Hebreos 5 - Sinia' Jlamtis 1994

¹ Siunie pa'yijis jika anechiyas wuj tajla'm napo i'nio' ti tikimajata'a, sekyi'i tijniejieta'a'ne ka noyeje napo i'nio', ti ijwile ni Sinia' siupa iyo napo i'nio'. Iniwojwa'n jiwoye siunie tiwoki ji'wajieta' ni Sinia', siu'neje puwa tilianat'ijyin'nijpe ti takat'ini ape'e puwa jikeyis papo i'nio'.

² Siuti kia'iyo pit ti jitiej 'wanjle'e ni jijliak'ali napo i'nio', 'yina je t'ayiji'n siunie jawone siunapo ti lajk'iyi pa ka iwo ti je 'yijejne'n, siu'neje napo ti netiajne'n, ti wuj ti jikap'ijliuskiye yi'ne.

³ 'Yina siuti kia'iyo pit ti iyoyi ni jike', nak it'imina pet ti jankime japa k'iejliyeyi ti janla'an ape'e puwa jikeyis, iyone ti iyu'ni ape'e niwa jikeyis napo i'nio'.

⁴ Je ti'wena paka ka jlama jiwek jla'am ka kiak iniwone iyo ni pa'yijis jika anechiyas wuj, 'yina ijiatjliyi jla'am pi Sinia' ti tane ka kiak iwo, nakaye ti yikiajle siunie ti iyo anechiyasa', iyot'iyipi pa Aarón t'ipi.

⁵ 'Yina Sijwajieti kiak iyo je jla'am ka jlama ka kiak iniwone, ti iyo pa'yijis jika anechiyas wujwa', Sinia' jla'am ti yikiajle ka kiak iwo. Iyone 'ate ti ijwijla'm: “A'm ti yajts'a'm, siu'niwa jlomas 'yaka ti Anak'i'm.”

⁶ 'Yina iyo 'neje 'ate ti ijwijla'm ti yiji niwa ijia inamtis: “Ja ke paja ka 'ekiye ti a'am ti pa'yijis jika anechiyasts'a'm, jiwo 'ate iyot'iyipi pak Melquisedec t'ipi.”

⁷ Ti Sijwajieti yi'i 'ni ajnat ti iyo t'ajlayeja', 'yakets'ijiap siu'neje ti jitiett'e' itiojnate'n ti inip'elisine pa Jinia' ti jla'am ti jijweye po', ka injwajiete siupa jiliaye. 'Yina siuti Jinia' i'wi'in ti inijlasat isia'm sekyi'i it'imina ti its'iuyi ni t'ajlaye.

⁸ Sijwajieti siuti kia'iyo ti inikayankine ni jijliak'ali, 'yina sek taj'le ni siunie ti 'yijene pi iyone ti iyoyi siunie ti its'iuye pa Jinia', jlam'ne nakayeta Sinia' jlas.

⁹ Jak je iyoyiji siuti yiyek'iyi siunie iyo ti lajak'i pa ka inetia'n, 'yina nak 'esieyi pet wikie'eyi napo i'nio', ti iyoyi ji'niayija' ti ijioyi ni jijwajieti ti laj jlaja, siunapo ti iyoyi niwa jlamtis.

¹⁰ 'Yina Sinia' iyone 'ate, “A'm ti pa'yijis jika anechiyas wuj'wa'm, jiwo'ate iyot'iyipi pak Melquisedec t'ipi.”

Jiwet'ia jawoyi siupa ti iliyi ni jitienkiujnieye ti 'es

¹¹ Je ajlan'ni siunie awotaja ka ijwi'lase'm, je 'wena pa ka ijwi'il niwaka siuniwa ajwel'ni, 'wanjlit'itieje ka ijialas ka 'najanayi. 'Yina je jitijnisiek'i siunie ijio'we, kajeyepa ti int'onie' ti i'neyasanatajyi'n je ta'a ka intant'iejats'iji'n.

¹² Jentat'itie pet ka apilie'yi napo as'lejwas ka 'eyasanajyi'n kajeyepa ti impajayi niwa Sinia' jlamtis. 'Nakayi kat'ajayi ti jlam yamjli'yi isia'm siunie jiwoyeyi ti jiwoyetaja ka tekiajlaja'a'ni ask'ioye ka tijwela'ase'm kiu'ujwe siuniwa je istieyijits'i Sinia' jlamtis. 'Yina jiwoye 'ate iyo siunapo kia'lis ti sajmela'aja'n ti nakata jla'am pet siunie jlet jikat'ios ti yapijyi'n, 'yina siunie asak ti kiojieti naka ti je jlapajyi'n k'iye.

¹³ Siunie kia'le ti je iliyi ti itipis je 'yijen jlosiki, kajeyepa ti kia'le.

¹⁴ Jlampet siunapo jlak kiojieti napoka pet siunapo isijlijyi'n, 'yijen jlosikisi siu'neje ti 'yakayane siuniwa wask'i'nelaja ti i'ye'en, 'yina itiant'ieje siunie 'es siu'neje ni je 'es.