Filemón 1 - Sinia' Jlamtis 1994

Pablo itijwile pa Filemón siu'neje papo Sinia' jilis

¹ Ampey isiecha Filemón, a'm ti sa'yi'ni ti awoki niwa Sinia' jlamtis. Ya'am Pablok'i'm ti ajyi jla'a insat jiwe, Sijwajieti Jesús jle' ti it'imink'i, ya'am ti ip'isinik siu'nie, siu'neje 'ni sikiecha Timoteo.

² Je asamkata ka itiejiet'ase, siu'neje jlaja sikiecha Apia, siu'neje ja sikiecha Arquipo, sa'yi'ni ti anilana ape'e ni Saka'niona, siu'neje ti asa'am, ti Sinia' jilists'ase'm, ti jininenayi'ni ji'wet'e ni sikiecha Filemón ti jinitotiek'i'ni wita'm.

³ 'Esiji ka Sinia', jla'yi pa Saka'niona Jesús, kiajatajak'i niwa jlomas ka imp'elisina'.

Jlemijnaye jla'yi pa jitienkiujnieye pa Filemón

⁴ Isiecha Filemón, ti awoyeta 'yejlayeja' sekyi'i ti atankiunie'eje ak'ioye, sekyi'i ti awo'ate “ijiatayijia'm” pi Sinia',

⁵ 'yina ika'niye po' siunie jiwo ti wuj ti emijnaye jle'ne napo Sinia' jika kia'lis pet, siu'neje ni atankiujnieye ti 'es poyi pa Saka'niona Jesús.

⁶ Siuti ts'ajanayi pet pi awone ti nak jleki siunie awoki, ti sitienkiujnieye poyi pa Sinia', 'yina ijiatayiji pet ti akatate ti 'ajlan'ni, ti awo pet ka intant'ieje siuniwa isis wask'i'nelaja yits'e ti tajleje pit pa Saka'niona Jesús.

⁷ Isiecha, wuj ti ts'ajkaj'ni, ti ajieye'a ti emijnaye jle'ne siunapo Sinia' jilis pet, jla'yi ti jiniuyijk'i'm, it'imina ti yaka inejiem pijia'm 'ni ijiusik. Kia'iyojliyi pit ti jlamis, a'm ti jit'imina, ki iyo ti po' ni jinikanitieye.

Pablo inip'elisine pa Filemón k'iye pa Onésimo pa inkipinik

^8-9 Ijiate ts'ajane pi awone ti emijnaye po'. Ijiatataja wek ti, siu'nie ka iyo ka ijliuye'a'm, “Ja k'iuk'i'm”, ti ya'am ti Sijwajieti jijliujwanik'i'm. 'Yina kijilak'i'm ti ajyi jla'a insat jiwe, lapakawo ti naka Sijwajieti Jesús ti it'imink'i 'ni awo.

¹⁰ 'Yina ena ape'e ti awo'ate ti 'esiji ka k'iuk'i'm siu'nie ti anip'elisi'na ka woyi, ti ajwel 'ni Onésimo ti awo yasa', siu'niwa jlomas ti a' insat jiwe.

¹¹ Ti pajk'i Onésimo je 'es ti akipinikta, 'nakayi 'yaka jla'm iwo ti ts'esi, jla'yi ti kiak jawo ja'nesi kajeyepa ti ink'ie' ni jikijmaye iyone, ti wuj ti 'es.

¹² 'Nakayi ajlo'wa. 'Esiji ka wujwa ka 'ye'n ilia'm, ataj ena 'ate ka yama, ti jla'am.

¹³ Pajk'i ka je iwi'in, ka ink'iuye a'wet'e ka noyijk'i'm, siuti ajyi jla'a insat jiwe ape'e niwa inamtis ti isis.

¹⁴ 'Yina nak ja ke iyine 'ate ka woyi, kajeyepa ti 'esiji ka ama a'am siupa jawoyi ti ja atankiujnieyeja'. Sek jane'yi ka je atajlatak'inie'e siuti jawoyi, ni'ne ka jeye.

¹⁵ Atejnistieje ka nak int'emint'iyijpe ti Onésimo taj'la'm kiu', ka ne'yi japa jlomaye, iyo'ate iyo 'nakayi ti yapi'lia, ti ja ke pajana'a ka intaj'la'm ti jane'yajap.

¹⁶ Ja ke iwo'ate iyo ti inkipinik, 'nakayi 'yaka'm ape'e naka, kajeyepa ti akiecha ti wuj ti i'namaja. Kia'awo pet ti ya'am wuj ti emi'n, 'yina siupet ti a'm 'esiji ka wujwa ka emi'n, kajeyepa ti naka ti akipinik jla'yi ti akiecha ti a'nayi ijwienjliyik'i siunie ti jleki ki iyo ni Saka'niona.

¹⁷ Siuti ja ijiatayiji siunie jiwo ti jiwo akiechayek'i'm ti kasjwanjliyik'i ti akinieje ki iyo ni Saka'niona, ki'm ilia'm. Ataj ena 'ate ka yama ka ijio'wa, ti 'es ti ji'ye'n ijyilia'm, kiak wone.

¹⁸ Siuti po' t'ipi pi k'iejliyi pi iyo'naja, ni'ne ka jikapia' ine'ya, jak'ieye japa ja 'ajlik'i'm, sipo' ya'am ti ja ikat'i'n ape'e.

¹⁹ Ya'am Pablok'i'm, ya'am ti 'eti' siu'nie, ajwel ti janitojmate, jlajme awo ti jatis. ¡'Yina je ayiji pit, ka itiej iyunitk'i ti kiak jiwo pit akapia' yik'i, ates yi' ijyilia'm!

²⁰ Ji'yu, isiecha, a'm ti Saka'niona jlasts'a'm pet, sip'elisi'n wata'a, k'iuk'i'm, woyi siu'nie awotajank'iye ka iyoyi. Kanit'ni pet 'ni ijiusik, ti a'm ti isiecha'a'm, iyo ni awoki, ti akinieje pet ki iyo pa Sijwajieti.

²¹ I'lij atate'a, kajeyepa ti itiej ya'm awa'm ti je int'o'ni, ti jawo siu'nie a'yasane. Ts'ajane pi awone ti a'm ja ijiatayi ti jakajmat ape'e siunie a'yasane.

²² Po'neje ni jikiecha jajwi'la'm ta'a, ti 'esiji ka wakajlanit ta'a pa jajio'weje'n ka yikta. 'Yina awotajank'iye ka je pajayi, lapawo ti Sinia' jawo i'niayija', tepa jawo ka kiak je iwo ti je liyeyi ti ts'ajlana'ni.

Sek jla'a niwa Pablo jlamtis

²³ Sikiecha Epafras itijwi'lase, siunie ti iliaye iniuyi wita'm ti ts'otie a'laja'm, ape'e ni Sijwajieti Jesús jle'.

²⁴ Kia'iyo 'ni Marcos, Aristarco, Demas, Lucas, napoka ti isijmape'n pa Sinia', itijwi'lase pit.

²⁵ 'Esiji ka Saka'niona Jesús ti Sijwajieti wujwa ka imp'elisina'.