Apocalipsis 3 - Sinia' Jlamtis 1994

Sijwajieti ji'lij ti itiejiete papo Sinia' jilis yiji japa Sardis

¹ 'Yina iyo'neje 'ate: —'Ete'e kiu'ujwe siu'nie ti jajloyi siunie jijliujwanik siunapo Sinia' jilis yits'e yi' jana Sardis: “Iyo'ate siunie ti yi' jikiojyi napoka ijwienjli sikio' itij'we times tom'niji Sinia' jikimet ti 'es, siu'neje niwa ijwienjli sikio' itij'we times tom'niji katese'l siuniwa yi' poliyi. Wikie'eyi siuniwa jiwoyi ti ts'ajane pi awone, 'yina 'wanjliyi ka e'e ijnok'i'ni ti injwela ka ayel 'wanjliyeje, 'yina jlampet ti ya'am ts'ajane pi awone ti i'na'al.

² Siuniwa jiwoyi jitieyi'i ni Inia' je ijniul wita'm ka ijiatayi ka 'esie. Jak je iyoyiji ti awo'naja 'ate, ká ama'a, 'yina ekiajle kiu'ujwe ka wo jweyeja' siuniwa 'wanjle'e, ti je pa itioyetajak'iye ti jota ka inetia'n.

³ Ataj wunitie siunie inka'neyasajnaye tiwena'ampe pet, 'yina wo ajosik ink'ieye. Jlampet ti ja ká aleyi ti jama'ni, ti ja ke atejnisi'n its'ioye, jayo'ate ni kajlajnata ti jasiowa'la ti jayik'ia.

⁴ “'Yina po' jiwek siunapo 'nak nojwaja'm ti jleyejyi jana Sardis ti je i'wi'in siuniwa ji'wuye ka t'ojliyeje'n. Napoka ti jant'asisi ijyik'i siunapo ti lemi ni ji'wuye, lapakawo ti jla'am je iniwonisi jiwek, 'yina 'yu'we ti kia'iyo.

⁵ 'Yina 'wena ja ke iwo napoka siunapo ti t'ank'i pijia'm ti itietek'i isia'm siupa teje'yi ilia'm, siuniwa ji'wuye kiak jawo ja lemiye, ja ke 'yojmatk'i 'neje siuniwa jleyis ti yi'i nak imp'esinik, siunie t'etaja'a'ni ni jle' napoka ti ji'wasankiye laj jlaja po'. Jak je iyoyiji ts'iji jitieyi'i ni Inia', jitieyi'i 'neje niwa jijliujwajnas poli jlele, ka iyoyena'a 'ate, 'Nak sikiecha 'neje.

⁶ “¡Siunie jik'iot tiojwa'l po' k'iuyi siunie iyo janak Sinia' jikimet ti 'es ti ijwijla'm napoka Sinia' jilis!”

Sijwajieti ji'lij ti itiejiete papo Sinia' jilis yiji japa Filadelfia

⁷ 'Yina iyo'ne 'ate: —'Ete'e kiu'ujwe siu'nie ti jajloyi siunie jijliujwanik napok Sinia' jilis yiji jana Filadelfia: “Iyo'ni siu'nie Sinia' 'yotat, siu'neje ti nak yiyi siojona anechiyas David jika 'wuk kiwet jikie'e. Ni siunie etie jla'm ka 'najlinitia'm ja lajak'ipa ka imp'ojna'm, siu'neje ti jlama ka imp'ojna'm kiak jawo ja lajak'ipa ka 'najlinitia'm.

⁸ Ts'ajane pi awone wikie'eyi siuniwa jiwoyi. 'Yejne'n, atayiji siunie 'wuk kiwet 'ajlinitia'm ta'a ak'ioye, 'yina ti ja lajak'ipa ka imp'ojna'm ak'ioye. 'Wanjliyi je kat'ajataja ka ajweye poye, 'yina je wojliyi wek ti jiwoyi niwa yamtis, siu'neje ti je jinikakiu ti intant'iejek'i.

⁹ Jayikiaj'l akiojyi napoka napo jilis pet ni sitiejiejwa imosik, siunapo sintijyis ti injwelis napok Judíojos jlam'ne jla'm iyo, 'nakayi ti t'akosjlete'l janteyiji'n akiajwe, siu'neje ti ja'najanisi pa jawonisi ti emi'n.

¹⁰ 'Yina siuti jik'iuk'i'm siunie awo ka woyi, siu'neje ti je liyi, nak jant'emina pet ti ja'ye'na'm ka inetiejenie'e siojona jloma siunie ti ja wujwa ti ja a'tiejak'i ape'e 'ni ajnat ti jajnejlit napo i'nio'.

¹¹ “Ja ke pajayi wat 'yina ka'nisana'a. Lesaniji siojona tena pet akiojyi, 'lojwinie'e ka poye paka intal 'niji ka ijnala akiojyi janak a'wajiete siojona tena'ni jletik'i siunie i'nio' je titieyeje'ni ti tiliaki'n.

¹² Siunie i'nio' itiete isia'm ni teje'yi ilia'm, 'yina nak jayo pet Inia' ji'wuk ji'wukijieteye'; etiejna'aja ka ine'yik'i, ja ke paja ka titiajlina ni yi'i. Sekjane'yi ka ip'isina'ajk'ina'a ti jayi'ne ni jle' ni Inia', siu'neje ni jle' janak Inia' ji'wet siojona jle' iyo'ate Jerusalén ink'ie', ti ja ke 'wenaye paka jantajle naka ni Inia' pet ti yi' poliyi. 'Yina kiak jayo'ojyi pet siunie yi' ti ink'ie' jayi'nik'iji pet.

¹³ “¡Siunie jik'iot tiojwa'l po', k'iuyi siunie Sinia' jikimet ti 'es iyone napo Sinia' jilis!”

Sijwajieti ji'lij ti itiejiete papo Sinia' jilis ti yiji japa Laodicea

¹⁴ Jla'm iyojli 'ate: —'Ete'e kiu'ujwe siunie ti jajloyi ni jijliujwanik napo Sinia' jilis yi'i jana isi' Laodicea: “Iyo naka ni siunie ti 'yakajanit ti jlam je iyo ni siunie iyo ni Sinia', siunie Sinia' jikawo ti inka'niyewo ti je tiwonaja, naka 'neje ni siunie ti ijiatk'i, jitis 'neje wikie'eyi siuniwa Sinia' jilisajna'.

¹⁵ Wikie'eyi siuniwa jiwoyi ts'ajane pi awone, siuti a'am je intechaja', jla'yi ti je inkio'yojwi'. '¡Estieje ka ijiatayi ka intechaja', ni'neje ka inkio'yojwi'!

¹⁶ 'Yina siuti inkipijyi', je intechaja', je inkio'yojwi', jak je iyoyiji ti ekial kisie'e ti akoyi, ajwel ti a'am.

¹⁷ Jlampet siuti jiwo'ate, “Ts'ajkaje, lajk'ipa ka isitiane”, 'yina nak je 'najane pet paka wone ti ijiat ti jwajla'a je 'we'n, laj ajaye, imp'elisie, ti je 'wejne'n siu'neje ti i'najleje'n.

¹⁸ Tempi it'imina ti kiak awo'naja ti ajwe'la'm, ti awo'ate, Mayi siu'nie yik'i wikinie maja ti 'najli ti tajla'm ni jwat ti tilisanaja, ja 'nakayeyi ti ja ijiatak'i ti jwajla'a ja'we'en. 'Yina mayi 'neje siu'niwa lotakijnies lemi ti yik'i, 'nakayi ti japoye pa jap'one atepe'e, kajeyepa wuj ti ts'ajwej'la ti i'najleje'n. Sek jane'yi ka akieyijna'a siu'nie inkakie' yik'i, ti jatojnata'm niwa atate, sekjane'yi ka 'esieyijinie'e ka 'yen kisie'e.

¹⁹ “Awo jlosikisie' siu'neje ti isio' e'ne wikie'eyi siunapo ti ts'amaja. 'Yina siuti kia'iyo jwajla'aja pakawo, wo ajosik ink'ieye.

²⁰ 'Ye'en, a 'ne 'wuk kiwet'e ti ak'iutieje'ni ka poye pa ka i'ye'n ijyilia'm. I'nio' ni jampe'yak'i, 'yina ja 'najlinitiena'a its'ioye, sekjane'yi ka 'yuyeyinie'e, 'yina ka sijwanayijna'a ti ja'yekiunieje'n.

²¹ Siunie i'nio' ti jantate isia'm ni jitiejiejwa, jawijna'm pet siunie ti janejyi'n ijiap siunie i'wit ti awo anechiyasa', iyo'ate awo ti atate isia'm siunie ata ilia'm, 'yina ayejen 'niji ti ajiap ni Inia' ti yi'iji'n jana ji'wet ti anechiyas.

²² “¡Siunie jik'iot tiojwa'l po', k'iuyi siunie Sinia' jikimet ti 'es iyone napo Sinia' jilis ti ijwijla'm!”