Hebreos 8 - Sinia' Jlamtis 1994

Jesús jla'am ti Sinia' iyoyi ji'niayija' niwa jlamtis ti iliyi ti jlama ja ke iwo siunie iyo kawo ti janwats'ilati siunie iyo ni pajk'i

¹ Siunie ti ijiate ti laja po', siu'nie ajwela'ni naka ni siunie ti awo 'neje 'ate: Ti po' siunie saka pa'yijis jika anechiyas wuj ni siunie i'nio' ajwel'ni. Jla'am ti yiji'n ts'iji jijweyeje yi'i pi Sinia' ti lajk'ipa ka ijnojliji poliyi.

² Yine kiajwe siojona Sinia' ji'wuk ti 'es ti isijme'n, siojona ti ijiate jla'am ti jilisanki, 'yina i'nio' je lisanki.

³ Siunie tiwonaja pa'yijis jika anechiyas wujwa', jiwo pet siuniwa tiwoki 'wajietayi pa Sinia' ti tajle napo i'nio', siu'neje niwa wask'i'nelaja siuniwa tilianaja'n ape'e niwa inkeyis jiwo 'neje. It'imina pet ni Jesús ti je 'esiji ka lajak'iyi pet paka inekiajle pi Sinia'.

⁴ Kawo'ate iyo ti yi'ne ajnat'e, ka kia'iwotaja ka ji'wet poye ka inkijme'n pet ti jla'am ti pa'yi pet. Awo kajeyepa ti po' siunapo pa'yijis ti napoka ti yikiajle'ni ni Sinia' siuniwa ti tiwoki ji'wajietayi, iyo nak Moisés jika'neyasajnaye siunie ka tiwoki.

⁵ Napoka siunapo pa'yijis jika anechiyasas wus jikijmaye iyo ti isimk'iji'n je niwaka siuniwa jlameje. 'Yina jipelis 'nejie'e jiwek niwaka siuniwa yi' poliyi. Siunie it'imina ti kasts'ajane pi awonaja ti jipelis 'nejie'e wek, pakayi jla'am ti Moisés ijyijlitayi ti ilisantaja japak Sinia' ji'wuk ti 'es ti tiwonaja 'ate, “Ataj ena 'ate, 'esiji ka 'wena je awone siu'nie a'wenki'na'm, ti ajloye'a'm ka jewitanik'i ts'iji yi'i jlaja tikijnaki.”

⁶ 'Yina, 'nakayi ni siunie saka pa'yijis jika anechiyas wuj, ajwel ni Jesús, siunie jikijmaye Sinia' iwijna'm jla'm ijiate ti 'esi, laja po'. Kajeyepa ti ji'wet ijwienkiteje napo i'nio' ni Sinia', siu'neje ti iniwojwa'n jiwoye pet siunie Sinia' ji'lij ti iliyi ti ijiatk'i siunie jawoyi ti iwiets'ilati siunie iyo ti pajk'i. 'Yina siunie iyo kiwa jlamtis wuj ti laja po', kajeyepa ti iyo ka kasts'isisi pet siuniwa ijwilts'e'm.

⁷ Siupa Sinia' ji'lij inia'an jlamt'itiepe ka ilesajne'n ni i'nio' jla'am kiak je iyotaja'ni ka poye paka ink'ieye.

⁸ Jak je iyoyi'ni Sinia' i'win'ne napo i'nio' ti je iyoyi paka'ne ti itiajlata, sekyi'i ti iyonayi 'ate: “Jana'm ni siuniwa jlomas ti jawiets'ilati siunie i'lij, 'nakayi ti jank'ieye siunie jayoyi, ni jayone napoka Israel jika kia'lis siu'neje napo Judá jika kia'lis.

⁹ 'Yina ja ke iwo'ate siunie awone kiapo jika kijilas mases ti akijmi kio'yi ti atajlaja'm jana Egipto ti aki'ni. 'Yina ti je its'iuyisk'i'm ki iyo kiwa yamtis. Jak je iyoyijipi ka je iliyi'ni,” iyo ni Saka'niona.

¹⁰ “Jlampa je k'iejeyeyik'i'ni kiwak jlomas, 'yina siuniwa jlomas atayeje siunie jayone napoka Israel jika kia'lis ti i'lij jaliyijap, 'naka siu'nie: Jayijnits'i niwa jitienkiujnieyejes siuniwa 'yaka'neyasajnayejes, sekjane'yi ka ip'isinajats'ina'a niwa jikiojwa'l. 'Yina jayama ti ja Jiniayeyisk'i'm jlampet ti jlamis janapokaye ti ja ika kia'lisa' pet.

¹¹ Ja lajak'i pa ka wo'ate ka injwejla'm pa ji'wetijwa ni'ne ka ji'niayi injwanjliyi ka 'neyasa'n: 'Esiji ka intant'ieje ni Saka'niona. Lapakawo ti japajlata ti jantant'iejesk'i, siunie ti lajk'iyi paka woyi ti je 'yije'en jantant'iek'i, siunie ti jwajla'a iyo'ni ti jle' po' kiak iyojliyi 'neje.

¹² 'Yina janitiajnat k'iye siunie jitis iyo ti atajlata niwak jikeyis, je pajna'a ka itiej yini'ni 'ate siunie iyoyisi.”

¹³ Siuti Sinia' iyo'ate, “Jawiets'ilati siunie paj ti awoyi, 'yina ja ink'ieye siunie jayoyi”, ijiat ti 'yakajanit k'iye ti ijwil ti iyo ji'yusieja' siukia ti inia'an ji'lij iyone ti iliyi. Siunie ti ijiate ti paj iyo ji'yusieja', 'yina nak je toj'we pet siunie ti janetia'n.