Apocalipsis 16 - Sinia' Jlamtis 1994

Siuniwa 'yiniye niwa inat jijwa'al ti Sinia' jiwak yijits'i ti tisiajietak'iji'n

¹ 'Yina ape'yayeyi pi tamti ti tom kiajwe jlaja Sinia' ji'wuk jla'lap ijiok'i'ni ti iyo'ate ti ijliuye siojopo ijwienjli sikio' itij'we times tom'niji injlojwajnas poli jlele: —¡Maye'ni, saye'yi ape'e 'ni ajnat siunie Sinia' jiwak yijits'i niwa inat jijwa'al ti jan'wejnank'i!

² Sekyi'i yama ja injlojwanik poli jlele ti isia'yi ape'e 'ni ajnat siojo yiji jlaja inat jiwe. Jak je iyoyiji wikie'eyi siojopo pajk'i ti pinitiok iyo jijwukisie', siu'neje ti iyunitis ja jipe'el ti tewitanajak'i, jiwet'ia pope ti ji'wok lajk'ipa ka k'ieye, ijiat ti je 'esi.

³ Sekyi'i ti yama pet siojo injlojwanik poli jlele jikiecha ti timesie siojowa itime ti isia'ni siojowa yijits'i jawa inat jijwa'al. Jak je iyoyi siuti itimayi ti isia'ni sekyi'i ja i'niat lajlik'i inikajyina' ti iyo 'woyisa', iyo ni ji'woyis ni i'nio' ti inlanik, sekyi'i wikie'eyi siojowa jlele pet no'we ti 'yajle'n.

⁴ Jlampet siuti yama pet ja injlojwanik poli jlele jikiecha jlampe najapeja japo yam'ni ti isia'ni siojo yiji jlaja inat jiwe, ti isiajia'm niwa tewukis siu'neje niwa i'niatis ti jlam sek tajlik'i'ni isia'm jiwek, sekyi'i ti kia'iyoyeyi pit ti iyo 'woyisa'.

⁵ Ape'yayeyi ja injlojwanik poli jlele ti i'yena niwa i'niatis ti iyo'ate: “Sinia' ti i'nes, a'm ti impo' ta'a, jla'yi ti je t'iki ti a'm. A'm ti tijnajyi siunie jiwoyi ni asajkinaye ti a'tiejek'i.

⁶ Napo i'nio' isia'ni kia ji'woyis kiapo ales pet, siu'neje kiapo ajwejlanawos, 'yina 'nakayi ji'yayijni ni in'woyis napoka. ¡'Esiji lapakawo ti jla'am je wo siunie jiwone!”

⁷ Sekyi'i ti ape'yayeyi pa ina'lap ti tome jlaja altar ti iyo'ate: —Ijiate ni Ika'niona, Sinia' ti lajk'ipa ka ijnojliji, 'yina siunie sajkinaye iyoyi tijnajyi, siu'neje ti je kak'emisie'n.

⁸ Sekyi'i ti yiyeyi pit siojo injlojwanik jikiecha, jakayi ti ijniujliejets'i, jak isia'ne pet ape'e 'ni kilie' siojo yiji jlajak inat jiwe. 'Yina sekyi'i ti 'yakamayi ape'e siupa yit'i'yi'ni ti 'nesi, akat ijlianajayi isia'm, sekyi'i ti 'yoyejets'i napo i'nio'.

⁹ 'Yina wuj ti a'tiek'i siukia iyo ti 'yojwits'i. 'Yina ka kiakaye'etieje ka inwoyis jlosikis ink'iejyisa', ka pakaye 'neje wek ka inwunitis pi Sinia', 'wenajliyi siunie iyoyisi ti tak'ekiasane ni Sinia', ni siunie ti lajk'ipa ka ijnojliji, ti jla'am ti isia'yi ape'e niwaka ti jiwet'ia iyo.

¹⁰ Siojo injlojwanik poli jlele ti ijwienjli sikio' itijwa'a japo isiak'iji'n siojowa yijits'i jawa inat jijwa'al, ti isiaye pet ape'e siujlieja ji'wet pet siojo pinitiok ti iniwojwa'n anechiyasa', jak je iyoyiji pet siunapo isie pet ape'e ajnatiok yiye ape'e. 'Yina siuti ijiate ti a'tiek'i ki iyo, jak je iyoyiji ka je inokiejejamk'i niwa jipajnatis.

¹¹ 'Yina ka pakayeyi ka woyisi ka leyisk'i siuniwa jikeyis ti je isis, 'wenajliyi ti siuti kia'iyo ijiat ti t'a'ti iniope ti puwaka jla'am jiwet'ia iyo a'tiejayisiam'ni, sekyi'i ti ji'lij je 'esieyi ni Sinia' ti yi' poliyi.

¹² Jlampet siojo injlojwanik poli jlele jikiecha ti yiyeyi jlampa ijwienjliye ni sikio' itij'we ijwienjli ni to'm ape'e, japo isia'ni siojo inat jijwa'al ja yiji, ti isiajia'm jak tewuk ti je jlase' jle' iyo'ate Eufrates, 'yina 'yima'a. Jak je iyoyiji'ni siunapo anechiyasas siunapo tal 'niji taj'le 'ni kilie' i'yakana i'niat ji'wechaja.

¹³ A'we'en siojo talk'i ja ajliutietiok jikiwet, siu'neje ja pinitiok jikiwet, siu'neje ja tal jikiwitk'i ja injwejlanik jiwo ti je tal Siniayi, najape siojowa imose'l ti ijiate ti je isis, ti 'yiniye puwa injlesis.

¹⁴ 'Yina jawak imose'l i'nisatk'i puwa k'iejliyi ti iyo ka inesi'lietk'i napo i'nio'. Sekyi'i ti yamak'i'ni napo i'nio' anechiyasas ti ijiut wita'm ti yi' ape'e 'ni ajnat ti itiejiete wita'm ni Sinia' ti inilajne'n, ti lajk'ipa ka ijnojliji, siuti janeyi janaka jika jloma ti ijiate ti jwesieje.

¹⁵ (Saka'niona iyo'ate: —'Yejne'n, jayapimet jayo'ate iyo ni kajlajnata ti yisi'lietk'i napo i'nio' ti iyoyetaja ni jikajlajnaye. Jak je iyoyiji pet siunie je inikiwalinit, je jlase' pet siunie awone ti e'ne ni ikap'ijliuskiye ti 'es, siunie ti itime ti ilisank'i niwa ji'wuye ti ja'nots'iji'n, 'nakayi ti ja ke i'najleje'n, 'yina ja lajak'ina'a pa ka k'iejliyeyi ka t'ajwejli ineniji ka i'nistana'a.)

¹⁶ Siojo ajnat yi'i ti ijiut wita'm napo anechiyasas siojowa imose'l jle' iyo'ate Armagedón, Hebreo ji'lij.

¡Wakal!

¹⁷ Sekyi'i ti yiye pit siojo injlojwanik poli jlele tome jlaja ti jlampa ijwienjli sikio' itijwa'a times 'neje niwa tom'niji, isiaye pet isia'm siojo yiji jlajak inat jiwe, 'yina ts'e yi'i siujlieja Sinia' ji'wuk yi' poliyi siupa ina'lap ti pesieje tajla'm siujlieja in'wet siujlieja anechiyas ji'wet, ti iyo'ate ti pesieje: —¡Wakal!

¹⁸ Sekyi'i tak'ayejets'i, pesiejayi puwa ina'lapis, siu'neje ti isiumtiniejets'i. Sekyi'i ajnat ti'wesiye ti ijiat ti pansak'i, ti je kiak iyoyi paka ti'wena tajlap'e ti i'nio' k'iejli poye ape'e 'ni ajnat.

¹⁹ 'Yina jak je iyoyiji siujlieja isi' wuj, ti jle' Babilonia, its'isamk'i jijwa'al najape. Kia'iyo 'niji siupuwa isi'il yi' ape'e 'ni ajnat no'we ti yamk'i isia'm, 'yina Sinia' je isiwaliyi'i janaka isi' wuj Babilonia ti iyo kan'yayijni naka at'es ti nak jiwak ti ja wujwa.

²⁰ Jak je iyoyiji siuniwa ajnatis i'niat tijwajiape'n, siu'neje niwa tikijnakiyis netia'n.

²¹ Sekyi'i ti tisiayejayi ape'e napo i'nio' yi' ape'e 'ni ajnat jawa alatiu' ti wus, yi'i japa ijiatt'iyi ti 'yaka'm ape'e siuniwa ijia ti cuarenta kílojos. Sekyi'i napo jlam jwesisjliyi ni Sinia' yinayits'i siunie ji'lij jiniliak, 'yina ti kiwaka jla'am kiwa alatiu' ti itiajlatisie, kajeyepa ti ijiate ti a'tiek'i siukia jiwet'ia iyoyisi.