Hebreos 12 - Sinia' Jlamtis 1994

Sitiej ja'yitie'e pi Jesús

¹ Jak je iyoyiji siuti 'yiniye ka iwiek jikiowe'e napoka i'nio' t'ipi ti 'loj ti inikajaniti siunie jitienkiujnieye ti 'es ti je 'yakakiu pa Sinia', 'esiji ka ijiutie kiu wat ts'ijiye siuniwa wask'i'nelaja kast'ajaniti'n, siu'neje ni sake' ti akapajlaja'ni. 'Esiji ka je inilakik siunie awoki ti 'osiye'ni ni atayeje.

² 'Esiji ka sitiej 'yitie'e ni Jesús, 'yina ti jla'am ti atajlajaja siunie ti je akakiunie, 'yina ti jla'am 'neje ti ijniujliet wita'm janaka. Jesús wuj ti inilayiti siupa jiwet'ia ti tena'a japa cruz, je nesi'lieyi ka inojwat jiwa'm siupa jikalakijnieye papo i'nio', lapakawo ti je int'ayiji'n siunie jawo ti janek'iyi ni jiwet'ia iyo jank'iuyeja'ana'a pet siunie jinikanitieyeja'. 'Nakayi yiji'n 'niji jijweye pa Sinia' siupa ji'wet ti anechiyas.

³ Jak je iyoyiji ti ja atankiunie'ni ti astaj ja enaye 'ate siupa Jesús iyot'iyipi, ti wuj ti inilayiti siupa jiwak siupapo i'nio' iyoyi ni jike' yi'ne. 'Yina je 'es kanik'ijlianatajyi'n ni'ne ka astaj je insisiek'i'ni.

⁴ Ijiate ti jlak'aliyeyi siunie je 'es, 'yina i'wasanajyi'n, je in'wenayejli'ijyi ka insa'n na as'woyis.

Saka'neyasajnaye tajle pa Sinia'

⁵ ¿Ta'a t'e ti inkiwaliyeyi'i siuniwa Sinia' jlamtis t'ipi ti ijwi'lase'm ti iyotaja ka insisieyi, ti asa'am ti jilists'ase'm? Yi'i ni ji'wet ti iyo'ate: “'Ni yas, ká awo alakikie siunie iyo ni Saka'niona ti ijliutie'am'ni, ká eni'ni jiwek ilia'm siuti kia'iyo ti iyo ajosikie'.

⁶ Lapakawo ti siunie ti ijiate ti 'namaja, nak iyoye'eje jlosikie', 'yina siunie ti iyoyi jlasa', nak je tasa'ne pet ti isie'e.”

⁷ Layitie'yi ilia'm siunie iyo'nase ni Sinia' ti iyo asosikie', 'yina je iyo'ate ka je nakaye ti jilists'ase'm. ¿Ent'a po' pa kia'le ti jinia' je ijliuyeje? ¡Ajwel'ni lajk'ipa!

⁸ Jlampet siuti Sinia' ja ke iwone 'ate siunapo jilis ti jlomas ti ijliuye, ka je injlo'wase'm, 'yina nak iyo pet 'ate ti je ijiat ka jilisa'ase'm, jiwoyeyi wek asnaye.

⁹ 'Yejne'n, astaj enayi 'ate siu'nie: siuti awok kia'lisa', siunapo siniewot ti awak'ne ajnat'e ijliuts'e'm, 'yina ak'iukie. 'Yina awo'ate, ¿yot'iyi'ni ka je its'iukie ni Sinia' poli jlele naka ti sosik atajlaja, ti nakaye ti si'wasankiye jatiajlajaja?

¹⁰ Ijwi'il kanwonts'e napo siniewot ti awak'i siu'nie ajnat ti ji'niayi je itioyi'i, ti ijliuts'e'm ka iyoki ka je ijliena siunie sosik ti 'es. 'Yina jla'm ijiatataja wek jla'am ni Sinia' ti ijliutiets'em'ni, 'yina ti iyota ka je 'wenayi papoka 'esieyi siunie 'es, siu'neje ti iyotaja ka kasts'isis iyo ti jlam ti 'es.

¹¹ Siunie i'nio' ti kia'iyo ti tiwok jlosikie' ijiatataja wek ti jitienkiujnieye je ilisank'i ti 'nelanjie'e, kajeyepa ti pansak'i siunie iyoyi ti tijwelaja'm. 'Yina jlamk'e'm ti tijwajyi, sekyi'i wuj ti 'esi lapakawo ti iniuyeje, sekyi'i ti 'yakamaja ni i'nio'.

Jiwet'ia je tojwi siunie je isi'm ilia'm ni Sinia' iyo

¹² Jak je iyoyiji ti awo'ate, ¡siuniwa askioye ti 'yajlits'i siu'neje niwa askosjlete'l ti je t'onk'iji'n, jejlitayi ka 'etiets'iji'n! ¡Woye kiu'ujwe jijweyeja'!

¹³ Noyets'i siunie 'nayi ti tijnajyi, 'nakayi ti siuti janok'i siunie iyo'ate ni jisiet je 'es, ja 'esieyi ka nok'i, kajeyepa ti jajnajyi'ne pi jisiet ti soyojia'm.

¹⁴ Jalasajyi'n pet k'iye ka akamaja jikiowe'e napo i'nio', 'yina janiukk'i siunie ji'niayi iyo pit siunie ti ini'notatiji, kajeyepa ti siunie ja ke inilesaniji ja ke i'we'en ni Saka'niona.

¹⁵ Ni'notatayiji 'nakayi ti ja lajak'ipa ka inleyi siunie jikap'ijliuskiye ti Sinia' pajk'i ti iwijna'm. 'Yina jawoyena'a 'ate siojona a'la' ti jijwetisi'l pa'a, sekyi'i ikajyi'n niwa ijia siu'neje ti iliajne'n.

¹⁶ Je 'es ka poye paka iwoyi siunie ti 'yu'ni ti je inilesanijiyi, siu'neje ka poye paka inlaki siunie t'otata, iyojinipi pa Esaú ti 'yuti pa ji'yini penik siupa tijna'yi ti jla'am ti isijli.

¹⁷ 'Yina je int'ayeyiji'n ni iyot'iyipi jlampa itimat'iyijpe, sekyi'i ti yiyet'iyipi japa jloma ti iyotaja ka inenta'a jlajap siupa jinia' jantajle, 'yina je ti'yena'ne ilia'm, lapakawo ti 'wena siupa its'iuye'e. 'Wanjliyi yapata'ni ti laj lajaye, lapakawo ti ijlie'en, 'yina je 'yijene paka wone ka iwats'ilati kajeyepa ti wakal, je 'es ka titiajlina.

¹⁸ Siuti asa'am je woye'yi 'ate siupapo Israel jika kia'lis, ti ijiateje ti 'yaka siupa ti nojwist'iyisipe ts'e yi'i japa tikijnaki jle' iyo'ate Sinaí. Siupa iyo ti 'yakaje pi jwat ti tak'ayi'ni ape'e, siu'neje ti talt'iyi'nijpe pa ajnaj; siu'neje pa ajnatiok, siu'neje pa pejlatiok ti jlajwu ijlinik'i;

¹⁹ siu'neje ka pe'yayeyi siojopa 'woso' ti tilienajata, paka'ne je jla'am siupa jla'lap iyo pa Sinia'. Jak je iyoyiji siupapo ti ipi'yayisi pa ina'lap 'yina inip'elisijnen'ni'ne, sekyi'i ti'yasanisi ka inleyi siupa ina'lap ti ijliuyi'ni.

²⁰ Lapakawo ti ijiat ti je ijwiyisk'i siupuwa inamtis ti iyo'ate ti pesieje, “Siupa ti japoye ni jant'ajts'e nak ajnat yi'i janak tikijnaki, 'wanjliyi ka niwaka pini', sisajas tikienajayipe ti ja tiliana, ni'ne ka janakaye k'ok ti ja tikienaja.”

²¹ Ijiatt'iyijpe wat ti jwesie siupa iyo ti i'wi'in papo i'nio', ikajlieteje pa Moisés t'ipi ti kia'iyo ti iyo'ate, “Sikititiyeyi'ni ti je sijwe'.”

²² 'Yina jlampet ti asa'am 'wenayi pet ni siunie jiniojwayiji, janaka pet siojona Sión ti kia'iyo tikijnaki ti jiniojwayiji, siu'neje jana isi' Sinia' ti je paj ka netia'n ji'wet pet, siojona Jerusalén ti yi' poliyi. Siu'neje ti jiniojwayiji siojopo injlojwajnas poli jlele ti je pini' ti iyunitie pi Sinia'

²³ siu'neje napo Sinia' jilis ti iniajnat ti kia'iyo ti nojwisiji, ti t'etaja'ak'i niwa jleyis ts'iji poliyi; siu'neje ni yi'i jla'am pi Sinia' ti jla'am ti i'ye'en napo siupi iyo; siu'neje ti jiniojwayiji napoka i'nio' ti isis ti yin wita'm siunie 'es ti iyoyi.

²⁴ Siu'neje ti jiniojwayiji pa Jesús jla'am ti iniwojwa'n jiwoye siuniwa iyo pa Sinia', ti iwiets'ilati siunie pajk'i ti iyoyi 'yina ink'ie'ne siu'nie 'nakayi. 'Yina naka ti iliji niwa sit'iojli, jitieyi'i pa Sinia', siunie ji'woyis. 'Yina siunie ji'woyis jla'm ijiate ti 'es siunie iyo saka'niyejats'i, 'yaka'm ape'e siunie ji'woyis t'ipi pa Abel, siunie tajle.

²⁵ 'Yina jak je iyoyiji ti awo'ate, joskiyeyi. Kima'yi ilia'm siunie ti po' ni ijwi'il niwaka. Siupapo i'nio' t'ipi ti je iyoyis lajaye siupa jla'lap pa Sinia' ti to'm ape'e japak tikijnaki t'ipi Sinaí, jiwet'ia po' papok i'nio' t'ipi. 'Yina sajma ijiatayiji siupa ja siwet'ia jawo siuti kiak jayoki ja ke iyok lajaye siunie jla'lap pi tamti ti tom poliyi.

²⁶ Puwak siupuwa jlomas ti Sinia' jla'lap i'wisinayi'ni pi ajnat t'ipi. 'Yina 'nakayi Sinia' iyo, “Jajwanjliyik'i kiu'ujwe ti kiak jayone, ja ke najataja ni ajnat ti kiak awone, 'yina siunie poli kiak jayoni'ijyi ti ja'wisi'n.”

²⁷ Siunie ti iyo'ate pi Sinia', “Jajwanjliyik'i kiu'ujwe ti kiak jayone”, siunie ijio'we ti naka ti Sinia' jan'wesijnits'i siuniwa jilisajna', sek jane'yi ti jantatek'i isia'm. 'Yina jlampet siuniwa ti je yits'e japaka jlomaye ka ti'wesinajats'i, 'yina ti t'o'nik'i niwaka ti ja ke titiajlana.

²⁸ Awo'ate, siunie Sinia' iwints'e'm ni jika anechijiayas nak je paj pet ka'wesi. Ijiatayijia'm pa Sinia', 'yina 'yu'we ka kiak iyonaja siunie iyo ka tiwonaja, ti ja ijiunitie siu'neje ti ja ke kasjweye.

²⁹ Lapakawo ti siunie Sinia' nak iyo'ate siunie jwat, ti je inia'yi wikie'eyi siuniwa wask'i'nelaja ti jwat t'otieja'm.