Apocalipsis 7 - Sinia' Jlamtis 1994

Siupapo ciento cuarenta y cuatro mil (144.000) i'nio' ti 'yakajats'i

¹ Jlampa yama pet 'niji kiaka, 'yina a'wena japo ijniujlits'i injlojwajnas poli jlele ti takasitk'i, ijwienjli ja t'as 'niji iniwuki, jikiecha 'neje ja t'as 'niji wikinaja, jikiecha ja t'as 'niji taj'le ni kilie', siojo kiecha t'as pet 'niji ijiojwi ni kilie'. Japokap'an ti je iwi'injli kiu' nak jlajwutiok ka inajwuti wikie'eyi ni nojwa'm siuniwa taj'le'yi ti yejwutits'i, ka inetiajnate'n 'ni ajnat siu'neje ni i'niat lajlik'i siu'neje niwa a'la'.

² Sekyi'i a'we'en 'neje ja injlojwanik jikiecha ti tal 'niji yi'i ni taj'le ni kilie' ti itiu'un ni siujlie'e wikinie tikienaja'ni pa ti tiwok jijwukisa', ti tajle pa Sinia' ti laj jlaja. 'Yina jaka 'neje ti ijliuyi'ni japoka ijia injlojwajnas poli jlele siojopo ti tijliukieje ka iwo jiwet'iaye 'ni ajnat siu'neje ni i'niat lajlik'i, ti iyo'ate:

³ —¡Ejlo'o kiu', ke k'iejliyeyi kiu' paka wonayi 'ni ajnat siu'neje ni i'niat lajlik'i siu'neje niwa a'la' siuti je atemajliyi'iji ka iyok jijwukisie'e napoka Sinia' jikawos ka yina'ak'i niwa jitiokiots'i'l!

⁴ Ape'yayeyi siojo nojwa'm siupapo 'yakajats'i, ciento cuarenta y cuatro mil (144.000) ti wikie'eyi ti tiwoma wita'm siunapo tajla'm siunapo Israel jika kia'lis ti 'lo'weje'n.

⁵ 'Yina doce mil siunapo i'nio' tajla'm pet siunapo Judá jika kia'lis ti 'yakajats'i, doce mil siunapo tajla'm pet siunapo Rubén jika kia'lis, doce mil siunapo tajla'm pet siunapo Gad jika kia'lis,

⁶ Jlampet siunapo tajla'm pet siunapo Aser jika kia'lis kia'iyo doce mil. Jlampet siunapo tajla'm napo Neftalí jika kia'lis kia'iyo doce mil. Siunapo tajla'm pet napo Manasés jika kia'lis kia'iyojliyi doce mil.

⁷ Jlampet siunapo tajla'm napo Simeón jika kia'lis kia'iyo doce mil ni nojwa'm, 'yina siunapo tajla'm pet napo Leví jika kia'lis ni nojwa'm kia'iyojliyi doce mil. Siunie nojwa'm pet napoka tajla'm napo Isacar jika kia'lis kia'iyo doce mil.

⁸ Jlampet siunapo tajla'm pet napo Zabulón jika kia'lis doce mil. Siunapo tajla'm pet napo José jika kia'lis kia'iyojliyi ni nojwa'm doce mil, 'yina jlampet napo tajla'm napo Benjamín jika kia'lis kia'iyo doce mil.

'Lojwe siupapo i'nio' ti ji'wuye lemi

⁹ Yam pet 'niji kiaka, ti a'yenayi, a'wena napo ¡ok! ti tajlits'i wikie'eyi niwa ajnatis, i'nio' siunapo jloniye 'wenayiji siunapo ji'lija 'wenayi. Takasitk'i ts'e yi' jlajak in'wet ti anechiyas ji'wet, jitieyi'i 'neje jaka 'wolepo 'woma, je titieyeje ka tetitina kajeyepa 'loj. Lemiyeyi ape'e 'yina ti jawaka jla'am ji'wuye, 'yina wisiuk jik'ase'l inijwankitisiamk'i.

¹⁰ Kijlamiyeja'm ti iyo'ate: “¡Siunie Sinia' ti yijijyi'n siojona ji'wet ti jla'am ti anechiyas, siu'neje na 'wolepo 'woma, ti napoka ti tajle jana injwajieti!”

¹¹ 'Yina wikie'eyi siojopo injlojwajnas poli jlele takasitk'i ti nojwisiap siujlieja ji'wet ni anechiyas, siu'neje japo i'nio' ti jwajla'a iyots'i'ni, siu'neje jawa ijniujlits'i pini' Sinia' jilisajna' jitiete 'lo'weje'n. Sekyi'i japo ajwel'ni injlojwajnas poli jlele sek t'akosjlete'l itiyeyisi'iji'n ajnat'e yi'i jlajak anechiyas ji'wet ti iyunitis,

¹² ti iyoyists'i 'ate: “¡Amén! ¡Jayunitie 'ni Sinia', jayok lajaye ti jla'am ti 'yije'en, jayunitie ni jijweye iyo, jla'yi ti je ijlie'en paka k'iejliyeyi ti 'yijene pi iyone! ¡Jayunitie ti ijiat ti kasp'elisijne'n, 'yina jajnok'i'ni ti kiak ja tiwonaja! ¡Amén!”

¹³ 'Yina ijwienjli'ne siojo si'yase'n siojopo i'nio' ti jwajla'a iyots'i'ni, ti iyo'ate: —¿Ten 'napoka 'napo ji'wuye lemi? ¿Tepa tajli?

¹⁴ Akiujlie'ne pet ti awo'ate: —T'eyi, 'ni ika anechiyas, a'm ti 'najane. Ijwilk'im'ne ti iyo'ate: —'Napoka siu'napo ti tijwajyi siukia ti ijiat ti a'tiek'i jijliak'ali, siu'neje ti pajk'i ti ilij niwa ji'wuye ti iyoyisi jika kieye siunie ti ilimijietis naka 'wolepo 'woma ji'woyis.

¹⁵ “It'imina ti tejeyets'i janak ji'wet ni Sinia' ti anechiyas, 'yina niwa ajnajas, niwa jlomas ti isimk'iji'n yi'i jana Sinia' ji'wuk. 'Yina siunie yiji'n ti yi'iji'n jana ji'wet, naka Sinia', naka ti yijap siu'neje ti jan'yena.

¹⁶ Jika nel'lia ja ke inopej'ne, ja lajak'i'ne pa siunie ti jika na'la iniope'ni, siunie akat kia'iyojliyi ja ke ilajnen'ne, siunie kilie' jla'al ja lajak'i'ne paka wone.

¹⁷ Lapakawo siunie 'wolepo 'woma ti yi' kiowe'e siojona 'es ji'wet ni anechiyas jan'yejnap jiwek siunie ti i'yena niwa sontas, janajnin'ni k'iye ti jajnoyiji niwaka i'niatis isisits'i ti tajla'm niwa tikijnakiyis, ti iyo 'wasankiyeja', 'yina Sinia' jitiet t'e' inlejak'ina'a.”