Efesios 4 - Sinia' Jlamtis 1994

Ijwienjli japa Sinia' jikimet ti 'es ti kasts'opijietk'i wita'm

¹ Tempi it'imina ti ya'am, ti Saka'niona jla'am ti it'imink'i ti a'ne yi'i jla'a insat jiwe, ti kiak awo'nase ti anip'elisi'niase, asa'am ti ta'nase pi Saka'niona: woyeyi siunie 'es iniwone siunapo ti ijiate ti iyo niwa inamtis ti isis.

² Ká anitonitie, ke injwesisa', nilayitie. Emina' napo as'lejwas, 'wanjliyi ka kia'iwo ka poye paka je 'esiek'i paka ine'yase, nip'elisinapi.

³ Je paj ka leyeyi siunie ti jawoyeyi, ti jajwanjlik'i siunie jiniwonayi, 'yina siojona Sinia' jikimet ti 'es janak janoye'ase'm, siu'neje ti po' ni askamankiye naka ti ijnotiek'i wita'm it'iminayi ti insisiek'i wita'm.

⁴ Kajeyepa napo Sinia' jilis ti iyoyi niwa jlamtis, ts'ajwes ijwienjlik'i, ijwienjli 'neje siojona Sinia' jikimet, siunie sinijijwiye kia'iyo ijwienjli ni it'imina ti Sinia' tants'e.

⁵ Saka'niona ijwienjli, ijwienjli 'neje siunie sitienkiujnieye ti 'es, ijwienjlik'i siunie ti kasnajienaja'n.

⁶ Ijwienjli ni i'nio' ni siunie Sinia' sa'am ti kasjwanjlik'i, siu'neje ti nak awak kiajwe kaswikie'eyi ti jlam ti anechiyas, 'yina jlam ti isijme'n ti potie pa 'es awoki, siu'neje ti yi' saka kiowe'e wikie'eyi ape'e 'ni ajnat.

⁷ Sijwajieti kasjwankitamk'i siu'niwa ti iyo si'wajieta', 'nakayi ka nek pet siunie jikijmaye iyo.

⁸ 'Yina tempi it'imina niwa Sinia' jlamtis ti iyo'ate: “Ti yapilie poliyi 'yina yame siupapo jikipijnas papoka papo jitiejiejwas. Sekyi'i iyo ji'wajieta' papo i'nio' yi' ajnat'e.”

⁹ 'Yina ¿tepat'e ijio'we siukia ti iyo'ate, “Ijio poliyi”? Je kast'ayiji'n pet ti 'nelanjie'e, ti jlam na'm ajnat'e.

¹⁰ Siunie ajwe'el ti na'm ajnat'e, naka ti jlam jla'am ni siunie ti ijioyi na poli siunie toj pijiame, 'yina niwaka'ne siuniwa jilisajna' ti 'yakajanit ti jijweye pajlat ape'e 'ni ajnat.

¹¹ Jla'am ti iwijnamk'i napo i'nio' ni jijweye ti iyoyi ji'wajieta'. Po' napo iwijna'm ka wo jijliujwajnasa', ijia napo iyone jijwejlanawosa', ijia napo iyone inka'niye jiwosa', ijia napo ijniejiet'e kan'yenkina napo jilis, ti 'yiyasajne'n napo i'nio'.

¹² 'Yina kiak iyo, siuti ilisanak'i napoka jikawos, ka napokaye pet ka 'neyasajne'n napo ijia Sinia' jilis ka noyeje ka inkima na Sinia' jikijmaye. Jak je iyoyiji pet siuniwa Sinia' jlamtis janekjlijyi'n pet sa'am ti Sijwajieti t'ajwests'e'm.

¹³ Paj ka ijwanjliyena'a siu'nie awoki, kajeyepa ti po' ni siunie sitienkiujnieye ti 'es, jla'yi ti ja ijiatayiji pet ka kastant'ieje ni Sinia' jlas, jla'yi ti jakaskijliyiji'n ni inamtik ti jayoki, sekyi'i ka kasjnojlieyijinie'e pa Sijwajieti ni jlosik iyo ti 'es.

¹⁴ Siuti kiak jayoki, ja ke iyokiena'a 'ate iyo napo kia'lis ti je tipejniki'i siupa iyo ka woyisi. Kajeyepa je ijlieneje siupi iyo ka iwoyi, jak je iyo 'wanjliyi ka inam'ni siunapo i'nio' ti ka kask'emijiete siunie iyoyi ni t'eyasajnaye iyo ti je 'es, ti iyo'ate ni jlajwu tiok ti yame pa ti k'iejlitieje.

¹⁵ Ja 'wenajliyeyi ti janiukk'i siunie iniu'we ni 'es ja kasts'amaja napo si'lijwas, 'nakayi ka jla'm inekjlinie'e pet siunie awoki. Sek jane'yi ka ijiatayijijna'a ka kasjwanjliyik'i pa Sijwajieti, ti jlam ti jletik wikie'eyi napo Sinia' jilis.

¹⁶ 'Yina Sijwajieti jla'am ti t'oni pijia'm siunie t'isie'n jla'yi ti 'esi. Sekyi'i siunie t'isie'n 'esieyi'iji pet siuniwa jijwal 'neje, ti t'opiyiji ti ini'nopijietk'i wita'm. Jak je iyoyiji ti ijwienjli pa yi'i pa ti 'es pa jikijmaye iyoyi, ijiate siunie t'isie'n wikie'eyi siuniwa jijwa'al kiak iyoye'ijyi pit ti 'es siupi iyo ti yajme'n, jlam yamjli pet siunie jlemijnaye iyo.

Sinia' jilis jlosik ti ink'ie'

¹⁷ Siu'nie jayo'nase, ti jajliu'wase'm, ya'am ti Saka'niona ji'lij iliyi ijiap, wuj ti 'ejie'nase'm ka je akiniejets'i siunie jike' iyoyi napoka ti je tajliyi ni siunie je 'es. Ti ijiate ti iyoyis jlajaye ni jitienkiujnieye, jlam'ne je iniuyeje paka ne'yi pa, kajeyepa ti je 'es,

¹⁸ itiusina ape'e ni jlosik iyo. 'Yina siojona ji'wasankiye ti Sinia' iwijna'm napo jilis je tijna'yi, kajeyepa ti je itiant'iejesi pa Sinia' jla'yi ti t'o'n ni jlosik.

¹⁹ 'Yaka jlamis ti ininekiajle siuniwa jikeyis ti wuj ti je isis, jlam yinjliyisi ape'e ti iyoyisi niwa ti itij'weje'n niwaka ti ijiateje ti 'yakajyi'n ni jlosik ni i'nio', nakaye ti lajk'ipa ka t'ajwejliye ni i'nio' ti iyoyi niwaka.

²⁰ Je niwak siuti ka atajlayiji pi Sijwajieti ti jini'neyasanayi.

²¹ 'Yina ajwel pajk'i ti 'najanayi pi jiwonayi kajeyepa ti jipe'yaye, jla'yi ti jini'neyasanayi niwaka Sinia' jlamtis ti ijiatk'iji'n, ajwe'el ti jla'am pi Sijwajieti.

²² 'Esiji ka leyets'i siu'niwa askeyis ti paj, lana'yi siunie astankiujnieye 'yusie ti ji'niayi je itio'yi, jla'yi ti niwak inkajyina siuniwa wask'i'nelaja ti inteliajayi ka woyeyi ti je isis.

²³ 'Esiji ka woyepe ink'iejyisa' niwa asosikis, siunie astankiujnieye kia'iyojliyi.

²⁴ Woyeyi as'wuye siunie asosik ti ink'ie', siunie ti jlam pa Sinia' ti jilisanik. Sinia' iyotajank'iye ka awoye'ate iyo ti jla'am ti jlam ti 'es, 'yina nak 'yakaja'aja pet ti jiwoyeyi siunie tijnajyi, siu'neje ti jinilesanayiji jitieyi'i, lapakawo ti jiwoyeyi as'nayija' siunie ijiatk'i.

²⁵ Leyets'i siunie ti jiwoye sintijyisa', jiwoye sintijyisaja'm ni askiecha pi k'iejliyi ti jiwoyeyi, jlam'ne ts'isie'n ijwienjlik'i, jijwalts'em'ne peyit siunie Sijwajieti t'ajwes.

²⁶ Siuti injwesie, ká aninene 'ate, 'lojwinie'e ka intonie ni aske'; ká amita no'oti ni asjwesi,

²⁷ ká awoye pet 'weta ni imosik.

²⁸ Siunie takajla'n 'esiji kanlek'i, 'esiji ka inkijme'n. Siuniwa jikioye, 'esiji ka itajietap pet siunie jikijmaye ti 'es, ja 'nakayeyipe pet siuti po' napo ti jwajla'a je i'wi'in, ja 'esieyi pet ti janoyeje.

²⁹ Asamtis ja ke jiniliajaye, 'yina siuti kiak jawo, ijiate janoyeje pet siunapo i'nio' ti its'iu'wase int'eminajna'a pet ka Sinia' imp'elisi'n siunapo its'iu'wase'm.

³⁰ Siuti kiak iyo, je jikanitie'ni jana Sinia' jikimet ti 'es, 'yina janak ti inkajanitie ti ijiate ni nak aska'niona ni Sinia'. Janaka 'neje ti ja insisieyi ka netiejenie'e janak jloma ti asjwajieti yiji.

³¹ Leyeyi siuniwa ti iyo asjlak'aliye, siunie aswak, siu'neje ni ti jleyeyijits'i napo as'lejwas ni siunie iyo, jla'yi ti jisilajiam'ni napo as'lejwas, siu'neje ti ine'wayajamk'i.

³² Woye'ate siunapo jlosikis po', nip'elisina'. Ká atayetieyi ti k'iejliyi pi iyo'nase, iyo'ate pet pa Sinia' ti wuj ti imp'elisina, ti kia'iyo ti je iyoyi astesa' siunie jiwoyeyi, 'yina ti paka jla'am pa Sijwajieti ti insisieyi.