Hebreos 10 - Sinia' Jlamtis 1994

¹ Kajeyepa ni siunie Moisés jika'neyasajnaye jipe'el jiwek siupuwa wask'i'nelaja'n isis ti janam'ni, je niwaka ni siuniwa ti jlameje. 'Yina naka'ne ti it'imina ti je 'yakajle'n ka'notate'n siunapo i'nio' ti kiajatak'i'ni niwa najkapis ti kiak iniwonisi'ni ti ijioyi pi Sinia', ti yamisi'ni puwa k'iejliyi ti iliajne'n ape'e puwa jikeyis iyo.

² Siut'itie ka kia'iwo ka inkajle'n ka inetiajnat niwa jloski'layis ka injwanjliyik'i wek ka pakatajaje ka sek ineyi ka 'najanataja paka inwone ti nojwi pi jitis iyoyi, ka sek ine'yi ka ileyetaja ka ilajne'ni puwa k'iejliyi ka inkat'i'n ape'e puwa inkeyis.

³ 'Yina siupuwa ti iwinis'ni jitipe'e ti ilianisin'ni, iniuyeje pet ti yiyetaja ni najkap jitiej iyunitisiek'i puwa jikeyis iyot'iyi papo i'nio'.

⁴ 'Yaka siunie ji'woyis niwaka sontas, siu'neje niwa wakiajas, je 'yakal ka ijnale ni jike' napo i'nio'.

⁵ 'Yina kiakak'i'ne siukia ti Sijwajieti na'me 'ni ajnat, sekyi'i iyone 'ate ni Jinia': “Siunie ti je wojonk'iye siuniwa wask'i'nelaja tilianajan'ni, siu'neje niwa tiwoki'ni in'wajietisa', 'yina naka p'an ti jiwoye 'isiena'.

⁶ Je inteliaja siuniwa ti tiwunie'ni, siu'neje niwa napo i'nio' ti iyoyi'ni ji'wajietiye ape'e niwa jikeyis ka netia'n.

⁷ Tempi it'imina ti ana'am, ni Inia', ti awo ka iyoyi ni siunie jijliuyijk'i'm, iyo niwa inlesajna' ti yiji ni imp'esinik ti takapajlatak'i, ti sijwe'el.”

⁸ Siunie inia'an, ijwi'il siupuwa tilianat'ijyin'nijpe puwa ti tiwuniejen'ni, siu'neje puwa in'wajietis, puwaka 'neje siupuwa ti iwinis'ni ape'e puwa jikeyis. Sinia' je itiliaja niwaka ikajlitieje ti niwakayeta siuniwa iyot'iyipi pak inka'neyasajnaye ti iyo ka tiwoki.

⁹ 'Yina to'm ape'e ti iyo'ate, “Ana'am, ni Inia', ti awo ka iyo ni siunie jijliuyijk'i'm.” 'Yaka ti ijiut ts'ijiye siukiwa jikeyis napo i'nio' siukiwa inia'an, ti iliajne'n ape'e siuniwa k'iejliyi ti iyo ka netia'n niwa jloski'layis. Sekyi'i initojmatayi jla'am ti kiak tiwonaja ti tiliana.

¹⁰ 'Yina ijwienjliyik'i wek ti kia'iyo ti iniwe'en ti ijioyi japa 'najlati sekatajaje. Siuti je 'yaka'm ape'e siunie Sinia' iyone siunie iniwone, 'yina nak kasts'isisi'ne pet kajeyepa ti Sinia' ijiatjliyi ti kasts'otat.

¹¹ Wikie'eyi siunapo pa'yijis ti tajla'm napo Judíojos jlomas itijw ti isimk'iji'n, je iliyi ki iyo ti iliajnen'ni siuniwa k'iejliyi ti yikiajle'ni ni Sinia'. Jlam'ne je 'yakajle'n siunie i'nio' ka ijnale niwa jikeyis.

¹² Jlam'ne pet pa Sijwajieti Jesús ijwienjliyik'i jiwek ti kiak iyo ti jlam jla'am ti iniwe'n ape'e niwa inkeyis, sekatajaje ti jajnok'i'ni. Jak je iyoyiji siuti wakal, 'yina yiyeje'n 'nijiye jijweyeje pa Sinia'.

¹³ Yi'i ti its'iujwap pa Sinia' siojopa jloma ti janen kiajwe papo jitiejiejwas.

¹⁴ Kajeyepa ti siupa iyo ti iniwojwa'n Sinia' ji'wajieta' ijwienjliyiji jiwek pakatajaje ijiok'i'ni ti ilisajne'n siunapo ti Sinia' 'yotat.

¹⁵ Siojopa Sinia' jikimet ti 'es kia'iyo 'yakajanitk'i sik'ioye ti ijiate ni iyo, siunie ti iyo'ate:

¹⁶ “Yam'nijiye kiaka, siuniwa jlomas na'am, siunie i'lij jayone ti jaliyijap napok Israel jika kia'lis, kiak jawone 'ate: Jajiojwanitiamk'i niwa jlosikis siuniwa yamtis, sek jane'yi ka ip'isinajets'ina'a niwa jitienkiujnieyejes.

¹⁷ Itiej ja ke iyunitk'iji'n k'iye siuniwa jloski'la iyo, siu'neje niwa ijiate ti je isis iyoyisits'i'ni.”

¹⁸ 'Yina kiak iyoyiyi siunie ti pajk'i ti netia'n niwak inkeyis, kiak ja ke iwo'ni, ka tilianajan'ni ape'e puwa k'iejliyi.

Jajioki pa Sinia'

^19-20 Ijiatjliyi, i'lijwas, 'nakayi akajlaja ti ajok jik'ioyi janak Sinia' ji'wuk jitiowe siojona ti ijiate ti t'otata, je 'es ka kaskip'e ni Sinia'. Lapakawo ti paka jla'am siupa Jesús ti iniwe'n ti ijioyi japa 'najlati, 'yina ti isia'ni pi ji'woyis, sekyi'i ti iyo si'niayija', siunie ti ijioyi janaka si'wasankiye, siunie 'nayi ti tejeye siunie Sinia' ji'wet ti to'm ilia'm ti jla'am, ji'wechaja ni siunie tip'onajaja'm.

²¹ Jesús naka 'neje siunie saka pa'yijis jika anechiyas wuj, 'yina iyo anechiyasa'a siunie Sinia' ji'wet yi' poliyi.

²² Jak je iyoyiji jajioki pi Sinia', ja'nialkitak'i na sosik, siu'neje na sitienkiujnieye ti 'es jalisanaja'n. Siunie iyo ti je akakiuk jajwienkitak'i, 'yina ke k'iejliyeyi paka iyoki sitienkiujnieyejak'i wita'm ka jiniliakie pa, lapakawo ti pajk'i siuniwa ts'ajwes ti tilijiki'n, ti tilijiki siunie i'niat ti 'es.

²³ 'Esiji ka je kask'asayik'i pijia'm ni siunie sinijijwiye ti je jwajla'a siunie sinijijwiye ti ajwelaja'ni pijia'm ti yits'e. Ka je iwo pa ti siunie iyo ni Sinia' ti ijwilts'e'm, ja ke ji'lijayik'i wek, 'yina ti ja ijiatayi.

²⁴ 'Esiji ka iyokijyi'n siupa 'es ka iniwonaja, jla'yi ti jani'najmak. 'Esiji ka inikimaja siunie ti janip'elisina', ti janikelaja siunie 'es sikijmaye ti jayoki.

²⁵ Ja ke kastasite siunie aniwonaja ti anitotiek'i wita'm, iyo napo ti iliyi ti kiak iniwone, 'wenajliyi ti janijlokk'ijin'ni. Wuj wata'a ti 'es ka iyoki kiaka, 'yina ti a'wena ti je tojwa'a siojona jloma ti Saka'niona janapimet.

Sikiowe ja ke iyikiajlaja'ni siuniwa sakeyis

²⁶ Jlam'ne ink'ie' je ape'yak niwak Sinia' jlamtis ti ijiatk'i, naka'ne na ti je 'esiji ka kasts'eliajak'i'ni ni siuniwa sakeyis ka je iliki ka iyoki. Jlam'ne kasts'ajane pi awonaja ti ja ke ine'nets'e ka poye paka yikiajla ape'e niwa sakeyis.

²⁷ 'Yina ja najatajana'a jlam ti jats'iukink'iye ni insajkinaye ti ja wujwa ti ja a'tiejak'i ni siunie jawoyi, naka 'neje ni siunie jwat ti tak'ayi'ni, ti jantejwk'i'ni siunapo ti teje'yi ilia'm ni Sinia'.

²⁸ Je kast'ayiji'n ni siunie ti iyo jiliakikie siunie Moisés jika'neyasajnaye ti 'yaka'm ape'e, ti po' siunapo najape ti i'winaja siupa iyoyi, ni'ne ti times papo i'winaja, 'yina je tiniaye'e naka i'nio', je tiniajwitaja.

²⁹ 'Yina ¿jijwelat'e ka Sinia' intasa'nena'a siunie ti iyo jiliakikie ni jlas, ijiate ti je iyo lajaye siunie ji'woyis, siu'neje ti iliaki siojona Sinia' jikimet ti 'es ti yiminta wek jla'am? ¡Je'e, ja ke intasa'ne! Ka je iwo pa ti siunie 'woyis naka ti 'yakajanitk'iyi siunie Sinia' ji'lij ti iliyi siunie janwoyi ti janwats'ilati siukia iyopi 'yina ink'ie' siunie janwoyi, 'yina naka ti i'mienit ni i'nio' ti Sinia' 'yotat.

³⁰ Kasts'ajane siuniwa Saka'niona jlamtis ti iyo'ate: “Ja ke 'wenaye pa ti jawo lajaye, ti ja yama ya'am.” Iyo'neje 'ate: “Saka'niona, je ijiat ka je in'ye'en siunapo jika kia'lis.”

³¹ ¡Wuj ti a'tie siunie inwet'ia ti titiajlajaja ni Sinia', ti 'najlati je isie'ne!

³² Astaj kiam kiu' wunitiets'i, siukiwa jlomas yam'niji ti k'iejli yiye'asepi siunie jloma ti tajle ni Sinia', 'yina 'wanjliyijpe ti yi'ase ni siunie inkajejlasaye 'yina jikima'yi ilia'm ti jinilanayiji'n.

³³ Ni'ne ti kia'iyo'nase napo i'nio' ti inlakiye, siu'neje ti teje'yi aselia'm, ni'ne ti kiak jiwoyeyi ti aslaye iniuyi wita'm napoka siunapo ti kiak iyo ni tena'a.

³⁴ Wuj ti askap'ijliuskiye jlena'yi siunapo yi' insat jiweje, siu'neje ti ejlo'o jiwekie'e ti tala'ase siukiwa askijmatis, 'yina je woyejli wek ti jinikanitiejyi'n lapakawo ti 'najanayi pi jiwonayi ti po' siuniwa askijmatis ti t'o'n ti yi' poliyi, ti jla'm ijiate ti isis.

³⁵ Ká anetiajnata siunie jiwoyeyi ti je kakiunieyi, 'nakayi ti ja ataja siojona as'wajieti ti je jlase'.

³⁶ Siuti jinilayitieyi siuniwa ijio'wase'ni, 'yina wuj ti jisitiana siunie ast'oni 'nakayi ti jawoyeyi siunie Sinia' iyo kawo, siu'neje ti jataja' siunie ijwi'lase'm.

³⁷ Kajeyepa siuniwa jlamtis ti iyo'ate: “Majleyeyi, majleyeyi, ja 'nes siunie t'ijieye'ni ilia'm. Ja 'nes, ja ke jwataja k'iye.

³⁸ Siunie i'nio' ti ja 'esieje'n, nak ji'wasankiye jantajleje ni siunie ti je takakiu'n. 'Yina jlampet ti janapiliji siunie ji'niayi paj, nak ti ijiate pet ti je ts'akanit'ni.”

³⁹ 'Yina je sa'am siunapo ti yapilik'i'ni isia'm, siu'neje ti ijioyi jana 'najlati ti netiajne'n. 'Yina sa'am siunapo jitienkiujnieye po', ti je takakiujni'n jla'yi ti tijwajyi'n.