Apocalipsis 5 - Sinia' Jlamtis 1994

Siupa 'wolepo 'woma tiwenaja'm siupa imp'esinik takapajlatak'i

¹ Sekyi'i a'wene jak siojo i'nio' yi'iji'n jlajak in'wet, ji'wet 'ni anechiyas, ti isi'me siu'nie imp'esinik ti takapajlatak'i itiujmat 'niji jijweyeje. Po' jawa inamtis yiji, 'yina po'neje jawa yi' siu'nie tomi kisie'e. 'Yina je lajk'i 'niwa ijwienjli sikio' itij'we times tom'niji 'yit'i ape'e jak imp'esinik jawak inamtis ti tip'ona ape'e siuniwa ti it'imina ti je 'esiji ka ilajna'm pa.

² A'wen 'neje ja injlojwanik poli jlele ti wuj ti jijweye po', 'yina siunie jla'lap jwesiejayik'i'ni ti taka'yasan'ni, ti iyo'ate: —¿Tepa yi'i siupa 'yu'we jla'm ka ila'nik'i siuniwa ti 'yit'i ape'e 'ni siu'nie imp'esinik, sekjane'yi ka ilanajamna'a?

³ Tiwet'ianaja ka poye paka ka ine' poliyi, ni'ne ka ine'yi 'ni ajnat, ni'ne ka ine' ajnat kiajwe, ka 'no'we ka ilajna'm, ni'ne kan'yejne'n jiwek.

⁴ 'Yina ti ya'am je pa ts'esiek'i, ti ap, lapakawo ti je a'we'en ka ne'yi pa ka 'no'we ka 'najlinitia'm jak imp'esinik siu'neje kanjweyi ka in'ye'en siupuwa yiji.

⁵ 'Yina ijwienjli'ne ja siojopo i'nio' jwajla'a iyots'i'ni ijliuk'i'm ti iyonk'i 'ate: —Leyi ti jlap'ni. 'Ye'en, siunie i'nio' jle' iyo'ate “K'iwajla siunie tajla'm napok Judá jika kia'lis”, siu'neje na David jlas 'neje ni siunie tomi pijia'm. Jla'am pajk'i ti itietek'i isia'm siunapo jitiejiejwas, 'yina naka ti 'yu'we jla'm ka ila'nik'i niwa ijwienjli sikio' itij'we times tom'niji ti 'yit'i ape'e ni imp'esinik siu'neje ti ja inlajna'm.

⁶ Sekyi'i ti a'wenayi ja 'wolepo 'woma takasiti'n jikiowe'e siojowa ji'wetis napo anechiyasas, siu'neje jawa ijniujlits'i pini' Sinia' jilisajna' jitiete 'loj, siu'neje japo i'nio' jwajla'a iyots'i'ni, 'wanjliyi ti iyo ti tiliana. Ijwienjli sikio' itij'we times tom'niji jawa jik'iulis, kia'iyojliyi jawa jitiete 'nak nojwaja'm 'neje, jawaka siojopo ijwienjli sikio' itij'we times tom'niji Sinia' jikimet ti 'es ti ijliu'we 'ni ajnat.

⁷ Sekyi'i jaka siojo 'wolepo 'woma yamayi siojo imp'esinik takapajlatak'i'ni ti yi' kiojyi siojo yi'iji'n jlajak in'wet anechiyas ji'wet.

⁸ Jak je iyoyi siojowa pini' Sinia' jilisajna' ijniujlits'i ti jitiete 'loj, siu'neje japo veinticuatro i'nio' jwajla'a iyots'i'ni, ti i'winayisi ti isime, sekyi'i ti t'akosjlete'l itiyejayisiji'n pet ajnat'e ts'e jitieyi'i jak 'wolepo 'woma. 'Yina ijwienjlijamk'i siojowa ji'woso'l siojowa t'aka'l 'lojk'iji'n a'lenta kias ji'wole, siu'neje jawa inat jijwa'al ti wikinie maja ti 'najli, ti tipoyijk'i ti tisiayejamk'i siunie jini inkajk'i jle' iyo'ate incienso, 'yina jawak itiunisin'ni jikiojyi 'niwaka siuniwa t'ajlayejes siunapo Sinia' jilis.

⁹ 'Yina yilisisk'i siu'nie inka'le ink'ie' ti iyo'ate: “Jla'am je jiwo ti jiki'me ni siunie imp'esinik ti takapajlatak'i, 'yina ti 'yu'wa'm a'm, siu'neje na ti jilie'nik'i siuniwa t'etiejek'i ape'e ti inamtis yi'i ti it'imina ti je 'esiji paka inlajna'm paka i'nio' jiniliakie. Lapakawo ti pajk'i ni siunie tiwona'aja ti inlana, siu'neje ni a'woyis ti tisa'ni, ti jikat'ini ape'e ti jleki napo i'nio' ti tajlits'i wikie'eyi niwa ajnatis, siuniwa wus siu'neje niwa je wus, i'nio' ti inijle'en niwa jloniye iyo, siu'neje niwa ji'lija iyo, 'nakayi ti jawo pet Sinia' jilisa'.

¹⁰ 'Yina jiwojwa'n anechiyasisa', siu'neje ti jiwojwa'n Sinia' jika pa'yijisa', siu'neje ti jlekiajle ti jijniejiet'e ni ajnat.”

¹¹ Jlampa yama'niji kiaka, sekyi'i ti a'yena'aja pijia'm. Ape'yayi ni jla'lap iyo japo injlojwajnas poli jlele ti 'loj ti je titieyeje ka tetinak'i, 'yina yikiajlasiapen'ni siujlieja anechiyas ji'wet, siu'neje jawa pini' Sinia' jilisajna' jitiete 'lo'weje'n, siu'neje japo i'nio' jwajla'a iyots'i'ni,

¹² jla'lap jwesiejayik'i'ni ti iyoyits'i 'ate: “¡Siu'nie 'wolepo 'woma ti titimaja ti tiliana, 'nak jla'm ijiate ti 'yu'we ka tiwunitie. 'Yina ti ijiate ti jijweye po', siu'neje ni ijios niwa jikijmatis, siu'neje ni t'ajankijnieye iyo, siu'neje ti je ijlie'en paka k'iejliyeyi pa. 'Esiet'itie ti kiak tiwonaja ti tiwok lajaye, siu'neje ti tiwunitie!”

¹³ Je nakata, siu'neje ti ape'ya siuniwa Sinia' jilisajna' yiji pet ni poli, siu'neje niwa yi' ape'e 'ni ajnat, siu'neje niwa yi' ajnat kiajwe, siu'neje niwa yiji pet ni i'niat lajlik'i, ti iyoyits'i 'ate: “¡Siunie yijyi'n siojona anechiyas ji'wet, siu'neje na 'wolepo 'woma, napoka ti 'yu'we ka tiwok lajaye, siu'neje ka tiwunitie, 'yina jajnok'i'ni ti ja kiak tiwonaja!”

¹⁴ 'Yina iyoyis pet 'ate siojowa ijniujlits'i pini' Sinia' jilisajna' ti jitiete 'lo'weje'n ti isiujlisie: —¡Amén! Jlampet siojopo i'nio' ti jwajla iyoyits'i'ni t'akosjlete'l itiyejayisijik'iji'n ti ijiunitis.