Colosenses 4 - Sinia' Jlamtis 1994

Jlampet siunapo anechiyasas

¹ Jlampet ti asa'am ti anechiyasasts'ase'm, 'yenayi siunapo askawos, ena'yi siunie ti tijnajyi. 'Yina je iyo'ate ka je 'najanayi paka wonayi, ti po' pet siunie aska anechiyas ti yi' poliyi.

Siunie 'es ka iniwone napo Sinia' jilis

² Ká aleyeyi ti jiwoye'ni asts'ajlayeja', siu'neje ti asnikanitieyi jlekiajlayi'ni pa Sinia'. Ká anikiwalinitie.

³ Kasts'ajlanayi pa Sinia' 'nakayi ti ja 'najlinit k'iye siunie inka'niye ti akiji'n, ti ijwi'il pa Sijwajieti. 'Yina siunie jika'niye naka siunie ti ijwik ti pajk'i, 'nakayi 'yakajanitie, naka ni siunie awoyi jika'niyejayi napo i'nio', 'yina naka ti it'imink'i ti ajyi jla'a insat jiwe.

⁴ Ts'ajlana'ni 'nakayi ti ja 'yakajanitk'ijine k'iye siunie jota ka iyo ka ijwi'il.

⁵ 'Ye'en, siu'neje ka anilesanayiji jitieyi'i napo i'nio' ti kakiujnietas. Ká akajyina japaka jlomaye.

⁶ Siuti jakamtijnienayi napo i'nio', 'ye'en siunie jlamtiyi. Jawone 'ate siunie sijwonie ti jitieteje ni ak. 'Yina 'esiji ka 'najana'yi ilia'm siuti po' ni in'yasayiji'n pi k'iejliyi.

Pablo jlaja ti itijwila'aja

⁷ Siojo sikiecha Tíquico ti wuj ti kasts'amaja, ti je tiwonaja jla'am ti ya'yi'ni ti iniuyijk'i'm ti akima ni Saka'niona jikijmaye, jla'am ti jawoye aska'niyeja' ti janjwe'lase siu'nie awoyi ti a pet 'ne.

⁸ Tempi it'imina ti nak ajlojwi ti janjwe'lase siu'nie awoyi, siu'neje ka inke'lase'm.

⁹ Siunie 'yunink'i Onésimo, naka 'neje ni taj'l aswa'am, siu'neje ti sikiecha ti je tiwonaja, ti wuj ti kasts'amaja. Ja napokaye ti janjwe'lase wikie'eyi siuniwa awoki ti awak'ne.

¹⁰ Aristarco, siu'nie iliaye iniuyi wita'm ti awaki jla'a insat jiwe, itijwi'lase pit. Marcos kia'iyojliyi, siojo Bernabé jikilia jlas. 'Yina je int'ayeyiji'n siunie awotaja ka wonayi ni sikiecha, siuti kiak jawo ti jajno'wase 'esiji ka 'yena'yi ilia'm.

¹¹ Sikiecha Josué, ti tiwonaja'ni 'neje 'ate Justo, kia'iyo itijwi'lase. Lajk'i papo ka ijiaja ka intajla'm napo Judíojos ti ijiojwa'm pet siunapo ti itienkiuni pi Sijwajieti Jesús ti iniuyisik'i'm, ti akima ni Sinia' jika anechijiayas, napokata jla'am 'yina wuj ti iniuyisik'i'm.

¹² Askiecha Epafras, Sijwajieti jikawo pet, itijwi'lase. 'Yina jla'am ti ini'net'i astepe'e ti 'najlanayi'ni pa Sinia', ka je aleyeyi ka k'iuyeyi siunie Sinia' iyo ka woyi.

¹³ Ya'am ti a'we'en, jla'yi ti ajwe'lase'm, ti je jlase' siunie iyoyi ti iniuye'ase'm. Je asamkata siu'neje napo si'lijwas yi' Laodicéaja, siu'neje napo yiji jana Hierápolis.

¹⁴ Lucas, inkakiewo wuj ti kasts'amaja, siu'neje ni Demas, kia'iyojliyi itijwi'lase.

¹⁵ Jwelajia'm siojopo si'lijwas yi' Laodicéaja siu'nie awoyi ti atejwile, siu'neje ja Ninfa. Jwanayi'i 'neje siojopo si'lijwas japo ti yinisi'ni ji'wetits'ik'i, ti initotietajask'i wita'm.

¹⁶ Siuti ja temayi ti ja amtijiena siu'nie ip'isinik, sekjane'yi ka ajloyeyinie'eje pet japo si'lijwas yi' Laodicéaja, 'nakayi ti kiak janwonisi ka inamtijienayisna'aja pet. 'Yina kiak jawoyeyi'iji pet ja 'yena siojo ip'isinik ti sek jantajli ti janjlo'wase.

¹⁷ Jwelajia'm ja Arquipo siu'nie i'lij, ti awo'ate, “Tankiuni ka teme wikie'eyi siunie akijmaye ti Saka'niona yikiaj'la ka woyi.”

¹⁸ Ya'am Pablok'i'm, atome pijia'm ti kia'awo ti 'eti' ti atejwi'lase. Nak ataj wunitieyijpe siuti ya'am ti a' insat jiweje. 'Esiji ka Sinia' jikap'ijliuskiye ine'yasap.