Apocalipsis 18 - Sinia' Jlamtis 1994

Babilonia netia'n

¹ Yam'niji kiaka, sekyi'i ti a'wenaja ja injlojwanik poli jlele kiecha na'm isia'm ti tal poliyi, jijweye jinia' ti na'am, siu'neje ja jla'al kia'iyojliyi, jak je iyoyiji siojo jla'al itijwi'n ape'e 'ni ajnat.

² 'Yina jla'lap ji'yusie ijiok'i'ni ti pesieje ti iyo'ate: “¡Netia'n, netia'n jakiak Babilonia, isi' ti wuj! ¡Iyoye imose'l ji'weta', ajwejnas siuniwa ijiate jla'am ti imose'l iyo jlopisieje', kia'iyojliyi siuniwa pini' 'lan jlele, ti jwesis siu'neje ti je isis, iyo jijwalaje'!

³ Naka ti ijiume wikie'eyi napo i'nio' yijits'i niwa ajnatis ni siunie jloski'la ti iyoyi; 'yina siunapo anechiyasas yi' ape'e 'ni ajnat iniuyeyisieje siunie jloski'la ti iyoyi, sekyi'i 'yuyisi'ni'ne. Jak je iyoyiji siunapo inak jiwos ti yi' ape'e 'ni ajnat inkasaje ka lajak'i ti jla'am siunie iyo ti je ilisaniji siunie i'winta'ni ti je inilesaniji.”

⁴ Sekyi'i ape'yayeyi'ijyi pi jla'lap pi tom poliyi ti iyo'ate: “Asa'am ti ika kia'lits'ase'm pet, tajlajia'm janak isi', 'nakayi ti ja ke anoyeyeje siunie jike' ti iyoyi, siu'neje ti aslaye ja ke inoyeyi wita'm ka kia'iwotajanie'e ka netiejenie'e ni ja jiwet'ia jawoyi.

⁵ 'Yina jla'am ijiosjli'yik'i niwa jikeyis 'yina yama poliyi; Sinia' je paj ka inkiwaliyi'i siuniwa ti ijiate ti je isis ti iyoyisi.

⁶ ¡Siunie ti jawenajia'm jnojlietak'i siunie iyone ti iwijna'm napo ijia! ¡Tojmatayi kiu'ujwe ape'e siojona ti ja enajyi siunie iyoyi! ¡Jlejnatayi siunie at'es ti a'tieje ti ja sayijia'm k'iye jana jlat jiwe, kajmatayi wat ape'e siunie iyone napo ijia ti iwijna'm ti i'yayijni!

⁷ ¡Wenajia'm ni siunie jijliak'ali siu'neje ni ka inilayiti jnojlietak'i ni siunie iyo ti jiwunitieye po' siunie iyo ti iniwunit, siu'neje ni iyo ti pa itiliaja ka iwo pak iyoyeyi! Kajeyepa ti siunie jikiowe iyone iyo'ate, “Siu'nie a'yijin'ni, lapakawo ti anechiyaskik'i'm, je askiliekik'i'm, laj ijliak'aliye.”

⁸ 'Yina siuti jitienkiujnieye kiak iyone, jak je iyoyiji ti kiak jawo ti jloma jajwanjliji wek jana jantejwik'i ti janejyi ni siunie jawo ni jiwet'iaye, siunie ti jawo masaja, jijliak'ali, siu'neje ni nel'lia, 'yina jwat ja tiwunieja'm. Ka je iwo pa ti jijweye po' ni siunie Sinia', ti Saka'niona, ti naka jla'am ti isie'e.”

⁹ 'Yina siunapo anechiyasas yi' ape'e 'ni ajnat, siunapo ti ininekiajlisi ti iyoyi siunie jloski'la, siu'neje ni iyo ti je ilisaniji siunie jikimet yiyi, ja wojoyeyija'm ti janapisk'i, jla'yi ti ja ke injweyijits'i ka kia' iwo inwentajasi ni tosie ti tajle siunie jwat jantojwa'm.

¹⁰ Siusie ja k'iejliyeyiji ti jankasitk'i jiwek ti ja ke injweyisi siunie jawo ti ja tisiejek'i, ka woyeyisna'a 'ate: “¡P'ijliusie, imp'elisie Babilonia, isi' ti wuj, isi' ti jijweye pope! ¡Ijiat ti je pajk'iyeyi siunie tiwona'a ti tisiejek'ia'm!”

¹¹ Jlampet siunapo inak jiwos yi' ape'e 'ni ajnat kiak jawo kanapajayijamna'a ti jan'wenis siunie jiwet'ia jawoyi janaka isi'. Ja ke jlasiye siunie jawoyisi lapakawo ti jantankiunisk'i kajeyepa ti ja lajak'i'ne paka ink'iajwayisi

¹² ti iwinis'ni siunie wikinie maja ti 'najli, siu'neje ni wikiniet'aj, siuniwa 'nijyi'l ti sisajas ti laja po' ti isis; siuniwa lotakijnies ti isis jle' iyo'ate lino, siu'neje ni seda, siu'neje niwa lasa'ni wat ape'e, siu'neje na isiat; siu'neje niwa a'la' ti jini inkajk'i; siu'neje niwa k'iejliyi ti titiajlajaja'm naka marfil, siu'neje niwa a'la' ti ijiat ti laja po', siu'neje niwa ti titiajlajaja'm ni wikinie maja ti t'onk'i, siu'neje ni wikinie, siu'neje niwa ti titiajlajaja'm ni mármol;

¹³ siu'neje niwa wask'i'nelaja ti jini inkajk'i, siuniwa canela, siuniwa incienso, siunie mirra, siunie ti tini'nelinaja'ni jini inkajk'i; siu'neje ni at'es, siunie impe', siu'neje ni niwakiwamak siunie 'es, siu'neje ni ipiatatiok t'ejes 'wanjle'e; siu'neje niwa inlajwas ti inkijmaye wos, siu'neje niwa 'wolepo', siuniwa a'lentas siu'neje niwa kaletajas, siu'neje napo inkipijnas ti iwinis'ni jlam'ne i'niolata.

¹⁴ 'Yina siunapo inak jiwos ka kiak iwonayisinie'e 'ate janaka isi': “¡Siuniwa k'iejliyik'i akas ti ijiat ti akas'nipe, lajk'i puwa ka ine'ya! ¡Jinitiajnat ti jinitiajnat siukiwa iyopi kiwa akijmatis ti isis, siu'neje ti jiwoyipi ti in'wasanjli kiu'ujwe ti ijiate ti i'nes, ja ke pajna'a ka ekiajle'e ka api pijia'm!”

¹⁵ Jlampet siunapo ti jwajla'a i'wine jakiak isi' siusie ja k'iejliyeyiji ni jankasitisijyi'n, lapakawo ti ja ke injweyisi siunie jiwet'ia jawo ti ja tisiejek'i, janapajanna'a ti jitiej janenisi 'ate,

¹⁶ ka iwoyeyisna'a 'ate: “¡P'ijliusie, p'ijliusie jakia isi' wuj! Ti jla'am ti 'yiniyipe siojona asejnia ti ji'wuye siuniwa lotakijnies ti isiat siu'neje ni lasa'ni wat ape'e, siuniwa lotakijnies ti je niliaja, jikijmatis ti isis niwaka sisajas ti isis ti laja po' siu'neje jana wikinie maja ti 'najli.

¹⁷ ¡Je jlomas jiwek puwa ka inejyi ti no'we kiwa i'wi'in ti jwajla'a i'wi'in! 'Yina wikie'eyi siunapo i'nio' i'yena niwaka kasejkanayis ti wus, siu'neje napo i'nio' yikiajlen'ni jikiusk'i niwa isi'il ti iniuyisk'i ni i'niat lajlik'i, siu'neje napo kasejkanawos, wikie'eyi 'neje napo ti isisi pet naka i'niat lajlik'i ti isimk'iji'n, siusie k'iejliyiji ti takasitk'i.

¹⁸ 'Yina i'winayisi ki tosie ti tajle ki isi' ti jwat itiujwa'm, kijlamiyeyisija'm ti iyo'ate: —¿Tejnapa isi' kiechaye ka kia'awo 'ate iyo jakiak isi' wuj?

¹⁹ Sekyi'i ajnat ijiosayis'ni jitipe'e, ti yapaja'm ti inip'elisijne'n, 'yina iyoyeyits'i 'ate: “¡P'ijliusie, p'ijliusie jakia isi' wuj, isi' ti 'esi wikie'eyi napo i'nio' ti jika kasejkanayis po' ti isimk'iji'n ti yiji naka i'niat lajlik'i, it'imina ti jwajla'a i'winisi! ¡Jlam nesi'lieyi ti netia'n!”

²⁰ ¡Siuti a'm poli, peni'yi ti netia'n jakiak isi'! ¡Siupet ti asa'am ti Sinia' jika kia'lits'ase'm, kiak jawoyeyi inkasajyi'n pet, siunapo injlojwajnas, siunapo Sinia' jijwejlanawos, kajeyepa ti siuti Sinia' kiak iyone isie'e, 'yina yijni pet ask'ioye siukia iyo'nasepi!

²¹ 'Yina po' ja injlojwanik poli jlele ti ijiat ti jijweye po' sekyi'i isima kiajwe jlaja sisaj ti iyo'ate jana wanjlek ti wuj, sekyi'i ti itietayija'm ni i'niat lajlik'i, ti iyo'ate: “¡Babilonia ti a'm ti isi'il jlet'a'm, siojokia sisaj ti atate, kiak jawoyi siuti Sinia' ja inetiajnat! Siunapo i'nio' je pajna'a ka in'wen'ni.

²² Siunapo i'nio' ti yijits'i niwa jika'wulis ti ilie'en niwa ji'woso'l, siunapo isi'me niwa t'aka 'lojk'iji'n, siu'neje napo ipiejwuts'i siuniwa sisej, siu'neje niwa wakiak'iu', kiak ja ke iwo'ni ka tipe'yaki'ni kanki'mik'i niwa ji'woso'l; kiak jawo siunapo jikijmayewos pi k'iejliyi pi jikijmaye iyo pit ti 'yijejne'n, ka kiak iwonie'e ka ti'wena'ni ka inkimk'iji'n, siu'neje ti ja ke tipe'yaki ka pesiejayi siojona wanjlek ka into'ma.

²³ Ka kia'iwo'nina'a ka 'nakaje japa katesa' ka ti'wenaja'ni kanla'na ti a'm; siu'neje ti tijwa'yiyetak'iji'n napo i'nio' ti kijlamiyija'm ti iyo jiliakijnieyeja' ti to'ma; kiak ja ke iwo'ni ka tipe'yaki'ni. 'Wanjliyi kiak iyoyetaja pit napoka inak jiwos yi' ape'e 'ni ajnat ti jwajla'a iyoyetajats'i'ni pet, 'yina je wojliyi ti jiliaki 'yina ti jika'm ape'e, kajeyepa ti aye'wukia'm.”

²⁴ Siunapo Sinia' jijwejlanawos, siu'neje napo Sinia' jika kia'lis ji'woyis yiji janak isi', wikie'eyi 'neje siunapo ti kia'iyo yi' ape'e 'ni ajnat ti tilianaja'n.