Apocalipsis 8 - Sinia' Jlamtis 1994

Siupa ti pajataja ti nojwa'a puwak ijwienjli sikio' itij'we times tom'niji t'etieje ape'e pa imp'esinik ti takapajlatak'i, siu'neje pa incienso tenaja'ni ti wikinie maja ti 'najli

¹ 'Yina siojo 'wolepo 'woma ti itijwa'a siojowa ijwienjli sikio' itij'we times tom'niji t'etieje ape'e pa imp'esinik ti takapajlatak'i ti its'isate ape'e, ti yiyeyi siojo ijwienjli 'wanjle'e, sekyi'i ts'iji poliyi mamiyeja'm, ni'ne ka ijnewit'ijiampe japa inetinki ijwienjli yiyi japa kiliekie' yiji ti kia'iyo.

² A'wena japo ijwienjli sikio' itij'we times tom'niji injlojwajnas poli jlele ti takasitk'i jitieyi'i 'ni Sinia', sekyi'i tijwankitajamk'i jawa ji'woso'l, siojowa tipajwukk'iji'n.

³ Paj ti 'nesa'aja ja jikiecha injlojwanik poli jlele, itiu'un siojo incienso tenaja'ni ti wikinie maja ti 'najli, sekyi'i takasitiejape'n siujlieja altar. Sekyi'i je iyo ka tiliakiki'i siojo incienso ti tiwenaja'm, sekyi'i ti iyunie ti yine ape'e jlajak altar ti wikinie maja ti 'najli jitieyi'i siujlieja anechiyas ji'wet ti 'es, 'yina ji'niayi ijwienkitayi niwa t'ajlaye wikie'eyi napoka Sinia' jika kia'lis.

⁴ Jak je iyoyiji siojo tosie tajla'm siojo incienso jikiojyi jaka injlojwanik poli jlele, siu'neje niwa t'ajlaye napo Sinia' jika kia'lis yam pijia'm ti tajla'm ja injlojwanik poli jlele jikio', paj ti yiyeyi pi Sinia'.

⁵ Siojo injlojwanik poli jlele isimayi jawa si'yakia ti tajla'm siojo jwat yi' ape'e jlaja altar, sekyi'i ijiosayik'i'ni siujlieja tenaja'ni jla'am siojo incienso, sekyi'i ti isiayeyi ape'e 'ni ajnat. Sekyi'i poye siuniwa ti yek'isia'm, sekyi'i kijlamiyeyija'm niwa ina'lapis iyo, siu'neje niwa tak'ajyits'i, siu'neje ti ajnat ti'wesi.

Ti jlamata pet pi yi'i pa injlojwanik poli jlele ti yiyi ipiejwuyek'iji pet japa ji'woso'

⁶ Siojopo ijwienjli sikio' itij'we times tom'niji injlojwajnas poli jlele ti tiwok ji'wosola' siojowa tipajwukk'iji'n, pajk'i ti itime ti iniwakajlanitis ti jampajwuyisk'i, siuti yiyeyi ja yi'i ja ti tiniajnata.

⁷ Siojo injlojwanik poli jlele iniane ti ipiejwuts'i jlaja ji'woso', sekyi'i ti titietajayi isia'm pet jawa alatiu' ti ijlinik'i ja jwat siu'neje ja 'woyis. Jak je iyoyiji siojo ijniuj'li ape'e ijliena kajnewita'm jikiowe'e 'ni ajnat no'we ti jwat itiujwk'i'ni, siu'neje niwa a'la', wikie'eyi 'neje niwa jop ti jiwats'o yi' ape'e 'ni ajnat.

⁸ Yiyi 'neje siojo injlojwanik poli jlele tomik'i siojo inia'an ti ti'woso' ji'woso' ilie'en pet, titietajam'ne pet ja i'niat lajlik'i siojo iyo'ate jlaja tikijnaki ti tak'ayi'ni, jak je iyo siojo k'ie' ja ijniuj'li ijliena kajnewita'm jikiowe'e ja i'niat lajlik'i inikajyina ti iyo 'woyisa'.

⁹ Wikie'eyi siukiwa yiji pet jak i'niat lajlik'i ja ijniuj'li ijliena kajnewita'm jikiowe'e no'we ti 'yajle'n. Siukiwa kasejkanayis wus yiji ja ijniuj'li ijliena kajnewita'm jikiowe'e kiwa no'we pet ti iwiesits'i.

¹⁰ Yiyi 'neje siojo injlojwanik poli jlele siojo tomik'i japo times ti ti'wosojyi'n ji'woso' ilie'en pet, jakayi'ne ti iniuyeje'n jla'a kates ji'yusiki tal poliyi ti tak'ayi'ni, 'ate iyo 'ni jwat ti tiwoki katesa'. Jlajak ijniuj'li ape'e ijliena kajnewita'm jikiowe'e niwa tewukis siu'neje niwa i'niatis ti tajla'm niwa tikijnakiyis.

¹¹ 'Yina siujlieja kates jle' iyo'ate Pajyi. Jak je iyoyiji siuniwa i'niatis ti ijniuj'li ape'e, 'yina payejets'i pet, it'imina ti je jlase' kiapo i'nio mases iliajne'n.

¹² 'Yina ti yiyeyi pet siojo injlojwanik poli jlele siojo tomik'i japo najape ti ti'wosojyi'n ji'woso' ilie'en pet, sekyi'i ijliena kajnewita'm jikiowe'e ja kilie' ja jiwet'ia, siujlieja we'la kia'iyojliyi, siojowa katese'l kia'iyojliyi. Jak je iyoyiji siunie jloma je itioyi'i, 'najata jla'am ajnatiok ti yi' ape'e 'ni ajnat.

¹³ Siuti itiej atatayi'iji 'nijiye, ape'yayeyi siojo ajwejnas jikie' wuj, ti ijwi'ya jikiowik'i ja poli, jla'lap ijiok'i'ni, ti iyo'ate: —¡P'ijliusisie'itie napo i'nio' napo yi' ape'e 'ni ajnat, kajeyepa ti jiwet'ia japoye ka pesiejatajanie'e siunapo ijia injlojwajnas poli jlele najape ka ilanta niwa ji'woso'l!