Filipenses 1 - Sinia' Jlamtis 1994

Pablo itijwile papo Sinia' jilis

¹ Asampey, i'lijwas ti jleyejyi jlaja Filipos, asampet ti Sinia' jilists'ase'm ti jini'nopijietayi wita'm pa Sijwajieti Jesús. Ya'am Pablok'i'm, siu'neje 'ni sikiecha Timoteo, sa'am ti Sijwajieti Jesús jikawosts'e'm, sa'am sip'esinik siu'nie ti ajlok'iase, siu'neje japo i'ye'nase'm pet sekaja, siu'neje japo iniuyeje'ni pet.

² 'Esiji ka Sinia' jla'yi pi Saka'niona Jesús ka imp'elisinajyimpe, jla'yi ka akamajape ni jleye'yi.

Pablo 'yejla'n papo Sinia' jilis

³ Ti itiej wuj'wase'ni, sekyi'i ti awoye'eje 'ate “ijiatayijia'm” pi Inia',

⁴ awoye'eje 'yejlayeja' astepe'e, jla'yi ti wuj ti ts'ajkaj'ni.

⁵ Lapakawo ti kasjwanleja'm naka ni inka'niye ti 'es, atajlajak'i'ni tajlap'e ti 'nelanjie'ajape, 'yina awakieyi 'nijiye.

⁶ Jlam je awoyi ti Sinia', ti jlam ti tajle siu'nie jikijmaye ti 'nelanjie'e iyoyeyi, siunie jiwoyeyi ti wuj ti 'es, jlam jankatatjliyijna'a ti jawoyi, 'yina paj ka ineyeyinie'e janak jloma ti jawakajla, ka 'nesta pa Sijwajieti Jesús ti janapimet.

⁷ Je ka jiniliakie siunie sitienkiujnieye ni awonaja, awojlitieje ti wuj ti ts'ama'ase. Ent'a naka ti ajyi jla'a insat jiwe, ni'ne ka nakaye ti ani'net'i ape'e ni inka'niye ti 'es, ti ajwele pijia'm ti ijiatk'i jla'am, 'yina awo'ate ti kiak jiwoyeyi pit siunie iyonk'i ni Sinia' ti sip'elisi'n, naka jla'am ti it'imina ni jikijmaye ti awoyi ti iwink'i'm ti ijniejietk'i'm pet.

⁸ Sinia' 'yijene pi iyone'ala ti awotaja ka yama'aseyi ka i'wina. 'Yina ti wuj ti emina', je lajk'i ki iyo ni jlemijnaye ni Sijwajieti Jesús ti wuj ti 'es nak tajleje.

⁹ Lapakawo ti awotajank'iye pet ka ijiatayiji ka asemijnaye poye, ka 'najanajyi'n, jla'yi ka 'najana asosiki. Nak it'imina ki iyo ni 'yejlaye awone.

¹⁰ Ja'nakayeyi ti jawoyejyi'n siunie ijiate ti 'es. 'Yina ti kiak janiwonayi, siojona jloma ja'nesi pa Sijwajieti ti janapimet, ja ke k'iejliyeyijna'a pa ka je injweye'yi ape'e, kajeyepa ti ja lajak'i paka astes iwo.

¹¹ 'Yina kajeyepa ti ja impo'ase siuniwa jawoyeyi ti jantajle pet siunie 'es ti jawoyeyi, ka lajak'i ni Sijwajieti Jesús, jant'emina ti ja tiwunitie pa Sinia'.

“Siojona i'wiesankiye paka Sijwajieti”

¹² I'lijwas, awotajank'iye ka 'najanayi, 'wanjliyi iwit'ia poyeta, 'yina ejlowekie'e, kajeyepa ti naka jla'am ti iyo 'niayija' ni inka'niye ti 'es.

¹³ 'Yina wikie'eyi napo tokis siunapo i'yena ni anechiyas ji'wet, siu'neje napo ijia i'nio', 'yijene pi iyone ti je 'wena paka int'emink'i ti ts'otie a'laja'm, naka ti akk'i ni Sijwajieti.

¹⁴ Je pini' napo si'lijwas, ti 'yijenayi pi iyone ti ajyi jla'a insat jiwe, 'yina kat'ajayi ti ini'netits'i niwa Sinia' jlamtis ti iyoyi. Lajk'ipa ka k'iejliyeyi paka je injweyits'i ape'e, 'wenajliyi ti t'otale t'onisi ti ijwilis.

¹⁵ Ijiate poyeta siunapo ijwil ka iwoyi jlamtikie' pa Sijwajieti, 'yina je ijiatk'i kajeyepa ti iyoyi naka ti ijiulsinisijk'i'm, jla'yi ti 'yaka ti tejeyis ijyilia'm. 'Yina po' pet siunapo jitienkiujnieye ijniul wita'm ti iyoyi jlamtikie' pa Sijwajieti.

¹⁶ Kajeyepa ti 'nakayi jla'am ti jlemijnaye po', jla'yi ti ipiniyisi'i'ni ti 'nak a'yi, nak jant'emina ti ja ke inetia'n niwa Sinia' jlamtis.

¹⁷ Jlampet napoka ti ajwel'ni, ti ijwil kankimk'iji'n, nakata jla'am ti iyo ka ti'wena, sekyi'i ka tijwela kanses, ka nak tonitieje. Awojlitieje ti po' siunie ti je yin kisie'e ti yiji ni jlosik, ti iyo ka womisiji 'ni iwit'ia iyo ti ajyi jla'a insat jiwe, ti wuj ti anilayiti.

¹⁸ 'Yina ¡ejlo'owek! Ka 'esie ni'ne ka je 'esie pi jitienkiujnieye ka poye, 'yina siuti ijwil pa Sijwajieti ti iyoyi jlamtikie', nak wuj pet ti ts'ajka'a. Je 'nakata siu'nie jloma ti ts'ajkaj'ni, 'yina ts'iji kiak jawo'ojyi.

¹⁹ Kajeyepa ti nak jant'emina ti jajwie'e, ka ijiatayijia'm ti je liyeyi ti ts'ajlana'ni, jla'yi ki iyo jana Sijwajieti jikimet ti 'es janaka 'neje ti iniuyijk'i'm.

²⁰ Iyoye'ate siunie yik'i ti po' siu'nie ak'iukink'iye, naka ti ja lajak'ipa ka ts'ajwel ape'e ka k'iejliyeyi paka je 'esie ka iyoyi ka ini'najwelanit'ni. 'Yina awotajank'iye ka ijiatayiji ka ini'net'i ka iyoyi niwa Sinia' jlamtis, 'nakayi ka 'yakajanit pa Sijwajieti ki iyo ti jijweye po', siu'niwa jlomas siu'neje niwa jlomas atayeje, 'wanjliyi ti kiak jayo ja sinitia'n, ni'ne ka si'wasa'n.

²¹ 'Yina siojona i'wiesankiye pet janaka Sijwajieti, jlampet ti kiak jayo ja sinitia'n, naka pet ti ja wujwa ti ja ts'esi ts'ijiye.

²² Jlampet ti kiak jayo ti ja si'wasa'n ape'e 'ni ajnat, janakaye'eje pet ti ja 'esieyi ni isijmaye, kajeyepa ti jajwi'il ape'e napo i'nio'. Naka'ne jla'am ni siunie sit'iajanit'ni, ¿tepat'e ja iniwone?

²³ Kajeyepa ti timesi siuniwa yik'i. 'Yina ti a'ye'en, siut'itie ka kiak iyo ka iyik ka iyijap pa Sijwajieti, nak wuj ti 'es.

²⁴ Siunie jikiecha, kia'iyo jla'm ijiate ti 'es ka si'wanjle'e ape'e 'ni ajnat, ka yi' asap, ka nisisiek'i pet.

²⁵ Ijiatjliyi, kiak jawo kajeyepa ti ja sisitiana ka yi' asap kiu'. Jant'emina ti ja ke sinitia'njli kiu' ape'e 'ni ajnat, 'nakayijna'a ka wujwa ni anikanitiejeye ti ja'wena, ti janoyeje ka ijiatayiji ka atankiunieyi pa Sinia'.

²⁶ Jak je iyoyiji ti jayikiajle'eje ti ja ijio'wase, ka ijiatayijijna'a ni asnikanitieye ti ja enak'i'm, lapakawo ti kasjwanjliyik'i pa Sijwajieti Jesús 'ni awoki.

'Wena ká 'asap'e ni iyo ni Sijwajieti siunie jawoyi

²⁷ Po' siunie 'ejejie'nase'm ka woyeyi: awo'ate siupi ja k'iejliyeyi siupa jawoyeyi, 'wena ká 'asa'yi ape'e siunie iyo niwa jlamtis pa Sijwajieti, ti iyo ka woyeyi. 'Wanjliyijna'a ka kia'iwo ka je ijio'wase, ni'ne ka ijio'wase ka i'wina', 'yina ka najatajana'a jla'am ti ja ijie'yase ti jakinieyi ni siunie jiwoyeyi ti ijnojlie wita'm ni astankiujnieye jiwonayi. Nojwa'yi ape'e ti jinilana'yi ape'e ni siunie iyo ni sitienkiujnieye ti 'es.

²⁸ Ká aninenayi 'ate siunie ti ja ke injweyeyi napo astajiejwas. Siunie ti kiak jawoyeyi, nak 'yakajanit ti jano'we ti jajnoyi siunie je 'es jiliayeja', 'yina jlampet ti asa'am jajwayejyi'n. Naka pet ti tajle pi Sinia' siunie iyo'nase.

²⁹ 'Yina je nakata ti Sinia' iwi'nase'm, ka je akakiuye pa Sijwajieti, siu'neje ti jinilayitieyi pi k'iejliyi ti po' pa yi'ase ape'e pi Sijwajieti.

³⁰ Kajeyepa siunie inkajejlasaye ni jitieye'yi ilia'm, naka ti ata ilia'm. Naka siunie ti anilaneje'n siunie ti pajk'i ti si'wenayi, 'yina je paj ka iliyi ti ata ilia'm, ti jijieyek'ij'ni niwa jlomas.