane'yi ka 'yakajlajanie'e ka iniukieje naka Sinia' ti je paj ka inetia'n.

¹⁵ Ijiatjliyi Sijwajieti Jesús nak iniwojwa'n jiwoye siuniwa jlamtis ti iliyi ti je iliakiyik'i wek siunie jawo ti janwats'ilati siunie pajk'i, 'yina ja ink'ieye siunie jawoyi. Jak je iyoyiji siuti 'yala pi Sijwajieti pakayi'ne ti jitiej je yini'ni 'ate siupa jitis iyo siupapo i'nio', ti siupuwa jlamtis t'ipi inia'an jitis yi'ne. Sekyi'i'ne pet siunapo Sinia' tanats'i yiye jikiojyi siuniwa isis tajle ni jikap'ijliuskiye ni Sinia', ti pajk'i ti ijwijla'm ta'a, ti laj jlaja.

¹⁶ Kajeyepa siunie ji'lij iliyi, siuti je ti'wena ka ijiatayi ka'na'al, siunie ji'lij ti iliyi, laj lajaye.

¹⁷ Siunie ti iyo jijweyeja' pi ji'lij ti iliyi ni i'nio', naka pet ti iliyetaja 'na ajnat.

¹⁸ Jak je iyoyiji pet siupuwa Sinia' jlamtis ti inia'an, puwaka pet siupuwa wask'i'nelaja tilianat'ijyin'nijpe siupa ji'woyis pak iyo jijweyeja'.

¹⁹ Siupa Moisés t'ipi kia'iyo itimataja ti itijwa ape'e ti ijwile ape'e papo i'nio' wikie'eyi niwak Sinia' jlamtis. Sekyi'i isimayi siunie jik'as janak a'la' ti jle' iyo'ate hisopo, ti jini inkajk'i, sekyi'i ti ilie'nitieyi'i siupa sonta 'wole isiat. 'Yina 'yutieja'm siupa wakia 'woyis ti tijlijnataja pa sonta 'woyis siu'neje ti i'niat tijlijnataja. Jak je iyoyiji siupa ti isia'ni yi' ape'e pak Sinia' jlamtis ji'wet, 'yina ti ts'iatitieja ape'e 'neje papo i'nio'.

²⁰ Sekyi'i ti iyo'ne 'ate, “Siu'nie 'woyis 'nak 'yakajanitk'i ti ijiate siuniwa iyo niwa Sinia' jlamtis ni iyo'nase.”

²¹ Sekyi'i ti Moisés 'woyis its'iatitieyi'iji ape'e japak siojopa Sinia' ji'wuk ti 'nejes, siu'neje puwa jikijmatis japak 'wuk ti t'otata.

²² Siuka 'yena siunie inka'neyasajnaye 'yina a'wena ti ijliena ka ijiatayiji ka pajlata niwak wask'i'nelaja ti ijwienjli jla'am nak 'woyis ti initiajnat ni t'ojli, sekyi'i ti 'esie pet jitieyi'i pa Sinia'. 'Yina tiwet'ianaja kapoye pa inke' ka netia'n siuti je tisiaye ape'e nak 'woyis.

Siuti Sijwajieti ti 'ya'al naka ti initiajnat ni jike' ni i'nio'

²³ Siuniwa ajwel'ni niwaka siuniwa ti jipelis jiwek siuniwa wask'i'nelaja yi' poliyi, 'yina niwaka'ne siuniwa ti tikienaja nak 'woyis siuniwa tilianajan'ni ti tinitiajnata. 'Yina niwak siuniwa ti jipelis niwak yi' ajnat'e siuniwa jlameje ti yi' poliyi isitia'n pet siunie ti ja tiliana, siunie ti ja tikienaja ka inka'm ape'e niwaka ka laja poye.

²⁴ Kajeyepa ti Sijwajieti je nak siunie i'nio' jilisanik ti siunie jipe'el jiwek ni Sinia' ji'wet ka'noyi. 'Yina tijnats'iyi ti 'yuyi ni poli, siuniwa jlomas ti yi' jitieyi'i ni Sinia' jla'am ti t'ajli'ni pet siuniwa iyo niwa asetiana.

²⁵ Je yikiajle'e'ni ka kiajatajak'i'ni niwa najkapis ka'noyi'ni ni siunie Sinia' ji'wet, siunie ti ijiate ti t'otata, ka iniwen'ni, ka wo'ate siunie iniwone naka pa'yijis jika anechiyas ti wuj ti yiyi japa najkap 'yuyi'ni ti yikial'ni pak ji'woyis siupuwa tilianajan'ni.

²⁶ Siut'itie ka kiak iwo pa Sijwajieti je pinitiejeje ka'nal'ni, ka intajlap'e siupa ti 'nelanjie'aja poye 'niwa wask'i'nelaja. 'Yina jeyi kat'aja ka kiak iwo. 'Wenajliyi siunie iyo, siuti awak 'niji jlaja niwa jlomas Sijwajieti ijwienjliyik'i jiwek pakatajaje ti 'yakaj ti 'nesa, ti iyo ka inetiajnat niwa jikeyis napo i'nio', pakayi ti jlam jla'am ti iniwe'en ti inila'n ape'e.

²⁷ Iyoye'ate napo i'nio' siunie jawoyi ti janjwanjliyik'i jiwek ti ja'najle'n pakatajaje, 'yina ts'ijiye ka ijnejlak'ina'a siunie jawo pet ni Sinia' ti jan'ye'en ni siunie iyoyi.

²⁸ Sijwajieti kiak iyoyi, ijwienjliyiji wek ti ininekial ti ijioyi ni jiliaye iyo ti 'ya'al ape'e niwa jikeyis napo ti itijlia. 'Yina janekiajle'eje ti ja'nes, 'yina ja ke niwakaye'ne niwaka inkeyis ka na'm ape'e, 'wenajliyijna'a jla'am ti janame siunapo inijijwijyi'n k'iye ti jla'am ti janjwajiete'n.