Colosenses 2 - Sinia' Jlamtis 1994

¹ 'Yina awotajank'iye ka 'najanayi paka wonayi ti ijiat ti anila'n astepe'e, siu'neje japo yiji jana Laodicea, wikie'eyi 'neje siojopo ti je itiant'iejesjlik'iji.

² Kiak aniwone 'nakayeyi ti ja wikie'eyeyi napo Sinia' jilis jijweye japoye niwa jlosikis, jla'yi ti janiwomk'i wita'm ti jawoyi ni jlemijnaye, 'nakayi ti jan'yakanis siunie 'wanjli wita'm t'ajankijnieye ti wuj ti laja po', siu'neje ti ja'najane paka iwonisi siunie Sinia' talk'i'ni ti je yin kisie'e, paka pi Sijwajieti.

³ Kajeyepa siunie iyo ni i'nio' ti 'yije'en, siu'neje ti 'yijen jlosiki, yiyi pi Sijwajieti.

⁴ Ajwe'lase'm niwaka lapakawo ti awotajank'iye ka je inteliajayi puwa ka jlamtisa paka ne'yi pa, ka neyi ts'iji ka ink'emijieta.

⁵ 'Yina 'wanjliyi ti je ayeta'asap ti ya'am ti i'niok'i'm, lapakawo ti isiowe yi'asap. Ts'ajkaj'ni ti ajie'yase ti jiwoyeyi siunie jota tiwoki ti 'es, siu'neje ti 'yaka ti jitienkiujnieye pi Sijwajieti ti je kakiuye.

Sinia' tipo'ase ti asa'am ti jiwayejiap pi Sijwajieti

⁶ Siunie jiwonayi pi Sijwajieti ti jikima'yi ilia'm ti jiwonayi Aska'nionaja', 'esiji ka kiak awonayi ti janoyets'i ni ji'niayi.

⁷ Woyeyi asjwetisila' ti jla'am, as'wasankiye japoye siuti jleye'yi ape'e. 'Yina nit'onitieyi pijia'm siunie astankiujnieye ti 'es, iyo'ate ti 'nelanjie'e 'neyasanayi. Ke esitie'yi ilia'm siunie jiwoyeyi ti asnikanitieyi jiwenayi'ni.

⁸ Joskiyeyi, ká ak'iuyeyi siunapo ti ijwi'il ka 'najajne'n 'lojwinie'e ka inkajmanats'iji'n, kajeyepa siuniwa jitienkiujnieyejes laj lajaye, siu'neje ti jawo jikipijnasa'ase'm. 'Yina siuniwa iyo ti 'yijejne'n, je paka ka intajle pi Sijwajieti, 'wenajliyi jla'am siuniwa jiket'i iyopi papo i'nio' ti 'yotatis, siu'neje ti tajle niwaka injweyejes ti je ti'wena, ti iyo jikimita 'ni ajnat.

⁹ Kajeyepa ti siupa k'iejliyi pa Sinia', pajlata'm pa Sijwajieti ti iyo 'weta', ti siuti i'nio',

¹⁰ siupet ti asa'am, Sinia' tipo'ase, kajeyepa ti jini'nopijietayiji pi Sijwajieti, siunie ti jla'am ti jletik wikie'eyi niwak injweyejes.

¹¹ Siu'neje ti jini'nopijieteje ni Sijwajieti, Sinia' ijiut ts'iji siuniwa ti asa'am ti taj'lase ti inteliajayi, siu'neje niwa askeyis ti je isisi. 'Yina kiaka siukia iyoyi, 'yaka'm ape'e siunie i'nio' jilisanik iyont'iyipi papo Judíojos jilis ti ayijnies, 'yina 'yaka ti t'isie'n jiwa ja siupa tejwak'i, sekyi'i titietajayi, jak je iyoyiji pet ti jiliyeyi kiwa askeyis, 'yina naka'ne pet ti 'esi niwa asosikis.

¹² Jak je iyoyiji siuti inajienajajyi'n, 'yiniye ka imp'onaja'yi ti aslaye iniuj wita'm ni Sijwajieti. Kiak iyojliyi siuti jiniuyets'i kisie'e ti jitiajlayi ni a'no', 'yina as'nayi ijwienjliyi ti yapi pijia'm. Lapakawo ti je kakiuye siunie Sinia' jijweye ti naka ti iniujwa'n kisie'e ti jla'am.

¹³ Ti pajk'i asa'am ti jiwoye masesie', ti jleyejyi niwa askeyis, in'wanjliye witame ti je intant'iejayi naka Moisés jika'neyasajnaye. Jlam'ne 'nakayi Sinia' iwi'nase'm ni as'wasankiye, siuti jini'nopijietayiji pi Sijwajieti, jla'am ti initiajnat sik'ioye wikie'eyi niwa sakeyis.

¹⁴ 'Yina Sinia' 'yojmatk'iji'n sik'ioye siukiwa inamtis yi'i ki imp'esinik ti ijwi'il ti sitis poyi ilia'm, sekyi'i ti ijiutie jlam ts'ijiye ti initojmate, sekyi'i its'iejwat'e 'ne japa cruz ti wikijnies 'yitajamk'i.

¹⁵ Pakayi ti Sijwajieti yi'i pijia'm japa cruz, sekyi'i ti itietayik'i isia'm siupuwa injweyejes siuniwa je 'yaka. Sekyi'i ti 'yakajanitie k'iye ti ijiate ti je tomits'i ilia'm, iyoyeyi jiliakijieye ti yine jitieyi'i wikie'eyi napo i'nio'.

¹⁶ 'Yina je 'esiji'ne 'nakayi ka ne'yipa ka inlakiyeyi siupa jitiuwa', siu'neje ni ji'yayejyi, siu'neje niwa jlomas ti inlakijnieyejes, siu'neje jana jloma ti i'nio 'wanjlijyi'n, siu'neje ti we'la ink'ieyeta.

¹⁷ 'Yina awo'ate, wikie'eyi siuniwa ti t'ijieye ilia'm ti janam'ni, jipelis jiwekie'e, 'yina jlam'ne siunie ja jlamayi paka pi Sijwajieti.

¹⁸ Ká ak'iuyeyeje siuti injwela ti ijwi'il astes po', napoka siunapo ti ijwi'il ka inijlasatisk'i isia'm, napoka siunapo ti ijiunitis napo injlojwajnas poli jlele, ti ijwi'il ka poye siuniwa ti'wenkinajam'ni, napoka siunapo ti initonitisi siuniwa ti jitienkiujnieyejes jlamis.

¹⁹ 'Yina je isiene wita'm siunie jletik napo Sinia' jilis, ti jla'am ti 'yakojniejne'n, siu'neje ti 'yupijietk'i wita'm, 'nakayi ti ja kiajatajak'i'ni ti janjlas'ni pijia'm, iyo jla'am pi Sinia' iyo kawoyi.

Ataj ja enayijpe 'ate niwak wask'i'nelaja isis ti yi' poliyi

²⁰ Aslaye iniuyi wita'm pi Sijwajieti ti 'ya'al, kajeyepa ti jiwoye masesie' jitieyi'i niwaka siuniwa injweyejes ti je 'yaka. 'Yina ¿yot'iyi'ni jiat'eje ti 'yiniye ka mawat je atajlajyi ni iyo pit ni ajnat, 'yina ti jik'iuyeyi siuniwa inamtis ti iyo'ate,

²¹ “Ká aki'me naka, ká atojw niwaka, ká akie'ne naka”?

²² Niwak siuniwa inamtis ti ji'niayi je itio'yi paka injwe'el, jlaj po' kajeyepa ti i'nio' jika'neyasajnaye jiwek.

²³ 'Yaka ijiatayiji ka inses, kajeyepa ti i'nio' 'yijijie'ne ka tonitie pa Sinia', sekjane'yi ti janijlasat isia'm, siu'neje ti ja iliaki 'niwa 'najwes. 'Yina je 'yakajle'n niwaka siuniwa itiliaja ni i'nio'.