Apocalipsis 9 - Sinia' Jlamtis 1994

Ti yiyeyi pet siupa jikiecha injlojwanik poli jlele jlampa ijwienjliye'ni sikio' itij'we papo ti ji'woso' ilie'en

¹ Jlampa iliena'aja pet jla'a ji'woso' siojo jikiecha injlojwanik poli jlele sekyi'i ti ijwienjliye 'ni sikio' itij'we japo ti no'we ti ji'woso'l ilie'en, sekyi'i a'wena siujlieja kates ti yi' ajnat'e siujlieja ti iniujwe'n ti tal poliyi. 'Yina jlajak kates ti ajwel'ni tekiajlaja siujlieja jikie' ti t'ajlinitieja'm siojona kiawe ti je ti'wena isia'm pa jik'ioyi siunie 'najlati 'wet.

² Sekyi'i ti 'yajlinitieja'm jlajak ijnaki, 'yina iniuye kisie'e ja tosie ti yam pijia'm 'yiniye ni jitiusie jana inka'we ti wuj. Siojo tosie jaka'ne ti ajnaj iyunitiji ni kilie' siu'neje ti je iyo inyejla.

³ Namik'i ja tosie siojowa kio'ol ti ijwi'ya'ni ti itij'w ape'e 'ni ajnat, siupa jijweye tiwenaja'm iyo'ate iyo siujlie'e ajliu pastana ni ji'wok iyo ti i'nio' ijyikie.

⁴ 'Yina nak je tiwenaja'm ka poye paka iwone niwa jop yi' ape'e 'ni ajnat, jla'yi niwa a'la' siu'neje niwa a'la'wole ti jiwats'o kanets'a. Napokata jla'am siunapo i'nio' ti Sinia' jika jwukis ti lajk'ipa ka tena'a jitiokiots'i'le, ti tijliukieje ka poye paka iwone.

⁵ 'Yina je tiwenaja'm 'neje ka inlajne'n, najata jla'am kan'wejnank'i papo i'nio' pa ji'wok ti ijwienjli sikio' itij'we puwa we'lajas tenaja ka kiak iwo. Siupa ji'wok iyo siupa isiene papo kiak iyo 'ate iyo jla'a ajliu pastana ti i'nio' ijyikie.

⁶ Siuwaka siusiwa jlomas napo i'nio' ti jantanisink'iye siunie jiliaye ka'najle'n, 'yina ja ke in'wenis. Lapakawo siojona 'najlati iyo ni i'nio' ti 'yalata jatojwajape'n kajeyepa ti janitejwiki'n k'iye napo i'nio'.

⁷ Jawak kio'ol je jilis iyo'ate niwa a'lentas siuniwa inwak jiwos. Po' siuniwa yik'i ape'e niwa jlete'l iyo'ate iyo siujlie'e tena'a jana anechiyas jletik. Jlampet siunie jitiokio' 'yiniye pet ni i'nio' ni k'iejliyi.

⁸ Siuniwa ji'wole iyo'ate jana asejnia niwa ji'wole, siuniwa jikinte iyo'ate na k'iwajla jikinte.

⁹ Jlampet siunie t'ot jip'otis tejeye ni inwak wikijnies, siuniwa jijwesis jla'lap iyo ti pesieje, iyot'e 'ate iyo niwa kaletajas siuniwa ti itio'on ti t'osiyi ti yiji ni inwak.

¹⁰ Jlampet siuniwa jikiase'l, jlanis po' iyo'ate jla'a ajliu pastana ni jlanis. 'Yina sektaj'le siunie jijweye, ti jankiene napo i'nio' ti jitiej janojwank'i ni siunie ji'wok janwo ti janjwanjli sikio' jantej'we niwa we'lajas ti kiak jawoyi.

¹¹ Siunie jika anechiyas naka injlojwanik poli jlele ni siunie ji'wet pet siunie kiawe ti je ti'wena isia'm pi jik'ioyi, ti 'najlati 'wet, jle' iyo'ate ti Hebreo ji'lij Abadón. Jlampet ti griégojos ji'lij iyo'ate Apolión, ti awonaja pet 'ate Kalankijieta.

¹² Ijiatjliyi, yam'niji kiaka inia'an inwet'ia. 'Yina ataj ena'ate times niwa netia'n.

Ti yiyeyi pit siupa jikiecha injlojwanik poli jlele ti joye kanjwanjli siupa 'wanjle'e ka ila'an japa ji'woso'

¹³ 'Yina ji'woso' iliena pet siojo injlojwanik poli jlele tome'e siojo tome jlaja, ape'yayeyi pa ina'lap ti to'm jikiowe'e siojowa altar jik'iulis ijniujlits'i ti wikinie maja ti 'najli, yi'i ni Sinia'.

¹⁴ Sekyi'i paka jla'lap pa tomts'e iyone'ne 'ate jak injlojwanik poli jlele ja tome'e siojo tome jlaja ti ji'woso' po': —Lajnits'i siunapo ijniujlits'i injlojwajnas poli jlele ti tilie'nitieje ni tewuk ti jle' iyo'ate Eufrates ti je jlase'.

¹⁵ Siojo injlojwanik poli jlele sekyi'i ilienajats'i japoka ijia injlojwajnas poli jlele ti janlajne'n papo i'nio' yi' ape'e 'ni ajnat ti ijliena kajnewita'm jikiowe'e siupapo janlajne'n. 'Yina lapakawo ti naka ti pajk'i ta'a ti tiwakajlanitie k'iye ka kiak iwoyi ti yiyeyi jakiak inetinki jana kiliekie', siu'neje jakia jloma, siu'neje jakia we'la, siu'neje jakia najkap ka iwo wet'iaye.

¹⁶ 'Yina kiak amit isia'm siojo nojwa'm japo tokis siojopo yik'i a'lentasts'ape'e doscientos millones ja nojwa'm.

^17-19 'Yina t'ot jip'otis wikijnies jikie' jla'am ni inwak, ni siunie k'iejliyiji'n iyo'ate ni jwat, siunie jla'al lasaje ijlijni'ni ni majajyi 'ate iyo ni azufre. Jlampet siojowa a'lentas jlete'l jawa iyo'ate niwa k'iwajla niwa jlete'l, jwat tal jikiwitk'i, tosie siu'neje ja azufre. 'Yina ijliena kajnewita'm jikiowe'e napo i'nio' yi' ape'e 'ni ajnat ti no'we ti 'yajle'n itij'we niwak inwet'ia, siunie jwat siu'neje ni tosie siu'neje ni azufre tal jikiwitk'i jawa a'lentas. Kajeyepa ti siojowa a'lentas jijweye yijits'i jawa jikiwitawa, siu'neje jawa jikiase'l. 'Yina siojowa jikiase'l jlete'l po' iyo'ate iyo niwa injlajas ti siuniwa je ijwietanit ti yokie pa. 'Yina jawaka ti isiene napo i'nio' ti iliajne'n. Kiak iyo ki si'wenkinaja.

²⁰ Jlam'ne pet siojopo 'wanjle'e i'nio' ti je yijliyi'ijyi siukiwa jiwet'ia iyo kiapo ijia, yamjliyisi ti iyoyisi ni je 'es ti iyunitis siuniwa wask'i'nelaja ti jikioye jilisajna' jlamis. Je iliyisi ti iyunitis niwa imose'l, siu'neje niwa ti jitiej iyomise siunie wikinie maja ti 'najli, ti isimisie ti 'yotatisi, siu'neje ni wikiniet'aj, siu'neje ni wikinie maja ti t'onk'i, siu'neje jana sisaj, siu'neje ti isima ni a'la', siuniwa ti lajata jitietiye, siu'neje ti laj jik'iot tiojwala', siu'neje ti je t'iskiunk'iji'n.

²¹ Yamjliyi ni siunie ti takalankijyi'n, siu'neje ti iniwojwa'n aye'wulisie', siu'neje ni jloski'la iyo ti ijiateje 'yaka'ma ape'eyi jana asejnia siu'neje ni ayinie, siu'neje ti je iliyi ti takajlajne'n.